Khawzawl, dated 21st May 2025: Vawiin chawhnu dar 1 khan Khawzawlah air raid (van sang atanga bomb hmanga inbeihna) thlen thulha tih dan tur enchhinna'n mock drill neih a ni.
Mock drill hi 2nd IR Batallion thuthmuna inbeihna thleng anga enchhinna neih a ni a, Shillong Air Force Headquarters atangin chhehvela thlawhtheihna thlawk thu dawn a ni. Dar 1-ah emergency alert siren tih rik a ni a, dar 1:10 ah a him tawh thu dawn niin white alert siren tih rik a ni. White alert rik rualin police te, ambulance te, QRT te, NCC te leh SDRF te rang takin DEOC Control Room panin DC Office an thleng a, inhrilhhriatna hun pek an nih hnuah 2nd IR Batallion lam an pan nghal a. A hmunah hian Inspector Pu Lalthanmawia chu Responsible Officer niin Adjutant Pu Lalthianghlima, Incident Commander hnenah chinchang a hrilh a, thi leh inhliam an awm nual bakah chin hriat loh an awm tih thu a sawi. QRT leh SDRF te chuan sawngbawl ngai te an hruai chhuak a, medical team te'n temporary hospital dinin na tuar hnenah triaging te, First Aid te leh a tul dang hmangin an lo buaipui nghal a. Mei khu awm pawh fire tender hmangin QRT leh SDRF chuan an ti thi nghal a ni. Election Officer Pu Timothy R. Lalhmangaiha chu Control Room-a Responsible Officer niin chhiatna hnuna thil thleng hrang hrang MPRO te'n a hnenah report an thehlut zel bawk a ni.
Mock drill neih zawh hian 2nd IR Badminton Hall-ah debriefing neih a ni a, Khawzawl SP Pu F. Lalbiakzauva leh Addl. DC (Incident Commander) ni bawk Pu Lalfakzuala te'n mock drill kal dan leh inkaihhruaina chungchanga an ngaihdan te, a tha leh tha lo lai te an sawi. Khawzawl Bawrhsap Pu K. Vanlalthiana chuan thu sawiin hlawhtling taka mock drill an zawh theih avangin a tel zawng zawngte hnenah lawmthu a sawi a, a taka tih a ngaih loh ngei a beisei thu sawiin vanduaina thilah a tul a nih chuan inring tawk tak an nih ngei thu a sawi. Hetiang a lo thlen palh chuan media lama kan thil hriat leh kan thil sawi reng rengah fimkhur a ngai hle dawn a ni tih a sawi bawk a ni.
Mock drill-ah hian chanvo hrang hrang hotu - incident commander - leh endiktu - observer - ruat an ni a, incident commander te hian thawktu hrang hrang te kaihruaiin an hna an vil a, observer te hian a tha lai leh tha lo lai endikin hma sawn theih dan tur an endik a ni.
