Zoram khawpui ber Aizawl a\anga 200km vel zet a hla Tuichangral tlangdunga awm Khawzawl District huam chhung khaw 28 zinga khaw pakhat, Sialhawkah i lo zin dawn a nih chuan i bangbo lutuk loh nan hengte hi i hriat hmasak atan ka han hrilh ang che.
Sialhawk hi chhuah chhawng khaw kuam deuh, a dung 2km leh a chanve, 1km vel a zau a ni a. A khaw \hut hmun hi Zo thengthaw nuam tak niin a chhunga mihring chengte pawh harh vang tak a ni. Chhiarpui hnuhnung ber (2011) a a lan danin Sialhawkah mihring 2279 chengin tun dinhmun (2021) -ah hian mihring 2491 (Mipa 1204 leh hmeichhia 1287) an cheng mek a. Chhungkua 487 an awm mek a ni.
Khaw chanchin leh indin chhoh dan : Sialhawk khua hi Sailo Lal ropui tak, Lallula
fapa Vuttaia nupui Neihpuithangi hovin Kum 1895-ah din a ni a. District khawpui ber Khawzawl a\anga chhim lam Tuichangral tlangdung 45km a hla a awm a ni. A khaw hming hi mizo phuah a ni lo va, Sialhawk ram khuaihnuai hmuna Hmarho an awm laiin khaw thar kaina tur an en a, chutilai chuan tuna Biak In kawtzawl ah hian Sial an lo tla a, an lo chen fai vek mai a, khaw thar kaina tur en tute chuan ‘E hei!! Sialin an lo hawk vek tawh a lawm, SIALHAWK a nih hi’ an ti a, Sialhawk tih hi a hming atan a pu hlen ta a ni. ‘Hawk’ tih hi Hmar \awng a ni a, ‘tichhia, tifai, chenphulh’ tihna a ni a, tichuan Sialhawk tih chu Sial chenphulh emaw Sial tihfai emaw tihna emaw a ni.
Lal leh an thlahte chanchin : Sialhawk hian lal 4 an nei tawh a, Sialhawk khaw dintu Neihpuithangi chu Lal hmasa ber a ni. Neihpuithangi hian kum 1895 a\angin kum 1913 chhung lal niin kum 1920-ah kum 105 mi niin a boral a ni.
Liankanglova hi Kairuma fapa a ni a, kum 1894-ah a pi Neihpuithangi ro relpui turin a pa Kairuma’n Khawlerh a\angin Sialhawkah a tir chho a. A nupui hming chu Thangpuilali a ni a, rorel \an tirh hian kum 18 mi a ni. Liankanglova hian kum 32 chhung ro a rel a. Sialhawka Kristianna lo luh lai hi Lal Liankanglova rorel lai a ni a, a dodal lo. A dodal loh avangin a khaw mipui ten an fak hle. Kum 1926-ah kum 50 mi niin Sialhawkah boral a ni.
Ngurliana hi Sialhawkah kum 1910-ah piang a, kum 16 mi a nihin a pa Liankanglova’n a boral san a, a pa boral a\ang hian ro a rel \an a ni. Kum 1925-ah Lower Primary a pass a, kum 1926ah ro a rel \an. A nupui hming chu Thuamkungi a ni. Lal Ngurliana hi zai ngaina mi a ni a, nula leh tlangvalte zai dan leh ‘aw’ hman dante a zirtir \hin a. Kut hnathawk ngaisang tak mai a ni a. A khua leh tuite entawn atan thingpui huan zau tak mai khaw mawngah kum 1934 khan a siam duai mai a ni. Lal fing leh them thiam a ni a, a taimain khawchhung rorel a duh uluk em em a, ram kang leh sa tla umahte hian tlan hmasa berah a \ang thei zel a. Chuvangin a Upaho leh mipuite pawhin an zuilo ngam \hin lo a ni. Khawchhung insak dan pawh a duh fel em em a, kawtthler te ngil takin a rem a, in sa reng reng en fel pui loh a nei ngai lo. Kum 1940-ah kum 40 mi niin a boral a ni.
Lalthima hi Liankanglova fa upa ber niin a pain Tlangpuiah a laltir a, Ngurliana boral
hnuah kum 1940-ah Sialhawkah a lal \an a. A nupui chu Laltinchhingi a ni. Lalthima hi Sialhawk lal hnuhnung ber a ni a, kum 1954 VC thlan thleng a lal a ni. Kum 1962-ah Aizawlah a pem a, chumi hnuah Kolasib-ah pem lehin hetah hian a boral ta a ni.
Pasal\hate leh an chanchin - Rualmura - Rualmura hi kum 1927-ah Sialhawk khuaah a lo piang a, a pa chu Chhunchungnunga niin a nu chu Zakungi a ni. Rualmura hi mi chak leh infiamna tuimi leh mi tlawmngai tak a ni a. a naupan tet a\angin nu leh pa zirtirna pawm mi a ni a, mi huat zawng sawi hlau tak, tlawmngai lo nih hlau reng reng a hun hmang mi a ni. Rualmura hi sapela ram vak tuimi a ni bawk. Vawi khat pawh Riangtlei leh Sialhawk inkar Riangtlei kawngah nghalchang sual deuh mai hi a awm a, an thlawhhma thlai chin tam tak tihchhiat a neih bakah an thlawhhma kal tur han dan chang a nei fo mai a. He nghalchang sual tak mai hi tihhlum theih dan tur khawtlang chuan an ngaihtuah ta a. Chutia mipuiin an zim chuan Riangtlei kai raifan lui ruamah an zim thla a, mihringin an tam hneh em avangin an hual bet a. Rualmura chuan chu sanghal chu umin a lu tak maiah a han vaw ta vak mai a. Thi ta mai lo chuan nghalchang chu Riangtlei kai leilawn hnuaiah chuan a tawm ta tlat mai a. Rualmura chu a letling zawnga inkhaiin sanghal tawm tlat mai chu a zuk chhun ta chiam mai a, a chhun hlum ta a, a len zawng an han teh chuan s<m sarih zet a lo ni nghe nghe a ni.
Vawi khat pawh Pi Thangheli (Manbawihi nu) chu fur khawchhiat laiin a ram kal chu a lo haw ta tlat lo mai a, ruah a sur tamin khua lah chu a thim nasa mai si a. A zan a zana zawng turin ruahpui vanawn leh khawthim karah chuan an chhuak ta a. Rualmura chuan au chung zawng zelin nakin deuhah chuan kawrh ruam chhengchhe tak karah pawnfen pakhat chu a han hmu ta a. Chuta \anga thlang deuhah chuan Pi Thangheli chu kham kar chhengchhe takah zawi vek a lo muin khawvawt chuan thi ang maiin a lo hmet chau hle a, Pi Thangheli hi tek den a nih ngei ring an awm a. Amah chauh chuan Rualmura hian kham chhengchhe tak karah paw bahl^tin in thlengin a hawnpui ta a ni.
Vawi khat pawh Aizawl AR Lammualah Lianhluma chak leh l^r tak nen inbuan tura
tihfel an ni tawh a, AR Lammualah chuan Zoram mipui inbuan en tur chuan an rawn pungkhawm nasa mai a. Rualmura chu kawr hlipin inbuan peih atin a awm tawh a, mahse Lianhluma chuan a duh leh ta tlat lo mai a. A buan duh leh loh chhan an zawh chuan “A inphelh ka en hian Sakei pian a ang em mai a, ka buan duh loh zawng tak a ni” a ti ta tawp mai a. Inbuan pawh en ta lo chua mipui an \in ta tawp mai a ni.
|um khat pawh Aizawlah inbuan chak intihsiak buatsaih a ni leh ta a. Rualmura pawh palaihawlah a chhuak ve a, lawmman pakhatna a la nghe nghe. Hemi \uma lawmman pahnihna dawngtu chu Rodinga tuna Champhai Vengsang-a awm khi a ni. Hemi \um hian zoram puma champion nih tumin eng anga lian pawh ni se buan a tum tlat a, mahse hotu lam ten paliana tel chu an remti lo a. Rualmura chuan hotute hnenah chuan “Paliana ka tel inphal lo a, palaihawla champion ka nih chuan palianah champion chu min buan tir thei angem?” tiin a zawt ta a, an ni chuan an phal thuin an chhang a. Chutia palaihawla a champion takah chuan palian inbuan chak chu a cho chho ta a. Palian chak inti leh champion ngei pawh chuan Rualmura chu a buan duh ta tlat lo mai a. Rualmura chuan a chakzia han tilang tur pawhin hun a nei ta lo chu hreawm a ti lehling hle a, lungawi takin palaihawla champion niin a haw ta a.
Mizoramah Mizo Union a lo din phat khan lal b^n a lo ni chho ta a. VC -te inthlan a lo ngai a, VC inthlan hmasa berah chuan VC atan thlan tlin a ni a, hemi \um hian VC naupang ber record a ni nghe nghe a, \um (term) hnih Sialhawk VCP-ah a\ang chho hial a ni. Sialhawk GSA President hmasa ber niin YMA Adviser hlun a ni bawk a. A tello chuan YMA hi a kal thei meuh lo an tih \hin pa tlawmngai leh khawhar hla hria; khuangpu hlun a ni a. Sialhawk Branch YMA pawhin vawi thum ngawt chawimawina a hlan tawh nghe nghe a ni.
Rualmura hi hmeithai leh pachhiate tana a tha leh zung sen nuam ti em em, mi tlawmngai leh khawtlangin a an thlamuanpui a ni. Mizoram Upa Pawl General Headquarters pawhin April ni 18, 2004-ah kawng chi hrang hranga teh a mi chungchuang bikte hnena a hlan \hin chawimawina sang Mizo Tangkapui, Vanapa Hall-ah a hlan tawh nghe nghe. He Tangkhapui hian Certificate leh Rs 5,000/-a keng tel bawk. Heti hun lai hian LPS Skylink leh Doordarshan-ah te Rualmura an kawmna hi an tichhuak nasa hle..
Rualmura hian fa 13, mipa 5 leh hmeichhia 8 a nei a. A fateah hian 9 la damin mipa pathum leh hmeichhe pakhat an boral tawh a, Rualmura hi march ni 4, 2017 khan kum 91 mi niin a boral a ni.
Indona/inbeihna hmun hmingthang :-
Pasal\ha Ralbilha Puk - Ralbilha Puk hi Sialhawk leh Biate inramrina bul Sialhawk ram lama awm a ni a. Khawzawl - E.Lungdar PWD Road a\anga hla lote a awm a ni. A awmna hi kawng chung kham bul biru tak mai a awm a ni. A zau viau a, a san lam erawh chu 5ft. vel, \hian zahokhat tan chuan inkulhna tham a ni. Mei chhem pawhin khawdang a\angin a lang thei vak lo a, ral bei tur ten chuan han tawm nan a remchang hle a ni. Biate leh Sialhawk inramrina lui Lungchang/Phawtun hnar Sialhawk ram lama awm a ni.
A hming put chhan chu kum 1880-1885 hun laiin Sailo Lal Vuta faten Pawi Lal Nikuala, Chawngtlaia awm chu \anrualpuiah an sawm a, Pawi Lalin Sailo Lal a \anrualpui tur chu Halkha pawi hovin Nikuala Chawngtlai lal chu thah tumin an pasal\ha huaisen Ralbilha hovin an rawn thawk chhuak a. Biateah an inkulh phawt a, chuta an awm lai chuan Nikuala chu an han hrilh a. Ralbilha ho chu Biate a\ang chuan an rawn chhuak a, he pukah hian an inkulh ta a. Chuta \ang chuan Ralbilha Puk tih hming a lo pu ta a ni.
Ralbilha ho chu Nikuala hote chuan (Tuna pawi thah kawn) an tih hmunah sawn an lo cheng a, an pasal\ha huaisen ber chuan kawnglaiah chhawl insawh hliahin silai kau sain a lo cheng a. A \hiante a hmalam kawngsir tuakah an awm bawk a, Ralbilha hote chu an lo kal ta ngei a, kawnglaia chhawl chu a hmasa ber chuan a han keu a, an pasal\ha chuan a han kap ta \huai a. An mahni zawn \heuh a mi an lo kap a, tleirawl pakhat a tlanchhe hman a an um a “I hming chhal rawh le” an ti a, “Keimah Ralbilhsihsinga” a ti a. Mahse Ralbilha tak chu a nih an ring lo va, a hmasa bera an kahhlum tak kha a nih an ring thung.
Sialhawka mi bikte :-
Vaichaka (Mi chak) - Sialhawk khaw chak ber nia sawi \hin chu Vaichaka a ni. A chak dan chu Zawlbuka mikhual lo kalte nen an inbuan te hian bawhtah chhuat te hi a kezungpui hian a phiat tawm tawk thei a ni. Tin, thlam chakte hi vawi khatah a pu zo vek mai \hin a, raw hmun a rua a sahte hian a hung ami a duhzawng a sahte hian hnuh thlak zawh loh a nei ngai lo va, a chung zawl leh zawl loh pawh a en thei vek a ni. A daikal pahte hian thing lukham turte hi a thliak a a pu haw zel mai a ni. Pathian thu a lo awi ta a, Kohhran upa atan an thlang a, Biak In saknaah pawh ban tur sei deuh mai pa hovin an zawn a, kawrh kamah an kal thei lo va, “Khawi maw, keiman ka pu mai ang” a ti a, kawrh kam awih lai zawng chu a pu ta mai a, hmun nuam chinah an zawn leh a. Mi chapo lo tak niin miin a chakzia an hriat hi a hlau hle a ni.
Hranghrima (Mi chak) - Inbuanah chuan Hranghrima hi chak hmingthang hmasa ber a ni. Kum 1929-ah Mizoram Bawrhsap G.G. Helme (Hem sap-in) Mizoram Lal zawng zawng a ko khawm a, an khaw chakte \heuh hruai turin a ti bawk a, Sialhawk Lal Ngurliana chuan a upa min ber chak bawk si Hranghrima chu a hruai a, lal 60 laiin an khaw chak an hruai hlawm a. Sipai lammualah Mizoram inbuan chak zawnna an nei ta a. Mahni tum an hneh loh chuan an tla zel a. Hranghrima chuan a tum hneh loh reng reng a nei lova, a tawpah (Final) Haubuanga Piler khua nen an inbuan a. Hranghrima chuan a lu chungah a kengkawh ta reng mai a, a \ang hman lo reng reng a ni. Mipui chu an au dur dur a, Mizoram inbuan chak ber a lo ni ta a ni. Hemi hma hian chak ber zawnna a la awm ngai lo va, Hranghrima hi a khingpui ten vawi khat mah an la k^ng ve lo a ni. Amah hi lal upa min niin Sialhawk VCP hmasa ber a ni a, December ni 25, 1997 khan a boral a, Sialhawk thlanmualah vui liam a ni.
Hranghmingliana Fanai (Hrangpuia) - Hranghmingliana hi February ni 23, 1953 khan Sialhawk khuaah a lo piang a, a nu hi Thanmawii niin a pa chu Pu Kawla a ni. An unau hi mipa 8 leh hmeichhia 4 an ni a, Hranghmingliana hi a upa lam a\anga chhiar a 5 a ni.
Hrangpuia hian chak lamah chuan chhun tur a nei duai lo viau hlawm a, a pa lamah chuan Vawmruma hi tlangval lai pawh a inbuan chak leh mizawn inchuh pawh a mi panga velina an bawr rawn \hin a ni a. A nu lamah pawh a nu pa Hranghrima (A pu) hi Mizoram palian inchai chak ber nihna lawmman lo dawng tawh tawhtu a ni bawk.
Hrangpuia hi mizopaah chuan pa te lo tak a ni reng reng a, a san lam 5.10ft. leh a awm len zawng 43 Inches a ni a, a kawng len zawng hi 37 Inches a ni bawk a. 90 kg lai a rit a ni bawk.
A chak lanna chi hrang hrangte -
Kum 1983-ah a pa Kawla lungphunna tur Sial lei turin Biateah an kal a, khawchhak Sechal an va lei ta a. Biate khawdai 1 km vel lek an han kal chu sial chu a kal duh ta lo va, a phurh nan Biate motor (TMB) an va dil ta ringawt a. Anau kum 12 mi leh a \hianpa chu a nghawng hruiah leh a meiah TMB a\ang chuan a pawh tir a, amahin Sechal chu a han pawm kang a, a hl^ng ta mai a. Driver chuan mak a ti hle a, Khuaah an phur haw ta a ni.
Kum 1994 Mizoram Gospel Centenary lungphun tur Sialhawk South Kohhranin a hnuh nan hruipui an chhat a, zawm a ngai ta tlat a. Tlangval panga lai chuan an herhsawp zo lo va, Pu Hrangpuia va kal ve chuan a herhsawp a a zawm ta mai a ni.
Kum 2001 March thlaah PHC Quarters pakhat a sa ve a, a ban concrete an phun zawh vek tawh chu J.E. duh dan a nih loh avangin sawn leh turin a ti a. Tihchhiat leh ai chuan tiin 3ft. laia hlaah chuan concrete ban 9ft. a sei 9 Inches a lian chu a pawm sawn phei ta mai, J.E. pawh chuan mak a ti hle a ni.
Kum 2006 a Govt Middle School Diamond Jubillee lawmna tur Sial an lei chu a ki pahnihah vuanin a elh thlu bawk a ni. Video clip-a dah niin tunah hian Youtube lamah hmuh theihin a awm a ni.
Skylink Cable-in kum 2007-a Mizoram pum Talent Hunt (Intihsiakna) a siam a, mi 325 lai telnaah thiam zawng chi hrang hrang entir a ni a. Hrangpuia chuan chakna lam a entir a, hetah hian Iron Rod sut 7 a banah a vet zawt zawt a, Parachute hrui thar ramsa awhna tur atan thanghruia an hman \hin pawh a kerekah hlingin a pal chat thei a. Mizo thleng kum (Aluminium thleng) pahnih chu awlsam tein a zial thei a ni. Gas bur paruk khat vek a taksaah phuar betin a dinpui zo bawk. Coconut rah chu a chhip a kawm kaw pawp a a kut lawngin a kheh hmiah thei bawk a. Buhfai 50kg a rit chu a ke ding leh veiah phuar betin bag thum phur bawkin a kalpui thei bawk a ni. Hemi \um hian Mizoram pumah lawmman pakhatna a la a ni. Tunah hian kum 68 mi niin Sialhawkah a la dam.
Capt. L.Z. Sailo (Padma Bushan Awardee) - Capt. LZ Sailo (Lalzuala Sailo) hi November ni 21, 1924-ah Sialhawk khuaah a lo piang a. Apa hi Sialhawk lal Liankanglova a ni a, a nu hi Sapthangi a ni.Nupui atan Ngurthanzuali a nei a, fapa pathum leh fanu pathum a nei a ni. Capt. LZ Sailo hian Indopui pahnihna hun lai November ni 21, 1941-ah Indian Army a zawm a ,kum tling lo ni mahse lal fapa a nih avangin ngaihhnathiam a ni a. Sipai a \an hnuin Kithener’s College, Knowgong Central India-ah Intermediate of Science a zir a \ha takin a pass a. Intermediate of Scence degree a lak hnu hian Viceroy Commission Officer-ah a kaisang a, an College-ah French Subject a lak avangin UNO Peace Keeping Force zawm tura thlan a ni a. Kongo, Africa-ah a thawk a, sipai a a \an chhung hian khawvel ram tam tak a tlawh kual a, Geneva khawpuiah Red-Cross Society-ah a thawk tawh bawk a ni.
Capt. LZ Sailo hi thu leh hla lama tuimi a ni a, lehkhabu pawh 12 lai ziakin la chhuah loh \hahnem tak a nei bawk a, a lehkhabu ziahte chu - Runlum nuthai, Mizo Academy of Letter in Book of the tear 2002, Hmangaihna tluantling (1978), Thanghniangi leh Rualkhuma (1991), Mizo hnam din leh thu leh hla (1991), Awi karei Lucknow (1997), Awmkhawhar suihlunglen (1998), Thilmak chhui sen loh (1999), Suihlunglen hlahril (2001), Hmanlai an chang zo ta (2002), Awi karei Lucknow -II (2003), Nghilhloh par (2004), Rose-par vul ve ta rih lo chu (2005). Heng bakah hian lehkhabua chhuah loh thahnem tak a nei bawk. A hla phuah zingah Insuihkhawm leh zai i rel ang u tih chu a larpui hle. Capt. LZ Sailo hi Northest Poet’s Meet, 2005-ah a bika hun pek zingah a tel pha bawk. Kum 2004-ah Mizo Academy of Letters-in Vanapa Hall-ah Meet the Authors, 2004 a buatsaihah sawm bik pathum zingah a tel bawk. Capt. LZ Sailo hian hla 400 chuang leh hla chhammi 2000 chuang phuahin chanchinbu hrang hrangah article \hahnem tak a ziak bawk.
Kum 2002 kum a\angin ruihtheihthil a buai \hinte enkawlna hmun Gamnuam, Kristian Home, Churachanpur chuan Home Father nihna a pe a, Nupi lal Aniversary vawi 61-na , Churachanpur-a an lawm \humin khuallian a ni a. Heng bakah hian Zohnahthlak hnam peng Zirlai Pawl hrang hrang;Hmar, Lai, B^wm, Mara, Ranglong, Siamsimpawlpi, Thado Zirlai Pawlte hian khuallian atan an sawm \hin bawk. Kum 1981-1999 chhung khan Manipur-ah Zo Re-Unification Organisation President a ni a. Chhinlung chhuak zofate insuihkhawm leh theihna tura theih tawp chhuaha sum leh pai, tha leh zung senga kum 18 teh meuh a thawh avangin kum 2000 khan ZORO Headquarters chuan Gaidinlu Award a hlan.
Kum 2000 khan Lelte Magazine chuan Lifetime Achievement Award a hlan a, September ni 12, 2002, Thu leh Hla Kutpuiah Mizo Writers Association leh Art & Culture Department-in Certificate of Appreciation an hlan bawk. Kum 2000 khan India Republic Day lawmna New Delhi-a neihah India mite chawimawina sang Padma Award dawng zingah telin Civil mite chawimawina sang Padma Bushan chu hlan a ni a, mizo zinga dawng hmasa ber leh dawng awmchhun niin April ni 5, 2007 khan India Presidentin a hlan. Capt. LZ Sailo, mizo pa ropui chu June ni 25, 2008 khan a boral a, Mission Veng thlanmualah mi bikte an phumnaah ropui taka zalh a ni.
Zaithiam leh hla phuah thiamte-
Pu Lalsangluaia Renthlei - Lalsangluaia Renthlei hi Pu Zoliana (L) leh Pi Kapmawii te fapa
naupang ber a ni a, kum 1972 March ni 2-ah Sialhawk khuaah a piang a, an unau hi 9 niin mipa 5 leh hmeichhia 4 an ni. Sialhawk Primary Schhool-ah zirna bul \anin Govt Middle School Sialhawk a\angin pawl 7 a pass a, kum 1991 khan Sialhawk Govt High School a\angin HSLC a zo.
Pu Lalsangluaia Renthlei hian Sialhawka a \hiante nen Music group (BCML) dinin zai lamah an theih tawkin hma an la a, mahse an \hianpa Maitawka’n a thihsan tak avangin an band hi a tawp leh ta a. Hemi hnu hian mal zai lamah inhmang chhovin hla \ha tak tak a phuah \hin. Kum 1999-a YMA General Conference Champhaia neih a nih \um khan a hla phuah ‘Zohnahthlak Lanu’ tih chu sain heta \ang hian Lalsangluaia Renthlei hi Mizoram mipuite chuan an hmelhriat \an a, Aizawl Local Cable TV leh DDK-ah te zaiin mite hriat a hlawh lehzual a. Kum 2000 khan a Single Album ‘Zohnahthlak Lanu’ chu a release a, heta a hla sakte hi a irawm chhuak vek a ni a, a hun laia cassette hralh kal ber tezing a mi a ni. Lalsangluaia Renthlei rawn lar chhuah hun lai hi YMA-in ‘Ram leh hnam humhalh’ kum puana a neih lai a ni a, Mizo zai mite zingah ram leh hnam humhalhna lam hawi hla sa an awm loh lai tak a nih bawk avangin ‘Zohnahthlak Lanu’ tih hla hian Mizote rilru chu ram leh hnam humhalh kawngah nasa takin a kaiharh a ni. Pu Lalsangluaia Renthlei hi zai leh hla phuah lama a tui mai bakah thu ziak leh drama thleng a sulhnu nei a ni a, a thu ziak \henkhat chu Mizoram pum chanchinbu chhuakahte a chhuah ve hial \hin a ni. A theih ang tawk a mizo\awng dik lo lai nia a hriatte thu leh hla hmanga tihdik tum tlat mi a ni a, dik lo nia a hriat paih a, dik nia hriatah chuan ding tlat mi a ni. Hla phuahtu dangte aia a danglam ve riauna chu hla thu midangte hman rim loh tuai hnam a, mizo\awng kauchheh mawi tak tak hla thua chantir hi a thiam em em hi a ni. A hla phuah mite hirat hlawh zualte chu - Zohnahthlak Lanu, Suihlung dam nan, Thaitlawm lungmawl, Khawnge Zonunmawi? tih leh a dangte a ni a. Audio Album pakhat tichhuak ve tawhin a hla phuah vek hmanga Album a puitlin thei hi a ngaihsanawm zualna a ni.
Kum 2001-ah C. Ramropuii nen Aibawk Presbyterian Kohhran Biak Inah inneiin fanu pakhat an nei a ni. Pu Lalsangluaia Renthlei hi January ni 8, 2020 khan pum nuam lovin a luak vak mai a, a tukah Falkawn Damdawiin panpui niin Investigation hrang hrangte tih nghal a ni a. A dam lohna khirh tak mai damdawiina thawkte pawhin chhan tum hle mahse a natna hian a hneh em avangin chelh rual a ni ta lo va, January ni 19, 2020 khan chatuan ram a lo pan ta a. Aibawk thlanmualah mi bikte phumnaah ropui taka zalh a ni.
K. Vanlallawmi - Pu K.Remsiama leh Pi Sikulsangi te fa pasarih zinga a palina, Zaithiam K.Vanlallawmi hi kum 1974, March ni 25 khan Sialhawkah a lo piang a, Sialhawk Primary School, Sialhawk middle School leh Sialhawk High School-ah te kal chhovin kum 1990-ah HSLC a zo.
K.Vanlallawmi hi Pathian fakna satu lar tak R.Lalbiaksanga nen an zai dun a\anga mite hriat hlawh \an a ni a. Kum 2001 khan Lalngaihzuali leh Ngurliantluangi te nen “Ka ta i ni” tih Album an tichhuak a. Kum 2002 khan a Single Album hmasa ber ‘Tuarna pawh hlawkna’ tih chu tlangzarh lehin Zoram dung leh vangah mite hriat hlawh lehzualin a Album pawh hralh a tla hle a ni. All india Radio chuan Artist atan an la nghal nghe nghe. Kum 2004 khan ‘Tuarna phena malsawmna’ Album tichhuak lehin kum 2006-ah ‘Min tlan sak’ tih Album a tichhuak leh bawk a ni. Gospel Collection Album hrang hrang pasarih velah a zai tawh bawk a, All india Radio ah hla 36 khung tawhin DDK-ah hla 4 a khung tawh bawk. Rimawi Khawvel Music Award Best Gospel Female Artist 2004 khan a lo dawng tawh a ni. Kum 2003 khan R.Lalzidinga nen inneiin fanu pathum leh fapa pakhat an nei tawh a, tunah hian eizawnna avangin Saitualah an chhungkuain an khawsa mek.
Upa Chawngbuaia - Upa Chawngbuaia hi kum 1893-ah Sialhawk khuaah a piang a, a pa chu |hianga a ni. Kum 1917-ah German ral runin a feh chhuak a, kum 1921-ah nula hmel\ha tak mai Kapchhungi nen inneiin fa 9, mipa 3 leh hmeichhia 6 an nei. Sialhawk a\anga Lallula’n Riangthlei khaw thar a kai \um hian chhangchhe tak chungin a zui chho a. Riangtleia a awm lai hian Kohhran Upa atan thlan a ni. A pum lam hrisel lohna avangin Sialhawkah pi leh pute bel turin an rawn let leh a, amah hi ha var rual \ha tak leh sam dum hlep hlawp, palian vak lo a ni a, mi lungleng thei tak a ni bawk. Khawhar hla 5 lai a phuah a, chung zingah chuan heng hla - Hringhniang nau ang a \ap, Eden huana pi leh pu ten, Dawn ve teh u, khawvel ram ropuiah tih hlate hi tun thlenga zoram dung leh vanga khawhar lusunte hnemna hla atana zofa ten kan la sak rim em em hla te an ni.
Upa Chawngbuaia hi Pathian thua tuimi leh Kohhran rawngbawlna ngai pawimawh mi a ni a, a nu leh pate Kristian an nih hma pawh a Kristian ni \ang \ang a ni. Hei vangte pawh hi a ni mahna a tu leh fate zingah pawh Kohhran Upa leh Kohhrana rawngbawltu pawimawh tak tak tun thlengin an awm chhoh zel ni. Amah hi hrisel vak lo a nih avangin kum naupangte kum 49 mi chauh niin March ni 18, 1947 khan a boral ta a ni.
Sialhawk rama History hmun luah thei thilte :
- Zialung : Zialung hi lung mak tak leh hmingthang tak a ni a, ’Zia’ tih chu hla thua an hman danin ‘ziak’ tihna a ni a, Zialung tih chu lunga ziak tihna a ni. Zialungah hian thil lem chi hrang hrang Darkhuang, Darbu, sial, feipui, naupang lem, puitling lem, puan rin leh tuiburte a ni a, hei vang hian Zialung tih vuah a ni. A san zawng hi ft.5 a sang 4ft. a hlai, 5inches laia chhah a ni.
He lung hi Sialhawk Lal, Liankanglova’n Sialhawk leh Khawhai inkar, Sialhawk a\anga 5km ami chu phun a duh a, a khaw mipa ral kai chin zawng zawng a thawh chhuahtir a, Pi Neihpuithangi kawtah a phun tir ta a ni. A phun nan hian ui tuai an phun hnan a, hetiang hi hmanlai lung hming nei deuh an phun \hin dan a ni. Zailung siamtute leh ziaktute hi hriat theih an ni tawh lova, Mizo ten thlang kan tlak hmaa Mizorama lo awm tawhte sulhnu nia rin a ni. Zialung awmna hmunah hian tunhma chuan khua alo awm tawh tih hriat a ni a, a lui hming pawh tun thlengin Zialung lui tih a ni.
- Mura Puk : Hmanlai Zialung hmuna an awm laiin Mura lian deuh a awm a, naupang khawlai lengte hi a la \hin a, an hlau em em niin an sawi. Chuvangin puitling feh hlana naupang dah khawmna tur puk panga lai an siam a, a len zawng chu 6x5x6 ft. a ni deuh vek a ni. A hmingah Mura Puk an ti a, a pangah 2ft. vel bialin kawngka an hawng vek a, pathum chu a chhe tawh a, pahnih erawh hmuh theihin an la awm. Lunga sak vek a ni a, a chung pawh lungpher hlai tak a khuh vek a ni. A chhungah pawh a lung chherna hnuhma hmuh theihin a la awm. A awmna hi P.W.D., K.E.L Road kawng kam maia awm a nih avangin khualzin mite tan pawh awlsam taka en theih a ni.
- Lungpum : Lungpum hi lung lian pui pui chher a ni a, a awmna ram hming pawh hian a put phah a ni. A awmna hmun hi Chalrang, Khawhai leh Riangtlei hual vel tlang hlawm lian tak a awm a ni a, heng lungte hi a sei lam 18 ft., a len zawng 96 Inches vet chhuak a ni. He lung chhertute hi tute nge hriat theih a ni tawh lova, khawi lai ami nge an chher tih pawh hriat theih a ni tawh lo. A awmna velah hian lung dang a awm si lova, rin danah chuan a awmna a\anga fing hnih velah kham deuh hi a awm a, chuta mi chu a nih an ring deuh ber. He lung chher hian hmanlai pum thing kawrawng pahnih ar fep tih buaka an zah \hin a an em avangin a hmingah Lungpum tiin an vuah a, a mu \hiang rual mai a, Mizo History ziaktu Pu V.L Siama lehkhabu ah pawh hmuh theiha awmin High School zirlaiahte pawh a lo lang tawh \hin a ni.
Lungpum ram tlang chhip zam pheiah khian khaw hmun hluite leh an thlanmual hluite pawh
tun thleng hian hmuh theihin a la awm a. Hemi hmunah hian mihring lo cheng hmasa an awm ngei a ni tih heng a\angte hian a hriat theih a. Tun hma kan pi leh pute hun laiah phei chuan mizo pasal\ha ten an kah chak em em \hin saite pawh a lo awm tawh \hin a ni tih hriat theihna turin tun thleng khian sai tluangdung te pawh hmuh theihin a la awm. He lai ram hi thlawhhma atana \heh kum a nih hian buh leh balah Sialhawk chuan an hausak kum a la ni ziah a ni.
- Lallula lungphun - Lallula, Sailo Lal hi Mizoramah chuan lal ropui leh lal hmingthang ber a ni a. A thlah kal zelah Sialhawk lal Lalngurliana chuan Sailo lal dana a luruk Neihpuithangi vawn \hat chu phum a vawn \hat a rawt a, kum 1993 buh seng zawh chuan Sialhawk khuaah Sailo lal thlahtu Lallula lungphun tur chu lak a ni ta a. He lungphun atan hian hmar lam Khawhai kawng, khuai tlang kawngpui thlang ruam a mi chu zawn a \ul ta a, Sialhawk tlangval chauh chuan an zawn zo lova, Lallula fate zing a mi lal ropui Vuttaia thlahte chu an inchah khawm ta mup mup mai a. Lung zawn tur chuan Biate lal Thangchuanga Sailo te, Lungdar lal Thangburha Sailo te, Khawbung lal Lalbika Sailo te, Riangtlei lal Lallula Sailo te, Tlangpui lal Lalthima Sailo te chu an khawnbawl upate hruaiin an khaw silai awm zawng zawng nen an thleng khawm ta rup mai a. Lal ho chu an sakawr nalh tak tak chungah chuangin an upa ten silai puin an rawn zui duah duah mai a. Tlangvalho nen Sialhawkah chuan an rawn lut ta zung zung mai a. A hunlai \heuhvah he thil thleng hi Sialhawka thil thlengah chuan a aia ropui a la awm lo hial awm e. Kum 1933 December thla tir chuan lung zawn tur chuan an thawk chhuak ta a, a zawnna hlang ngawt pawh hlam ruk bialin an phan a, thingtlawn an kham kawkalh rup mai a. An han zawn chu a rit bawk a, haw haw an la a, an ri hup hup mai a. Sialhawk tlangval bakah Biate tlangval zawng zawng, Riangtlei tlangval zawng zawng, Tlangpui tlangval zawng zawng nen khaw pali tlangval intawk khawm an ni bawk a an ropui tak meuh a ni. A ni khat niin an thlen hman lo reng a, ni hnihnaah chuan Bungzung lal Laltawna chu lung chungah chuan an chuan tir a, silai an kap ulh ulh mai bawk a. An han zawn chu an thawm a na ngei mai. Ni hnihna tlaiah chuan an thlen thei ta a, a phunna atan pawh Sial tam tak a tlu nghe nghe a ni. A lung phunah chuan heti hian a in ziak -
SAILO LAL THLAHTU LALLULA HRIATRENGNA
Hreichuk khuaah a thi a, Sailo danin a luruh vawn a ni. A fa Vuta Rullamah a thi a, Vuta lu nen May 5, 1920-ah hemi hmunah hian phum a ni.
A fate A lung latute
Lalpuiliana Lalbika Lalthima
Lallianvunga Thangburha Lallula
Manga Laltawna Ngurliana Vuta Thangchuanga
A lung lak ni - 20.12.1993 tiin.
Sialhawk khua hi kuthnathawh uar khua, mahni tawka khaw intodelh tak nih tum ran kan ni a. Chhungkua za zela 80 vel hi kuthnathawka ei zawng kan ni. Kuthnathawh kan zahpui ngai lova, tun dinhmunah hian kan kuthnathawh thlai thar hmangin a kum telin chhungkua leh khawtlang pawhin hmasawnna rahbi thar kan kai mek zel a. Tun dinhmunah hian huan nghet hmanga eizawng chhungkua pawh thahnem tak kan awm tawh a, serthlum a\ang pawhin kumtin ` 50,00,000/- vel zet kan la lut tawh a chhut a ni. Mizorama an hming chherna leh hmun hla tak a\anga an kuthnathawh avanga an lo hmingthanpui ve \hin chu lakhuihthei hi a ni a, \henkhat phei chuan lakhuihthei khua tia sawite pawh an awm. Mizoram pumah lakhuihthei thar chhuak hnem ber khua niin he khuaah vek hian chhungkaw mala thar hnem ber pawh kan awm a. Lakhuihthei a\ang hian ` 60,00,000/- vel kumtin la lut thin anga chhut a ni bawk. Hemi bakah hian sawhthing, hmarcha leh thlai chi hrang hrang kan chingin kan thar nasa hle bawk a, intodelh kan inzirtir nasa hle a hnathawh kawngah hian khawtlang hruiatute leh \halai rual ten theih tawpin hma kan la bawk a ni.
A bul lama kan sawi tawh ang khian Sialhawk khua hi Zo thengthaw nuam tak leh chhuah
chhawng khua niin a khawthleng pawh rem tak mai leh len veivahna atan pawha nuam tak mai hmunhma kan nei \ha em em a. A khawchhung a\anga hmun hla tak pan buai ngai lo hian pipute sulhnu tam tam hmuh theihin a awm. Chung zingah chuan -Zialung, Lallungdawh leh Lallula thlanrawn rawtna chempui leh Vuta thangchhuahpuan leh muallam puan te pawh hmuh mai theihin a awm a, kan lo kawhhmuh dawn che a ni. Hmun hla tak a\anga lo kal tur i nih avangin chiang lo leh vai riai a i haw leh kan phal dawn lova, hre lote hnena fiah taka i hrilh chhawn leh theih nan chiangkuang lehzualin kan han hrilh ang che.
Sialhawkah ilo zin a nih chuan veng lai lum taka mual eng zau deuh hlek lo awm kha Bus Stand a ni a, Sialhawkah rau rau chuan kan vengpui lai leh kan hmun hulum ve ber a ni tih kan sawi hmasa ang e. Chuta \anga hla vak lovah hmar lam hawi zawngin va kal ta la, kawng peng \huam a lo awm leh ang, chu chu Pengpui kan ti a, pengpui a\anga kawng chung lama i kal zel chuan Pastor Quarters leh Lal Lungdawhte pawh i va hmu thei ang. Chuta a\ang chuan khaw lu lam panin her chho zel la, thing phun ngaw thelh nuam takina a chawi vel karah Govt’ High School pawh i han thleng zel ang a, a piah leh chiah a mi kha P.W.D. I.B. a ni tih i han hmu ang. A piah leh tlangchhipah chuan han lawn leh la, khua han chuan la, i zawn chhim lam hla deuh tak kha i thlir phei chuan Mizorama Middle School hmasa i hmu thei ang. Saw lai hmun a\ang sawn Mizoram tana mi ropui tak tak an lo inzir chhuak tawh a, sakhaw rawngbawltu \ha tak takte pawh an lo inzir chhuak tawh bawk a ni. Khawchhak lam hawiin han hawi chho leh la, Sialhawk Higher Secondary School leh Primary Health Centre (PHC) te pawh i hmu thei vek ang a. Chu mai a la ni lo, i mit kha han len kual leh la, khaw mawng lama zawl zau tak i hmuh khu Sialhawk Playground a ni tih hai rual lovin i hre nghal thei bawk ang. Khu Playground khu tlawm hle mahse Mizoram Premeare League hmasa ber (2012-2013 Season) Best Player lo chher chhuaktu. Chu mai a la ni lo cheu, I-League-ah Player of the Year (2018-2019) atana thlan ngam, vawi duai lo I-League Hero of the Match ni tura an lo thlan chhuah Sialhawk tlangval R. Laldanmawia lo chher chhuaktu a nih khu!! I ring han fan det la, Tuipuiral tlangdung- Khuangleng, Vanzau, Bungzung, Hruaikawn leh Kelkangte i hmu thei ang a, i mit han len leh det la, \iau ral pipute thlang rawn tlang hmaa an lo khawsak tawhna hmun Lentlang dung lo inkham zur te pawh i hmu thei ang. Leh lam hawiin han inher leh la, tikhan ni tlakna tur lam khawthlang lam i hawi mek tihna a ni. I mit han len kual leh la, tlang chung zawl duai Tawi tlang lo inkham zur maite leh Serchhip tlangdungte a lo lang leh ang a, Lungpho, Ngentiang, Thinglian leh Hmunzawlte pawh hmuh hmaih rual lovin an lo lang dawn a ni.
Khawchhung lam rawn hawi leh la, nangmah rawn ep zawng taka Biak In lo lang larh i hmuh
khu Sialhawk South Kohhran Biak In a ni a. Chuta \ang chuan nangma awmna lamah khan i mit han len hnai leh la mual zawl zau tak i zuk hmu ang, khu khu Lal mualzawl niin Sialhawk hming putu tak chu a ni. A sir thlang lama mi khu kan Lal In hmun a ni a, tunah khuan an tu leh fate an la khawsa mek. A chhak lawka concrete in lian lo to vuah khu Sialhawk Community Hall a ni a. Hmar lam hawiin i mit han len hnai hret la, Biak In pahnih inhnaih deuh tak i hmu leh ang. Nangmah hnaih zawktu Biak In khu Sialhawk Kohhran Biak In a ni a, a kawt sir thlang lam tlang bawk zawla awm khu Salvation Army Corps a ni.
Heng kan sawi bakah hian Sialhawk khua a\ang hian Mizoram pa langsar tak tak rorelna
khawl sang bera a fawng lo vuan a MLA leh Assembly Speaker hial lo ni tawh R. Lalawia te, MPS Senior Officer Lalhuliana Fanai (Conferred IPS) te, Mizoram Public Service Commission (MPSC) in Exam (2016) a buatsaiha chungnung ber nihna luah pha Lalrinsanga Hnamte te leh sakhaw rawngbawltu chhuanawm Pastor Lalhluma Sailo te, mithiam tak takte leh dan hremi L.L.B. (Ukil) thlengin he khua hian a lo hring ve tawh a. Sialhawkah hian hnamdang mi in leh lo neia khawsa chhungkua hmuh i tum a nih chuan thingchang hmuna rawtuai hawn tum ang tlat a vang a ni ang. Chuvang chu a ni mahna kan \awngkau chheh pawh hi a la chiangin \awng thar Mizo\awng hman dan fel lo leh dik lo kan rawlh khat hle a, an \awngkam chhuak pawh a changin a hriam palh chang mikhual bengah a awm a nih pawhin an huat vang che ni lovin MIZO hlang hlak kan nih avangin hriatthiamna bengdar vuah chung leh enremna tarmit vuah chungin Sialhawkah lo zin ve ta che.
