Biate

1. BIATE KHAW HISTORY TLÂNGPUI      

i) Hun hmasa lam      

        Biate khaw awmna hmun hi bung hmasa lamah khan chiang takin kan sawi tawh a. A khaw hmun hi lal hrang hrangin an lo awp tawh a ni awm e. Tin, Mizo hnahthlâk hnam pêng pakhat ‘Biate’ hovin 1780 hma daih tawh khan an lo luah tawh a, kha tih lai kha chuan ‘Zialung’ khua an ti thîn a. Anni hi khawchhak lam atanga khaw thlang lama thlang tla hmasa hnam kha an ni a. Anni hian thlang tla zêlin 1780 vêl khan Hringchar (Silchar) phai vêlah an lût thla niin Rev. Liangkhaia chuan a ziak a ni. 

ii) Biate Hnam 

 Biate hnam ho Biate hmuna an awm lai, Zialung khua a nih lai khan Mizo thawnthu ngaihnawm tak mai a awm a, chu chu ‘Zialung khaw chhan Hrangkhupa’ tih kha a ni a. He thawnthu leh Biate (Zialung) khua hi a inzawm tlat a ni, a lunglenthlâk dang dai hle. 

 Biate hnam sawi takah chuan tlêmin an chanchin hi han sawi zui deuh ta lawk ila. Anni hi tûna Mizoram ramri chhûnga lo lût hmasa ber nia hriat a ni a. A tîrah chuan pûkah te an chêng ve mai mai a, an chenna pûk hming chu Sinlung (chhinlung) pûk an ti a. He pûk hi Riangtlei leh Vântlâng ram inkarah sâwm a awm nghe nghe a, chu chu Biate atang pawh hian hla lo tak a ni. Chumi hnuah Vântlâng leh Riangtlei-ah te khaw thar siamin an awm leh a, chumi hnuah Biateah hian khua an din ta a ni.  

 Biate khaw hmuna an awm lai vêl hi AD 1500 vêl nia rin a ni a, thangkhat lian teh meuh an awm ni ngei pawhin a lang. An awm rei thawkhat viau tih a lanna chu he lai vêl ahmun leh lui hming tam tak hi Biate Tawng kha a ni tlat mai. Entîr nan - Râlvawng tlâng te, Hnîngtui Lui te, Raifan lui te, Mura pûk te, perhkai te, Chhuanvawra khawthlir tihte tûn thlengin a la awm vek a ni. Biate ho chu Mizoram hmun hrang hrangah an pem kual nasa hle a, tichuan thlang tla zêlin tûnah hian N.C. Hills District, Assam ah khuan Biate khua 18 lai a awm a, Jaintia Hills District, Meghalaya-ah khuan khaw 22 zetah an awm bawk a ni.  

iii) Sailo lal hnam 

Sailo hnamho hi Sihsinga thlah kal zêlte an ni vek a. Sihsinga fapa chu Râlnaa a ni a, Râlnaa fapa chu Chhuahlâwma a ni a, Chhuahlâwma fapa chu Zahmuaka a ni leh a, Zahmuaka fapa chu Thangura a ni a, Thangura fapa chu Thangmanga a ni. Thangmanga fapa chu Sailova a ni a, Sailova fapa chu Chungnunga a ni a, Chungnunga fapa chu Rohnaa a ni a, Rohnaa fapa chu Lallula a ni, Lallula fapa chu Vuttaia a ni.Vuttaia fapa chu Kairûma  a ni a, Kairûma chu Biatea lal hmasa ber a ni ta a ni.   

iv) MizoramLal zînga lal ber Kairûma 

 Kairûma hi kha tih laia British sawrkâr sipai khan 1900 thâl tîr lam deuhah an man hlauh mai a, Jail-ah thla ruk lai a zu tâng hial a, a jail tâng chhuak chu a lalna hmun Hmunteah rei vak lo a awm a, Hmunte leh Phuihnama a khaw mi leh sa awmte chu Biate hnamho hmun hlui Zialung-ah a kaipui ta a ni. A kai hun hi a fapa Pathumna Lungdar lal ni ta Thangburha record-ah chuan “1901” tih a ni. Upaten an sawi dân hrang hrang thlirin 1900 kum tâwp lamah kai tanin 1901 ah an kai kim niin a lang. 1901 chhiarpui an nei a, Biateah In 334 awm anga record a ni. Kha tih lai kha chuan in 300 chu khaw lian tak a ni a, naupang zirlaibuah pawh hun eng emaw chen chu Mizoram khawpui lian zual pali zîngah a tel a ni - Aizawl, Lunglei, Champhai, Biate tia zir thîn a ni. 

 Biate lal hmasa ber Kairûma hi lal fing leh rorêl thiam tak mai a ni a, thu lai la tak mai niin fak pawh a hlawh hle a ni. A thlânah pawh ‘Ro a rêl sual ngai lo’ tiin ziah a ni nghe nghe. Lal ropui tak mai a ni a, a ropuiin hriat a hlawh hle tih a lanna chu kha tih laia Political Officer A.W.Davies I.C.S chuan “Hmar chan lalte zînga ropui ber” a ti hial a ni (Gazetteer of the Lushai Hills) 

 Mizo lalten 1904 kuma Viceroy Curzon Silchar-a an hmuah tumin, Viceroy chuan lalho ding tlar chu ti hian zawhna a zâwt a - “In zîngah hian tu nge lal ber che u?” tiin. Chu tah Lal Kairûma chuan “Kei mah” a ti a, tichuan Mizo lal zînga Lal ber nihna chu awlsam takin a hauh ta a ni. A hnung zuia kal ve Avunga chuan, “Kan tlâwm zo ta vek mai le,” a ti hial nghe nghe niin an sawi. Kairûma kha British sawrkâr pawhin an ngai nep lo hle a, a dam loh pawhin a enkawl tûrin doctor an tîr vang vang mai a ni.  

v) Kairûma Certificate dawn chu  

 A khua leh tui a enkawl dânah an lungawi tâwk hle tih leh an dah sâng hle a ni tih lanna chu British Emperor King George V lallukhum an khumtîr lâwmna Delhi hmuna an neihah Lalber King George V hmingin chawimâwina certificate hial an pe a ni. A certificateah chuan hetiang hian a inziak nghe nghe - 

By command of His Excellency the Viceroy and  Governor-General in council, this certificate is presented in the name of His Most Gracious Majesty King George V, Emperor of India, on the occasion of His Imperial Majesty’s Corronation, Durbar at Delhi to Kairûma, Lushai chief of Biate in recognition of the able manner in which he has administered the village committed to his charge. 

 He certificate hlu tak hi December ni 12, 1911 khan a hnênah an hlân a ni. He certificate hi Biate lal chhûngkuaten an chenna Mualvêngah an la kawl tha tlat a, en theihin tûn thlengin a la awm nghe nghe a ni.  

vi) Kairûma fate leh an lalna 

 Kairûma hian fapa paruk neiin lalna a chantîr vek nghe nghe a. A fate leh an lalna hmunte chu a hnuaia mi ang hi a ni e. 

            Laltawna                    - Bungzungah a laltîr 

            Lalthangchuanga     - A thih hnuin Biateah a lal 

            Lalbuanga                 - Tukkalh-ah a laltîr 

 Biate hmuna an awm hnu 1907 ah Biate atanga kilometre 5 vêl Râlvawngah an han kai a. Mahse Râlvawng chu a lo hrisel hauh lo mai a, kum 3 chauh an awm hnuin 1909 ah tûna Biate hmunah hian an lo let leh a ni. An awm chhûng khan mi 70 lai an thi hman an ti. 

1909 atang chuan khaw dang kai lovin vawiin thlengin mei mit lovin an la luah ta a ni.   vii) Biate lal pahnihna - Lalthangchuanga 

 Titanic lawng pil kum 1912 khan Biate lal ropui Kairûma chu a thi ta a. A ai hi a fapa Lalthangchuanga chuan a awh ta a. Ani hi Kairûma a thih hian kum 12 chauh a la ni a, ro rêl tham a la nih loh avângin a nu Thangpuilali chuan a aiawhin kum 2 ro a rêl a, Lalthangchuanga kum 15 a nih chuan ro a rêl tan ta a. Biateah hian a lal rei hle a, kum 34 chhûng ro a rêl a ni. 

 Lalthangchuanga a lal lai hian Biate chu a ropui deuh deuh a.  A hun chhûng hian thil thleng pawimawh a tam hle. 1913 khan Abhor run a ni a, Biate tlangvâl 14 lai an kal ve nghe nghe a. Tin, a lal lai khan Biate tlangvâl thenkhat Silchar-ah tîrin thingpui tiak a zu rûktîr a, chûng chu Biateah an chîng pung ta vak a, vawiinah chuan thingpui ngah khua an lo nih phah ta a ni. 1938-ah Tuichângrâl Presbytery a lo pian khan Biateah nghah a ni. Kha tih lai khan Presbytery khat kha a la zau hle mai a, mikhual pawh an kal tha thei hle. Chuti chung chuang, “Presbytery nghahna in hriat loh apiangin Biatein kan dawng zêl ang” a ti ngat a ni. Khami kum 1938 ah vek khan Zawlbuk chu thiah a lo ni ta bawk.                        

 Khawvêl Indopui pakhatna (1914-1918) khan Mizo tlangvâl Feren (France) run tûrin Mizo tlangvâl 2000 teh meuh an kal a, khang zîngah khan Biate tlangvâl 20 lai an kal ve a ni. 1919 khan Spanish flu hripui kha khawvêlah a lêng chiam mai a, vânduaithlâk takin Biateah pawh mi 90 lai an thi nghe nghe a, Indopui pakhatnaa zu kal tlangvâlte erawhin an kai ve lova, thlân laitu ber atân an tang ta hlauh a ni. 

  Indopui pahnihna (1939-1945) khan Lushai Scout Corps ten Batallion Headquarters atân Biate an hmang a, 1944 thleng anni hi an awm nghe nghe a ni. A hun lai hian Young Lushai Association (1947 atangin YMA tih a ni ta) chu 1937 ah din a ni a.  

viii) Biate Lal pathumna Lalngûra 

 1948-ah Lalthangchuanga chu kum 48 mi chauh niin a thi ta a. A ai hi a fapa Lalngura’n a awh ta a. He tih lai tak hi Mizo lalte dinhmun khirh lai tak a ni a. Mizo Union pâwl din niin mipuiin lalte rorêlna an duh lova, bang tûra duhtu an pung chak hle a, an thawm pawh a na hle a ni. Democracy rorêlna phutin Mizo Union pâwl-te chu an nuar a, a nuar ve duh lote chu an in an vawm a, an huante an tihchiatsak a. An nuar hrem tûr chuan sipai an lo kal ta a, mi 13 laiin vuak an tuar a, lung Ina khung tâkte pawh an nei a ni. 

ix) Biate Lal hnuhnung ber Laltluanga 

 Lalngura hi 1949 khan a thi ve leh ta hlauh mai a, kum khat leh thla khat chauh ro a rêl hman a ni. Ani hian fapa a nei lova, fanu erawh pali a nei a. Fapa a neih tâk loh avângin a 

nau Laltluanga chu a ai awhin a lal ve ta thung a ni. Laltluanga hi1949 kum tâwp lamah lal tanin 1954 ah Mizo lal bân a nih khan a lalna chu VC thlan hmasa berte kutah a hlân ve leh ta a ni. 

 Laltluanga hian nupui hmêltha tak mai, Khuanglêng lal fanu Lalbiakmâwii nupuiah a nei a. Ani hi vawiin thlengin a la dam a. A hriatna a la tha a, a la tei vak peih bawk a, a la kawmtlâk êm êm a ni. Laltluanga nên an inneih lai vêla mita hmutu an la dam nual mai. Chûng zînga mite chuan a hmêl thatzia thu an hrilhfâk a ni. A hmêl hmu duh tân pawh Mualvênga an chenna inah he thu ziak thleng hian hmuh tûr a la awm reng a ni.  

2. BIATE KHUA CHU  

i)  A awmna hmun 

 Biate khua hi Mizoram khaw chhak lama awm niin Khawzawl District ram valh chhûnga awm a ni a. Khawzawl district ah hian a chhim lamah awmin a tâwp berah a awm a ni. Biate hi  khaw chhak lamah South Khawbung, Dungtlang, Vânzau leh Bungzung ten an hual a, hmar lamah Sialhawk leh Riangtlei khuaten an kîl bawk a, chhim lamah East Lungdar leh Lêng khuaten an kîl ve thung a ni. Biate atanga khaw hnai ber hi Sialhawk niin kilometre 9 chauha hla a ni a, East Lungdar khua hi Biate atanga khaw hnai ber dawttu niin kilometre 15-a hlaah a awm thung a ni. 

 Biate hi 22⁰37’34^” N leh 93⁰04’22”E ah awmin, Sea levêl atanga tehin metre 12001500 inkara sângah a awm a ni.  

 Biate khua hi khua hi hman lai chuan Mizorama khaw lian berte zînga mi ni thîn mah se tûnah erawh chuan khaw lian zîngah a tel tawh lo. In 550 vêl awmin a khaw dung seizawng hi kawngpuiah  kilometre khat leh a chanve vêla sei a ni a, a vâng zawng hi kilometre chanve vêl a ni. Ram rem tak anga han sawi tûr ni lo mah se khaw hmun rem ve pangngai tak a ni a. Fur chhia tak takah pawh tu in mah leiminin a hnawl hlauhawmah an awm lo a ni. Kairûma lalna hmun a nih avângin a ram hi a zau êm êm a, a khaw chhehvêl, a fapate a indantîrna khua ai chuan ram nei zau tak a ni.  

ii) Biate sik leh sa 

 Biate hi Mizoramah chuan a awmna tlâng a san vâng pawh a ni ang a, hmun vawt pâwl tak mai a ni a. Thlasik khaw vawh zual lai phei chuan hmun thenkhatah vûr a tla vâr iarh thei hial a. Thlasik vawh zual lai tak tak hian 4⁰ C atanga 15⁰C vêl a ni thîn a. Nipui khaw lum hunah erawh chuan 200C atanga 30⁰C vêl a ni tlângpui. Global Warming avângin Mizoram leh khawvêl hmun dang tam tak ang bawkin a lum chak ve hle a. Kum 15 kal ta leh vawiin chu a inthlau ta hle. 

            Heti chung hian chhunah khua lum ve hle thîn mah se, zanah chuan thawmhnaw lum lam a inbel theih zêl a, khaw lum vânglai ber pawhin zan lam thleng thlenga tawrh hrehawm khawpin a lum ngai meuh lo a ni. Chhuna ruah a sur phei chuan zan lam phei chu chawp leh chilhin a vawt ve nghal mai thîn a ni. A sik leh sa hi a dai nuam a, Football Playground leh a chhak lam pangah ngat phei chuan eng tik lai pawhin thlifîm  a thaw heuh heuh reng a. Hmun khat lai phei chu ‘Puan Vawrh Tlâng’ tih a ni hial a, chu tah chuan eng tik lai pawha thlifîm a thawt heuh heuh reng avângin khamah puan vawm thlâk tum ila, thliin a rawn chhem let leh zêl a, a vawm thlâk theih miah lo a ni. 

 Tûn hma phei chuan a ram hi a vawh  êm avâng leh a zo êm avângin buh leh bal thar kawngah pawh harsatna an tawh phah hial thîn a ni. Buh hi ram vawt takah chuan a chin theih vak loh a, chin theih pawh ni se, a hlawk vak lova, chuvângin hawp khawp thar chhuah a harsat phah thîn a ni. 

iii) A boruak a hrisel 

 Biate hi khaw hrisel ang reng tak mai a ni a. Tûnah pawh hian kum 80 chin chung lam hi mi 60 vêl an awm a, Biate khawlaia i kal chuan pitar putar, tiang hawla kal a, inzui dam dam i hmu fo ang; hei hian a entîr chu Biate hi khaw hrisel tha pangngai tak a ni tih hi a ni. Khaw hrisel loah chuan kum upa deuhte hi an vâng pharh thîn. An awm a nih pawhin in lamah an tawmim viau zêl. Biateah hi chuan kum 90 chin chung lam pawh hi an awm nual mai a, tiang hawla la lêng peih, thian la kawm peih an ni nawk hlâwm mai. 

 He thu ziah lai hian Biatea khuaa chêng mêk zînga upa ber chu Pu Lalnghaka niin kum 98-na a hmang mêk a ni. Tin, Biatein faina a kalpui hnuah ngat phei hi chuan hri a lêngte a nih ngawt loh chuan Biate Community Health Centre ah hian inêntîr pawh an tlêm thîn hle a, damlo admit pawh pahnih thum lek lek nih tum a  tam a, Damlo admit tûr awm miah loh avânga damdawi In khar rih lawp lawp châng pawh damdawi In lama thawkte hian an nei fo a ni.  

3. BIATE ZIA  

i) Superiority Complex nei nasa khua 

 Biate hi sawi tawh angin Mizoram lal zawng zawng zînga ‘ka lal ber’ ti ngam ngat Kairûma khua a ni a, Mizoramah khawpui lian zual pali zînga tel pha a ni bawk a, hei vâng hian a khaw orignal takte chuan khaw dang tam takte aia mahni indah sanna ‘superiority complex’ hi an nei nasa a, awm pawh a awm viau a ni.  

Hman lai chuan Biate hi khaw fai, khaw intodelh leh khaw lian an ni a, infiamna chi hrang hrangah, a bîk takin inbuanah Mizoram puma chak ber nihna hauh pha Airawta te, AK Sailûta te, Pu K. Lalkûnga te khua a ni a, Pathian thu lamah Pastor hmasa ber Paster Fehtea te leh thuhriltu ropui Lalkherha te khua a lo ni bawk a. Football-ah lah an khaw thenawmteah hneh loha bar an nei ngai meuh lo thîn bawk a ni. Mizorama Harhna tum 4-na 1930-a lo thleng kha Biate atanga chhuak a ni bawk a, Mizoten khawhar hla tha kan neih tam tak hi a Biatea sak lâr hmasak a ni bawk. Hêng zawng zawng avâng hian mahni indahsanna ‘self esteem’ pawh an nei nasa a, a mak pawh a mak vak lo a ni. He zia hi tûn tlengin eng emaw chen an la chhawm reng a ni. Khaw dang, anmahni khaw tiat leh a aia lian hret thlengin dah sanna an nei lem lo, an chhuk en deuh vek mah zawk fo. Tûnah erawh a ni lutuk tawh lo.  

ii) ‘Biate Ngat le’ rilru 

 1950 chho vêlah khan khaw hrang hrang atangin   Aizawlah tlangvâlte chi seh phurin an kal nasa thîn hle a. Tlangvâl 20/30 rualte te an inzui duah duah thîn. Kha tih lai khan khaw lian deuh khua chu an intihuaiin khaw dang tlangvâl kha han dah neu deuh an tum ran thîn. Kawng chêp taka kea kal thîn kha an ni a, khaw lian leh ropui deuh tlangvâlte kha chuan midang an tawhin kawng pawh an kian ve ngai meuh lo, khaw te zawk leh nêp deuh zawk tlangvâlte erawh chuan kawng an kian thîn a ni an ti.  

 Chi phura kawng zîmtea kal duah duah tlangvâlte khan, “Nang khawi khua nge i nih?” tiin an khua an inzâwt tawn thîn a ni awm e. Biate tlangvâl chuan, “Biate” ti tha ve mai lo khan, “Biate ngat le,” an ti deuh kher thîn. Khaw lian dang atanga lo kal thenkhat pawh ‘ngat le’ tih han belh an awm ve tho bawk awm e. Tichuan, “Biate ngat le,” tih chu Biate khaw mite chuan anmahni an insawi dân a ni chho zêl a, vawiin thlenga la sawi pawh an awm zauh zauh awm e. A tam ber erawh chuan midang tâna chapo anga an lan theuh deuh avângin ‘ngat le’ tih lai tak hi chu an belh tawh lem lo.  

 Hman lai tlangvâl, huai zawk leh chak zawk, chungnung zawk nih tum rêng rênga khawsate kha chuan, a ropuina leh a lenna changchawia an   khaw hming an han chhal ngat thîn kha chu ‘hla do chham’ ang riak kha an ni ve a, a ropui dangdai ve thîn hle. Kha khan thalaite a tiphûr a, rual khûm tûrin nasa takin a fuih (motivate) ve tlat a ni. 

 He an zia hian nasa takin khaw danga an awm pawhin nghawng a nei a. Biate khaw chhuak, khaw danga awmte pawh  an awmna khua leh vêngah mahni indah hniam mai lovin thu nei pâwl leh rorêl pha ve pâwl zînga tel ngamna a siam a, chuvângin chuan an awmna vênga pâwl hruaitu leh VC hial an nih phah nasa hle niin a hriat a ni.  

iii) Mahni khua an ngai 

 Biate khaw mite tân hian Biate hi a nuam hle mai a. An inngainain an induhsak tlâng thîn hle a. Khaw chhûnga an pawh lutuk loh leh an biak ngai lutuk lohte pawh khaw dangah chuan chhûng khat ang maiin an inên thuai zêl. Tin, kum tam tak khaw danga an awm hnu, vote pawh an neih hnu leh tu leh fate nêna an awm hnu daihah pawh an khua hi an ngai thei hle a, ‘Râlvawng tlâng’ te hi an thinlungah a lian reng mai a ni.  Râlvawng tlâng hmu pha lova awm hi kum upa deuhte phei chuan thih hreh takin an hreh a ni. Khaw danga kum 50 lai awm tawh si, khawi khua nge i nih an tiha mahni chen mêkna vêng/khua sawi ta mai lova, “Biate” la ti tlat hi chhiar tham fê an la awm. Kum rei tak hnua chhiat that nikhuaa khaw dang atanga lo haw, Biate ngaih vânga tap ta rawih rawih pawh an awm fo mai.  

iv) Kohhran leh Hlimna ngaisâng khua 

 Biateah chuan kohhran a lal ber. NGO pâwl hrang hrangten committee leh hnatlâng an neih dâwn pawhin kohhranin hnatlâng a ko em, emaw committee a ko em tih emaw an zâwt chiang hmasa phawt thîn. Eng emaw palha a lo inthuah a nih hlauh chuan NGO lam thil tum chu sawi ngai lova thulh sa a ni mai. Kohhran thu leh hla hi YMA pawhin a kalh ngai lo, ti tawl mai ila kan sawi sual ka ring lo.  

 Tin, Biatea kum sâwm chin chêng tawh chu kohhran ngaihsak vak lo leh zu hmun sa hmuna tal thîn pawh ni se ‘eng emaw hun lai’ khan Biak Inah an lo lam kual zak zak tawh deuh vek. Biak Ina lam ngai miah lo tak tak chu chhiar tham lek an awm. Hlimna a lo thlenin lam mai an sam êm êm a, lamtual a khat rang thei hle.  

 Pâwl hruaitu zîngah kohhran ngaihsak vak lo mi hi an duh lutuk lova, a bîk takin YMA hruaitu leh VC  member ni tûr ngat phei chu an duh fîr hle. Ruihtheih thil ti mi an awm ngai miah lo, ti ila kan daw lo tluk a ni ang. VC inthlan hmasa ber atanga vawiin thleng hian VCP zu in mi vawi khat mah an la nei lote hi mak tak a ni. Ruih theih thila buai hi an dah sâng vak ngai lova, kohhran leh khawtlangah pawh an tlangtla thei lutuk lo fo mai. Ruihtheih thil ti mi hi mi fel tak tak leh a tlâwm ngai ngai an ni duh viau mai a. Chutih rualin Biateah hi chuan promotion an hmu hlei thei vak lo. 

v) Thian ngaina khua 

 Biate hi thian inkawm khawm let let ngaina mi, thian pâwl bîk insiama chuta hlim taka inkawm khawm thîn an ni. Hman lai atangin Football an ngaina êm êm a, an tlangvâl laia inkhel ngai tûr pawha ngaih loh, an that laia football thiam tak tak an awm fur a. Tin, tûn hma deuh khan music an ngaina êm  êm thîn a, Mizoram pum huap beat contest-ah pawh an lang pha hial thîn. Tûnah erawh chuan music-ah tûn hma an pha ta lo. 

a) Thianzaho pâwl hming hrang hrangte 

 Tin, thianzaho, mi fel leh inleng dawl zo deuh ina chhuah khawm hi nuam an ti hle a, an inpawh thei hle. A hnuaia mite hi Biatea thianho pâwl hmingte an ni a, a tam zawk phei hi chu an la nung reng a ni. Biate original thalai chin ngat chu hêng a hnuaia pâwl kan han târlan eng emaw berah hian an tel deuh vek a ni. Thenkhat phei chu pâwl hnih pâwl thuma tel kawpte pawh an awm.  

 13. Spartan (Pu Siamta in chhuak)          14. 7 O’clock 

Merlin (Pi Engi In chhuak) 

RMC (Ropuiliani Memorial) 30. Manscape 

 31. Mercy Sport Club         32. Mâwimâwi 

 33. Bernard  34. Rinrin 

 35. KLK         36. PPH (Pangpâr Huan) 

Hêng bâkah hian thian inkawm pâwl, a hrana hming han nei chiah si lo pawh an la awm cheu a ni.   

 vi) Khaw Lungrual 

 Biate hi khaw lungruala tûn hma atanga hriat thin a ni. Hei hi a dikna chen thui tak a awm. An lungrualna chu hruaitute thu an awihna hi a ni kan ti thei ang. 

 Politics ah chuan insawisêl ngai a ni a, mahni party mi leh sa lote chu an insawisêl ve bawrh bawrh tho a, inthlan dâwn phei chuan nasa takin an campaign ve thîn ngei mai a. 

 Amaherawhchu, hruaitu atâna mipuiin an thlan chhuah tawh chu zaa sâwmriat vêl hi chuan hruaitu atân an thinlung takin an pawm zui ve mai niin a lang. Hemi dikzia lanna chu Information mike atang ringawta khawtlang hnatlang awlsam deuha an inau khawm mai thei thîn hi an ni. 

 Biate hian Faina lamah a zawnin kum 5 kha pakhatna a hauh a. Faina lamah kher kher chuan mipui tan rual a ngai êm êm a. Hruaitu bawr chauhin faina kalpui se, an thian fai seng lo ang. Mahse, mipui zawng zawngten VC thu an awih a, hnatlang an aute leh faina lama tan la tûra an infuihnate mipui nawlpuiin an zawm tha a, chumi vânga pakhatna ni thei an ni. Lungrualna tel lo chuan faina kawngah pakhatna a nih theih loh.  

 Tin, Biate hi tûna chêng mêk zât hawlh hian an pemsan tawh a, mahse chûng zînga a tam ber erawh an rilru a pem miah lo. An awmna hmun theuhah Biate Welfare Society (BWS) an din a, chak takin an kalpui a ni. Aizawl-a BWS phei chu a pâwl a lian hle a, anmahni pawh an inhre seng meuh lo hial a ni. Anni hian Biatea thil tih pui a awm rêng rêngin part  pawimawh tak an la ziah a, an bang ngai lo. Sum thawhah te, thluak hman ngaiah leh ram hruaitu biak ngai, len chilh ngaiah te an tlan chhe ngai lova, Biate tân chuan an inpe êm êm vek zêl a ni. BWS hruaitu zîngah political party hrang hranga inhmang tak tak an awm a, a tawl rêl pâwl tak an ni nawk hlâwm. Chûng mite chu politics lamah chuan han inhnial fiam fo mah se, Biate khaw tân a nih chuan kawi kawm thin ang thapin an che nghal vek zêl. Biatea an kal pawhin a tam zawk chuan ‘ka zin’ ti lovin ‘ka haw’ an la ti reng.  

vii) Khaw rual el 

 Biate khua chu rual el pâng mai vek an ni a. Chhûngkuaa din tawh chuan chenna In puah ngei tûrah an ngai nghet tlat a, mahni puala in neih ngei hi ‘pa’ chuan an tum tlat thîn. Biate khaw paho, tlêma a nei nung deuhte a ruka inelna phei chu a sâng hle - Aizawla In tha tak neih a ni. Biate leh Aizawla in nei kawp a awm thluah mai. In neih meuh chu Aizawlah chuan har tak a ni a, chuti chung chuang Biatea in nei tho si a, Aizawla In tha tâwk tak nei an awm nual. An inelna hi a sâng a, mi nazawng tân tel ve ngawt ngam chi pawh a ni lo. 

viii) Mipui nawlpui an fing 

 Khaw upa na na na chu a chhûnga chêngte pawh an fing deuh nge nge thîn. Aizawl pa naran ai chuan kum inrual rau rauah Delhi pa naran chu a fing zawk ang, a chhan chu Delhi-a a chenna environment leh nitina an thil hmuh leh hriatten a tifing a ni. Chutiang chiah chuan Biate chu khaw upa a ni bawk a, (Kum 120 chuang a ni tawh) a chhûnga chêngte pawh an fing nge nge a ni. 

ix) Ram kang thelh taima 

 Kum tinin February, March April chho vêlah ram kang hi Mizoramah chuan a awm deuh ngei ngei. Biateah pawh ram kang awm loh kum a awm lo mai thei. Ram a kan rêng rêngin Information Mike ah an au vat a, tichuan tlangvâl leh paho a biling a balangin kang awmna lamah an tlan nghal thluah thluah thîn. Kairûma thuthmun a nih miau avângin Biate ram hi a zau êm êm a, ram kanna chance pawh a sâng nge nge lo thei lova. Eng anga hlaah pawh ram kang se thelh tûr a ni mai. Hman loh a sawi theih loh, damlo erawh an phut bîk lo. 

Lo pawha neih ngai mang hleih loh, ram tau, awih teng chhe taka ram kang pawh ‘kang mai mai rawh se, a ram a chhe si’ an ti chuang miah lo, a thelh tûra tlan a ni tawp mai. A mih hma chu haw loh. Hei hi tûn thlenga an nih dan a la ni. A tlâwmngai zuala te phei chu ni naran tluk rual an ni lo. Mipui nawlpui tlan hmain an an tlan a, a hrehawm lai leh a harsa lai ber an pan chat thîn. Tleng hmasa ber leh haw tlai ber nih tum tlat hi tûn lai sanah pawh an la awm tlat nia. Mahse tlêm tlêmin tlâwmngaihna pawh a dal ve tial tial a, kang thelh ni khuaa tlan chhuak ve ta lem lo (damlo emaw hnathawk laklawh, cement chawhsa nei) pawh ni lem lo an ve awm ta zauh zauh. 

 Kang thelh nikhua hian mi hna thawka inhlawhte pawh hi an tlan ve mai thîn a. An thelh mih hnuah an lo haw a, an thawh chhunzawm ve leh mai thîn. He tah hian dân siam deuh a tha mai thei. Kang thelha tlan hun azirin hnathawktu hlawh hi inpêk ni thei se. Ram kang chu hnathawktu mawh a ni lova, a ruaitu mawh a ni hek lo. Hna pawh thawk thei loa nilenga kang thelh pawh a awm thei. Chawhma tha awrh thawk a, ram kang thelh tûra tlan a tûl châng a awm bawk. Hêngah hi chuan inlaitanin hnathawktu hlawh hi a zâtve chauh a ruaitu hian pe thîn se a dikin a rinawm. Ram kang thelh a ngaih thut hian hnathawktu chu an tlan mai thîn si a, an lo haw leh har viau pawhin a ruaituin an hlawh an pe full fo mai a, ram kang kha a ruaituin a mal tawrh leh ngawt zêl a, hei hi chu siam that a tha mai thei e.  

4. BIATE KHAW MI CHAK, HUAISEN  LEH TUAR CHHELTE  

i) AIRAWTA 

  Mizo tlangvâl rual 2000 lai German râl runa an zu kal khan Silchar an thlenin Mizo ho chu inbuanah an inel a, kha tah khan Biate tlangvâl Airâwta chu a chak ber a ni. 

ii) AITHUAMA 

  Ani hi Pu Rengliana pa niin Mizoram pumah insaihruipawhah pakhatna a lo hauh tawh a ni. 

iii) BAWIHTHANGA 

             Ani hi Rosuaka fapa a ni a. October ni 15, 1918 khan Biateah a piang a, pa san tha leh dawlh kai tak a ni a, feet 5.9 a sânga  ni. A awm 43 inches-a lian a ni. Ram hnathawh a chak êm êm a,1935 khan buh tin 9 hmun a vêng zo a, buh tin 600 a thar nghe nghe (Hman lai khan buh hi a hlawk vak lo tlangpui, khua a vawh vâng a ni ber).  

Chi sêr 70 (Kg. 80 vêl) Tlabung khua atangin Biate khua a phur thleng thak. Buh tin 6 phur chungin a duh hun hunah nghat miah lovin a inthiarpui thei bawk.  

 Bawihthanga hi 1974 khan Mizoramah inbuanah a chak ber a. India sipai Eastern Command Boxing-ah pakhatna a ni bawk. Sakei hliam thâng pika awm, tûma beih ngam loh chu amahin a luh chilh a, a kâp thal tawp mai bawk.  

 A chak mai a ni lova, a tuar a chhel êm êm mai kha thil mak a tling. Tum khat chu Khasi ram Sohriangkham luiah a thianpa nên sangha manin an kal a, luia an awm lai chuan Khasi helte chuan an rawn kâp ringawt mai a. Ani chu hmun thumah an kâp fuh a. Hmun khat chu an kâp tlang a, silai mu dang pahnih chu a taksaah a tang a. A ngûmah pakhat a tang a, chu chu awlai takin a zen chhuak mai a, a dâr chhûnga pakhat tang chu a thûk êm avângin kut lawng chuan lak chuah rual a ni lo a. La chhuak tûr chuan hnimhlum leh kahhikna hman an tum a.Mahse chutiang hman chu a duh ta tlat lo mai a. “Min zai dâwn chuan hnimhlum emaw kahhikna hmang lovin min zai rawh u,” a ti ta tlat mai a. Tiang chuan a duh ang chuan an zai ta a, an zai chhuahsak ta a ni.An zai lai chuan a che hauh lo a, a tuar tlang thak mai a ni an ti. 

iv) K. LALKÛNGA 

  K. Lalkûnga hi Thanhranga fapa niin 1975 khan Mizoram pumah patê inbuanah pakhatna a ni a. Kum 1977 pawh khan patê inbuanah pakhatna a ni leh bawk.  

 Mizorama palian inbuana chak ber ni thîn Lalkulha kha Biateah tum khat chu a kal a. Pu K. Lalkûnga nên hian an inbuantîr a. A vawi khatnaah Lalkulha hian a la kang a, a vawi hnihnaah K. Lalkûnga’n chiang fein a la kang ve thung a. A tum thumnaah chuan  inla kang bîk an awm lova, a tâwpah K. Lalkûnga hian a pawt thlu a ni.   

v) MI TUARCHHEL PU HNAWKA 

   Vêngkhama hi Patea pa a ni a. Tum khat chu khawtlang hnatlannaah taivâng seh na chi, Chhimtaivâng bu hi an hmu a. An thai darh a, mite chuan, “Thut ngam in awm em?” an ti a. Vêngkhama chuan a puan ven a hlim sauh sauh a, a thut ta hmak mai a. A mawngah chuan taivâng za rual dâwn chuan an seh bur ta far mai a. Ani erawh chu na tuar lo ang maiin vaibel a zu tual tual a, a hawi vual vual ringawt a ni, an ti.  

vi) MISUAL TAWRAWT TUDAWLTU      CHHUANVAWRA 

  Ani hi police huaisen tâwp a tling. Aizawl khawpuia misual tûru leh hnawksak bera neih Thanghuta-te thianho chu mi tinte hlauh a ni a. Kham pûkah tawmkûk neiin tumahin an luhchhuah ngam lova. Biate khua Police huaisen leh ro thap Chhuanvawra chuan, “Keima’n ka bei ang, ka man dâwn a ni,” a ti a, a man tûr chuan a kal ta a. 

            Misual Thanghuta te tawmna pûk bul a thlen chuan aw rawl chhuanin a inhrosa ta a, 

“Kha keimah Chhuanvawra, hlauh nei lo ka lo kal e, in chet vaih chuan ka bomb hlum vek ang che u,” a ti a, chu tah [A thiante awm hauh lo khan] “Thiante u, lo inrâlring rawh u, tlan chhuak an awm vaih chuan pakhat mah hlah rêng rêng loh tûr,” tiin a au that that bawk a. “Kha le, ka lo lût e, a che che chu ka kâp hlum nghal ang che u,” a ti a, pistol-a tin chungin pûkah chuan a lût ta a. Thanghuta, an hotupa ber kha a thiante hnung khirh tûrin a ti a, an hnung khirh loh chuan kah hlumah a vau chher chher mai a, tichuan anmahni leh anmahni chu an inhnungkhirhsak ta vek a, beih let chu sawi loh, a tum pawh an tum chhin ngam lo rêng rêng a ni.  Tichuan kut hnung khirh chungin a man ta phiar mai a ni an ti. 

vii) KEITE VAWHLUM NGAM LALKHÛMI 

  Lalkhûmi hi Lalber-a fanu a ni a. Tum khat chu Riangtlei kawng lam chulah ui hruaiin a kal a, a haw lamah chuan kalkawnga lui pakhatah a insil fai a. Chutih lai tak chuan a ui hruaite chuan hlauh nei ni awm takin an rawn bel chûk chûk a. Lalkhûmi sawi dân chuan, “Ka han dâk chhuak a, Keite hi min zuan tumin a lo inrâlring phân phân tawh mai hi a lo ni a. Ka hmuh vêleh ka bulah thing, banrêk tiat vêl chu ka la vat a, vuak tumin ka lo inring ta a. Tichuan min rawn zuan ta a, chuvêleh ka lo vaw thla tawp mai a, a tlûk hnu pawh chuan ka vaw zui nghek nghek mai a, ka vaw hlum ta a ni,” a ti. 

5. BIATEA THIL HMASATE  

1. Concrete Building hmasa ber 

 RCC Building hi Pu Lalrawna, Pu R. Lalchhanchhuaha Mualvêng pa hian Biateah a sa hmasa ber. 1978-ah an sa tan a, 1979 khan a chhawng hnuai zawk an luah tan. Biate mai ni lovin Tuichângrâl pumpuiah RCC Building nei hmasa ber an ni. A hun lai chuan 

Tuichângrâl titi a tling. Ropui an ti hle. 

2. Motor lian nei hmasa ber 

 Pu Chalzîka, Pu V. Lalzuia pa hian motor lian a nei hmasa ber a. 1976 khan motor lian TMB (S Model) an lei a, Driver atân Hnehliana, Lakhipur lam mi an chhawr a ni. Biate leh  Aizawl inkarah ni 2 vêl an thang tlangpui thîn a, motor leh bungrua an phurh kawp vek thîn. An neih tirh hian Biate to Aizawl chuan man hi mi pakhattân Rs. 30 a ni a, Aizawl to Biate chuan man erawh Rs. 40 a ni thîn.  

3. Radio 

            Radio nei hmasa ber hi Pu Lalchinga niin ani hi Storekeeper a ni thîn. 

4. T.V.   

            TV hi Pu Saihranga ten 1986 khan an nei a, Biateah a nei hmasa ber an ni. 

5. Tape Recorder 

            Pu Chalzîka ten an nei hmasa ber 

6. Disc Antenna 

            Pu Chalzîka ten an nei hmasa ber 

7. Gramaphone (Thingrem zai thei)  

Pu Chalzîka ten an nei hmasa ber 

8. Two Wheeler 

Mini Bullet bîke hi Pu Lalnunmâwia, Headmaster pension hian Biateah nei hmasa berin 1986 ah a nei a ni. 

Scooter: Scooter hi Pu R. Lalchhanchhuaha’n 1988 ah neiin scooter nei hmasa ber a ni. 

9. Video 

            Pu Thanhranga ten an nei hmasa ber  

10. Fridge 

            Pu H. Hmangaiha, Mualvêngten 1986-ah Fridge an nei a, a nei hmasa ber an ni. 

11. Jeep  

            Jeep nei hmasa ber chu Pu Lalrawna a ni. Pu Sângzuala, chaltlang Aizawla mi nên 

1967 khan an inlei tawm a. Rs. 4500 man a ni. Pu Rawna’n Rs. 3,000 a thawh a, Pu Sângzuala’n Rs. 1,500. 

12. Cane Chair (Hruipui thutthleng) 

 Biatea Cane Chair nei hmasa ber chu Biate lal, Laltluanga kha a ni. A lo thlen tirh chuan an en luih luih mai a ni awm e. Thenkhat chuan ‘Lal Compensate a dîl a niang,” an ti hial. Compensation la lo chuan a lei theih an ring bîk lo a ni mah na. Ropui an ti hle.  

13. Dining Table 

 Biatea Dining Table, chaw ei dawhkân sâng kan tih ang nei hmasa ber chu Biate lal Laltluanga te tho hi an ni. An neih tirh chuan khawtlang titi a tling chiang hle. Chhuata chaw en ei lai mêk a, thu chunga a kanga han ei dâwn tak chu mak an ti a, tûl ti lo fê fê an tam hle a ni awm e.   

6. BIATEA THIL THLENG DANGLAM THENKHATTE              

 Biate hi khaw upa a ni bawk a, kum 100 chhûng chuan chanchin a ngah hle ang tih a hriat mai a. Thil thleng dangdai, vawiin thlenga a chhûnga chêngten an la sawi fo reng thin pawh a tam hle a ni. Tûn tumah chuan tawi te tein tlêma zawng i han  târlang teh ang 

1. SE CHHUNA CHHUN HLUM PERA 

 Pêra chunga thil thleng hi Biate history-a thil râpthlâk theih tâwp a ni a, chuti chung chuan sawi lan tam loh tak a ni awm e.   

 He thil thlen lai hi kum 1870-’80 chho bawr vêl ni awmin an sawi a. Pêra chu sailo lal khawnbawl upate zînga mi a ni a. Amah chu Sadawt a niawmin an sawi nghe nghe. Pu Thangbuta sawi dân chuan - Pa fing leh rorêl thiam tak mai a ni a, chutiang mi a nih avâng chuan lal pawh chuan a ring hle a, a thu leh hla chu lal pawhin a zahin a la fo mai a. 

 Chutia lalin a thu leh hla a zah bîk avâng leh a lâk fo avâng chuan a upa puite chuan an thîk ta tlat mai a, tichuan lal hnênah pawh chuan, “Ani hi a rorêl ang ang hi i zawm vek a, nakin lawkah chuan i lalna hi a la chhuh ang che,” an ti a. Chung khawnbawl upahote chuan khawhring neiah an puh zui a, lal hnênah chuan an hek ta a. Kha tih lai kha chuan khawhring neia puhte chan a chau hle, tihhlum kha an hmabâk a ni mai. 

 Pêra pawh chu khawhring neia puh a nih tak miau avâng chuan se chhuna chhun hlum tûrin lal chuan a chungah râpthlâk takin ro a rêl ta a. An chhun hlum hma chuan mipuiin se chhun hlum tûr an chaih ang chiahin an chaih chau hmasa te te a, tichuan a chauh tâwpah an chhun hlum dâwn ta a. He tih mêk lai hian fanu hlir 12 lai a nei a, se chhuna an chhun lai vêl hian a nupuiin thla thum mi vêl fa a lo pai mêk a. 

i) A tu leh fatetân a tawngtai 

 Chutia se chhuna an chhun hlum dâwn lai tak chuan a mang a ang êm êm mai a, a lam tang ngam pakhat te mah a nei bawk si lova, tichuan mang ang êm êmin, “Hmuh theih loh pathian, ka tu leh ka fate hi lo awmpui ang che,” tiin a au ta ngawt a. Tichuan, se chhunin râpthlâk thei ang berin an chhun hlum ta a ni. 

 A nupuiin a pai mêk, a fa chu a lo piang a, vânneihthlâk takin mipa a lo ni hlauh a, a hmingah Zabiaka an sa ta a. Zabiaka chu a piang tlai an ti hle a, mipa a lo ni kher bawk nên, ‘Patlaia’ tiin an ko thîn bawk a ni. Patlaia  farnu 12 te kha khawiah nge pasal an neih zawh tak a, eng tin nge hun an hman zêl tih chu hriat a ni tawh lo a. 

 Patlaia erawh chu a lo puitlinin fa a nei a, a hming chu Thanseia a ni. Thanseia chuan fa a nei leh nual a, chung zîngah chuan Pu K. Thankûnga, Biate VCP rei tak ni tate hi an ni ta a ni. 

 He thu sawi chhuaktu hi Pu Thangbuta niin Pu Tekûnga nu leh pate inneih Golden Jubilee lâwmnaah a sawi a. A sawi zêl dân chuan Pera’n a thih dâwn darkara hmuh theih loh pathian hnêna a tu leh fatetâna mangang tâwp khâwk chunga a tawngtaina chu Pathianin a chhang a, a tu leh fate zîngah hausa lua chu awm lo mah se, khaw khata a rethei pâwl an awm lo mai ni lovin, buh leh bal nei thei pâwl, ngaihtuahawm lo tak an ni vek a ni,” a ti. A thusawi hi a dik hle a ni.  

2. PI LAIRUMI RAWNG TAKA THAH A NI 

 Kum 1980 chho vêl khan Pi Lairumi te chuan Fu huan an nei thîn a. Kha tih lai khan kurtai kg ah Rs.2.50 vêl a la ni a. Anni chhûngkua hi pawisa khawl thei tak leh taima tak an ni a, an kurtai man pawh an khawl tam ve hman hle. An pawisa khawl Rs. 4010 lai chu Pi Lairumi hian a paipawn a ni. An chhûngkaw sum kawltu, nu fel tak a ni. 

 Pi Lairumi te hian Pawi pahnih chhawr an nei a, an hming chu Vânlianthanga leh Kimnawna te an ni. Vânlianthanga hi a upa zawk a ni a. Anni hi thingzai mi niin mi hrang hrangin thingzaiah an chhawr thîn a. Pi Lairumi te chhûngkua pawhin thingzaiin chhawr an tum ve mêk a. Sualna hranpa êm êm an nei pawhin an hre lo. 

i) Pi Lairumi thia chhar a ni 

 Ni khat chu Pi Lairumi pawisa ah chu an hmu a, chhuhsak an chak ta tlat mai a. Tichuan neihsak dân tûr an rêl ta a.  April ni 18, 1985 ni tak chuan anni thian dun thing zai tûra an kal tawh chu an dam lo der a, inêntîr tûra damdawi Ina kal an duh thu an sawi ta a. A hmain Vânlianthanga hian an thing zai tûr hlanna lamah a ke a tina a, a bai sa deuh rêng rêng bawk lah tak a. Pi Lairumi chuan a khawngaih êm êm mai a, tichuan damdawi Inte a han kaisak a. Kha tih laia Biate Doctor chu Dr. Thangchungnunga a ni a. Ani chuan damdawi te a lo chawh nghe nghe a. 

 Chutia an damdawi In kai haw chu inah chuan Kimnawna chuan Pi Lairumin chu thingfakin a vaw hlum ta tawp mai a. Tichuan a pawisa ah chu an lâksak a, chu tah rizaiin an tel a, khûmah an mut thân a, Burma lam panin an kalsan ta vang vang mai a. He tih lai hian chhun dar 11 vêl a ni mêk a. 

 Tlaiah chuan Pi Lairumi chhûngte hnathawk chu an lo haw a, nu ber inah a lo awm si lova, a ngaihna an hre lo hle a. An thenawmte an han zâwt a, anni’n an thingzaite an dam loh thu leh damdawi a kaisak thute an lo hrilh a, chu pawh ni se lo haw a hun tawh hle si a. Pi Lairumi pasal ngaih tha lo chu damdawi Inah te a han kal a, an haw daih tawh thu bâk eng mah thu hriat belh a nei lo. 

 A lo haw leh chuan chhuatah hian thisen hi an hmu ta tlat mai a. Tlai dar 6 vêl lai a ri tawh a, ngaih thatna chi a ni tawh lo. Hmun tin chu an han dap zung zung a, an la en hmaih nia an hriat khum chu an han en leh a, rizai inzial hi an va hmu a, chu chu an va en chian nâk chuan  a chhûngah chuan Pi Lairumi chu an va hmu ta mai a, a lo thi khawng reng tawh mai lehnhgal a, an buai ta phat mai. Chu tih mêk lai chuan thingzaia an chhawr Kimnawna te thian dun chu hmuh tûr an awm bîk lo a, rinhlelh loh rual an ni ta lo.  

ii) Pi Lairum thattu rang taka zawn nghal a ni 

 Chu tah chiah chuan Biate tih dân pangngaiin khuang an han tlir ta a leh! Pa leh tlangvâl chu kar lovah an rawn pung khawm nghal a (Chu chu râl khel dar angah hman a ni a, chutiang khuang tlir ri an hriat tawh chuan pa leh tlangvâl zawng zawngte laklawh awm lovin khuang rikna lam an pan nghal thin. Thil tha lo lam a thleng a ni tih entîrna a nih avângin mitin an phawklek vek zêl a ni. He khuang an tlir thin hi Biate Museum-ah hmuh theih in a la awm nghe nghe) Tlangvâlho zînga a chak vak zual deuhte chu a ûmzui tûr chuan an intîr liam ta thuai a. Mahse a lo berah pawi an khawih atangin darkar 4 vêl a liam tawh tlat mai a, hmanhmawh taka an kal a ngai dâwn a ni. Tin, Burma lamah an tlan ngei em tih lah chu finfiahna chiang bal an nei chuang lo lehnghal a, an dinhmun a khawlh hle a ni.   

 Morsecode (êng hmanga inbiakna) hmangin zanah chuan mi thenkhatin Khawbung lam an han bia a, rinhlelhawm deuh an hmuh thu chu an rawn sawi a, tichuan Biate tlangvâl 20 rual vêl an intîr chho a, anni chu hmanhmawh bâk lengin an han tlan chho ta a. Khawbung atangin Vaphai kal tûrin motor an hmang a. Vaphaiah chuan Burma chinchâng hre deuh an lo awm a, “He ti zah êm êm Burmaa in han kal chuan buaina in tâwk ang, a chanve vêl chauh kal rawh u,” an lo ti a. Tichuan Biate tlangvâl 10 an inthlang chhuak a, Vaphai tlangvâl 5 vêl  Burma tawng thiam an hruai tel bawk a, tichuan Burma ram valh chhûngah chuan misual tual that zawng tûr chuan an lût ta a ni. 

iii) Foreign ram atangin an hnûk chhuak 

 Tiau Râl lawk an han thlen chuan Biate VCP Pu Tekûnga thianpa hi a lo awm hlauh mai a, an khaw lal a lo ni lehnghal a. Ani chuan a thianpa khuate an ni bawk a, man an nih lohna tûrin lehkha a lo siamsak hlauh mai a, tichuan chu lehkha keng chuan hmanhmawh takin an tlan chhunzawm zêl a.   

 Misual man tuma kal an ni bawk a, chau tawh hle mah se an kal hrâm hrâm zêl a. Tichuan Dihai khua an han thleng ta a, chu chu Falâm khaw bul lawk a ni. Tah chuan in pakhatah an han hmu ta hlauh mai a, an han man ta a, tichuan Mizoram lamah an rawn hruai haw ta a ni. 

 Misual tlan chhia an ni bawk a, an chau ve hle mai a, pakhat zawk ke bai deuh a nih avângin an kal chak lutuk thei bawk si lova, chutia Mizoram lama an han hruaithla leh chu an hah tawngkhawng tawh hle. Burma-ah pawh suah sual rawng an lo bawl nasa hle tawh tih a chianna chu an man tih an han hmuh khan Burma khaw mite an lâwm hle a, “Damin rawn chhuah hauh su aw,” ti an awm nawk an ti. 

 Kimnawna zawk hi kûngfu thiam tak mai a lo ni reng mai a, khua an han hruai thlen châng apianga mipuiin an han piai liam liamte hian an lo thle zeuh a, an khawih tumtuten an khawih thelh leh thîn a, an kut a ulh phêng phung mai niin an sawi. 

            Biate an thlenpui hmain an chau tawngkhawng ta lutuk a, an tlin ta lo a ni.   

3. MAK TAK MAIIN PI ROSIAMI A BO 

 Kum 1982 August ni 16 khan Biateah thil vânduaithlâk tak thleng a awm a. Fur lai a ni a. Pi Rosiami, kum 80 vêl lai ni tawh hi a thiannu Pi Chhingi nên thing phurin chaw ei khamah an chhuak a. Kum upate an nih tawh avângin hla tak kal thei an ni lova, tin kawngte a nâl bawk nên, tûna thingpui khawl bunna chhak lawk vêlah khuan an kal a, a hmun an thlen chuan thing chu an fawm tan ta a. 

i) A thiannu beidawngin a hawsan 

 Pi Chhingi chuan kawng kam vêl maiah chuan phurh tûr a dap a, phur khawp tûr vêl chu a hmu ta mai a. Pi Rosiami erawh chu kawng ruh chho, thing phurh kawngah a thing phurh ve tûr dapin Pi Chhingi kalna aia hlaah chuan a kal thung a, a kal chho lai pawh Pi Chhingi chuan a hmu reng a. Pi Chhingi chuan a phur a ngah hnu chuan a Pi Rosiami chu a au a, mahse a chhang ta rêng rêng lo mai a. A auh a auh hnu pawha chhangtu awm ta lo chu a haw san ta ngawt mai a ni. 

            Ina a haw hnu chuan a hnung deuhah tal a rawn haw ve mai tûrah a ngai a. Mahse rei ngial hnuah pawh chuan a la rawn haw tlat lo mai a, an ngaih a tha lo tan ta a. A chhûngte leh thenrual thate ngaih tha lo chu an thing phurhna hmunah chuan an zu kal ta ngawt a. A thian nuin a kal chho a tihna lamah chuan an zu en thuai a, tah chuan a thing phurhna paikawng an zu hmu ta mai a, a bulah chuan thing fak li nga vêl a phurh haw atana a tih ni ngei tûr hi a lo let ram bawk a, amah tak erawh chu an han auh chiam chiam hnu pawhin an hmu zo ta tlat lo mai. A zu kalate chu an beidawng titih ta a, tih zêl dân tûr ngaihtuah tûrin in lamah an rawn haw leh ta rih a ni. 

 Hemi ni tak hian Pu Zuia te motor - TMB hmanga zin tum mi thenkhat chu ‘Pu Thanhranga âwih’ an tih, Pi F. Lalthangvungi, Higher SS lecturer kawt chho âwih laiah khian an motor a tlan tlang theih ngang loh avângin an zin tûr chu an thulh a, an lo let ve leh mêk bawk a. Pi Rosiami chin hre tûra lo kalte an beidawn ruk riau avângin Pi Rualzachhingi te inah chuan ro an lo rêl laih laih a, chin châng ngaihvenin mi pawh  an lo pung khawm tak tak tawh a, mi rêng rêng chu an phawk lêk hlâwm hle a ni. 

ii) Zawng turin mi an pun ta 

 A zu zawngtute an beidawn tak viau avâng chuan chungkhat hnai leh thenrual tha mai lo deuh pun an titlu a. Mahse khawtlang pun ngawt erawh chu an la hreh fan a; High School naupang pun an rêl ta thung a. Chu tih lai tak chuan Aizawl zin tum, motor tlan tlang theih loh avâng thulh leh tate zînga mi Pu K. Zodingliana chu chinchâng ngaihvenin a va phei ve a; ani chu High School naupang pun tûr chuan an lo tîr chho a, tichuan High School naupang leh ina mipa awm chhun chhunte chu a zawng tûr chuan an liam ta zung zung mai a.  

 Pa fel deuhte chu an tlan hmasa a, Bungzung kawng te, Râlvawng kawng hrang hrangte en hmasa ila, mihring kal an awm chuan a chhui theih ngei ngei ang an ti a, tichuan chung chu uluk takin an han chhui a. Râlvawng lama kalte chuan Pu Thangpianga farm thleng an han chhui a, an bei dawng hle a, an lo let leh hlawl mai a. Bungzung lama kalte kha 

Râlvawng lama kalte aiin an lo let hmasa zawk a. Anni chuan, “Pawi sumdâwng kan tâwk a, ‘Tumah kan tâwk lo rêng rêng’ an ti a, kan beidawng a, kan lo let leh tawp mai a ni,” an ti ve bawk a. A chungkhat leh laina hnaite chu beidawngin an tap chuah chuah tawh a ni. 

 Tichuan khawtlangin an zawng ta luai luai mai a, Mizo dânin Ni sarih leh zan sarih an zawng a, chumi chhûng zawng chuan nasa takin an zawng a, chuti chung pawh chuan a hnuhma eng mah an hmu lova, a khuang cher bo hmak mai a ni. An beidawng let der a ni ber e. 

iii) A kum 3-naah a ruh ro an hmu 

 A hnu kum 3-na kum 1986 khan an ram vahnaah Pu Lâwmkima (Pu H. Sânghnuna pa) hian mihring malpui ruh ni awm tak a chhar a, a hma kum 3 kal taa Pi Rosiami bo kha tumahin an la theihnghilh lova, a mal ruh a nih ngei an ring hlâwm a. Tichuan, kha tih laia Biate CHC doctor Dr. Thangchungnunga an han entîr a, ani chuan uluk takin a lo endik a, “Hmeichhe mal ding lam ruh a nih hi,” a lo ti a. Chuti a lo nih takah chuan a bul vêlah ruhro dang hmuh beiseina an lo nei thar leh ta a, pasaltha eng emaw zâtte chu malpui ruh an hmuhna lamah chuan a tûkah an liam ve leh ta a. 

 An rin ang ngeiin malpui ruh a hma nia Pu Lâwmkima’n a chharna atanga field vâng lam chen vêlah hian pûk hi an han hmu a, kal pawh a har hle a, tah chuan a ruh dangte chu an han hmu leh ta hlauh mai a, an hmuh zawng chu an rawn hawn ta a. A vai chuan Pi Rosiami ruh ngei niin an ngai a, a chhûngten kuangah mâwi taka dahin pangngai takin an vui liam leh ta a ni. 

            Tichuan Pi Rosiami bona mual chuan ‘Tar bo mual’ tih hming a pu hlen ta a ni. 

7. BIATEA ZIRNA CHANCHIN  

1894 ah khan Mizoramah tih tak zeta awm chilh tûra Missionary ropui pahnih Rev. D.E. Jones (Pu Buanga) leh S.W. Savidge (Sap Upa) January ni 11, 1894-a an lo thlen hnu lawk khan chanchintha hrilh tluk zeta an ngaih pawimawh chu zirna a ni. Mizotân A AW B an siam nghal a, lehkha ziahte anmahni’n an han zir hmasa te te a, tichuan an thiam vêleh midang an zirtîr zui nghal zât a ni. 

i) PRIMARY SCHOOL 

 Khami kum atanga a kum 8-na 1902 ah Biateah enchhinna atân Missionary sapten school an din a. Zirtîrtuah Pu Chawngdawla an la a. A kum leh 1903 October thlaah thingtlang school nghet hmasa ber dawttu ni tûrin Biateah Lower Primary school din zui nghal a ni. He tah hian Pu Chawngdawla chu zirtîrtu atân lâk zui a ni nghal a. 1906 ah Pu Chawngdawla chu Pu Chawngliantlira’n a thlâk.  

 Ani chanchin hi han sawi thui hlek ila. Mizo lalten Mary Winchester pa an thah a, Mary Wichister an zu man rual khan Pi Nokhiri chu an man ve a. Chumi chu mi pakhatin nupuiah a nei zui a, chumi fa chu Pu Cahwngliantlira hi a ni e, tiin an sawi. 

 1910 ah Chawngliantlira chu Pu Khuanga’n a thlâk leh a. 1914 ah Biate kohhran chan Biak Inte a lo nei ve ta a, tah chuan sunday school awmin ziak leh chhiarte an zir thîn. 1921 ah Pu Khuanga chu hla phuah thiam CZ Huala’n a rawn thlâk ve leh a ni.1923 ah Biateah Primary school Exam Centre hawn a ni leh a, khaw tam tak atangin Lower Primary exam bei tûrin an lo kal khawm thîn a ni.  

            1934 ah C.Z. Huala chu Pu Chhuanzova’n a thlâk leh a, Ani chu Pu Chaldailova’n a thlâk leh a, ani chu Pu Rosiama, Hotupui tia hriat lâr tak chuan 1952 ah a rawn thlâk ve leh a ni. 

            1962 ah Primary school pakhat chauh awm thîn chu pahnih rawn awmin Primary School II a lo piang ta a, Head Teacher atân Pu Vunga lâk niin ‘Pu Vunga School’ tia hriat thin a ni. 1972 ah Primary School III a piang ve leh a Head Teacher atân Pu H. Hauzuala dah niin ‘Pu Haua School’ tia hriat thin a ni.  

 1991 ah Primary school II leh III chu Gov’t Eastern HS ah betin Comprehensive Eastern High School, Primary Section tiin a hming a pu ta a. Primary School I chu Gov’t Modern Middle School-ah hemi kum vek hian betin Comprehensive Modern School, Primary Section tih hming a pu ta a ni. 

 Hun a lo kal zêl a, English Medium school te din a lo ni ta a. CM English School din a nih hnuah PES School chu Biate North Kohhranin an din ve leh a, chu tah chuan school naupangte an lût tam tial tial a, chu chuan Primary School-te chu hmun dang ang bawkin a ei ral tial tial a, tichuan Primary School II eh III te chu  tih tâwp a lo ni ta a, tûnah chuan Gov’t Primary School chu pakhat chauh a awm ta a, tûnah thawk mêkte chu hêng mite hi an ni: 

Pi K. Lalruatsângi, Headmaster 

H. Lalhmangaihi, Teacher 

Lalramhlunmâwii, Teacher 

4.Lucy Lalmuanzovi, Teacher 5. T. Lalhmangaihzuala, H & P Inst. 

R. Lalthazuali, Teacher 

JL Fakzuala, Teacher 

ii) ANGANWADI 

 1982 khan sawrkârin Biateah Nursery School a rawn dah a, hêng Nursery School te hi Primary school ah betin an enkawlna hnuaiah a awm thîn a. 

 A hnuah Nursery School tih chu Anganwadi tia thlâk niin Mizoram sawrkâr Sepcial Welfare Department in an enkawl zui ta a ni. 

 Tûn dinhmunah hian Biateah Anganwadi Centre paruk a awm mêk a, a worker te nên a hming han târlang ila: 

iii) MIDDLE SCHOOL 

 1950 ah Private in Biateah Middle School din a ni a, Pu Chalhnuna chu Headmaster hmasa ber a ni. Ani hi Pu Tlangmâwia’n a thlâk a. 1966 ah Ram buai avângin khar lailawk niin kum 4 lai khar a lo ngai ta a. 1970 ah chuan Private bawkin an hawng tha leh ta a, Pu V. Thangmâwia chu Headmaster atân dah a ni. A hnu kum 2-na 1972 ah chuan deficit a ni ta hlauh a, 1980 ah sawrkârin provincialise ta a ni. 

 1983 ah Middle School II din a ni a, a hmingah Modern Middle School tiin sak a ni. Headmaster atân Pu Lalchungnunga lâk a ni a, 1985 ah deficit niin 1994 ah sawrkârin a provicialise ve leh ta a ni.   

i) Headmaster lo ni tawhte 

            1. Pu Chalhnuna      2. Pu Tlangmâwia 

 Anni pahnih hnuah hian midang headmaster an awm a, h kan hre chhuak zo ta lova, hun hnuhnung deuhah heng mite hi headmaster an ni leh hlâwm a ni:  

i) Tûna thawk mêkte 

1. Pi Lalthuami Tochhawng, i/c Headmaster 

2. Pu. K. Lalnunmâwia        3. Pu. TBC Lalsângliana 

 4. Tv. Zorammâwia             5. Pu. Lalhruaizêla 

 4. EASTERN HIGH SCHOOL 

 1958 khan Biateah private in High School din a ni a, Mizoramah High School pangana a ni. A hming atân  

Eastern High School tih niin vawiin thlengin he hming hi a la pu reng a ni. A hming hi Biate lal Pu Laltluanga Sailo sak a ni nghe nghe. Headmaster atân Pu VL Zaithanga B.A. lâk niin hetih lai hian High School khaw chhak tlang dungah Biateah bâk a la awm lova, zu awm lohna khua tia hriat lâr a lo ni vei rawl nên hmun hrang hrang atangin Biatea school kai an tam thîn hle  a ni. 

 Ram buai hma hret 1964 ah Deficit-a hlân kai a ni. 1966-ah ram a lo buai takah khan khar a lo ni leh ta tlat mai a. 1970 ah chuan High School neih leh duhna a lo lian leh ta hle a, tichuan private bawkin an hawng thar leh a, Pu K. Lung Muana  B.A., B.T. chu Headmaster atân lâk a ni a. Vânneihthlâk takin 1972 ah deficit ah hlânkai zui a ni leh nghal a, 1991 ah provincialise a ni ta a ni. 1984 ah HSLC Exam Centre ah dah niin exam hun lai vêl chuan Biate khaw chheh vêl atangin exam bei tûr an rawn kal thahnem thei hle a ni.  

i) Headmaster lo ni tawhte 

ii) Tûna EHS-a thawk mêkte 

            1. Pi V. Lalrempuii    2. Pu Lalrinngheta 

            3. Pi R. Chhingpuii   4. Pi Chawngzampuii 

            5. Tv. Malsawmkima (Internship till Nov. 2023) 

Pu B. Lalruatfela, LDC 

Pu H. Rodinmâwia, 4^th Grade 

5. BIATE HIGHER SECONDARY SCHOOL 

i) A Tobul 

 2002 kum tâwp lam khan VCP Pu Piangruma kaihhruaina hnuaiah Higher Secondary School Biate khuaa awm ve duhna khawtlang hruaitu VC te leh mi thahnemngaite rilruah a lian hle a. A din dân tûr chungchânga inrawnkhawmna VC ten khawtlanga a sâwm awm an tihte sâwmin sawihona 2003 January thla chawhma lamah Pi Piangruma VCP inah neih a ni a. Hemi tuma kalkhawmte hian Higher Seconadry School neih ve ngei thaa hriain Pu Piangruma kaihhruaina bawkin dt. 20.01.2003 Zan dar 6:30 p.m. ah inrawn khawmna neih leh a ni a. He tah hian kha tih laia VC member te chu Pu Piangruma, VCP, Pu BL Pârkûnga, Vice President, Pu H. Lalrosema, Secretary, H. Vânlalthaa, VCMember, Pu H. Laltanpuia VC Member, Pu C. Lalrinliana VC Member te an ni. 

 Hemi zanah hian VC member te bâkah Biate school zawng zawnga Headmaster leh Head Teacher te sâwm niin anni bâkah hian prominênt citizen - Pu K. Lalbulliana, Pu C. Lalkûnga, Pu Lalhmachhuana Râlte, Pu V. Lalpâwlliana leh Dr. H. Lalengzaua, Dental Surgeon, Biate CHC te an tel a ni. 

 Hemi zan hian tuana a hming “Biate Higher Secondary School Managing Board” tih hi phuah a ni a, Managing Board member hmasa ber pawh thlan/ruat nghal an ni: 

Chairman                   : Pu BL Pârkûnga, Vice Pre. VC Biate 

Vice chairman           : Pu C. Lalkûnga 

Secretary                   : Pu C. Lalrinliana 

Asst. Secretary          : Dr. H. Lalengzaua 

Fin. Secretary            : Pu K. Lalbulliana 

 School sâng zawk din chungchângah hian kha tih laia VC te leh Board member te an phur tlang hle mai a, Committee pawh a zing hle a ni. January ni 29, 2003 zana OB Meeting hmasa berin he school kal zêl dân tûr chuangchâng VCP Pu Piangruma leh Vice Chairman 

Pu C. Lalkûnga te School Education Director leh Secretary te dâwr tûra Aizawla kal tûra an rêl pawh rang taka kal nghalin, February ni17, 2003 zan board Meeting-ah an Aizawl kal Report an pe a, an hlim dar dar hle a ni. 

ii) Sum Leh Pai 

 School meuh han din tûr chuan sum leh pai a lo hau tak êm êm mai a. Board Meeting in  a lo rêl tawh angin February ni 24, 2003 (Monday) niah Gov’t Eastern High School Biateah sawrkâr hnathawk zawng zawngte an hlawh atanga 1% thawh tûra koh khawm leh ngen an ni a. Muster roll-a thawkte pawhin 1% tho an thawh a, sawrkâr hnathawkte pawh an phûr tlang hle. Tin, dâwrkai leh Biatea a awm thei deuhnia ngaihte pawh donation thawh ve tûrin lehkhate pêk leh hrilhfiahte neih a ni a, Amaherawhchu, sum lamah pawh malsâwmna an dawn chhoh tak viau avângin dâwrkaite hi chuan an thawh hman ta lo a ni. 

 Tin, kha tih lai khan World Bank Road, Biate to Khawzawl chu Tarmat Company in a thawk mêk a. Tûna Biate Quarry atanga Company in lung an lâk atangin he schooltân hian cubic metre tinah royalty Rs. 25 lâk zêl a ni a, kum khtatah chuan Rs. 120,000 lai a lo tling khawm a ni. Tin, Râlvawng kawn, Tarbo Mual in lam pang chho thing chu Rs. 50,000 in hralh a ni bawk a, hêng sumte hi Pu Piangruma, VCP leh Pu H. Lalnunmâwia te hmingin Sialhawk Rural Bank ah dah thîn a ni.  

iii) Zirtîrtu Lâk hmasak 

 Zirtîrtu (Lecturer) hmasa ber mi 4 te chu Board in la se, a tih angin interview-na hmasa ber chu April ni 15-17, 2003 chhûngin Pu KL Lianchia In, Electric Vêng, Aizawlah neih a ni a, tah chuan hêng mite hi lâk an ni: 

Pu Lalsângliana Kawlni, Sialhawk 

Nl. R. Lalduhsaki, Biate 

Nl. Elizabeth Lalnunpuii, Khawlian 

Nl. Lalrozami, Zemabawk 

 Zirtîrtu lâk hmasak berte hi thla tin Rs. 3,000 hlawh tûra lâk an ni. Zirlaiten Admission Fee  Rs. 500 bâkah Tuition Fee atân Rs. 150 an chawi a ni.  

 Higher Secondary school hian a tîrah building a neih loh avângin Gov’t EHS Biateah attach a ni a, kha tih laia Headmaster Pu H. Lalnunmâwia leh a thawhpuite inpêkna a sâng hle a ni. 

iv) Hawn a ni ta 

 Biate Higher Secondary School hawnna hi Gov’t Eastern High School, Biateah May ni 1, 2003, zîng lam dar 10:00 a.m. ah VCP Pu Piangruma’n urhsun takin a hawng a ni. He a hawnna inkhawmah hian zirlai thar tûr te, zirtîrtu lâk tharte leh Managing Board member-te pawh kal an tha hle a ni.   

 Biate HSS ah hian Acting Principal hmasa ber atan, Pu H. Lalnunmâwia, Headmaster, Gov’t EHS Biate chu September ni 5, 2003-a Managing Board committee Meeting chuan a ruat a. Tin, hmaih chi miah loh chu Pu C. Lalkûnga, Managing Board vice chairman chuan sum lama Board in thahnem a ngaih êm avângin Mizo Subject-ah kum khat el euh mai hlawh  phut hauh lovin a thawk a, hei hi thil chhinchhiahtlâk tak a ni. 

v) Permission Chungchâng 

 School hi mahni thu thua hawn ve ngawt theih a ni lova, sawrkâr lam atanga phalna neih ngei a ngai a ni. He shcool pawh hi hawn a nih atangin permission hmuh dân tûr ngaihtuah nghal char char a ni a. VCP leh a thawhpuiten theih tâwpa nawr a nih hnuin a din kum 2003 kum tâwp lamah Permission leh Grant-in-Aid chu sawrkâr atangin an hmu thei nghal ta mai a. Grant-in-Aid hmuh a nih takah chuan sawrkâr atangin kum tin Rs. 75,000 dawn thin a ni ta a. Managing Board lam pawh an lâwm tlang hle a ni. September ni 15, 2004 Managing Board Meeting chuan September 2004 atang phei chuan sawrkâr hnathawkte hlawh atanga 1% an cut thin pawh chu an titâwp ta a ni. Kum hnih chhûng zet chu sawrkâr hnathawkte hlawh atangin 1% cut a ni tihna a nih chu. Sawrkâr hanthawkte an fakawmin an titha hle a ni. 

vi) AdHoc Aided ah a kaisâng 

He school hian Pathian malsâwmna dawng zêlin VC hrang hrangte kaihhruaina hnuaiah hma a sawn ve zêl a. Managing Board Committee Meeting April ni 26, 2004 a neih chuan VC President apiangte Managing Board Chairman ni zêl tawh se, tiin a rêl a, chutiang chuan vawiin tlengin a la kal ta zêl a ni. March 2006 ah Pu Piangruma. VCP pawh Pu PC Lianthangpuia’n a rawn thlâk ta a, VC term thara Managing Board Office Bearer-te chu hêng mite hi an ni: 

            Chairman       : Pu PC Lianthangpuia, VCP 

            Vice chairman : Pu K. Lalbulliana, Teacher EHS 

            Secretary       : Pu H. Lalnunmâwia, Headmaster, EHS 

            Asst. Secretary : Pu C. Vânlalhruaia, Secy, VC 

            Treasurer       : Pu H. Laltanpuia 

            Anni pui tûr hian Board member eng emaw zât ruat an ni bawk. 

 Board chairman VCP Pu PC Lianthangpuia kaihhruaina hnuaiah HSS hi Ad hoc Aided tûra nasa taka nawr chhunzawm zêl a ni a. Tichuan, kan VC te thawhrimna azârah April ni 1, 2008 khan School dang tam takte zîngah Ad hoc Aided dinhmunah hlânkai a lo ni ve ta a ni.  

            2008 kum tîr lam thleng hian hêng mite hi Biate HSS ah an thawk: 

Pu Lalsângliana Kawlni, Principal 

Pi R. Lalduhsaki, Lecturer, Pol Sc 

Nl. F. Lalthangvungi, Lecturer, Edu 

Nl. Ranghakliani, Lecturer Mizo 

v) Thawktu lâk belh zel a ni 

 Nl. Ramnghakliani hi 2008 kum tîr deuhah lâk a ni a, chumi hnuah English lecturer tang mêk chuan pasal a nei a, a thawh chhunzawm theih tak loh avângin a aiawh tûr zawn a ni a, a aiah Tv. Zomâwia Khiangte chu lâk a ni. Ani hian May ni 16, 2008 (Friday) ah a zawm ve a ni 

 He tih lai hian Principal hian Rs. 5,000 a hlawh a, Lecturer dang hian Rs. 4,000 an hlawh thung a ni. Ad hoc Aided status a hlânkai a lo nih takah khan a hnuaia mite hi a thawh khat nan lâk chhunzawm an ni: 

            1. Tv. F. Lalnunthara,          2. Pu H. Lalnunhlima,  

            3. Tv. Lallâwmsânga  

A thawh hnihnaah hian hêng mite hi lâk leh an ni: 

            1. Tv. Lalruatfela                  2. Nl. Gospel Hmangaihthangi 

            3. Nl. H. Lalhmingliani  4. Tv. Aldriene F. Lalnunneia  

            5. Tv. JC Zoherliana  

 Ad hoc Aided School ah Fourth Grade pakhat sawrkârin min pe thei hlauh a, Pu. Laltlansânga chu hemi atân hian lâk a ni bawk. 

 Ad hoc Aided dinhmuna a kai hnu lawk May 2008 thlaah hian Eastern High School-a attach chu tihtâwp niin Primary School-I building hlui, Vawktekhaitlang-ah hian May ni 20, 2008 ah an insawn thla ta a ni.  

 Hun a lo kal zêl a, VC lo inthlâk lehin Pu Liankûnga VCP a lo ni leh ta a. HSSLC Exam Centre chungchângah te, School Electric Connection leh thawktute B.Ed Training leh thil dang tam takah hma lâkna hi a awm chho reng a ni. 

 Hun lo kal zêlah VC thar a lo piang leh a, VCP Pu R.V. Hluna chu Managing Board Chairman thar a lo ni ta a. Pathian zarah school pawh a kal tluang chho zêl a, thawktute pawhin B.Ed. te a tahtawlin an han training zêl bawk a. School-in harsatna lian tham êm êm tâwk lovin hun a kal chho ve zêl a, Tûnah hian VC Term te lo inthlâkin Pu C. Lalrinliana chu Board Chairman a ni mêk a ni. 

 Economics Subject Lecturer Pu Lalnunhlima chuan hna dang a thawh tak avângin a ai awh tûrin Tv. K. Zoramsânga chu lâk a ni a, June ni 26,2012 ah a thawk tan. Economics lecturer pakhat Pu Lallâwmsânga chu 2022 khan vanduaithlâk taka a boral avângin a aiah Tv. K. Laldinkima 2022 vêk khan lâk a ni leh a ni. 

 He School hi din a nih atangin tûn thleng hian zirlai 300 chuangin HSSLC an pass chhuak tawh a, 2010 khan he school-a zirlai Lalrinngheta chu Mizoram pumah Arts Stream bîkah 10-na a ni pha nghe nghe. 

vi) Provincialise a ni 

 Biate HSS hi Pathian zarah a tluang ang reng hle a. School dang hmasawn rualin hma a sawn ve hret hret zêl a. September ni 27, 2023 khan Council of Minister thukhawm chuan Higher Secondary ad hoc Grant-in-Aid 12 te chu a provincialise ta a, chumi zîngah chuan he 

school            pawh  hi         a          tel        ve        leh       a          ni.        Provincialisation       Effective             date    chu  1st October 2023 a ni. Din a nih atanga a kum 20-na chiahah Provincialisation dinhmunah hlân kai a ni ta a ni. 

 vii) Tûna Bite HSS-a thawk mêkte: 

Pu Lalsângliana Kawlni, Principal 

Pi. R. Lalduhsaki, Pol. Science Lecturer 

Nl. F. Lalthangvungi, Education Lecturer 

Pi. Ramnghakliani, Mizo Lecturer 

Pu Zomâwia Khiangte, English Lecturer 

Pu F. Lalnunthara, Pol. Science Lecturer 

Pi. H. Lalhmingliani, Mizo Lecturer 

Pu JC Zoherliana, History Lecturer 

Pu Lalruatfela. History Lecturer 

Pu Aldriene F. Lalnunneia. Education Lecturer 

Nl. Gospel Hmangaihthangi. English Lecturer 

Tv. K. Zoramsânga, Economics Lecturer 12. Tv. K. Laldinkima, Economics Lecturer 

13. Pu Laltlansânga, 4^th Grade. 

6. CHAWNGI MEMORIAL ENGLISH SCHOOL 

 CM English School hi Pu H. Lalnunmâwia te chhûngin 1999 khan an din a, Nursery atangin Class VII thleng a awm. Naupang pawh an nei theiin an bawh hle a ni.  

i) Principal Lo ni tawhte: 

Tv. Zothanpuia                                  

Pu C. Thanmâwia Hmar     3. Pu.Danny K. Lallâwmzuala ii) Tûna thawk mêkte: 

Danny K. Lallâwmzuala, Principal 

Mary Hmingthanpuii 3. Lalrosânga 

            4. Lalramdingchhuaka         5. Ramnghinglova 

            6. C. lalsiamkima      7. Lalremruati 

            8. Ramchhanmâwii  9. Hmangaihzuali 

            10. Lalmuankim Jongte 

7.PRESBYTERIAN ENGLISH SCHOOL, BIATE 

 Presbyterian English School, Biate hi Biate North Kohhranin 2006 khan an din a. Din a nih tirh atangin naupangin an bawh hle a, tûn dinhmunah hian Biatea school naupang ngah ber an ni. School naupangte Monthly fee bâkah Synod atangin kum tin Lump sum Grant Rs. 150,000 an dawng thîn a ni. Manging Board member changtlung tak awmin kohhran Upa ngei Chairman-na hnuaiah zawi leh dam thlapa enkawl a ni a, Pathianin mal a sawm hle niin a lang: 

i) Principal Hna lo thawk tawhte: 

            1. Jim D. Gangte      2. F.Lalnunpâri 

            3. Rev. B. Lalremzuala 4. Upa K. Lalbulliana 

            5. Rev. Samuel Lalhmangaihsânga 

            9. Aldrin Lalhriatpuia            10.R. Lalnunmâwii 

            11.Grace Vânlalhriatrengi 

            12. Lallungmuana 

8. BIATE LEH FAINA  

 Zêp nâk maw, Biate lârna ber chu ‘faina’ hi a ni kan ti thei ang. Ni e, Biateah hian faina hi hun rei tawh ngial atang khan thupuiah an lo neih tawh a, Lal lal lai hun daih atang tawh khan faina hi kalpui a lo ni tawh a. 

i) Faina hi Biateah an buaipuina a rei tawh 

            Lal Thangchuanga lal lai khan kâr tin khaw chhûng nun phung leh faina vawn that leh that loh enthlithlai tûrin Kawlbawi a ruat a. Faina kawnga hma la tha lo leh kawh mawh bawl deuhte chu ‘siki’ an chawitîr thîn a ni. 

 Tin, YMA din a lo nih khan faina kawngah nasa takin an thawk thîn. Anni khan In chhûng leh bungbêlte vawnfai an zirtîr a, a endik hnate thlengin an thawk thîn a ni. Fai lâwmman pawh an lo pe thîn a ni. 

ii) Khawlai tifaitu ran khuahkhirh kha a hma hle 

 1947 a Mizo Children Association din a nih khan naupangho chuan inrinni tuk tinin kawngpui an phiat fai thîn a ni.  Tin, fai tûr chuan khaw laiah ran êk a awm loh a ngai tih hriain 1980 chho bawr vêl daih tawh khan khaw chhûnga sial luh an rem ti tawh lova; 1986 ah vawk an khuah khirh tan bawk. An khuah khirh tirh chuan a In hran pawh sa lovin an in hnuaite an hung a, tah chuan an chentîr mai zêl thîn a ni. Hun a lo kal zêl a, a hrana in saksak an ching chho ta zêl a ni. 1993 ah ar hi khung tan a ni bawk. 1994 ah bawng, sakawr, kel, beram etc. te khuah khirh an ni zui leh bawk. 2003 khan ui pawh an khuah khirh zui leh a ni.  

 Heti chung hian kha dang danga tih dan ang thovin in tina bawlhhlawh chu a tlangpuiin anmahni hnaih ber kawrah an paih mai thin. Kawng atanga bawlhhlawh paih a lan ther thur loh chuan chhungkaw fel fai tak an ni mai. Hun a lo kal leh deuh hlek a, Biate khaw chhunga luang tlang luiah chuan paih loh ni se tiin VC ten thuchhuah an siam a, mahse Motor-a paih a nih miau loh avangin bawlhhlawh paih tura hla taka kal chu a harsa an ti tlang hle a ni. A fel deuh chuan an fehnaah an bawlhhlawh an phur a, khaw chhung atanga hla deuhah an paih thin.  

iii) Motor hmangin bawlhhlawh paih tan a ni 

 2013 khan YMA Committee chuan hun rei tak ata tawh an chak êm êm thîn, an la tih theih loh chu ti tanin, YMA bul tumin in tina bawlhhlawhte motor-a paih tan an rêl a. Motora bawlhhlawh an paih tan ni hi February ni 14, 2013 a ni. Bawlhhlawh paihna chu khaw chhung atang 3 kilometre vela hlaah a ni a, he ta tang hian khaw chhung leh a bul vela bawlhhlawh an paih thin chuh a lo tâwp ta a ni. In tinah motor hire-na senso tur Rs. 10 an khawn a. Tichuan, motor-a bawlhlawh paih chu vawiin thlengin châwl miah lovin an la ti ta reng a ni.  

            Hemi vang hi ni tak maw, 2015 khan Champhai District chhûnga khaw fai berah thlan a ni a (Champhai District-a a la beh lai a ni).  

iv) Faina beihpui thlâk tak tak chu kum 2017 kha a ni 

 2017 kum kha Biate a fai tak tak intan kum a ni. Hemi kum hian Urban Development and Poverty Alleviation Department chuan Notified Town zîngah Fai lama inelna a buatsaih a. Pakhatna nih ngei tumin chêt an han la tak tak mai a; hemi kum hian kawrpui leh Biate hnaih kawr zawng zawng tihfai a ni. He hna hi a hautak hle a ni.  

 Biate khaw chhûngah hian kawr hi 10 chuang a luang tlang a, a tam zawk chu fûr lai chauha luang a ni a, kum tluana tui hna nei pawh an awm bawk a. Sawi tawh angin heng kawrahte hian 1900-a Biatea Kairuma hoa an kai atang khan bawlhhlawh hi 2013 kum tîr lam thleng khan paih a ni ta ngar ngar mai a!! Kum 113 chhung! 2013 atanga khan kawra paih an chin chu an sim ta a, mahse kum 113 chhung teh meuh, Mizorama khawpui lian 4-na ni pha ve tawh thînte bawlhhlawh paih vûm tam dan tûr chu suangtuah phâk bâk a ni awm e. 

 Tichuan, kha tih laia VCP Pu R.V. Hluna kaihhruainain Pu C. Lalrinliana, Vice President (tûna VCP ni mêk) te, Pu H. Lalchhuanawma, VCM te, Pu H. Lalmuanpuia, VCM te, Pu Zairemtluanga, VCM te, Pi C. Lallâwmkimi VCM te, Pi Lalnîlâwmi Râlte, VCM te leh VEC member Pu Biakchhuana leh Pi Vanzîki te kha a hmahruaitu an ni. Anni hian Biatea kawr hrang hranga hmasang ata tawh bawlhhlawh tawih thei lo, thîr lam chi te, polythene leh plastic te, a bîk takin thawmhnaw hlui, chirhdiaka inchiah rei tawh, uih vung vung mai, tawih ral si lote chu luhchilhin an han hai chhuak ngheng mai a ni! Awihawm lo khawpa tam an paih a ni. “Kelsih kawr chauha kan bawlhhlawh hai chhuah pawh hi Tipper trip 23 a ni a, Khawthar tui kawr bîk atangin trip 13 kan hai chhuak. Chu chu mumal taka a fact and figure ka chhinchhiahna bu-a ka chhinchhuah chu a ni. Kan thenfai lai khan   a hautak hle a, darthlalang keh them hai fuh palha kut tih thite kan nei nawk a, a changin bawngtuthlawhin kan hai a, a tam berah chuan kut lawngin kan hai,” tiin Pu RV Hluna, kha tih laia VCP khan min hrilh a ni. Chuti a nih chuan Biatea kawr 10 chuangah hian Tipper trip 60 vel chu phâng lovin an paih ang tih a rin theih a ni.  

 “Biatea kawr kan han tifai tak tak chu a turu hle. Kawr kha a tenawm hlawm hle a; bawhhlawh paihna rei tawh, tâng thûk tak tak a tam êm êm a; Jacket chhia te, tu pa kekawr chhiate, tu nu pawnfen hnuaite kan han pawt fan dâwr dâwr a, kan pawt dawk thut a, kan hmai leh kan taksaah a rawn tuam hlup mai thin a, kan luak lo chauh zêl. Tin, bawlhhlawh paih thar, tawih tan te, sa thi uihte kan tawng zing êm êm a, a then a uih tantîr te a ni a, a then a uih vâng lai te, a then a uih zo lam tawhte an ni.  Uih dan inang lo tak tak - uih thâng huam te, uih thûr deuh nghur te, uih vung vung te a inpâwlh nuaih mai a ni. Kan zuk hamna lamah uih tak, nâl pelh pulh zu ham chu hrehawm tak a ni, kan kut kan tât nawk nawk zêl mai a ni. Kha tia kan tihfai lai kha chuan chhûnah kuhva pawh, sahdah pawh eng mah kan ei ngai lo, min pe mah se kan ei thei lo. Chaw pawh ei hlei thei lo kan awm nawk zêl,” tiin kha tih laia VC member Pu H. Lalchhuanawma’n min hrilh a ni.   

 VC te khan hlawhfa an han ruai thin a, mahse an ten deuh tlat mai a, chuvangin tihfai an duh si a, a khaw nu leh pa chan chang takin anmahniin Biate faina thanmawhbawk, kawrpui tihfai hna chu ‘luhchilh nun’ tak takin an luh chilh a, tichuan tûn dinhmun hi an thleng thei ta a ni. VC ten tenna nei hauh lova an han tih takah chuan hlawhfa rawihte pawhin an ten lo ta deuh a, an hnung an zui ve ta a ni. 

  A hma zawng kha chuan kawngpui leh kawng kam vêl an tifai ve a, han en mai chuan a fai hmêl ve vûk thîn a, kawr erawh entlâk a awm ngai bik lo. 2017 atanga kawr an han tifai tak tak chu hmuhnawm a tling hial a ni. Kha hna hautak tak an thawh hnu atang kha chuan âwm nêm zâwkte pawhin awlsam takin an chhunzawm thei tawh a ni.  

            2017-a pakhatna an nih lâwmpui nan kha tih laia UD & PA Minister Pu 

Zodintluanga’n Project chêng nuai 50 man siamna daih a pe hlauh mai a. Chu chu an hmang tangkai hle. Kawr zawng zawng kawngpui atanga lang thei chin a chhuat lung an phah a, a bang an rem vek bawk a. Zunin 10 chuang an siam a, kawngpui zim lai an zauh   teuh bawk, Biate hmêl a thlâk danglam dawrh a tih theih ang. 

v) Fai lâwmman an dawng ta mawlh mawlh mai 

 Kha ta tang khan a zâwnin 2018,2019,2020,2021 ah te khawpui fai inelnaah pakhatna a ni chho ta zêl a ni. 2022 ah erawh chuan pahnihna niin Ngopa khua chu pakhatna an ni ve thung. A zâwna Khawpui fai ber kum 5 an nihna hi khawtlangin ropui takin ruai nên October ni 10, 2022 khan Biate town Faina Committee huaihawtin lâwm a ni. Hriat rengna lungphun pawh phun a ni nghe nghe.  

 Biate khua hi faina kawngah an lungrual hle a. Masi bial 14 te hi fainaah an inel thin a, an tang nasa thei hle. 

Tin, School hrang hrang te, Office hrang hrangte leh restaurant-te pawh faiah an inel châmchi a ni. Hêng inelnaah hian vêng laili aiin vêng dai dêng lam pakhatna an ni zêl thîn hi thil chhinchhiahtlâk tak a ni. Khaw daifêm bal a awm vak ngai lo tih a chiang a ni. Mahse, fainaa lâr chu thil hahthlâk tak mai a ni a, tanrual mar pât reng a ngai a, zuai deuh châng pawh an ngah ve thîn hle a ni.  

 vi) All India levelah pawh Fainaah an lang thin 

            Tin, India ram pum khaw 4,000 chuangte zînga fai inelna Swachh Survekshan ah pawh tum hnih a lang. 2018 khan “Best City in innovation & Best Practices in North East zone” tia puan a ni a. Tin, 2021 khan “Best City in Citizens’ Feedback in the North East Zone” nihna a lo hauh tawh bawk a ni.  

9. BIATEA KUM PAWIMAWHTE (A indawt dânin) 

1780 hma lam - Biate hnamin Zialung khua an luah hun lai vêl. 

1780 hnu - Biate hnam hovin Hringchar Phai an luh thlâk        hun vêl 

1900 Pâwltlâk thla - Lal Kairûma’n Biate khua a din tan a, an inbeng bel tan. 

1901- Biatea inbenbel kum 

October, 1903 - Biateah Lower Primary School din tan a ni. 

1904 - Zosaphluia (D.E. Jones) Biate a tlawh kum. 

1906 - Biateah Kristian an awm tan (Fehtea, Lalbuana,Thangburha leh Lalhema) 

1907 - Biate Hmun atangin Râlvawnga Insawn kum. 

1909- Râlvawng atanga Biatea let leh kum. Bawk Vêngah bawk an khawh. 

Feb 22, 1912 - Kairûma thih ni. 

1913 - Abor run kum. Biate tlangvâl 14 an kal ve. 

1914 - Lal Thangchuanga rorêl tan kum. Biate Biak In sak tan a ni. 

1917 - German ral run tûra Mizo tlangvâl kal kum. Biate          tlangvâl 20 an kal tel ve. 

1918- German râl run lo haw kum.  

1919 - Hripui len kum. Abor run tum hnihna. Biate  tlangvâl 6 an tel leh. 

1920 - Biatea thingpui phun tan kum. Salvation Army din kum a ni bawk. 

1921 - Pastor Fehtea Tirhkoh hna zir zovin Biateah a  thawk   tan. 

1926 - Pastor Fehtea pastor atân nem ngheh a ni. 

1921 - Zirtîrtu CZ Huala thawh tan kum. 

1923 - Lower Primary school Exam centre Biate hawn tan a ni 

1925 - Missionary Miss Kitty Lewis (Zomâwii) Biate tlawh  kum. 

1929 - Minpui Kum. Rorêl thiam manah Lal  Thangchuanga’n Silai a dawn kum. 

1937 - YLA Biatea din kum. (1947 ah YMA tia thlâk a ni) 

1938 - Biate Zawkbuk thiah kum. Tuichângrâl Presbytery        pian kum.  

1939 - Biate lalin Daithlang thingpui huan a theh kum. 

1943 - Lushai Brigade Biatea awm kum. 

1946 - Mizo Union din kum. 

1947 - Mizo Children Association din kum. 

1948 - Lalthangchuanga thih kum  

1949 - Mizoram Bawrhsap Barkataki Biatea a lo kal a, Laltluanga chu Biate lal atân a ruat. 

31.1950- Middle school hawn tan kum. 

1961 - Pastor Lalbiakthanga’n Zawlnei Conference  Biateah a ko. 

1969 - Biate Sialhawka khawm tûra tih kum. 

Feb ni 5, 1969 - Biate Sialhawka khawm tûra tih chu  thulh  leh a ni. Hemi ni hi vawiin thlengin Biateah serh a la ni. 

1970 - Ram buai avânga khar lailawk Middle school  leh High School hawn tan leh kum. 

Dak pawh ram buai avânga chawlh tawh chu chhunzawm      leh a ni. 

1972 - Primary School III hawn tan kum. 

1975 - Biateah Primary Health Centre (PHC) din a ni. 

            Biatea Chanchinbu hmasa ber “Bengvarna” tih  chhuah tan a ni. 

March ni 10, 1976 - Tuichângrâl Truck Road hawn ni. Biatea Truck leh Bus luh tan ni. 

1980 - Biatea khaw chhûngah sial luh khap tan a ni. Pi Lairûmi râwng taka thah a ni. 

38. 1981 - Biate chu Sub town-a puan a ni. Middle       School II hawn a ni bawk.  

May 19, 1981 - Biatea Electric khawl hawn ni.  

1982 - Biate EHS chu Exam Centre dinhmun pêk a ni.Pi Rosiami thing phur a bo hlen. 

1985 - Biate khaw chhûng kawngpui Blacktop a ni. 

1993- Biateah ar khung tan a ni. 

1994- Bawng, sakawr, kel, beram etc. khuahkhirh tan a ni. 

1997 - Revenue Deptt. in Biate In tin an patta. YMA  Diamond Jubillee ropui taka lâwm a ni.  

2003 - Biate Higher Secondary school din kum. Ui khuah        khirh tan a ni bawk. 

February 14, 2013 - Biateah a vawi khat nan hemi ni  hian YMA bul tumin motor-a hnawm paih tan a ni. 

Feb. 21, 2014 - Biate Thingpui Kut ropui taka hman a ni.  

2015 - Champhai District chhûnga khaw fai bera thlan a ni. 

2017- Mizoram Khawpui fai berah a hmasa ber atân  thlan a ni. 

2018 -Mizoram Khawpui fai berah a tum 2-nan thlan  leh a ni 

2019 -Mizoram Khawpui fai berah a tum 3-nan thlan  leh a ni. L. Malsâwma Colney thih kum. 

2020 -Mizoram Khawpui fai berah a tum 4-nan thlan  leh a ni 

2021-Mizoram Khawpui fai berah a tum 5-nan thlan  leh a ni 

2023- YMA Inkhâwmpui Lian Biatein a thleng. Biate HSS chu Provincialise a ni.