KHAW AWMNA HMUN : 

 Khualen khua hi Khawzawl District Headquarters atanga hmar lam; Khawzawl to Sinzawl, Thanlon Road a awm niin, District headquarters atangin 23 km a hlaa awm a ni a, mihring 285 an cheng mek a ni. GPS Co-ordinates chu 23°37’59”N 93°11’33”E a ni a, Elevation hi 3484 ft a ni.  

 Khaw hmun hmasa hi a zo in a thengthaw nuam hle a. Khaw thlir pawh a nuam hle. Malaria a awm lo an ti hial thin a ni. Tunah hian thala kal theihin motor kawng a lut tawh a ni. GPS Co-ordinates chu 23°39’18”N 93°11’14”E a ni. 

                  KHAW DINTU LEH A CHAN CHIN: 

 Khualen khua hi lal Kaihranga khua a ni a. Lal Kaihranga hi a pian leh murna  lamah chuan Sailo a ni a. Lallula, lal hming thang tak thlah kal zel kha a ni a, Lallula’n Lalsavunga a hringa, Lalsavunga’n Vanhnuailiana a hringa, Vanhnuailiana’n Dothiauva a hringa, Dothiauva chuan Kaihranga a hring ve leh a ni. 

 Kaihranga hian a rorel chhungin khaw thar 13 lai a sat a, chungte chu: Khawhreng (Hmuntha bul) Bunghmun, Kawihthuang, Khualen (Hmundam), Khualen (Kanhmun), Thiak, Hnahlan, Murlen (Lungpuizawl), Sairuhkawn, Zaingen (Thlanpui hmun), Zaingen (Kanhmun), Khualen (Hripui veina) te hi an ni a, tun thlengin Hnahlan, 

Murlen leh Khualen khuate hi a la ding ta reng a ni. Khualen leh Zaingen hi khaw khat anga awmin Kaihranga a hian a awp kawp a, a hnuah Khualen ah awm nghetin; Zaingen-ah a fapa Lalmakthanga a thu nghet ta a ni. 

                    KHUALEN HMING PUT CHHAN 

 Tun hmain Khualen ah hian nula hmeltha deuh mai hi  a awm a, a 

hmel that zia chuan zoram dung leh vang a fan chhuak a. Chu nula hmeltha hmuh chak; khaw thenawm atang te leh hmun hla tak tak atang tein a en turin an rawn kal huai huai thin a. A en apiangin ha hipin a that zia hlir an sawi zel mai si a, a la hmu ve lote pawhin hmuh ve ngei tumin khual hla leh hnai pawh an kal tak huai huai avang chuan “KHUALEN” tih hming a lo pu ta a ni. 

                  KHAW LUAH LEH KRISTIANNA :  

 Kum 1912 ah   Zaingen Likkawn atangin Khualen Hripui veina hmunah kai a ni. Hetih hun lai hian Zoramah kristianna in bu a khuar nasa tawh hle a. Khualen a an kai kum 2 na 1915 ah pawh Kristian an thahnem hle tawh a, an Lal Kaihranga  remtihna in kum 1915 ah hian Kristian Biak In a ding a. Mizorama Biak In ding hmasa ber pawl a ni.  Lal Kaihranga fanu Sairengpuii hi Kristiana inpe hmasa a nih avangin Lal hian Kristianna hi a do ve ta lova, Pathian thu awih hmasa te pawhin nuam an ti hle a ni. Lalberin a do lem loh avangin a fate, Saiziki, Saithuama, Saichhungi te pawh Kristian hmasaah an inpe a, an rual hian Piangthuama, Saitlaia, Dobanga, hrangthuama leh Hrangthawma te pawh kristianah an inpe ve a ni. 1915 ah hmarchhak presbytery in Kohhran Puitlingah a dah a. Sunday Sikul te an nei a, A, AW, B te an zir a, Pathian thute an inzirtir thin a ni. 

 He hmuna an awm lai hian HRIPUI rapthlak tak a leng a, naupang rual khat chu an mang deuh thak a ni awm e. 

 Kum 1920 ah hian Khualen hripui lenna atang hian Thiak khaw hnuaiah kai leh a ni a, kum thum vel an awm hnuah Thiak khaw chungah an kai chho leh a ni. 

 Kum 1932 ah Khualen Hmundam-ah an kai leh a, Kum 6 chhung an awm a ni. Kum 1937 kum hian Khualen ram, Ramkhek an nei a, buh leh bal a tha hle a ni ang; buh thar an han seng chu a lo hlawk em em mai a. A khaw pumin buh an hausa em em a, buh kawt 6 (tin 8) hi Re 1/- in an hralh thei hial a ni. Kum 1938 ah Zaingen ah an kai leh a ni.  Zaingen atangin kum 1943 ah Khualen kai chhoh leh a ni a, hemi tuma Khualena kai hi in 36 niin an sawi. Kum 1946 January 14 ah Kaihranga hi kum 82 mi niin Khualen ah a thi a, Zaingen Thlanpui (An chhungkaw ro) ah phum turin Khualen atangin zawn a ni a. A fate khaw 3 leh thenawm Aiduzawl a a farnute khua nen khaw 5 mipuiin an zui a, kawng tluanin Darkhuang leh Siallam Dar an vua in an tum a. Zaingenah hian ropui taka vui liamin, Kaihranga an phumna Thlanpui hi hawn leh theih tawh loh turin an chhilh hlen ta a ni. 

 Lal Kaihranga chu a boral tak avangin Khualen khua chu a nupui Darpuiin a awp a, a fapa Laltuman a tawiawm bawk a. Lal ban a nih kum 1954 thleng hian an ni hian Khualen ah ro an rel a ni. 

               SAI KAH THU : 

                                                       1922 Thiak khaw hnuaia an awm lai hian Khualen ram te, 

Zawlnghak ram, Aiduzawl ram ah te Sai pa chal lian tak, ngho pawh sei tak mai ram tla an hmu a, tichuan Aizawl Bawrhsap hnenah Sai kah phalna lain Arro pasaltha Thangchhuma chahin tuna Khualen ram, Saikahmual hmunah hian pasaltha ten an kap hlum ta a ni. He an sai kah ngho hi 7 feet zeta sei a ni. 

               FRANCE RAM KAL : 

 1917   khan France ram kal tur lak a nih khan Khualen atangin heng mite hi an kal ve a ni :   

1. Phirbawra 2. Dokunga 3. Surawia        4. Kaiphunga  5. Kapdaia   6. Thlahleia       7. Thatbuta         8.Khumkuala 

9. Liana           10.Rotlaia         11.Mangkhaia                               12.Buktaia.  

 Heng tlangval 12 lai mai German run tura kalte hi 1918 – 1919 ah an rawn haw leh a, lal Kaihranga hian Sialin a lo lawm a, a theih anga ropuiin a lo chawimawi nghe nghe a ni. 

                  MIZO SIGNALLING CORP (MSC) DIN :  

 1943 atangin Khualenah hian Mizo Signalling Corp (MSC) din a ni a, nula leh tlangval a huap kim tha hle a. Pawl chak tak leh lungrual tak niin khawtlang tan hna tam tak an thawk a; mi harsa an tanpui a, khawtlang pawhin an thlamuanpui hle a ni. An pawl din chhan ber “Eng hmanga inbiak pawh” chu a hlawhtling hle a. 1944 June thlaah zir tanin, zualko kal hah ngai lova lam hla tak pawh inbiak pawh theihna a nih avangin an phur hle a ni.  

 Hetih lai hian Khualen pa thenkhat chuan eng hmang maia inbiak chu an ring meuh lova, “in inbiak theih chuan ka kut zungchal ka tan ang,” ti te pawh an awm hial a ni. Tlangvalte chuan phur takin an zir zel a, a bul an tan atanga thla thum lek, September 9, 1944 ah chuan Zaingen leh Khualen chu engin an inbe thei ta a ni.  

              SIALLAM DAR  

 Kaihranga hian a pa Dothiauva hnen atangin Siallam Dar a rochung a, he Siallam Dar ang hi Mizoramah a dang a awm tawh loh avangin an ro hlu tak a ni. ( Lalsavunga atanga an in rochun Siallam Dar chu Kaihranga fa tlum ber Lalrengpuia, Chandmary West, 

Aizawlin a kawl mek a ni ) He Siallam Dar an neih tan hun hi 1800 AD vela Zadeng Lal, Lalchungnunga’n Lalsavunga hnen atanga a fapa Ngura tlan nana a pek a ni. 

                  LAL BAN LEH VILLAGE COUNCIL DIN :                

                                                   1954 Lal ban a nih hnuah Village Council thlan nghal a ni a, 

Khu       alen VC term hmasa ber chelh tute chu heng mite hi an ni:                       

Term khatna 

 Zoram buai hmain Villlage Council hi term 4 (1954 – 1968) tluang takin a kal hman a ni. 

                  RAM BUAI LEH KHAW KHAWM : 

 Kum 1968 Zoram buaia hruai khawm a nih khan Kawlkulh a kal turin order an pe a. Kawlkulh chu a hlat deuh avangin Aiduzawlah pawh a theih mai lawmni tiin hetih laia V.C ten sawrkar an dawr a, sawrkar lam pawhin rem an ti a. Mahse, Aiduzawl V.C lamin rem an lo tih loh avangin 1968 December thlaah Kawlkulhah khawm an ni ta a ni.   

 Kawlkulh ah hian kum 1968 – 1972 chhung an awm a, ram buai a lo ziaawm deuh tak a Sawrkar in mahni khaw lama kir leh phalna a chhuah tak avangin 1973 kumah Khualen hmunah kir chhoh leh a ni ta a ni. Ram buai avanga in luah lai hal leh rapthlak taka mihring sawisak tawk an awm lo a ni. 

                BAWK COMMITTEE :  

 Kum 1973 atanga 1982 chhung chu bawk Chairman kaihhruaina hnuaiah Bawk Committee ten khawtlang chu an kaihruai a, heng mite hi 73 – 82 chhunga Bawk Committee Chairman hna lo chelh tawhte chu an ni. 

1. Pu Laltluanga                              1973 
2. Pu Liandawla                              1974 – 1976    3. Pu Zachhunga                       1977 – 1979 
3. Pu K. Thanchungnunga            1980 – 1981 
4. Pu R. Lalhawia                            1982 

Kum 1983 February 24 ah sawrkarin V.C thlanna a buatsaih leh a. Heta tang hian Village Council pawh buaina awm lovin neih chhoh char char a ni ta a ni. 

             YMA : 

 Mizo Signalling Corp hian khawtlang nula leh tlangvalte kaihhruai hna leh tlawmngaihna thil pawh a khawih tel vek avangin YMA hi a ding mai lova, Kum 1962 ah MSC tih chu YMA hminga thlakin din a ni ta chauh a ni. Hruaitu pawh thlang thar lovin MSC hruaitu te rin nghal an ni.  

              MHIP :   

 Khualen Branch MHIP hi 5th March, 1978 ah din a ni a, din tirh atang hian Pathian hruaina zarah vawiin thlengin tluang takin a la kal chho ve char char a ni. 

                  Branch MHIP din a nih tirha hruaitute: 

              UPA PAWL : 

 Mizoram Upa Pawl; Khualen Branch hi kum 2000 August 13 tlai lam dar 3:30 ah Pu R Biakmawia (L) kaihhruaina in Pu R. Ngurkunga Inah din a ni a, hemi hma hian hruaitu mumal vak lo in din a lo ni tawh awm e. Kum 2000 atang hian Mizoram Upa Pawl, Khualen Branch chu mei mit lovin vawiin thleng hian a la kal ve zel a, hruaitu hmasa te chu heng mite hi an ni. 

              President                     : Pu P. Lalrinthanga 

                   V. President     : Pu R. Zakhara              

              Secretary                    : Pu C. Roliana 

              Treasurer                    : Pu R. Ngurkunga 

              ZIRNA : 

 Kum 1948 velah Sikul neih tan a ni a, zirtirtu hmasa te chu Pu Thanpara Tualpui; Pu Ch. Lalsanga Khualen; Pu Lalenga Chhawrtui leh Pu Thangkunga Khualen te an ni a. Ram buaiin a nan zui tak avangin Kawlkulh a khawm an nih angin Khualen Sikul pawh a kal ve zel a. 1973 kuma Khualen a Bawk chhoh leh a nih hian Sikul hi din nghal a ni lo va.  1974 kumah khawtlangin sikul neih a tha an ti a. Tlawmngaia zirtirna hna thawk turin Tv Pc Nundanga chu sawm a ni a, ani ho hian Middle School leh Primary School chu private a neih a ni a, hemi kum hian Pu Laltluanga Inah sikul kal a ni a, Pc Chuauliana  chauh Middle zirlai awmin a bak zawng chu Primary School naupang vek an ni. 

 1975 kumah Sikul Building neih a ni a, a hnuaia mite hi zirtirtu indawt dan a ni. 

1. -                       Sawikunga (Sentea), Aiduzawl 
2. –                      Lalnuntawma, Khawzawl  
3. –                      Saitluanga, Vankal 
4. –                      Lalphalova, Aizawl Ramthar 
5. atangin mumal takin Sikul pawh kal chhoh a ni a, hemi kum atang hian Pu C. Roliana s/o Lalkima Aiduzawl chu a rawn thawk a, 1980 ah Sawrkar atangin Permission hmuh a ni a. 1981 ah Recognition hmuin mumal takin Primary School chu kalpui chhoh a ni ta a ni.  Kum 1999 ah Private in Middle school din a ni a, Headmaster atan Tv Sapliana, Hliappui lak a ni a. Zirtirtu atan Nl. Roluahpuii, Aizawl leh Pi Lalmani, Khawzawl te lak an ni bawk a, rokhawlhna avangin hemi kum bak hi chu chhunzawm a ni ta lo a ni. 

 Kum 2004 ah SSA Mission hmalakna hnuaiah EGS din a ni a, Pu BT Zorammuana leh Pi Vanlalhruaii te nupa, Champhai atangin an rawn awm a. Kum 2006 ah Upper Primary School ah hlan kai a ni a. Vawiin thlengin mumal takin kalpui a ni ta a ni. 

              KOHHRAN : 

 Khualen ah hian Kohhran 3 awmin, an din kum chu a hnuaia tarlan ang hi a ni. 

1. Presbyterian Kohhran – Kum 1912  
2. United Pentecostal Church; North East India – Kum 1953  
3. Mizoram UPC – ^7th July, 1995 

                KHAW HMUN SAWN :  

 Kum 1980 atangin Khawzawl to Sinzawl Road laih tan a ni a, he kawng hian Khualen ram (Mualkhang ram) a pal tlang a, a pal tlangna tir lam tlangdung zam nuam tak maiah chuan eizawnna awlsam zawk beiseiin 1988 kumah insawn thlak a ni a. Insawn thlak lai hian in 17 chauh an insawn thla a, insawn ve duh lo te chu Khawzawl, Rabung, Kawlkulh leh Aizawlah te an pem darh a ni. Hun a lo kal zel a, indang tharte leh khaw dang atanga lo pem lute nen tunah hian in 60 lai Khualen ah hian a lo ding ve ta a ni. 

               ANGANWADI CENTRE: 

 Anganwadi Centre pakhat awmin kum 1985 ah din a ni a, tunah hian Worker pakhat leh Helper pakhat in an enkawl mek a ni. 

                 HEALTH CLINIC CENTRE : 

 Kum 2009 ah din tan a ni a, thawktu awm mumal lova kum 13 a awm hnuah kum 2022 atangin Health Worker in a thut chilh ta a ni. 

               TUI DINHMUN: 

 PHE Department & JJM hmalakna in Khangte kawr, Daikawn Kawr leh Zawngatui lak a ni a, Khualen khua hi Mizoramah chuan tui hnianghnar ber te zinga mi a ni awm e. Thalvaekchar ah lo chuan nitin tui sem thin a ni. 

                         JJM hmalakna in in tinah tui connection pek vek a ni tawh a ni 

               LAWMMAN DAWN : 

 Khualen khua hian faina kawngah tan an la nasa hle a. Kum 2022 khan Khawzawl District chhunga thingtlang khaw fai lawmman 2 na lain; kum 2023 khan fai lawmman 1 na an la a ni. 

 Kum 2024 ah Khawzawl District chhunga WATSAN Committee, tuihna humhalh thaah lawmman 1 na an la bawk.