Kawlkulh khua hi Mizo history ah hian a lam tam lo em em a, mahse Mizoram chhung khaw hrang hrangte zingah hian pawimawhna tam tak a nei bawk. Mizo History a Kawlkulh lanna chanchin tlem lo tarlang ila:- Lalsavunga fate’n chhak an nawr laiin Vanlalhnuailiana Saitual atangin Puilo-ah a kai a, a nau Lalphunga Tualbung atangin Kawlkulh ah a kai a sawi a ni. Tun thlengin Lalphunga hmun (Govt. Kawlkulh High School hmun vel hi) ala awm bawk. Kum 1900 hma lama Chin Hills atanga Survey map British-in an siamah ‘kolkul klang’ tih alo awm ve bawk a, hei hi Kawlkulh tlangdung an sawina ni ngeiin a lang bawk. Chubakah RB Mc Cabe (North Lushai Hills Bawrhsai) Mizote’n ‘Lalmantua emaw Lalmansap’ ti a an koh in kum 1890-1892 inkar a Mizoram khua a fan tum a report a, a ziah danin Lalruma Sailo khua Kawlkulh In 203 leh mihring 1,015 awm ang in a ziak a. Tin, Kawlkulh khua hi Meitei hote lo awm tawhna hmun pahnih kan hriat theih zinga pakhat niin K Zawla (Mizo Historian) chuan a sawi bawk. Vanhnuailiana Saitual kai tum chuan Saitual ram ‘Lamzawl’ chu lo vah an theh a, chumi lo vat lai chu Pawi-hoin an bei thut mai a, Pahnih (2) an that a, midang erawh chu an tlan haw ta a. Vanapa te, Chawngduma te, Tawkthiala te ho in an um a, Kawlkulhah tan hmun siamin kulh te an lo siam a, tang leh ngam lovin Vanapa te thlen chhoh hmain an tlan leh ta zawk niin a sawi.

 

            Kawlkulh khua hi Khawzawl District huam chhunga khaw sawmthum leh pakhat (31) te zing ami a ni a. District Headquaters Khawzawl tih loh va khawlian ber a ni. Kawlkulh awmna hi 23o36’57.9” N Latitude leh 93o04’58.9” E Longitude a ni. Kum 2011 chhiarpui atanga a landanin, Kawlkulh khua ah hian In (House) dinglai/ luahlai 700 lai awm in, mihring 3094 lai an cheng a ni. Chung zingah chuan Hmeichhia 1563 awmin, Mipa 1531 lai an awm bawk. Kawlkuh khua ah hian ziak leh chhiar thiam hi 82.42% lai an tling a ni. Kawlkulh atanga District Headquaters Khawzawl hlat zawng hi 30 kms niin, Mizoram khawpui ber Aizawl hi 122 kms vel lai a hla a ni. Heng khua te - Puilo, Dulte leh Vankal te hi Kawlkulh thenawm khaw hnai ber te an ni.

 

KHAW HMING PUTCHHAN: K. Zawla (Mizo Historian) chuan, hman laiin Kawl Sipai ram hauh tur leh ram chinchang hriat tumin tam fe an lo kal a, he laiah hian an inkulh a. An haw hnu chuan an inkulhna hmun chuan Kawlkulh hming a pu hlen ta niin a sawi.

 

            JF. Hmuliana chuan, “Kan naupan lai chuan awmpui leh mel veng pa ho te leh dawr veng pa ho te pawhin Saihumkawn, mel veng peng bul hi kawlho inkulhna hmun a ni an ti thin” a ti. Amah vek hian Kawlkulh Val Upa PC. Lalhmachhuana Dairy ah chuan Saihumkawn, RD Godown hmunah hian kawl ho an inkulh a, an Lal In chu tlangah an sa a, hnapen tui hi an tlan a. Chutih lai chuan Sipai Camp tlangah hian Meitei ho an in inkulh ve thung a, an ramchuan chuan an inhre pawh ta tlat mai a, an insaseng leh ve ve ta a ni tih thu a lo ziak niin a sawi.

 

KHAW AWM TAN DAN: Tuivawl ral chhak lam (Dulte ram, Mualpheng ram, Tawizo ram, Saichal ram, Puilo ram, Vankal ram leh Kawlkulh ram) leh Tuichang inkar ram te hi Lalruma Sailo (Lalphunga fapa) ram a ni a. Lal leh a khua leh tui te pawh hi hmun nghet/ awm hmun nghet an nei lova, kum 5 atanga kum 7 a vei hi chuan khaw thar an sat mai thin. Mahse Mizo Lalte’n ramri chungchangah buaina an neih loh nan Bawrhsap J. Shakespear-a chuan Land Settlement chu kum 1898-ah Mizoeam (Lushai Hills) ah a hmang tan a. Tlangsam-ho (Survey) an lo chhuak a, Mizoram Map an siam nghal bawk a. Bawrhsap J. Shakespear-a chuan Lalram chin tur chiang takin a siam fel a, Lalram chin tur chu document fel taka siamin ‘Ramri lehkha’ tih a ni a, chu chu lal tinin an lo nei ta. Lushai Hills (Mizoram) chhung a ramri buaina chu Bawrhsap hnenah zel chin fel a ni ta a ni. British-ho chuan Mizoram hmun hrang hrangah Inspection Bungalow an sa a. British officer zin veivakte chawlhna leh riahna tur a sak a ni ber a. Sakawr nikhat kal dan vel ah zel Bangla hi dah a ni. 

 

Kawlkulh khua pawh hi Bangla thuthmun niin Aizawl atanga Champhai inkara Bangla Pangana (5) a ni. A tirah chuan Kawlkulh thlen hma km 5 vel tun a Banglakawn kan tih takah hian sak a ni a. Remchan zawkna avangin tun a I.B tlang ah hian Bawrhsap Maj. J. Shakespear-a thupekin sawn chhoh a ni ta a ni. Kawlkulh Bangla hi kum 1903 atanga sak tan niin kum 1908 velah sak zawh niin an sawi. Lalruma ram chhungah Inspection Bungalow sak anih avangin Chawkidar emaw Mohurer emaw awm alo ngai a, ramngaw chhah taka la nih avangin sa hlauhawm ala tam bawk nen Bangla awmpui dah a ni a. Lalruma fapa upa ber Mualpheng Lal Hrangkunga khua leh tui ami Chhunhrenga chu Chawkidar awmpui turin koh chhuah a ni a. Awmpui hna hi tuichawi, bangla vel tihfai a ni ber a, a hautak deuh avagnin sawrkarin heng mite hi a lak belh ta a, chungte chu :- 1. Thangchema 2. Kulha 3. Hrawnga 4. Saieka 5. Chalruma     6. Bawka 7. Ropuia (Thirdeng) 8. Zamanga leh 9. Thangliankhuma (Puithiam) te an ni.

 

Bangla awm hnu deuh lawkah, Kum 1913 velah Lal Dolura’n tuna Kawlkulh Vengthlang hmungah hian dawr a siam a, Ex C. Lalhluna (L) Inhmun vel hi niin an sawi. Dawr nghaktu atan Satliana dahin, Dawr nghaktu awmpui turin heng mite : 1. Darchhuma 2. Khawmeka 3. Tlangduha leh 4. Laltawma te a awm tir ve nghal bawk a. Lal Dolura chu Bevuakah a khua leh tui te nen an la awm a ni. Bawrhsap in hei hi a lo hriat hian, khawper anga awm alo phal lo va. Mahse, Lal Dolura leh Luseia (Chhungte Lal) ten nasa takin Bawrhsap hnenah an dil a, zin mite tan riahbuk pawimawh tak anih bakah Bangla awmna hmun a nih thute thlen a ni. Hemi hma deuh hian Bangla Awmpui te hnenah Bawrhsapin Lal khua hi hnawk in tih chuan mel 5 pawnah ka sawn a nge a ti a. Mahse Bangla awmpuite chuan hnawk an tih loh thu leh an intihhlim zawk thu an sawi a. Bawrhsapin Dolura leh Lusheia dilna chu pawm sakin In 16 lai an nih a phalsak ta a ni.

 

Bevuak atangin Dolura chuan Tawitawkawn a kai a. Lal Dolura khaw siam tawhah a ropuiber niin In (House) 200 dawn lai an tling a. Kum 1932 kum ti lamah Dolura chuan Saichal kai turin Bawk a khawh tir a, a tam zawk an kai hnu in a fapa Satdai chu a thut tir a. tichuan, Dolura pawh chuan kum 1933 ah Tawitawkawn chu chhuahsanin a khua leh tui tlem zawk te nen Kawlkulh ah a khua leh tui te lo awmsa te thut nghet turin a lo phei ta a. Pa Pakhat phei chu amahin kum 3 lai a chambang niin an sawi a ni. Kum 1945 alo her chhuah meuh chuan Kawlkulh khua chu In 70 lai an lo tling ta a ni.

 

Kum 1946 April ni 9 a Mizo Union Party lo ding chuan Zoram dung leh vangah India ram a beh leh Lalban chungchang chu nasa takin an tlangaupui a, vahchap kang ang duai duai in Mizote thinlungah Union thlipui chu a hrang a, mi tam zawk zuitu nei an ni. India ram kum 1947 a zalenna a hmuh hnuah Mizoram pawhin Kum 1952 atangin District Council alo nei chho ta a. Mizo Union ten District Council inthlannaah hnehna changing kum 1954 ah chuan The Assam Lushai Hills Distrct (Acquisition of Chief’s Rights) Act, 1954 hmangin Mizoram a kum 300 chuang roreltu Lalte chu an lo bang ta a. Acquisition of Chief’s Rights Amendment Act 1955 in a sawi danin Lalte chu Zangnadawmna pek an ni a. An buhchhun lak atanga siam rem a ni. Chutiang zelin Kawlkulh Lal Thanghuliana Sailo chuan Rs. 10,536.00 lai a hmu a, heng khua te: Vankal, Saichal, Dulte leh Kawlkulh khaw mipui buhchhun zat atanga siam sak a ni.

 

Kawlkulh chanchin a ziah hmaih theih miah loh pakhat chu Mel veng chungchang hi a ni a. Kawlkulh Mel veng hi Banglakawn chung Dulte hmun hluiah an awm a. Tuichang leh Tuivawl inkar lamlian tihfai an hna ber a ni a. An hna a hautak em avang leh an hma a zauh em avangin Mel Veng-II siam belh a ni a. Mel veng-I in Kawlkulh leh Tuivawl inkar an vil ta a ni. Mel veng-II enkawl ram hi Puilo Lal Khawtinkaia ram chhung a ni a, a khua leh tui ten enkawl ve tawh rawh se tiin dilna a thlen a. Chumi hnu atang chuan mel veng-II enkawltute chu Khawtikaia khua leh tuite an lo ni ta a. Mizoram a Lal ban anih hnuah Mel veng-I ni thin chu Dulte VC alo ni ta a, Mel veng-II chu Puilo VC hnuaiah an awm a. Mizo Union sawrkarin 1964 ah Mel veng-II chu kawlkulh VC hnuaiah an behtir ta a ni.

 

RAMRI: Office of the Mizo District Council Executive Department Order No. 1 of 1964 angin Kawlkulh Dulte leh Puilo ramri siam fel a tul avangin Boundary Committee ruat a ni a. Boundary Committee chuan a hnuaia ziak ang hian a siam fel ta a, chu chu Executive Committee Mizo District Council in a nemnghet a ni.

 

“Saichal lui atangin Bangla lui a zawh chho a, vei lampang a kawrte a zawh leh a, Champhai lamlian Dulte peng kawnah a bang liam a, Pu Lalhmingthanga M.D.C vau kawrte a zawh chhuk a, Chhimluang lui a fin thlengin. Chhimluang lui a zawh thla a, tlangdung dinglamah Darhmingthanga leh Chaldinga inrinna kawrlui a zawh chho a, ngil takin lungpui chawlhhmun tlangdung sahmul thenah a zawh thla a, lungpui chawlhhmun takah tl^k lamah ngil takin Pu C. Pahlira khawthlir lui a man a, Ailui a fin thleng in a zawh a. Ai lui a zawh thla a, kawnzar lui chhuah thlengin, kawnzar lui a zawh chho a. Kawnzar lui kawnah a bang liam a, kawrte a zawh thla a, Zaupui lui a fin a, zaupui lui a zawh thla a, serlui thlengin, Serlui a zawh chho a, zawngsih lui chhuah thlengin, zawngsih lui a zui chho a, dinglam pang a luite a zawh chho zel a, |huamthum kawnah Puilo leh Kawlkulh kar kawng atan liam a, kawrte a zui thla a, Kawlkulh lui chhuah thlengin, Kawlkulh lui a zui chhuk a, Tuichang thlengin, Tuichang a zui chho zel a, Falpuikawnah, Falpuikawn luite chhuah thlengin, Falpuikawn luite a zui chho a, Falpuikawn leh khuai lui in khan tlangdung a zui phei a, Mangkutphira Lungdawh thlengin kawrte ziding ber a zawh thla a, Saichal lui thlengin, saichal lui a zawh thla zel a, bangla lui thlengin ramri then tirhna a man leh a.

 

Mizoram buai (1966) khan nasa takin Kawlkulh leh a chhehvel khua te ah nghawng a nei a. MNF te beihna hmanrua atan Khawkhawm (Grouping of Villages) hman a ni a. S.K. Agnihotri IAS sawi dan chuan mipui za zela 80 zet chu an khua atanga sawn chhuakin, khaw lian deuh ah saw khawm an ni a. Mizroam khua 764 a\angin khua 516 te chu Grouping Centre 110 ah an sawi khawm a. Chutichuan, Kawlkulh khuaah pawh hian Khualen, Vankal, Dulte, Puilo leh Chhawrtui khua te sawi khawm niin, Kawlkulh khaw hmar lam pangah hian an awmkhawm ta a ni.

 

Re organization Act, 1971 leh Govt’ of the Union Territories (Amendment) Act, 1971 in a sawi angina Mizo Hills District chu UT ah hlan kai a ni a. Kum 1972 ah chuan MNF volunteer mi 500 lai sawrkarah an in pe a. Chuvangin Mizoram ah Sipai(Regular Army) chu Para Military Force ten an thlak zui nghal bawk a. Khawkhawmna hmun a\angin mahni khaw bu hlui luah phalsak leh an ni a. Kawlkulh khua a khawm khaw hrang hrang mipuite pawh an let leh deuh vek a, awm hlen ta tam tak an awm bawk a ni.

 

KHAWTLANG: Lal ban an nih hnuin, July 23, 1954-ah Village Council inthlanna neih a ni a. August 15, 1954 atangin Village Council/ Court rorelna tan niin hengte hi VC memberte an ni.

 

President                   : Liandinga

Vice President          : Kaphnuna

Secretary                   : Darngailova

Members                    : Raltawna

                                      Lalchhinga

                                      Liankhuma leh

                                      Vanluta te an ni.

            Mihring lo pung zel leh hmasawnna avangin kum 2010 atangin Kawlkulh VC pakhat ni thin chu VC pahnih ah then a ni a. Kawlkulh VC leh Kawlkulh North VC tih alo ni ta a ni.

 

            Kawlkulh khua din anih atanga tun thleng hian Non-Government Organization (NGO) pawl hrang hrang alo ding chho va, pawl thenkhat te chu a lo tawp chho ta bawk a ni. Kawlkulh Boy Scout (1936) te, Kawlkulh Youth Organisation (KYO-1981), thalai Hna Thawk Pawl (1942), leh Thiang Zau Pawl Kum 1959 a din te hian Kawlkulh Khaw hmasawnna turin theihtawpin hma an lo la tawh thin a, Kawlkulh chanchin a hmun pawimawh tak changtute an ni a. Chubakah, YMA (Young Mizo Association) Mizoram Upa Pawl (MUP) leh Mizo Hmeichhe Insuihkhawm Pawl (MHIP) te nung takin tun thlengin ala ding chho zel a ni.

 

            Young Mizo Association (YMA) hi Dt. 21.02.1961-ah Kawlkulh ah din a ni a Kawlkulh YMA President hmasaber chu R.K Romana (Primary School Zirtirtu) a ni a. June 15, 2011 ah Kawlkulh YMA Golden Jubilee hmang in, hlim tak leh ropui tak a hman a ni.

 

                        Kawlkulh khua hi Kawlkulh Group YMA Headquarters awm na a ni a. Mipui lo pun chhoh zel avang leh remchan zawkna avangin te in Kawlkulh YMA hi Branch 3 a then a ni a, chungte chu – Kawlkulh Branch, Kawlkulh North Branch leh Kawlkulh South Branch te an ni.

 

                        Sakhuana lamah pawh Kawlkulh khua a din tirh atangin Bangla awmpuite Hrangkunga, Chalthianga leh Darchhunghluta te hi Kristian tha tak an ni a. Kum 1906, Mizoram a harhna thlen hmasak ber kum hian Pathian thuawih tan in, dated 11, November, 1909 ah Rev. D.E. Jones a kutah baptisma an chang tih Synod archive ah hmuh a ni. Chuvangin Presbyterian Kohhran hian kum 1906 hi Kawlkulh Presbyterian Kohhran din tan kumah an pawm a ni. Tunah hian Pastor Bial thuthmun Pahnih a awm bawk a ni. Tin, United Pentecostal Church (UPC) hi kum 1950-ah ding tanin, Pastor Zakamlova kutah mi tlemte in baptisma an chang a. Inkhawmna pawh a hrangin an nei nghal bawk. United Pentecostal Church (NEI) Pastor bial thuthmun a ni bawk. Heng a chung a kohhran te bakah hian Salvation Army, Isua Krista Kohhran, Seventh-day Adventist Church leh Roman Catholic te an awm a, Judaism sakhaw vuantu Bnei Manashe mi tam vak lo an awm bawk a ni.

 

                        Tin, Zirna lamah pawh hian Kawlkulh khua hi a tir in lal thuthmun anih loh avangin sikul pawh hawn a ni har hle a. Chuvangin, Mission Primary School pawh Tawitawkawn (Lal Dolura khua) ah kum 1925 an din tan an a. Zirtirtu hmasaber chu Lianvela ani. Kum 1933 ah Lal Dolura. Kawlkulh thut nghet tur a a phei khan Primary School pawh chu 1933 kum tirah kawlkulh ah sawn ani ta a. Tunah chuan Zirna pawh in hma sawn chho zelin Higher Secondary thleng zirna alo awm chho ta ani. 

            Kawlkulh ah hian sawrkar department hrang hrang a awm a, chungte chu – 

1. Administration – Administrative Officer (AO) in awpin, kum 1969 atanga    

    1993 thleng a awm. 

 

2. Food Civil supplies & Consumer Affairs Dept., Inspector of Food civil Supplies & Consumer affairs in a enkawl ani. 

 

3. Health Dept – kum 1959 ah Dispensary hawn niin PHC (Primary Health 

    centre )   ah hlankai ani tawh a, Doctor Pakhat in a thutchilh. 

 

4. Forest Dept – Pange Officer in a awp mek ani. 

 

5. AH & Vety  Dept – Kum 1980 ah bul tanin, VHA in a thut chilh mek ani. 

 

6. P&E dept – Kum 1985 ah bul tanin, kum 1990 ah 33 KV Sub station dah ani 

    a, JE in a thut chilh mek ani. 

 

7. Agriculture Dept- Kum 1961 ah bul tan niin Gram Sevak in a enkawl a, kum   

    1974 atangin AEO a awm. 

 

8. Horticulture Dept.-Circle Horticulture officer in enkawlin kum 1990 atangin 

    bul tan ani. 

 

9. PWD Department – Kawlkulh a department awm hmasa ber ani. Tunah SDO 

    (PWD) in a thutchilh.

 

10. Postal Department – Kum 1949 ah din niin, tun thlengin BPO a la ni. 

 

11. Soil & Water Conservation Dept. – Soil Demonstrator a awm thin a, 

      tuna kawlkulh a Far hmun te hi an kuthnu niin tunah chuan an awm ta lo. 

 

                        Kawlkulh khua hi Mizoram a Centenary lawm thei khua tlemte te zing a mi ani a. Meimit lovin kum 1903 atangin a lo ding chho tan a, tun thlengin harsatna nasa tak karah pawh a la ding reng a ni. Tun hma atang rengin hmun pawimawh tak ani a. Bangla awmna hmun anih mai piahlam ah zinmite tan rahbi pawimawh tak ani a. Zoram buai avangin Grouping Centre ani a, mihring pawh an pun phah nasa hle. Hman lai atanga khualbuk awmna reng thin ani a. Chuvangin tun hnu deuhah pawh Hotel, Restaurant leh Thingpui Dawr te chu mi tamtak eizawnna a lo ni chho ta a. Kawlkulh Economy innghahna pakhat ani ve bawk. Loneitu ten thlai thar, thei leh hnephnawl hmun dang pan ngai lovin deh ralna tha taka tan kawngpui kam an lo hmang thin bawk a. Amaherawhchu khawvel changkang zel leh hmasawnna te avangin NH-6 chu bypass ani a. National highway 102B tha tak a hnathawh mup mup ani bawk a. chuvangin, kawlkulh in hmanlai atanga a pawimawhna a hlauh chho tan mek a, mi tamtak eizawnna leh innghahna a lo tawp chho dawn ta bawk ani. Mahse, khaw taima, rilru sang tak leh Pathian tih khua an nih avangin beidawng mai lovin an thawhrim rahthlum tak an la seng leh ngei ang a, Zoram khawvel a hmun pawimawh takte zing a mi a ni reng bawk ang. 

                        

 

Lehkhau Rawn te

                       

1). K. Zawla, “To Bul” Hmar Arsi Press, Sikulpuikawn, Aizawl, 1st Edition 1981

 

2). K. Zawla, “Mizo Pi Pute leh An Thlahte chanchin”, Gosen Press, Aizawl 5th 

     Edition, 1989.

 

3). Rev. Liangkhaia, Mizo Chanchin, LTL Publications, Mission Veng, Aizawl, 

     chhut ngana, 2002.

 

4). Vanlalhuala, “Vanapa chanchin, R. Laltawna, Aizawl, 1993.

 

5). Kawlkulh Kohhran Souvenir” 100 Years, “ Lois Bet Print & Publication, 

     Published by Kawlkulh Kohhran, 2012.

 

6). Kawlkulh 100 Years Centenary Jubilee Souvenir, Kawlkulh Centenary Souvenir Committee, 2011. 

 

Articles:    

 

1. C. Lalhruaithanga, “Kawlkulh Lal Lalruma” in Kawlkulh 100 year Centenary 

    Jubilee Souvenir, 2011.

 

2. JF Lalhmuliana, “Kawlkulh History laktawi” in Kawlkulh 100 Years 

    Centenary Jubilee Souvenir, 2011.

 

3. B. Pawlthanga, “ kawlkulh khua a Zirna in\an Dan leh Kal zel Dan” in 

    Kawlkulh 100 Years Centenary Jubilee Souvenir, 2011. 

 

4. Upa F. Lalchawiliana, “Kawlkulh Kohhran Chanchin” in Kawlkulh Kohhran 

    Centenary Souvenir, 2012. 

 

5. Lalhmingliana Saiawi, “Kawlkulh khaw Chanchin, in Kawlkulh Kohhran 

    Centenary Souvenir, 2012. 

 

 

 

 

KAWLKULH NORTH

 

            Kawlkulh khua hi Aizawl atanga khawchhak lam,Champhai kawng 122 kms vela hlaa awm a ni a. A khaw awmna hi hmun thengthaw nuam tak ,tlang sang vak lo,hmun rem lutuk lo lai a awm a ni. Luipui pahnih Tuivawl leh Tuichang inkara awm a ni. Tuifinriat zawl atanga tehin 1,116m(3661ft) a sang a awm a ni a. A geographical coordinate chu latitude 23.6152651oN leh longitude 93.08392oE intawhna laia awm a ni. Hmar lamah Hliappui a awm a, chhim lamah Puilo niin, thlang lamah Dulte, chhak lamah Khawzawl leh Vankal te a ri a ni.

 

A TOBUL: Kawlkulh khua hi khaw hlun tak a ni a. Kum 2003 khan a kum 100-na lawm a lo ni tawh nghe nghe ani. Kan history ziaktu lar Rev. Liangkhaia, Dr. Lalthanliana, K. Zawla, Vanchhunga, C. Chawngkunga te hian an lehkhabu ziakah Kawlkulh hi an dah upa hle. An lehkhabu ziak hrang hranga a landanah chuan kum 1840 atanga kum 1892 inkarah pawh hian Kawlkulh hming hi a lo chuang daih tawh a ni. Aizawl Bawrhsap MC. Cabe-a pawhin a political record-ah Kawlkulh hi kum 1890-1892 khan a lo chhinchhiah daih tawh a ni. Engpawhnise, Vanhnuailiana Sailo lalna kal zelah Kawlkulh hian hmun pawimawh tak chu a luah ngei a ni tih a hriat a ni. Kawlkulh khua hi sawi tawh angin khaw upa leh hlun tak ni mahse tun dinhmun a mei mit lova a awm tan hun hi chu kum 1903 ni a chhut a ni a. Vanhnuailiana Sailo nau Lalphunga Tualbung atanga Kawlkulha a pem chhoh hnuah a fapa Lalruma chu Kawlkulh lal a lo ni ta. A thih hnuah Lal Dolura chuan a pa lalna chu rawn rochunin Laldolura chu Kawlkulh lal tih a lo ni ta a ni. Tun thleng hian Kawlkulh lal in dinna hmun leh lal awmna hmun chu Kawlkulh North-ah hian a la awm reng a.A lungdawh pawh hmuh theihin a la awm bawk.

 

            Tun dinhmunah hian Kawlkulh hi Kawlkulh leh Kawlkulh North tia Village Council rorelna hran a lo nih tak avangin Kawlkulh North dinhmun chauh hi kan thlur bing zui ang.

 

POPULATION: Kum 2011 chhiarpuia a landan chuan chenna in 294, mihring 1037 niin tunah hian mihring awm zat hi 1238 a ni thung. Tun dinhmuna voters awmzat hi mipa 369, hmeichhia 378 an awm. Ziak leh chhiar thiam zat hi 98% vel a ni.

 

SAKHAW LAM: Kawlkulh North kohhran hrang hrang atang hian Mizoram huap pawha Pastor lang sar takte pawh a nei ve tawh a. A veng ang pawhin eng kohhranah pawh rawngbawlna thawh hlawk tak khua   an ni.

 

1. Presbyterian Church of India (Mizoram Synod): Rambuai vang khan khaw tam tak sawikhawm a ni a. Kawlkulh pawh Grouping center a ni. Heng khua Dulte, Vankal, Puilo, Khualen te hi sawikhawm an ni a. Chung khua atanga lo kalte chuan rambuai karah pawh rawngbawlna chhunzawm zel duhin September ni 02.1969 (Thawhleh) zanah Pu Zanghaka, Dulte inah inkhawm tanin, kohhran committee chuan Biak In hlata awmte in dan chu tihmakmawhah ngaiin inkhawm hrang turin a rel a. Bialtu Pastor Tlanglawma’n Hmarchhak Presbytery, Ngopa Kohhrana neihah inkhawm hran tulna chu thlenin, pawm a nih hnuah Kawlkulh North kohhran chu lo dingin, a lo din tan ni atan October ni 01.1961 (Nilaini) chu pawm a lo ni ta a ni. Tunah hian Kohhran in 130 chuang an awm a, member 570 chuang awmin, dan zawh kim hi member 430 chuang an bawk a ni.

 

 

 

2. United Pentecostal Church of North East India (Aizawl East District): Mizorama UPC kohhran a lo din tirh khan Kawlkulh khuaah pawh nasa takin nghawng a nei a. Ni 16.04.1950 (Pathianni) khan Pastor Zakamlova hnenah mi tlemtein baptisma changin, member pawh an lo pung ve hret hret zel a ni. A tirah chuan Arro atanga awp nia hriat a ni a. Mahse, kum 1967 atangin District remtihnain Aiduzawl bialah a awm ta a. Hun lo kal leh hretin kum 1960-ah Biakin nei tanin kum 1985 thleng a hmun ngaiah an awm a. Kum 1975 khan Pastor Vankhuma’n a bial laiin Kawlkulh North kohhran hi Kawlkulh Venglai tia vuahin, chu chu tun thlenga kohhrana a hming vuah dan a lo ni ta. Tunah hian kohhran in 49 awmin, member 221 vel an awm mek a ni.

 

3. Isua Krista Kohhran (Kawlkulh North): Isua Krista Kohhran (Kawlkulh North) hi a var tia sawi an ni a. A din tan hun hi ni. 25.1.1975 a ni. Bialtu hmasa ber chu Tirhkoh Lalhleia a ni. Ral atangin a rawn vil thung a ni. A tirah chuan Pu Lianlerha (L) te inah an inkhawm a, mahse, an din atanga reiloteah Pu Zairema(L) inhmun chu Rs. 500/- a leiin kum 1976 khan tuna an biak in hmunah hian an sa nghal a. Tun thlengin an awm a ni. Kohhran in 46, member 205 an awm mek a ni.

 

4. Seventhday (Church of God): Kum 1980 velah mi tlemte kalkhawmin Pu Tlangkhuma(L) in, Kawlkulh North-ah an din a. A dintute hi hmun hranah an awmdarh hlawm avangin Kawlkulh North(Tawitawkawn) ah kum 1983 khan an thar thawh leh a. Local Chairman hmasa ber chu Pu Thangkunga(L) a ni. An bialtu Pastor hmasa ber chu Pastor Biakkunga a ni. Champhai in a bial a, tun thleng hian Champhai bialah an la bet ta zel a ni. Kum 1984-ah an biakin chu thlipuiin a tichhe vek a. A kum leh 1985-ah Pathian thuawih tlangah an sa leh a, chupawh chu kum 1999 khan lo halin a tichhe leh a. Kum 2000 khan sat ha lehin tun thleng hian chutah chuan an lawi ta. Kum 1996 pawl hnihah an awm a, an vai hian member 50 vel an ni.

 

ZIRNA LAM: Kawlkulh North-ah zirna in hi tunah Primary School – II leh Middle School – II te an awm a. Mahse, Kawlkulh khuain zirna in kan neih hmasak ber chu tuna Kawlkulh North-a veng pakhat anga awm ta Tawitawkawn a din Missionary Primary School a ni thung. A din atanga kum 8 hnu kum 1933-ah Kawlkulh khaw hmunah sawn pheiin Primary School – I kan tih tak hi a ni.

 

1. PRIMARY SCHOOL – II (Estd 1971): Rambuaiah khan Dulte, Vankal, Khualen, Puilo leh Chhawrtui te chu Kawlkulhah sawikhawm niiin, hmar lamah an awm deuh ber a. School din belh chu a lo tul hle ta mai a. Chutichuan kum 1971 chuan P/S – II chu din niin, Headmaster hmasa ber chu Pu Lallula Sailo a ni. Pension in he school atang vek hian a chhuak a ni. He school hi kum 1992 khan Middle School – II nen kai kawpin, Govt. Comprehensive Middle-ah a lo bet ta a ni.

 

2. MIDDLE SCHOOL – II (Estd 1986): He school hi kum 1986, February thla atanga hawn tan a ni a. Headmaster hmasa ber chu Pu R. Laldika a ni. He school atang vek hian a pension bawk a ni.Building an neih nghal loh avangin Community Hall-ah class an kal thin. Hemi kum vek September ni 29-ah permission an hmu a. Kum 1987, August ni 13-ah recognize niin, hemi kum vek September ni ni 1-ah deficit a hlan kai a ni. Kum 1992-ah P/S – II nen la kawpin Govt. Comprehensive Middle School – II tih a lo ni ta.

 

3. PRIMARY SCHOOL IV (Estd 1998): He school hi a tirah chuan Kawlkulh tlak lam ruam, Aizawl kawtchhuah lama awm a ni a. Khuanglak veng tih an ni. School dang atanga a hlat deuh avangin khawtlang tangrualin an din a ni. Amaherawhchu, hun lo kal zelah school naupang an tam tawk loh avangin P/S - I ni thin nen an inchhunfin(amalgamate) ta a. Primary School – V ti a kum 1998 a lo din ve tho, Tawitawkawn a mi te nen kaikawpin tunah hian P/S – IV tiin Tawitawkawn hmunah hian a lo awm ta a ni.

 

RORELNA LAM: Sawi tawh ang khan Kawlkulh North hi Kawlkulh atanga ro inrel hran in kum 2015 khan a lo awm ve ta a.Kawlkulh North Village Council tih a lo ni ta.Tunah hian VC general seat 4 leh reserve seat 1,a vaiin VC member 5 an awm mek a ni. Rorelna hran neia a awm hnu hian Congress leh MNF te’n Village Council-ah rorelna an chelh ve ve tawh a. Khawtlang tana thil tha leh hmasawnna tam tak an thlenpui tawh a ni.

 

PRIMARY HEALTH CENTER (PHC): Kawlkulh North-a damdawiin kan neih hi a tirah chuan Subsidiary Health Center tih a ni a. A building hmasa ber hi kum 1959 a sak a ni a. Sap ho sulhnu mawi tak a ni a. Amaherawhchu,kum 1980 a Primary Health Center a hlan kai anih khan a building chu sak that a lo ngai ta a. Doctor hmasa ber chu Dr. Lalnunthara a ni. Tun dinhmunah hian thawktu nurse 3, driver 1 leh group D 3 an awm mek a. Khum 10 awmin, heng a bial khua Vancheng, Chhawrtui, Dulte, Pawlrang, Hliappui, Saichal leh Kawlkulh-ah te hian Health and Wellness Officer leh Health Worker awmin, Vankal, Puilo, Changzawl leh Kawlkulh North-ah te hian Health Clinic a awm thung a ni.

 

ADMINISTRATION: Rambuai hnu lawk kum 1969 khan Administration Officer-in min awp a. Rei tak min awp hnu, kum 1993 khan AO hi sawrkara an dinhmunte siam danglam a lo nih khan min chhuahsan ta a. An office leh staff quarters hi hmun nuam tak a ni a, tunah hian an office hmun hlui chu BSNL (Telecom Dept.) in an luah a ni.

 

SEMI-GOVERNMENT AGENCIES: 

 

1. BSNL (Telecom.Dept): He agencies (Dept.) hian kum 2000 atanga hma rawn la tanin, AO hmun hlui, tlang theng thaw nuam takah office sain, a bul maiah tower an bun nghal a. Tun dinhmunah erawh chuan mumal takin an thawk tawh lem lo a ni.

 

2. Airtel: Telecom lama kan tangkaipui tak Airtel pawh hian kum 2006 khan hma an rawn la tan a. BSNL Tower hmar lam hret,hmun zawl remchang takah tower bunin, security 1 leh Technician 1 in an awmchilh mek a ni.

 

3. Aircel: Kum 2008-ah rawn inbun tanin sum lama harsatna avangin an chhunzawm thei lo.

 

4. Jio: Kum 2015 velah an rawn inbun tan ve chauh a. Aircel Tower an rochun nghal a. Security 1 awmin, thildangah chuan Khawzawl atangin an rawn vil thung a ni.

 

NGO: Kawlkulh North-ah hian Tlawmngai pawl lian tak tak 3 a awm a.\

 

1. YMA: Kawlkulh North khaw chanchin sawi dawn hian Kawlkulh chanchin atanga kan sawi hmasak zel a ngai a. A chhan chu a bul tan naah hian Kawlkulh tih hlira sawi anih thin vang a ni. Kohhran leh Tlawmngai pawl dangah pawh Kawlkulh tiha lo record tawhna hi sawi hmasak zel a ngai a ni. YMA hi 21.02.1961 ah Kawlkulhah din tan a ni a. President hmasa ber chu Pu R.K. Romana(L) a ni. Ama sawi dan takin chhim lamah hian in a la ding mang lo zawk a ni. Kum 1996 khan Kawlkulh Branch atangin Kawlkulh North chu an indang chauh a ni. President hmasa ber chu Pu T. Thanmawia a ni a, Secretary chu Pu R. Biakenga a ni. Tunah hian member hi mipa 319, hmeichhia 111 an awm mek a ni.

 

2. MHIP: He pawl hi kum 1974-ah Kawlkulh-ah din a ni a. Kum 1998 khan Kawlkulh atangin Kawlkulh North Branch hi a indang a ni. President hmasa ber hi Pi Hrangthangi a ni a, Secretary chu Pi Tlangmawii a ni. Member hi 317 an awm mek a ni. 

 

3. MUP: MUP hi Kawlkulh North-ah hian kum 1974 tan a ni. A dintute zinga thenkhat heng Pu Chaldaia(L), Pu Thangvela(L), Pu Patea(L), Pu Thira(L), leh midangten mual an liamsan tawh a ni. Upa tawh taka la dampuite pawh an awm a ni. Tunah hian(data report chin) mipa 49, hmeichhia 49, an vaiin 98 an awm a, amaherawhchu, boral leh member ni thar hi an awm leh thin avangin an member dinhmun hi a danglam ve reng a ni.

 

HMUN LEH RAM HMING THENKHATTE:

 

1. Chhura Thlalak: Kawlkulh North atanga hmar lam 2 kms vela awm, lung bang sang taka Chhura lem ziak a ni a. Khuarel chhiatnain nasa takin a tihmelhem tawh a ni. Hmar ho sulhnu ni a rin a ni. Puilo, Vankal leh Khualen te pawh hmar hnam peng hming vek a ni a. Helai tlang velah hian hmarho an lo awm tawh thin ngei nia rin a ni.

 

2. Dama Lungchawi: Makpalen hnuai a ni a. Mizo pachak Damvea lung chawi a awm a, dah that reng a ni thin a, BRTF-hovin an nawr lum ta a ni ang, a ram hmingin a pu ta a ni.

 

3. Dardah puk: Pial Mual kawng,Nuihruk ram chhung tlang kham a ni a. Hmanlaiin lalten an ro an thukru thin a. Bevuak-a an awmlai-a kangmei leh rallaka an him nan lalten an  dar an dahna a ni.

 

4. Far hmun: Soil & Conservation Dept.in far an chinna a ni. Kumpinu hunlai khan survey hovin Tawi tlang nen degree lak nan an hmang thin. Kawlkulh sub Town Cadatral Survey-in an plan pawh khan, helai atang degree lak a ni. A sanglai atangin Aizawl a lang thei. S hoten darthlalanga inbiak nan an hmang thin an ti.

 

5. Lal lungdawh: Hetah hian Kawlkulh lal Laldolura thlan a awm a.Chumi avang chuan a hming pu ta a ni. Veng hming angin a pu hlen ta. Hmuh theihin a la awm bawk a ni.

 

6. Kanhlum: Mi pahnih lai 1. Lalliana, 2. Lalnawka (Saizinga, Ngurchhawni te pu) an kanhlum avanga phuah a ni. Tun hnai lawkah pawh mi pakhat chu lo kang chhuak a venna lamah a kang hlum leh.

 

7. Maikhawli Pumbawh: Maikhawli hi Tawitawkawn-a awm a ni a, a rai puar si a, a ram awih nen bungbu-in a kal a, chuvanga phuah a ni.

 

8. Nuihruk: Ram kheng tak,tha si, a ruka nuih ver verna a ni.

 

 

 

FAINA LAM: Veng hrang hranah faina lam mawhphurtu insiamin tawngka mai bakah whatsapp groupte siamin faina pawimawhzia leh thatzia inzirtirna hi a theih ang anga neih a ni thin. Dumping ground neiin chutah chan Inrinni tinin motorin bawlhlawh thiar khawmin a paih thin. Tin, khawtlang hruaitute remruatnain veng chhung thenfaina neih thin a ni bawk. Hmasawnna tam tak hmuh tur a awmlaiin tanlakna tur erawh a la tam em em a ni.

 

EIZAWNNA LAM: PC sawrkarah khan Garden colony kalpui niin chhungkaw thahnem takin serthlum an ching a. Kawlkulh ram serthlumin a ngeih hle mai a. Chhungkaw engemaw zatin innghah nan an hmang hman nghe nghe a ni. Vanduaithlak takin serthlum tam hri a lo thleng tlat mai a, serthlumte chu a tam zo ta deuh vek mai a. Tunah hian chhungkaw thenkhat chuan ching thar lehin hma an la leh mek a ni. Tin, Dragon fruit ching enge maw zat an awm bawk a. Tunah hian a puitling tan mek a, chhungkaw thenkhat chuan innghah nan an hmang ve tan mek bawk. Kawlkulh North-a a mi cheng tam zawk hi lo neih lama eizawng an ni tlangpui a. A tlangpui thuin buh, sawhthing, hmarcha, etc hi an ching tlangpui a ni a. Chutihrualin, sawrkarin scheme hrang hrang a siamte bawhzui a, hlawhtlinpui a, eizawnna tlaka siam mekte pawh an awm bawk a ni.