Tualte khaw awmna hmun Tualte khua hi Khawzawl District chhung a awm a ni a, Khawzawl atanga km 20 a hla niin, Khawzawl atang hian Biate Road a kalin, Chawngtlai Phaiveng a tanga pen lehin, Chawngtlai Phaiveng atang hian KM 9 a hla a ni. Tualte khua hi Khawchhak tuipui hnaih te a awm leh Zo boruak nuam tak mai a ni a, Khaw lum lai berin Celcius degree 28o bawr niin khaw vawh lai hian Celcius degree 7o bawr vela vawt a ni tlangpui a, Longtitude Degree 93.20-66o E leh Latitude Degree 23.41-24oE lai vel a awm niin, Sea level atanga a san zawng chu 1390m a ni.
Tualte khua awmna hmun hi hmun thaw veng leh ualau a nih avang hian Mizoram khaw hrang hrang pawh 25 vel zet a lang thei a, Tualte khua atang hian Mizoram tlang lar deuh deuh -Phawngpui tlang, Lurh tlang, Tan tlang, Purun tlang, Hrangturzo tlang,Tawi tlang te pawh a lang thei a, Mizo History a lang awllo-Myanmar ram chhung a hmun hmingthang Halkha ram chhunga dawn tlang te, lungdup tlangte, Len tlangte, Lungdup tlang dung te pawh fiah takin a lang thei a, Khua han chuan vel nan a hmun nuam tak mai a ni.
Tualte Hming vuah a nih chhan : 'Tualte' tih hming vuah chhan leh a hun hi chiang taka sawi theih ni lo mahse pipute chuan hetiang hian an sawi thin. Tlang hlawm (Tualte leh chawngtlai tlang hlawm) hi Mizo hnam thlang tla hmasa , Hmar hnam peng pakhat Thiak (Thiak hi hmar hnam chikhat an ni a, thiak hnam peng pakhat zing a mi an m) te chuan an lo luah tawh niin sawi a ni a, Chung hnam peng zingah Tualte hnam awmna niin an sawi.
Hmar ho hi AD 1750 vela awm an ni a, Tualte hnam hovin an chhuahsan hnuah Tualte tia hriat a ni ta ber a, Hmar ho chhuah hnuah he lai tlang rawn luah leh hmasa bertu chu Lal Vanhnuailiana hi a ni.
Tualte vanglai : Mizo lalte zinga ropui bera an sawi thin Sailo lal Vanhnuailiana chuan Saitual, Puilo atanga rawn chho zelin ,Awnnu (Chalrang ram) atangin kum 1857 vel khan Tualte a rawn kai a, in 1000 lai a rawn kai pui a ni. Tualte a thut hmun a rawn rem fel hian a hming a thang tanin pasaltha a neih that vangte, rorel a thiam vang tein Vanhnuailiana khawpui Tualteah chuan hmun hla taka tang pawhin an rawn pem lut sup sup mai a, Tualte chuan a vanglai a hmang tan der mai a,hetih lai hian zawlbuk pawh pasarih lai a awm ni a sawi a ni a, Tualte Vanglai hunah hian in 1700 vel lai a awm niin an sawi a, Mizo Lal hmingthang Vanhnuailiana a dam chhunga a ropui berna hmun niin, fel takin khua a rem a, Tualte Vanglai hun hi Mizo history a khawpui pawimawh ber ni a
sawi reng tawh tur niin,chanchin tam tak a nei a ni a, Vanhnuailiana Pasaltha zingah Vanapa ,chawngduma leh Zampuimanga te pawh an hmingthang hle a nih kha.
Lal Vanhnuailiana a fin em avang hian tun thlengin Tualte khua pawh hian midang khawdang chuh pui theih miah loh , ram zau leh tha em em, lui ramriin a hung fel vek ni bawk si kan nei a, Tualte ram chhungah hian Mizo Lal hrang hrang pali laiin hmun satin ro an lo rel tawh a ni
Tun dinhmun : Tualte khuaah hian tun dinhmunah chhungkua 250 awmin mihring 147() vel an Cheng mek a, kohhran hrang panga -Presbyterian, Salvation Army, UPC(NEI), UPC(MZ) , Seventhday Adventist te an awm a, Presbyterian Kohhran member an tam ber a ni.
NGO pawl hrang hrang -YMA, MHIP , MUP te mumal taka an din bakah Association hrang hrang awmte inngeih tak leh phei khai rual takin an kal za a, Tualte hi Tun hma atangin pem khawm khua an nih loh avangin in chhung khat laina kual deuh vek an ni a, 'Mikhual tan rel sual an awl' an lo ti thin a ni.
Eizawnna lam : Tualte khua hian mi nawlpuiin kan eizawnna ber chu Thingtlang lo neih, kut hnathawka eizawn a ni deuh ber a, VC ten kum tinin ram theh thin niin, buh hi eizawnna ki pui ber a ni thin a, Amaherawh chu hun lo kal zelah kum 2019 chho atang khan Tomato Ching chho tanin mi nawlpui eizawnna a ni chho tan a, Ni kum 2023 lamah khan Tomato hi Qtl. 10000 (Singkhat) chuang tharin Mizoramah a thar hnem ber khua kan ni mek a ni.
Tomato bakah hian thlai chi hrang hrangte uar chho zelin, Aizawl, Lunglei, Serchhip,Champhai District chhunga thlai Commission thin ten kar tin a rawn la thinin,Mizoram hmun hrang hrangah te sem kual thin a ni a, State pawnSilchar leh Myanmar- Rangoonah te pawh Tualte tomato tharte thawn chhuah tawh niin tunah hian sawrkar chakna nen a tangkawpin thlai thar kawnga hma la nasa zual turin beih mek a ni a, Economic kawnga Tualte Vanglai din thar leh turin Theihpatawpin tan lak mek a ni a, Hemi kawngah hian khawtlang mipuite pawh kan in lungrual hle a ni.
Tualte khuaa hmun hlui thenkhat te: Tualte khua hi Mizo History a khawpui pawimawh tak a nih avangin thang thar ten pipute sulhnu pawimawh tak tak vawnhim na chang kan hriat loh boralta enge mawzat a awm rualin, vawn that leh hmuh theih engemaw zat a awm bawk a , Chung zinga thenkhat lar zual han tarlang ila - 1) Sapin zawl. 2)Lalruanga lung kah keh. 3) Lalruanga lung chhuan. 4) Dar thuhruk. 5) Vanhnuailiana in hmun 6)Vanhnuailiana Tuikhur. 7)Vanhnuailiana hruih 8)Vanhnuailiana khaw thlir. 9) Vanapa in hmun. 10)
Vanapa ui phumna 11) Vanapa Tuikhur.12) Lutua hmun 13) Manglala hmun 14) Lal Nikuala hmun 15) Chawngluta khaw thlir. 16) Lal Dokhama Thlan .17) Hla phuah thiam Patea in hmun hlui 18) Pathian Tlang.
Heng hmunhma hrang hrangte hian chanchin ngaihnawm tak tak an neih bakah, hmun hlui ziah Ian loh engemawzat a awm bawk a ni.
Tualte ram chhungah hian Mizoram State bird- Vavu a awm mai bakah State Animal-Saza pawh tam tak an awm a, Sazuk pawh hun engemaw ti atang khan rawn lutin , Hengte hi uluk taka humghalh mek an ni a„Lal VAnhnuailiana khua 'Tualte Vanglai" i lo kal chuan heng kan hmun hma neih te hi i lo tlawh ve ngei dawn nia.
