Khawzawl Hermon veng hi Khawzawla veng chhim tawp ber niin tunah hian In 350 vel awmin mihring hi 1690 vel kan ni a, vote nei zat hi 909 kan ni.
Kum 1977-a Pu Ch. Chhunga Mizoram Chief Minister a nih lai khan Shifting an ti a, Mizoram khaw sawm vel tur zingah Chawngtlai khua chu tuna Hermon veng ‘Kawng phei ram’ an tihah hian insawn phei vek turin an thlem a, an insawn phei duh a nih chuan rangva bandel li theuh pek an ni ang an ti a, Chawngtlai VC te pawhin tha tiin number pawtin inhmun chu an theh ta a, number pawt tha apiangin VC te peg khen chu an duh lai an thlang a, VC te hian Biakin hmun tur te leh sawrkar dept hmun tur te an thlang sa vek a.
Tichuan, engemaw harsatna neuh neuh avangin In hmun thlan fel vek chu thiah leh a ni a, Mahse, mi engemawzatin insawn phei chu an la duh avangin Pu Sanghnuna AO a nih laiin Pu Hawihliana(L) inah Public meeting an la a, mi engemawzatin Chhumliamkawn pheia insawn phei chu an duh avangin number pawtin In hmun chu thlan leh a ni a, hei hi kaltlangpui a ni ta a ni. Biakin hmun leh sawrkar hmun tur pawh kaltlangpui a ni zel bawk.
Kum 1981-ah Chawngtlai chuan kawngphei ram hi Lo-ah an theh a, Tlak lam leh chhuah lam zawng zawng chu thlawhhma ah neih vek a ni a, hemi kum hian chhungkaw engemawzatin an In hmunah chuan Bawk tê an khawh nghal a, a thenin In ang maiin an luah lum nghal bawk. Kum 1981 Krismas pawh hmang nghalin Forest Department Complex-ah ruaite an theh a, ruai an thehna pawh hi hemi hunlaia Forest Department-a thawk Pu C. Zatluanga’n a tumsak a ni nghe nghe. Kum 1982 kumthar pawh an hmang nghal bawk a ni.
Tichuan, kum 1982 kumtirah Chawngtlai atangin chhungkaw tlem an phei belh a, an vaiin chhungkaw 20 vel an awm tling ta a, Vengthar Presbyterian Kohhran Biakin-ah an inkhawm chho thin a, naupang tan a hlat tham deuh avangin Kohhran din zai an rel ve ta a, School leh Biakin atana hman kawp tur sak phawt mai chu tha an ti a, Febuary ni 15, 1982 ah sa tanin ni thum chhungin an sa zo vek a, Biakin chu naupangin chhun lamah school kal nan hmangin Kohhran inkhawm hunah inkhawm nan an hmang leh thin a, Pulpit-ah te pawh naupang lehkhazirna thil vel pawh a awm rem rum thin a ni awm e.
Biakin te neia an inkhawm hran takah chuan Chawngtlai Presbyterian Kohhran atangin indan an va dil a, mahse indan mai chu an lo remti rih lo a, mahse, mihring an pun chhoh zel avangin indan chu tul an ti tlat a, Khawzawl Pastor Bial hruaitute hnenah an sawi ve thin a.
Chhumliamkawn Kohhran hruaitute Pu KT Parmawia(L) Pu F. Laldela(L) Pu Haukhawthanga(L) te chu Khawzawl Bialtu Pastor, Rev. Kaphuliana chu an han kawm a, Kohhran hming tur an sawi khawm a, Rev. Kaphuliana chuan, “Sipai pastor-a ka awm laiin room hming atan Hebron, Zion, Hermon tihte an tar a, chungte chu a inhmeh tho lo maw?” a lo ti a, tha an ti hle a, Thlasik laia chhum leh dai tla a tam thin em avang chuan Hermon tih chu Kohhran hming atan an thlang a, an rilru-ah Hermon daifim tih a awm vang a ni awm e.
Kohhranin Hermon Kohhran tih hming a put chu a lo rei deuh hnu chuan veng hming atan hman a lo ni ta a ni.
Hermon veng hi inhmun rem tak a nih avangin sawrkar pawhin hmun pawimawh a dah chho mawlh mawlh a, Damdawiin, Khawzawl Police station, AH&Vety Department, Government Middle School, Primary School IV, Forest Department, P&E Dept(132 KV sub station) te awmin tunhnaiah SDPO Office, Wildlife Division, DCSO, CMO te sawrkarin a rawn dah belh bawk a ni. Khawzawlah chuan sawrkar hmun pawimawh tamna ber veng a ni hial awm e.
Kohhran lamah hian Presbyterian, Mizoram UPC, UPC NEI leh Kohhran thianghlimte awmin Hermon veng tlak lamah Roman Catholic Father Quarters leh Roman Catholic Middle School leh High School a awm bawk.
Eizawnna lamah hian lo neia eizawng an tam ber a, mipui an taima in chhunah pawh thalai hnathawk loa awm mai mai an awm meuh lo. Veng thang chak tak niin in leh lo pawh a tha chak hle. VC leh Tlawmngai pawl thawhhona a tha thin hle bawk. Veng fai intihsiakah pawh a tawp bera awm thin kha Top three ah kan lang chho ta zak zak a ni.
Hermon veng atang hian mi chhuanawm tak tak, Theology lama Doctor te, Medical Doctor, Lecturer, Mizoram puma Zirtirtu tha ber lawmman dawng thei te, Mizoram Civil Service-a tling thei te awmin huaisen lawmman dawng te pawh an awm tawh bawk.
