Khawzawl, the 8^th November, 2021:

Vawiin chawhma dar 10:00 khan Pu C.C. Lalchhuangkima, Deputy Commissioner, Khawzawl District chuan Govt. Khawzawl High School-ah Administrative Training Institute (ATI), Aizawl buatsaih Group B leh C hnathawkte tana Induction Training Programme (ITP) a hawng.

He hunah hian Khawzawl District Bawrhsap chuan thu sawiin, hmasawnna leh changkanna hrang hrang chak taka a kal reng avangin sawrkar hnathawkte chu intuaithar reng tur kan ni a, chumi tur chuan training neih fo a pawimawh hle a ni, a ti a. Training-a thil zirte chuan hnathawhna leh nitin nunphungah tangkaina engemawtak a nei thin tih a sawi. Khawzawla kalchilha training buatsaihtu ATI Aizawl chungah lawmthu sawiin, zawhna an neih ang angte inthlahrung hauh lova zawt thin tur leh, hlawkpui ngei tum chunga rilru inhawng taka training turin kalkhawmte a chah a ni. 

Induction Training Programme hawnna hun hi Pi Golda Dell Zohmangaihi, Core Faculty, ATI in kaihruaiin, Pu H. Lalramenga, SDC in lawmthu sawina hun a hmang a ni. 

ATI leh DC Office, Khawzawl tangkawpin a buatsaih Induction Training Programme hi Central sawrkar programme niin kar hnih awh tur a ni a. Sawrkar hnathawkten hlawk zawka hna an thawh theih nana soft skills zirtir chu a tum niin, ATI atanga faculty lo kal bakah Khawzawla Sawrkar Officer ten topic hrang hrangah zirtirna an pe thin dawn a ni. Classroom chhunga inzirtirna bakah field visit te neih thin a ni ang. Training-ah hian Khawzawl-a sawrkar department hrang hrang atangin Group B leh C hnathawk mi 35 (sawmthum leh panga) an tel dawn a ni. 

Written by H. Lalramenga, SDC, Khawzawl District