Khawzawl District Commissioner Pu K. Lalrohlua hnen a\anga lehkha V/C-in a dawn angin, Ni 4.7.2019 a\ang khan Khawzawl District chu lo piangin, Ni 12.8.2019 a\angin a takin a lo function ve ta a. Kum 2024 hi kan District-in kum 5 a nih champhaphak lo thleng tur thlirlawkin, “Khawzawl District Chanchin” hi a bu-a siam tum a ni a. Chuta chuang ve tura Zaingen Veng chanchin ziak tura tih kan nih angin ziah a ni ta a ni.
Zaingen Veng chanchin ziak tur hian Zaingen khaw chanchin a\anga \an loh chuan a famkim thei dawn lova, chuvang chuan Zaingen khaw chanchin han sawi hmasa ila, a dawtah Zaingen Veng chanchin chu kan sawi leh dawn nia.
ZAINGEN KHAW CHANCHIN TLANGPUI :
Zaingen khua hi Khawzawl a\anga hmar thlang 12 Km vela hlaa awm a ni. Khawhmun rem leh nuam, zo thlifim tamna ram a ni. Tuipui (Sea Level) a\anga tehin metres 1470 vela sang a ni. Khawzawl a\angin Motor kawng \ha takin a pawh a, LPK lenga zau a ni.
Zaingen khaw lal hnuhnung ber chu Lalmakthanga Sailo a ni a. An in thlah chhawn dan hetiang a ni :- Lalmakthanga Sailo pa chu Kaihranga a ni a, Kaihranga pa chu Do\hiauva, Do\hiauva pa chu Vanhnuailiana niin, Vanhnuailiana pa chu Lalsavunga, Lalsavunga pa chu Lalpuiliana, Lalpuiliana pa chu Lallula, Lallula pa chu Rohnaa, Rohnaa pa chu Lalchungnunga, Lalchungnunga pa chu Sailova a ni. Sailo lal thlah ziding dik tak kha an ni.
An lo awm tawhna hmasa hmun indawt dan hi a kim chang chuan a sei deuh dawn avangin, Baktawnga an awm a\ang hian chhui ta mai ila a \ha ang e. Baktawng a\angin Do\hiauva hovin Khawhrengah kum 1884/1885 velah an kai a, Khawhreng a\angin Maite-ah an kai leh a. Maite-ah kum khat emaw chauh awmin Bunghmunah an kai leh a, Bunghmunah hian lal Do\hiauva chu 1887-ah a thi ta a ni.
A fapa Kaihranga chu a pa aiawha lo lalin, Bunghmun a\angin Arro ram Kawihthuang hmunah a kai a, chuta \angin Hrianghmunah a insawn leh a, Hrianghmun a\ang hian Arro ram vek ‘Kaihranga hmun’ an tihah hian a awm leh a. Heta tang hian Hnahlanah chho leh in kum khat lek hnuah Bunghmunah an let leh ta a ni.
Bunghmun a\angin kum 1906 vel khan Likkawn bul Zaingen hmunah hian an kai chho leh ta a, hetah hian Zawlbuk pawh an nei hman an ti. Kum 1912-ah Khualenah an kai chho leh a, hetah hian Biak In pawh an nei nghe nghe a ni. Heta an awm lai hian HRIPUI a leng a, a rapthlak hle a ni awm e, naupang rual khat chu a mang deuh \hak an ti. Khualen a\ang hian kum 1919-ah |hiak Khawhmun hnuai, |helret phunna, tun hnu deuha Saikah hmun an tih takah hian an kai leh a. Helaia an awm lai 1921-ah Kaihranga fanu Saihlupuii chu a thi a, a thlan bulah \helret an phun nghe nghe. Helai hmuna an awm lai, 1922-ah Sai pachal an kap a, kum chhiar nan ‘Sai kah kum’ te, hmun sawi nan ‘Sai kah hmun’ te an ti \hin.
|hiak khaw hmun hnuai, |helret phunna, Saikah hmun an tih bawk a\ang chuan kum1924 ah |hiak (Kanhmun) ah an rawn in sawn leh a. Vanduai thlak takin kum 1928, May thla chawhnu lamah |hiak khua chu a kang ta a, hei hi Zaingen khuain ‘Kan kum’ an tih \hin chu a ni. In 95 lai niin an inchhal a, khaw kan \um hian In 21 leh Biak In chiah a kang lo a ni. Kum 1929 hian lalnu Lal\huami a thi a, a ruang chu hmanlaia an tih \hin angin kuang ur a ni a, a ruhrote chu dah \hain ‘Lal thlan Ro/Thlanpui’ an tihah dah/phum a ni. Thlanro/Thlanpui hi |hiak tlang hmawr lam tlangdung hmun rem laiah siam a ni. Hetah hian La\huami, Do\hiauva, Siallamthangi leh Kaihranga te dah/phum an ni.
|hiak (Kan hmun) a\ang hian kum 1931-ah Khualen hmun damah an kai leh a, hemi tum hian kai ve duhlo in 12 lai an awm. Chungte chu :- Liantawna, Phirbawra, Dophunga, Lianchhunga,Thatbuta, |huambawnga, Thanzinga, Haudala, Kutdenga, Selkhama, Lianchhingpuii leh Vanzuana te an ni.(Vanzuana hi Mualvawm, tuna Mualvawm Field atang hian Hmunnghakho awmnaah a rawn pem phei a ni) Hmunnghak, kai ve duhlo ho chu Zaingen hmun Field velah khian an lo insawn phei a. He lai hmunah hian Arro a\anga lo awm phei in 4 te nen in finin an awmho ta a ni. Kum 1938-ah Khualen a\ang chuan Zaingenah an rawn kai leh a, Hmunnghakho hi an rawn fin a ni. |hiak hmun pelin Zaingen hmun pawh thleng si lovin a inkarah an awm ta a ni.
Hetih hun lai hian |hiak khaw dang Aizawl piah deuhah a lo awm ve bawk avangin, Sawrkar leh Kohhran lehkha a kalsual fo avangin, |HIAK khua kan lo nih \hin chu thlakin ZAINGEN tih hming alo pu nghet ta a ni. Kum 1942-ah Kaihranga hovin chhungkaw engemawzat Khualenah an kai chho leh a, Zaingen khua chu a fapa Lalmakthanga’n a awp ta a ni. Kaihranga hi 1945-ah a thi ta hlauh mai a, a ni a thih takah chuan a fapa Laltuma chu Khualenah chhovin a han awp ta a ni. Hetih hunlaia Lalmakthanga rorel pui (Upa) te chu :- Hrangkhupa, Saptawna, Kamlova, Telrawka leh Hahmawnga te an ni. Lal leh roreltute hian Khawchhiar (Ziaktu) Sawrkar hriatpuiin an nei \hin a, chung hna lo thawk tawh \hin te chu :- Piangthuama, Rualzakhuma, Thandailova leh K.Lalzuia te an ni.
Zaingen khuaa Kohhran, Zirna, Party, Games, YMA leh Rualchhuak Party lam te tawi te te in han chhui lawk ila :-
1. Kohhran : Kum 1906-a Bunghmun a\anga Likkawn bul Zaingen hmuna an rawn kai hian ringtu Ralkhuma leh Thanglawra an rawn kai tel ve a, an khawhar thei hle. Lal Kaihranga hian ringtute hi nek chep a tum hle laiin, Pathian remruat a ni ang chu a fanu Sairengpuii chu ringtu-ah alo inpe hlauh mai a, nekchep leh tihduhdah an ni ta lo a ni.
Kum 1912-a Zaingen a\anga Khualen hmuna an kai hian ringtu heng mite hi an awm belh leh – Piang\huama, Vaitlaia, Dobanga, Hrang\huama leh Hrangthawma te. Ringtute hian Biak In an sa a, an Biak In chu 1915-ah Presbytery-in a nemngheh sak. Kum 1919-a |hiak khaw hmun hnuaia an kai leh in Tirhkoh Kap\hianga a rawn awm a, zirtirtu Haubawiha an rawn dah bawk. Sunday School-ah A, Aw, B te an zir \hin.
Tirhkoh Kap\hianga hi Tirhkoh Lalthima’n a rawn thlak a, Pastor Thankhuma’n Pamchung a\angin a rawn enkawl bawk a. Pastor C.Zawna chuan Theological School kum 1928-ah a zo a, heta \ang hian Tirhkohah awm nghalin, tirhkoha a awm chhung hian Tualpuiah a awm a, kum 1944-ah Pastor atan nemngheh a ni. Zaingen khua chu Bial \huthmunah an hmang ta nghal a ni.
Zaingen khuaa Kohhran Upa lo ni tawh te leh an nemngheh kum:-
1) Upa Piang\huama - 1924 2) Upa Zadala - 1926
3) Upa Dobanga - 1926 4) Upa Surawia - 1930
5) Upa Thandawla - 1953 6) Upa K.Lalzuia - 1958
7) Upa Laldawla - 1964 8) Upa Rokima - 1964
No 4-na a\anga a hnuai lam zawng te hi Khawzawl-a khawm luh kan nih khan dam takin min la ho a ni.
2. Zirna : Zirna lamah chuan 1919-ah zirtirtu Haubawiha alo awm a, kan lal fanu Sairengpuii pawhin Lower Primary School a pass a ni. 1948-ah Pu Kamliana a rawn awm leh a, 1953-ah Zaingen lal Lalmakthanga fanu Nl Lalengzami a rawn thawk a, 1954-ah Tv H.Khualhnuna, 1957-ah Nl Malsawmi, 1962-ah Tv C.Valkunga.
Zaingen khaw Primary School a\ang hian Lower Primary School-ah Mizoram pumah 1953-ah Lianhnuna chu pangana a ni a, 1955-ah Tawnluia chu pakhatna a ni. Middle School ah 1956-ah Lianhnuna hi pakhatna a ni a, 1958-ah Tawnluia hi Pakhatna a ni leh bawk.
1956-ah Primary School behchhan in M.E School chu private-in din a ni a, class IV chauh hawn ala ni. Pu Kamliana leh Tv Khualhnuna te chu zirtirtuah ring nghalin, Tv K.Lalsanga chu zirtirtu ah lak a ni. 1957-ah class V hawn belh a ni leh a, 1958-ah class VI thleng hawn a ni ta a ni. M/S hi P/S liam tlang dung hmun remah awmin Building pawh a hran in a nei tawh bawk. 1958 hian Tv K.Lalchhawna leh Pu Laihnuna te chu zirtirtuah lak an ni leh bawk. Kum 1959-ah Tv Lianhnuna chu Headmaster turin lak a ni a, 1964-ah Pu K.Vulliana chu Headmaster atan lak ngheh a ni a, Zirtirtu atan Tv H.Lianzuala leh Nl Lalhmingmawii te lak an ni leh bawk.
3. Party leh rorelna : Ni 9.4.1946 -ah Mizo Union Party a ding a, Ni 4.1.1952 -ah District Council siam a ni a. Ni 4.7.1954 -ah Village Council siam a ni leh a. Ni 16.8.1954 -ah lal rorelna a tawp ta.
Mizo Union Party bakah hian Zalen Pawl (UMFO) Party a ding. Ni 4.7.1954-a Village Council inthlan hmasa berah Mizo Union chakin, thlan tlin te chu heng mite hi an ni :-
Pu Vanthawma, Pu |uankhama, Pu Kap\huama, Pu Surawia leh Pu Manliana (Mante-a). 1957-a Village Council term hnihnaah chuan Zalen pawl chakin, thlan tlin te chu :- Leiphunga, K.Lalzuia, Sangthuama leh Zathata te an ni. VC Secretary ni thin te chu :- Lalvuana, Dokhuma leh Hmingdailova te an ni.
4. Games : Kum 1943 vel atangin Zaingen khuaah hian Games & Sports Association din a ni a, hruaitu hmasate chu heng mite hi an ni :- Thanghuta, Zahlira, K.Lalzuia, Sailianhranga, Aibuaia leh Lalvuana te an ni.
Zaingen khuain Games lamah hma a sawn zel theih nan kum 1953 khan Hav. Chuaukunga’n a pa Pu Zuanga hmingin Football Tournament a buatsaih. Games hmasawn nan Pu Thangthuama’n football size 5 a lei. Pu Lalzuala leh Pu Thankima ten Party Cup atan 1956-ah Istiri (puan nawhna) an lei. Zaingen khuaa inbuan chak kan neih te chu hengte hi an ni :- Behzuta, Kamlova, Za-auva, Hrangdawla, Rozinga, Hrangbawiha, Zialmawia, Zosanga leh K.Lalchhawna te an ni. Mizorama inbuan chak ber thin chu Chhundenga a ni a, Tualpui khuaah a rawn zin a, hetihlai hian Zaingen lal Kaihranga pawh Tualpuiah hian a zin ve a, lal kaihza vengin Pu Rozinga pawh a zin ve a, hemi tum hian Pu Chhundenga leh Pu Rozinga chu an inbuan tir ta a, Pu Rozinga hi a chak hlauh a ni awm e. Pu Rozinga hian fiamthu ti takin ‘Mizoram inbuan chak ber nge chak ang a hnehtu’ a ti thin.
5. YMA : Kum 1948-ah Tualte atangin Pu Kamliana chu Zaingen khuaah zirtirtu atan sawrkarin an rawn dah a. A ni ho hian Ni 16. 9. 1948 Sunday Chawhnu Inkhawm banah, Thalthlithaw Veng a Primary School-ah Zaingen Branch YMA hi din a ni. A hnuaia mi te hi a dintirh a hruaitute an ni :-
President : K.Lalzuia
Vice President : Vanthawma
Secretary : Kamliana
Asst Secretary : Sailianhranga
Treasurer : Siamliana
Fin.Secretary : C.Siamliana
6. Rualchhuak Party : Zaingen khua hi khaw nuam leh khaw inlungrual tak kan ni a. A chhunga chengte hi pian kum inang tlang deuh leh thian inkawp tlang deuh ten hun rei deuh tawh atang khan tleirawl/rawlthar chhuah velah, “Rualchhuak Party” tiin party hmingte inphuahin, chhuahbuk (tu In emaw) neiin kan lo awm tawh thin. Chhuahbukah hian zanriah eikhamah mipaho chu kan chhuak khawm phawt a, chuta tang chuan nula rim tur emaw, hmun danga leng tur emaw chu kan kalchhuak chauh thin. Kal chhuak peihlote pawh men chhung chu chhuahbukah ti tiin hun kan hmang bawk thin a, thil kan tih khawm pawhin chhuahbukah vek kan ti khawm thin. Chhuahbuk hi mi zau chhungkua tan lo chuan han tlin sen chi pawh a ni lo.
Kum 1948-ah Pu Kamliana chu Zaingen khuaah zirtirtu in alo awm a. Mi huikhawm thiam leh zau tak a ni a, a ma kawm rualte hui khawmin hun hlimawm tak an hmang thin a, kum 1950-ah chuan thian inkawm rualchhuakho chuan Eitawk party tih hming in phuahin an lo ti khawm tan ta a ni awm e. Hei hi rualchhuak party lo intanna chu a ni.
Zaingen khawlai takah hian zawl (field) a awm a, chutah chuan infiamna chi hrang hrang an ti thin. Football phei chu an uar hle a, tlai tin feh haw hmasa atanga lo pet tanin thim thlengin hah pawh hre chang lovin an pet thin. Kum 1956 khan Pu Thangthuama, sipaia tang chhuti-in Football a rawn hawn a, Pu Thankima leh Pu Lalzuala ten ISTIRI (Puan nawhna) leiin Party Cup atan an pe a, chu chu kumtin rualchhuak party zawng zawngten an inchuh thin a ni.
Tun thlengin Zaingen vengah hian kan la inchuh ta zel a, harsatna deuh a awm kum chuan Volleyball-in an thlak thin. Istiri kha awm tawhlo mahse, Games lam hruaituten bel emaw, dekchi emaw, thildang lawmmanah siamin, hlut takin kan la in chuh zel a ni.
Hun kal tawh engemawti chhung khan zan lama khawhar ina tui/thingpui sem thin te kha rualchhuak party kut vek a ni a, zing lama khawhar chhungte tui chawi sak leh tih tur dang tih sak te pawh an kut vek a ni thin. Khawtlang inenkawlna kawngah pawh rualchhuak party-te hi an tangkaiin discipline siamtu tha tak a ni. A hnuaia mi ang hi rualchhuak party lo in din tawh dan a ni a, mihring chu a tam tham deuh avangin tarlang lo mai ila, an party hming chauh tarlang mai ang :-
1) Eitawk Party 2) Chawnghawih Party 3) Nuihiuau Party
4) Lemhleih party 5) Zawlriallo party 6) Thlerkawi Party
7) Chuailo Party 8) Vulreng Party 9) Vulmawi Party
10) Vullai Party 11) Dinthar Party 12) Hmanamiaianuam Party
13) Chhuakthar Party 14) Hlimreng Party 15) Chuailo Party
16) Zoawi Party 17) Runmawi Party 18) Zonun Party
19) Lungrual Party 20) Thangmawi Party 21) Zomawitu Party
22) Thazual Party 23) Zobawmtu Party 24) Sawirem Party
25) Perhkhuang Party 26) Chiangsa Party 27) Sawhkeh Party
28) Zunzam Party 29) Tuakthar Party
Zaingen Khuaa thil thleng langsar deuh te :-
SAKEI KAH.
Zaingen khua (Kaihranga khua) ah hian chhan hrang hrang avangin Sakei hi kah a lo ni thin, a vaiin pasarih lai an kaphlum a ni. Hetih hun lai hian khawtlangin Silai (Laiphir) an nei a, hei hi Buh Silai tiin an sawi bawk. Hemi hmang hian Kar an siam thin a, Zaingen khuaa pa leh tlangval zawng zawng deuh thaw hian Kar siam hi an thiam a ni deuh ber mai. An kah hmasak dan indawtin han ziak ila.
1. Sakei kah hmasak ber chu Biak In mualah a ni a, Sial a seh avangin kar hi siam a ni. Kar in a kah hliam chu chhui zuiin, Pu Hausuaka chu a hmasa ber a, Sakei hliam chuan rawn seh tumin a rawn zuan a, a nin alo kap a. Vanduaithlak takin a Silai chu a tlawlh ta hlauh mai a, mahse vanneihthlak takin a rawn zuang ang lai takah chuan leihruisenin a lo awk hlauh mai a, chu chuan la kawiin a seh ta lo hlauh a, chu chu Pu Tlaupawla’n a lo kaphlum ta a ni.
2. KEICHERA : He Sakei hi a hming an phuah ang hian a cher hle a, pawl tuamho hian an hmu fo mai a, an nin em avangin an hual a, an kaphlum ta a ni. A kaphlum tu tak hi hriatchian a ni ta lo. A kawchhungah engmah chaw pawh a lo pai miah lo an ti.
3. HNIAKHERI : He Sakei hi a hming ang lo takin a pa a ni tlat. A ke-ah kah hliam tawh a nih vangin a hniak pawh hi a her ta a ni awm e. Ran te a seh fo avangin a ninawm ta deuh a, khawtlangin Thelret hmun peng chung, Haifavang kawn an tihah kar siamin an kap ta a, a chung tlang hnaiteah alo thi a ni.
4. HLAIBA : Sakei lian leh bak buk tak, han hmuh mai pawha hlauhawm tak hi a ni. Rante a seh fo mai a, mipui tan a ninawm tak em avangin Pu Kamlova bawk zawl an tihah kar siamin an kap ta a, a hmunah hian a thi nghal a ni.
5. TLANGVALA NU : Sakei an kahhlum ve tho “Tlangvala” an tih nu/pui hi a ni. Thelret hmun pengah kar siama kah a ni. Kar hian a kap thelhah an ngai a, a kah atanga ni thum hnuah Pu Muala daikal turin kawng chung hnaiteah thiin a han hmu ta a ni awm e.
6. TLANGVALA : Tlangvala hi a nuin a thihsan atang hian a ninhlei ta em em mai a. Vawk, Bawng leh Sakawr te a seh ta fo mai a, tlangval zan lengte pawhin an hmu fo thin a ni. Mipui tan a ninawm tak em avangin kar hmanga kahhlum a ni ta a ni. Tun thlenga ram/hmun sawi nana kan la hman fo, Tlangvala thihna kawn/Sakei thihna kawn kan tih takah hian kar siamin an kaphlum ta a ni. Zana nunau leng ngam lova ti raltitu a thih takah chuan lung muang takin an awm thei ta a ni awm e.
7. Sakei kah hnuhnun ber chu, Sedaikawn bulah Pu Thlukliana Sakawr a seh a, chu chu kar an siam hnan ta a. Sakei chu a kap hliam a, a thlang kawrteah awmhmun khuarin a in hrosa a. Mi tam takin an kap a, an kap fuh hlei thei lova, a tawpah Pu Suakzinga’n a kaphlum ta a ni. Hetianga kar hmanga Sakei an kah tak fo-ah chuan Zaingen khua chu kar siam thiamah an lar ta em em a, an lar zia lanna pakhat han sawi ila - Pu Thankima leh Pu Lalzuala te thian dun Aizawl kal chu Seling khuaah an riak a, an khuain kar siam an thiam tih hriain kar an lo siam tir a. Hemi tum pawh hian vanneihthlak takin an kar siam chuan a kaphlum an ti a ni.
SAI KAH.
Kum 1922-a Thiak khawhnuai”Thelrethmun-a an awmlai hian, Sai pachal (a pa dawp) lian zet mai hian Zaingen ram leh Aiduzawl ram hi a kar tawn chhen mai a. Lal Kaihranga chuan Bawrhsap NE Perry-a hnenah kah phalna a dil a, a ni chuan C.I rawn tirin a kah phalna a rawn pe a. A ni pawh chu a kah naah hian a kal tel ve ta nghe nghe a ni awm e.
Lal Kaihranga chuan Arro khaw pasaltha Thangchhuma (Upa Saikhuma pa) chu chah pheiin, Zaingen khaw pasalthate nen chuan Sai kap turin tlangval tam tak nen an chhuak ta a. Kaihranga chuan a pasalthateho chu an Silai zen tam tawk takin a thun sak vek a, an phawrh then loh nan a hawlhna a laksak vek bawk a ni.
Aiduzawl lal Hrangkima pawh a pasalthate leh a khaw tlangval tam tawk tak nen an rawn thawk chhuak bawk a. Bawrhsap thurawn angin hetiang hian thuthlung an siam - “Sai chu khawi khua zawk zawk pawhin kap se, a tlukna hmun kha ramri lai pawh nise, a luin a delhna lam ram neitu zawk zawk khan a lu an chang ang” tiin. Pasalthaho chu Sai kap tur chuan an kal ta a, vanneih thlak takin Pu Thangchhuma hmaah chuan lo chhuakin a kapthlu ta ruah mai a. A kaptu pawh a Silai nghawng nat em avangin a tlu tawp a, a silai pawh a rek lai takah hian a bung hmawk a, ni thum lai a sil a ni awm e.
Sai chu Kaihranga ram lamah a tlu ta si a, Hrangkima chuan a naupang zawk nihna leh a kal tam zawk nihna chhuang in, ka han lawm hmasa ang e, tiin Sai lu chu a hawpui ta a ni. Tichuan Sai sa chu an insem ta a, an vaiin mi 300 lai an ni an ti.
Thenkhat sawi danah chuan, ‘Sai lu an inchuh thu Kaihranga fapa, Hnahlan lal Saithuama’n a lo hriat chuan a thin a ur ta em em mai a. A rawn chhuk a, Hrangkima hnenah chuan Sai lu chu a laksak dawn a, Hrangkima chuan Saithuama hnenah, Kaihranga hian “Ka khaw rama mi Sai hi a khaw ram lamah a khalh a, a ti diklo a ni” a ti a. Saithuama chuan, “Sai hi Bawng khalha khalh theih em ni? Chutiang nise engatinge i kawtah i kah mai loh? a ti ve thung a, Sai lu chu laksakin a pa Kaihranga hnenah a pe ta a ni,’ an ti. He Sai kah chawia hming phuahte chu - Thanmawii, Saikhuma, Saimanliana, Saithanhranga, Saisaeia leh Saituliana te an ni. Kum 1922 hi kum chhiar nana hmangin “Sai kah kum” an ti thin bawk a ni.
SANGHAL SAHHUAL.
Zaingen khua hi tun hma lal lallai chuan Kaihranga khua tih a ni a, in za han tih ve mai tur hi an ni. A khawthleng a remin a nuam hle a, a mi chengte pawh an in lungrualin tumah an ngai bik lo. Lal rorelna tih tawp a lo nih hnuah pawh Village Council (V/C) tha tak ding chho zelin, rorelna tibuai khawp sual fal leh politics avanga buai pawh awm lovin hlim takin hun an hmang chho thin a ni. Kumtin ram theha thlawhhma nei thin an ni a, kum 1968 pawh hian Pialthleng leh Khuaihnuai ram neih a ni a. July thla alo nih chuan Pangen ruama in sawm lai lo a mi vaimin chu zan khat thil thu-ah Sanghal rualin an ei zo ta vek mai a, hetiang a nih chuan kan tuar lovang tiin lal upa pawh lo ni thin Pu Hrangkhupa inah pa engemawzat kalkhawmin Sanghal sahhual chu an rawt ta a ni.
Sanghal awmnate lo en thlithlai turin mi pali, Pu Lalauva, Pu Laluapa, Pu Lalkhuma leh Pu Lalthlamuana te ruatin a tuk zingah an kal ta a ni. Pu Lalauva leh Pu Lalkhuma te hi Likkawn lamah kalin, Pu Laluapa leh Pu Lalthlamuana te chu Zokawngchho lamah an kal ve thung a ni.
Pu Laluapa te thian dun chuan Pialthleng kawng thlang ngawpuiah chuan Sanghal tam tham tak chu an han hmu ta a. Lam kalte hi an lo ruahman lawk angin Kawnpuiah an inhmukhawm a, Pu Lalthlamuana chu in lamah chanchin hriattir turin tirh haw a ni ta a ni.
Lam kalte ngai chang renga in lama lo awmten Pu Lalthlamuana an han hmuh meuh chuan awm ngaihna pawh an hre lo a ni ber mai. Val upaten tlangau tirin, mipa puitling awm zawng zawng leh rawlthar a thei apiang Sanghal sahhual turin kal vek tur a ni a, hmanrua neih ang ang kengin kawtchhuahah innghahkhawm vek tur tiin a han puang ta a. Hetih hun lai vel hian pa sawmhnih rual vel chu kuli-in Vankal khaw lamah an lo thang bo mek a, an chan ropui ngei mai.
Nghal rual kawngthlang a mi chu sahhual remchan zawk nan kawngchhak lamah khalh chhoh an ni a. Val upate ruahmannain fel takin buh tin sawm hmun velah an hual ta phawt a. Pu Kapthianga, Tlangau chu thinglerah lawnin au rual tur a tih ve leh au rual dual dual chungin an zawna thang te telin an hual zim zel a, tin thum hmun vela an hual zim hnu chuan val upaten dai tha deuha theu turin an ti a, an dai theu te a that leh that loh an endik leh vek hnuah a kal khante siamin thang an kam ta a ni.
Tlai dar thum velah hual lut an kal tan a, hual lut atan hian pa fel leh viak tha mi pathum - Pu Sinanga, Pu Lalzawna leh Pu Khawdina te an ruat a. Anni hian Sanghal zahnih rual vela tam awmkhawm chu a darh thei ang ber turin an va um ta a. Chumi darh chuan dai an rawn su a, chu chu a remchan dan ang leh an hmanraw neih ang, a thenin fei-in an chhun, chemin an sat, hmawlh tumin an lo vaw bawk. A then lahin a man in an man a, a thenin thangin an awk bawk. Hmun tin maiah chuan Sanghal chu an ngek ta chuah chuah mai a, mipui lah rawl nen an tang bawk, a rik hian a ri chur chur a ni ber mai.
Kut lawnga lo man tan khan tih ngaihna awm hek lo, an in lehthal zak zak mai hlawm a ni. Hual luta kal Pu Sinanga chu Nghalpuiin a vawrh ta lawp lawp mai a, a thianten an chhan thuai a, vanneihthlak takin eng em a ti lo hlauha a lawmawm hle a ni.
Sanghal tihhlum tak hi a vaiin 37 (Sawmthum leh pasarih) lai a ni a, hengte hi thiam thil hrang hrang hmanga an tih hlum a ni. Kan sawi hmaih hauh loh tur chu, hemi tum hian feia khawh phal a ni lova, Silai phei chu a tir atangin ken an phallo nghal a ni. Pu Lianzuala hian thang hnawka tang pathum lai hreipuiin a chek hlum a ni.
A hmun atangin khaw thim tanah hawn a ni a, khuaa miten ropui taka lo hmuakin Thalthlithaw venga Sikulah a vaiin dahkhawm a ni.A tukah a kal pawh kallo pawh thliar chuang lovin, in kaw kipin Sanghal sa chu an insem ta a ni.
Val Upaten ruahmanna fel tak siamin, pakhat aia tam lo tihlum pawh, a lu pakhat aia tam an chang thei lova, a bawp pawh pakhat aia tam an man thei bawk lo a ni. Sanghal sah hualna hmunah hian a tukah mi tlemte an va kal leh a, an thangkam (Tungthlun) pakhata Sanghal lo la awk reng chu Pu K.Lalkhuma’n ava pal chhuak a, Sanghal chuan a lo bei ta mai a. Pu Doluta’n a chhan nghal thuai a, Sanghal chu a kap karah lutin a nin a lo chep bet tlat a, chu chu Fei-in an chhun hlum ta a ni. Hemi tuma Sanghal sah hual hi Zaingen khaw chanchinah chuan nuam an tih leh an sawi nin theih loh a ni reng tawh dawn a ni.
CHINGHNE UM.
Zaingen khaw dai velah hian 1959 kum hian Chinghne rual nghal em em mai hi an awm a. Bawng leh Sial te an seh ta fo mai a, han tih ngaihna tak erawh avang hle. Bawng neiho chu inhmukhawmin umbo an rel ta ringawt mai a.Bawng neiho zinga a khaipa deuh deuh - Pu Thansiama, Pu Lalhlira, Pu Saawka, Pu Zialmawia, Pu Pachhunga leh mi dang 30 rual lai chuan Hmunmual rama Chinghne awm chu um tanin Kawngsahmual ah, Mel thum mual thlengin an um ta a.
Kawngsahmual peng, Thangtedawh kawnah chuan an awmkhawm a, tih leh zel dan turte an sawihova. Chutah Pu Thansiama chu lo dingin, in aukhum hi thil huatthlala tak a ni a, lal ban laia lal an aukhum pawh khan an huat em kha, Chinghneho hi i aukhum ve ang tiin a rawt ta a. Tha dawna an hriat avangin an phur hle hlawm a.
Pu Thansiama chuan kaihruaiin, ’Chinghnia,’ ka ti ang a, nangnin ring takin,’Tlanbo rawh se’ in ti ang.’Engvangin maw?’ ka ti leh ang a, nangnin ring tak bawk in, ‘Bawng seh an chin avangin’ in ti leh ang. ‘Tun chinah’ ka ti leh ang a, nangnin a aia ring leh zualin, ‘Lokal tawh suh se’ in ti leh dawn nia a ti a. Chutiang tak chuan patling 30 rual chu phur leh ring takin, a ram khawk rum rum khawpin an han au rual ta a nih chu ! Heta tang hian Chinghnia-in ran a seh sak thin chu a reh ta a ni an ti.
Chinghnia an um tum hian Pu Lalauva chu hmasa berin, kawnglaia thingtang kulah chuan Pawmrem (Pangrem) lian tha deuh hi a lo bawk zur mai a, a han hmu thut hlau lutuk chu eng dang sawi lovin a tlan let ta phut mai a. A hmasa ber tlan let ta phut chu a thiante pawh chuan an um ve ta ringawt mai a, engemaw chen an tlan hnu chuan enge kan hlauha kan tlan tiin an han inzawt a, thingtang kula Pawmrem a ni tih an han hriat chuan ho an ti hle. Pangang hi a hlaute tan chuan thil hlauhawm ve tak a ni reng a ni.
TLANGZAM.
Tlangzam tih hi a lar lo hle a, awm pawh a awm zen zen lo a ni awm e. Tun tumah hian telh ve thaa hriain kan han telh ve a ni. A awmzia chu hetiang a ni :- Pasalthaten an sakah chu rama a awm ang angin an rawn haw san a, chu an sakah chu khawtlang tana an pek hi a ni. Ramhnuaia mi chu tlangvalhovin zawn chhuakin, a sa chu an khaw in tinah an sem vek thin. Hetiang hi Tlangzam an tih chu a ni.
Zaingen khuaah pawh hian Tlangzam hi a awm tam lo hle a ni awm e. Kum 1962, January thla khan Pu Zathata (Nahaia) Zaingen khaw pasaltha khan Savawm a kah chu a Tlangzam a, a kahna hmun Mausin leh Mandarh inkar kawr hnara mi chu tlangval rualin an va zawn chhuak a, rin aiin a lo lian leh nghal a, sum 6 zeta lian a ni. A ram hi a awih em avangin a mar kaihna hrui an siam a, a hmalam atangin tlangval rualin an pawt kal tawp mai a ni. Hlim takin a in kawkipin an insem ta a ni. Hemi tum hian Pu Nahaia hian a kahhlum note pahnih lai hi a hawn nghe nghe a ni. Hetianga ti thei tur chuan mi thilphal leh mi zau tak nih a ngai. Thil ropui tak a ni e. PASALTHA CHANCHIN
Zaingen khuaah hian tunhma atangin Pasaltha Sakap thei engemawzat an awm ve a, tun tumah erawh chuan tlem a pasaltha danglam deuh mi pahnih te chanchin han thlur bing ila, heng mi pahnihte pawh hi hmanlai pasaltha zinga mi nilovin tunlai pasaltha zinga mi an ni nghe nghe.
1. Pu Lalnghaka Fanai :- Pu Lalnghaka Fanai hi Kum 1930 khan Pu Zadala leh Pi Chhunthiangi fate zinga a parukna niin Thiak (Zaingen) khuaah alo pianga. Amah hi a naupan lai atang rengin mi tawng tam lo tak, mi tumruh leh zaidam, tlawmngai tak a ni a. Hang lam deuh, feet nga leh a chanve vel a sang a ni. Sa chi hrang hrang a kap ve nual a, a zat chiah hriat erawh a har tawh hle a, sa chi hrang hrang za leh sawmriat vel ni a ngaih a ni. Sakei 2 a kap a, mahse a sakei kah hi chuti ngawt a pawngpaw kah/kap mai mai a nilo. A theih chhung chu kah loh a tum hram hram a, mahse a kalna tur kawng a dal tlat avangin a kap ta chauh thin a ni. Savawm hi 53 lai a kap a, pakhat phei chu a cheh hlum a ni nghe nghe.
A huaisen zia te, a tuarchhel zia te, a tlawmngaih zia te chu heng atangte hian a lang chiang hle. Vawikhat chu a thianpa nen an ramchhuak a, mual hran ve ve ah an kal a. Sa an hmuh tak mai loh avangin ani chuan thingthupui alo lo a, a thianpa chuan Hauhuk emaw tiin a kap ta a. A bek sam hi a thawi chho thuak mai a, zam hauh lo hian ‘han ti leh rawh, ka lo het (head) per nelh nelh mai teh ang’ ala ti thei a ni. A kap tupa erawh chu a khur nasa mai thung a ni awm e.
Vawikhat leh chu Sanghal hnu an chhui a, rei tawk an chhui hnuah a hnu alo tai darh tak avangin a thianpa nen chuan an chhui hrang ta a. Silai pu chunga Sanghal hnu chhuia a’n kun kat kat lai chu a thianpa chuan Sanghal emaw tiin a kap zawt mai a. A hnungzang khuar bulah kapin a dar ruh khawih lovin, a ban puam ah a mu chhuak lo deuhin a tang ta a. A kap tupa chuan Lalnghaka a ni tih a han hriat chuan, ‘Nghaka, nang i ni maw! ka fuh che em?’ a han ti a. A ni chuan, ‘E, min fuh chiang kher mai, lokal rawh khai,’ tiin zaidam takin alo chhang thei a ni. Zawn an tum a, a duh lova, a kal lui hram hram a. An inhliamna atanga mel 4 laia hla khua chu a kal thleng ta hram a ni.
In an han thlen chuan a ban puama silai mu chu phawrh tha in an hria a, han zai mai thei damdawi lam thiam khuaah chuan an awm mai bawk si lova, an buai hle a ni. Amah chuan, ‘Chem han tat hriam ula, lo vuan rawh u, keiman kan zai chhuak a nge,’ a ti ta mai a. Ni thei em a an hriat loh avangin, Pu Rinsanga (Sipai pension) chuan tlawmngaih chhuahin, damdawi pakhatmah hmang lovin, bilet (Blade) in a zai chhuah sak ta a ni. An zai chhung hian chair-ah thu in zial a zu a, na ti awm pawha lang lovin a ti ti vel mai mai a ni. Hemi tum hian vawikhat te pawh a rum loh thu leh, a kantute hnenah a na love alo thih theih zel avangin a nu phei chuan, ‘Lalnghak, a na lo tak tak em ni?’ tiin a zawt hial a ni. A na chu a dam that mai theih loh avangin Champhai damdawiin an pan pui ta a, hetah pawh hian a chhung hawlh fai tura hruihrual an han pawh chhuah tawn thin pawhin rum lovin a tlakin a tlak bap bap an ti.
Vawikhat leh pawh a makpa Nghalchang kah hliam an um a, rei tak an um hnuah chuan Nghalchang hliam chu an bul lawk atang chuan a dawk hian a rawn dawk chhuak ta zawk mai a. A ni pawhin rang takin a kap a, mahse Nghalchang hliam chuan a malpui tawp, mawngtam hnuaiah hian a bung zawngin inches 5 lai a seiin a tai sak ta hmuar mai a, a malpui leh lamah pawh chuan na tham takin a tai tel bawk. Hemi tum pawh hian na ti awmlo takin meizial ala zu talh talh tho a ni. A thi duh khawp a, an zawnna hlangah thelret puan (tui puan) an phah a, kawng lakah chuan a thi tlingin a chim deuh thin chu tum hnih lai an paihsak nghe nghe a ni. Hemi tum pawh hian vawikhat pawh a rum leh miahlo. Hetih hunlai hi Buh seng tul vanglai a ni a, ramriah an ngai hlawm si a. Khawtlang hruaituten a riahpui dan tur list an siam ta ringawt mai a, mi pahnih zela in kawpin zan engemawzat an riahpui nghe nghe a ni. An riahpui zan alo thlen chuan, tlangval ramriak pawh tlawmngaiin an rawn haw nal nal zel a ni an ti.
Vawikhat chu an lo vah ramriah naah Savawm no hruai nen an intawng hlauh mai a, an in dang deuh rap rap a, a tawpah chuan amah rawn beih tum a an nufaa an rawn thawk phei chu a pui zawk lu ah tak mai chuan alo chek let tawp mai a, a thi ta a ni. Savawm lamah hian a tluang viau a ni ang, a ni zawn chu ni chiahlo mahse Savawm hi nikhatah pathum zelin ni 3 lai a kap a ni. Tin, nikhatah pahnih zelin ni hnih a kap bawk. Pu Lalnghaka hian a nau hnenah, ‘Savawm i hmuh chuan i tlansan tur a ni lo, chawhmeh tui tak a ni,’ tiin a hrilh a ni awm e. Saza kawlh hlauhawm zia ti hian a sawi ve thung. ‘Saza kawlh ka um a, mi rawn bei turin a rawn tlan phei puat mai a, ka lo per hman hlauh mai a, mahse ala rawn kawi zui zel a, chu chu chemin a nghawngah ka lo vai a, a nghawng a chhum thelh a, Savawm hliam chu nep te a ni a, Sanghal hliam ang vel a ni,’ a ti hial.
Mizoram buai avangin kum thum lai chu Jail hrang hrangah a zu tang ve a. An tan pui pakhat, ruk ruk avanga tang ve palian pui sual em em mai hi a awm a. Mi chaw dawh ai te hi alo dawh ru thin a, thildangah pawh a sual hle a ni awm e. Tumahin an khing ngam si lova, a vawk lal len a ni ber mai. Paliana hnenah hian a thil chin hi a chin chhunzawm zel chuan amah dahthat mai a tum thu chiang takin a hrilh a, chu vauna hlauhawm tak chu paliana hian tuar ngam lovin a nun sual a sim ta niin an sawi.
Pu Lalnghaka hian nupui a neilo hlauh mai a, amaherawhchu, tlai khaw hnuah fapa pakhat a nei ve hlawl mai a, a lawmin a chhuang hle. Hunrei tak chhung asthma natna in a tlakbuak avangin a ramvak thei lova. A natna chuan zual lam a pan ta zel a, a thih hma lawk hian a thianpa Pu Zakhuma chuan ava kan a. A ni na tuar chau tawh tak chuan thawk a nawm zawk beiseiin vawi hnih a han rum ve a. Pu Zakhuma chuan, ‘Lalnghak, engatinge i rum ve tak?’ tiin a han zawt a. A ni chuan, ‘Zakhum, a tul a nih hi’ tih ringawt in a chhang a ni. Chu asthma natna chu pasaltha huaisen, tuarchhel tak hnuk/nunna pawh chuan a tuar zo ta bik lova, ni 24.1.1998 tlai lam dar 3:40 khan a pasalthatna helei ram chu chhuahsanin, chatuan ram min lo pansan ta a ni. YMA nula leh tlangval, nu leh pa ten a ruang chu tlaivar puiin a tuk ni 25.1.1998-ah chuan duhsak taka a thlan thuk taka laih ah chuan zalhin kan thlah liam ta a ni.
2. Pu Laluapa :- Pu Laluapa hi Pu Diauva leh Pi Tlauhnuni te inkarah lo piangin unau mipa 3 leh hmeichhia 2 an ni a, a ni hi a upa ber dawttu niin tunah hian a nupui fanau te nen Khawzawl Zaingen vengah an cheng mek a ni.
Kum 1976-ah khan Zaingen ram Tuira lui kam zawl leilet, Pu Mangvunga’n a enkawlah chuan buhseng hunlai November thlaah buh hmunah chuan Sanghal alo chhuak vak mai a. Pu Mangvunga hian Pu Laluapa chu a buh hmuna Sanghal chhuak chu chang turin a sawm a. Khua atanga hnai te mah nise ni tlak hma deuh va a hmun thleng turin an kal dun ta a. Sanghal chhuah hun tur nia an la ngaih loh avangin thawm dim lem lovin an kal a, leilet an zuk thlen chuan Nghal rual chu an lo awm ta reng mai si a, an thawm hria chuan Nghalrual chu rangtakin an tlanchhe ta a. Chutiang a nih tak si ah chuan an ni pawh chuan an haw san ta a.
Pu Laluapa chu a meizial bur theihnghilh lam paha Sanghal chang turin a tuk zingah chuan a kal leh ta a. Sanghal chu an lo awm mai loh avangin a hma ni a an hmuh te hnuchhui turin luikam chhak lam mualkual ramchang hmunah a lut chho ta a, chutia fimkhur taka a kal lai chuan rin loh takin thingkungah Savawm no lian ve tawh tak awm a hmu a, chu chu a silai ulhbun thar tha tak mai chuan a kap thla ta tawp mai a. Savawm no kiangah chuan Savawm pa pawh alo awm reng mai chu niin, a note chhan tum chuan Pu Uapa chu beih a rawn tum nghal zat mai a, chak taka Pu Uapa a rawn pan lai chuan a vanneih a siamin alo kap thlu leh tawp mai a, chumai la ni lovin Savawm pui pawh a no chhan tur chuan Pu Uapa bei turin alo lang ve nghal thuai mai a. Pu Uapa erawh chu thingkungah alo lawn kai hman hlauh a, Savawm pui chuan lawn khung tuma thingkung a rawn pawm tan chiah chu chhuk zawngin alo kap a, vanneih thlaktakin a kap hlum nghal a ni.
Hetia Savawm nupa leh an note a kahhlum hnuah lawm leh thlamuang taka a thut hahchawlh mek lai chuan, Savawm no dang lian ve deuh chu a hmu leh ta a, chu pawh chu a kap hlum leh ta a ni. Mizo pasaltha zingah hian tum khata Savawm pali kap thei hi an awm ve a ngem aw? Pu Laluapa hian a vaiin Savawm 10 leh sa dang engemawzat a kap tawh a, Sakhi pawh vawmhlum tawhin a nung chungin a man tawh bawk a, Sahram 2 a man tawh bawk. A Sahram man hmang hian Pu Laluapa hian hrawka sangha ruh tang a zut thlak sak thin a ni.
Kum 1989, October thla ah vaihlo lova an riah laiin Vawngthla thing, ban atan kitin fit 6 vela seiin a tan hlawm a, a hahchawl tur chuan a hreipui chu thingah a chek bura. Meizuk a siam lai tak chuan savawmin a rawn bei thut mai a, tan pawh alo khawh nasa hle mai a, Savawm hi chhoh tanin a kawr ban pawt thlerin a ban pawh a ham thlur sung mai a. Savawm chu thlang lamah a nam thla thei ta hlauhva, Savawm hi thlang lama a tlak tawh chuan mi a bei zui ngai tawh lo tih a hriatin thlawhlaia a silai dah chu la in Savawm chu a veh zui ta a, vanneihthlak takin a kap thlu leh ta hlauh mai a ni. ZAINGEN VENG LO IN TAN CHHOH DAN
Kum 1966, March ni 1-ah Mizoram chu a buai ta a. Mizo National Front (MNF) chuan Independent puangin India sipai te chu an kap ta a. Khawzawl Camp pawh chu lak tumin nasa takin an kap a, an la mai thei ta lova. Anmahni rawn pui turin Jet Fighter rawn thlawkin, Thlawhna lian Ration phur a rawn veng pah bawk a. Camp pawn leh a velte chu ni 5,6,8,9 leh 10-ah te Machine gun-in an rawn kap ta chiam mai a. Bomb engemaw zat an rawn thlak bawk a, Chenna in tam tak an kap alh ta a ni. Mipui tan awm ngaihna a awm tak loh avangin, ramhnuai leh remchangte belin an darh ta vek a. A vel khuaahte an tlan chhia a, a then phei chu Aizawl lamah te an tlanchhe ta nghe nghe a, Sipaiho chauh an awm ta a ni.
Khawzawl chhehvel khuate pawh chu sipaiho chuan an hal deuh vek a, Zaingen khua pawh ni 22.5.1966-ah halin ramhnuai remchangah leh thlawhlai thlamahte an tlanchhe zo ta a, hun engemawti hnuah khuaah Bawkte te khawhin an luah leh chauh a ni. Chutianga hlau leh khur, buai taka kan awm lai chuan Zoram hmun hrang hrangah khaw sawikhawm (Grouping) a nih tur thu chu kum 1967 chawhnu lam atang chuan a ri tan ta a. Khawzawl chhehvel khuate pawh chuan an khaw V/C te leh Sipaiho kaihhruainain khaw hrang hrang awmna tur te ruahmanin, In hmunte siam rem a ni a. In sakna tur chakte chhuahin, a then phei chuan an sa tan mek bawk a. Kum 1968 chawhnu lama khawm tura tih chu V/C leh khawtlang hotute ngenna avangin, mahni khaw lamah Krismas leh Kumthar chu hman min phalsak ta a.
Mahse, vanduaithlak takin, Darngawn rama MNF ho Camp awmna chu Sipaihote chuan an lo hre ru a, an inringlo lai chu kah chilhin Pu Lalbela chu an kaphlum ta a. Sipai thin thawk chuan Darngawn khua chu a tuk ni 19.11.1968-ah a zatve an khawm ta thut mai a, a tuk lehah a leh lam an khawm leh a. Keini Zaingen khua pawh chu ni 20.11.1968-ah min khawm ve ta a ni. Kum 1968 tawp lam leh 1969 kumtir lamah khawm luh kan ni. Khawzawl chhehvel khua Khawzawla khawm luh te chu :- Darngawn, Zaingen, Tuisen, Arro, Zuchhip, Tualpui, Ngaizawl leh Neihdawn (Lalveng) te kan ni. Zoram buaiin a nghawng chhuah (Grouping Policy) avangin, Mizoram khaw hrang hrang 516 chu khaw 110-ah sawikhawm kan ni.
Chutia min khawm tak chuk chukah chuan chenna tur In sa zo pawh an la awm lo, a chhuat leh a bang nei, a chhuat chauh nei, a then phei chu a ban chauh phun te, la phun lote kan ni nawk ta a. Chhung kat lainate belin, buk sak chawpah kan cheng ta hlawm a ni. In lah chu a in hnaihin kan bit tlat a ni ber mai. Kan rethei em em a, ei a chhiain kan hrisello hle bawk. Chutia kan buai em em lai chuan ni 3.12.1968-ah kan veng chhunga mi Laldawngkima Khawlhring
s/o KM.Lalzuala kum 16 chu Sakawr ek hrik natnain, rei pawh in enkawl hman lovin a thi ta hlauh mai a. A phumna tur thlanmual pawh kan la neih si loh avangin thlanmual zawngtu a ni ta a. Tuna Vengchhak thlanmual hman mek hi a ni. Vengtinah V/C ten hma lain, YMA, GSA leh Kohhrante pawhin an theih ang angin hma an la hlawm a, Sikul lamte pawh din chhoh nghal zel a ni bawk.
Kum 1968, November ni 19 atanga Khawzawl-a khawm luh khaw hrang hrang 8 te chu khua tih zel a rem ta lova, veng hmingah kan pu ta hlawm a ni. Zaingen veng hi Khawzawl khawm hlim ah chuan veng lai lum tak a ni a, Darngawn veng leh Zuchhip veng inkarah a awm a, a sir leh lamah Arro veng, a sir leh lamah Tualpui vengte a awm bawk a ni. Veng nuam leh laili tak a ni a, a veng lai takah kawn zam nuam tak leh zau tak Taidawnkawn a awm a, khawm hlimah phei chuan helai hmun hi insual tur pawhin an pan khawm zel emaw tih tur khawpin an insualna hmun ber a ni. Khaw hran hran awmkhawm kan nih avangin duhdan, tihdante a inan loh avangin kan inngeih lo hle a ni.
Tuna Zaingen veng chanchin tlangpui chu a hnuaia mi ang hi a ni.
1. Veng then : Zaingen veng hian tunhma atangin veng then dan kan lo nei a, chungte chu :-
1) Vengchhak 2) Vengthlang 3) Biakin kawn 4) College veng
5) Lal veng 6) Kawn veng
Heng veng inthenna te hi YMA section then nan te, MUP leh MHIP lam te pawhin member lak leh thil khawn ngaiah pawh kan hmang nghal zel.
2. A mi chengte : Zaingen veng chhungah hian mihring 1180 kan awm a, mipa 568 leh hmeichhia 612 kan ni. Vote nei chin mipa 386 leh hmeichhia 408, kan vaiin 794 kan ni. Kum 80 tling chin mi 10 an awm a, mipa 9 leh hmeichhia 3 an ni. Mipa upa ber chu Pu Vawmhranga niin kum 88 a ni a, hmeichhia upa ber chu Pi Lalnghaki niin kum 92 a ni.
3. In awm zat : Zaingen veng chhungah In dinglai 273 a awm a, Biak in leh School, Sawrkar in leh chenna in atana hman chi loh nen vek a ni. Assam type hi In 200 a ni a, Concrete building hi In 73 a ni bawk. Concrete in sak lai 15 a awm bawk. Chhungkua 276 kan ni a, mi inluaha khawsa chhungkaw 43 an awm. Zaingen vengah hian In chhawng li nei hengte hi an ni :- Pu R.Laltlankima, Pu Hmingsangzuala, Pu Lalnunmawia, Pu V.Lalbiaktlinga leh Pu K.Lalzika te an ni a, sak lai mekah Pu K.Lalrohlua ten chhawng nga in an sa mek bawk.
4. Eizawnna : A tlangpui thu in hnathawka ei zawng kan ni ber a, Lo neia eizawng In 15-20 vel, huan neia eizawng In 10 vel an awm bawk. Sawrkar hnathawk 54 leh a nghetlo a thawk 15 an awm. Sawrkar hnathawk kan tih pawh hi Sipai/Police lam deuh vek an ni. Furniture lama eizawng hi In 5 niin heta thawkte hi mi 15 vel bawr an ni. Cement lam mistiri hi 10 vel an awm a, thing mistiri 4 vel an awm bawk. A bak zawng hi chu mi hnuaia inhlawhfaa a rem rem thawkte kan ni tlangpui.
5. Dawr : Zaingen veng chhungah hian a hnuaia mi ang hian dawr chi hrang hrang an awm:-
1) Wholesale - 2 2) Hardware -1 3) Granite dawr - 1 4) Alluminium dawr - 2 5) Damdawi dawr - 4 6) Rawng dawr - 1 7) Thingpui dawr - 2 8) Cosmetic dawr -2 9) Puan than dawr - 1
10) Photographic & Printing -2 11) Eichawp dawr - 17 12) Second hand dawr -2
13) Phone repairing - 2 14) Tailoring -2 15) Beauty parlour -3
16) Lu mehna -2 17) Furniture work - 5 18) Electronic dawr -1
19) Health clinic - 1
6. Bazar : Khaw khawm atanga rei vak lovah kan thil neih ang angte hralhna atan Vengchhak lamah Zaingen leh Darngawn in ri naah Bazar siam a ni a, kum engemawzat hnuah tawp in Taidawnkawnah Bazar hmun hi siam leh a ni a, tunah chuan Zaingen YMA Hall hnuaiah seat engemawzat awm in siam a ni leh a ni. Hetah hian nilengin thlai hnah leh thil chi hrang hrang zawrh a ni a, Burma sumdawngte pawh engemawzat an inzuar bawk. Bawng leh vawk, Ar leh Sanghate Bazarah hian zawrh a ni bawk.
Khawzawla Bazarah chuan a lian ber a, tun hma chuan Trade & Commerce enkawl a ni a, tunah chuan Zaingen Branch YMA in enkawlin a neitu nihna pawh a nei tawh a ni.
RORELNA LAM : Khawzawl khuaa khawm luh kan nih hnu lawkah V/C pakhat hnuaiah kan awm a, hun engemaw ti chen kan awm hnuahV/C engemaw zatah kan inthen ta a. Zaingen leh Zuchhip hi V/C pakhata awmin V/C-IV kan ni thin. Chuta tang chuan veng bila V/C neih duhna a lo piang a, kum 2021 atang khan kan lo indang ta a, Zaingen Veng V/C tih hming kan lo pu ta a ni. V/C Hall (Panchayati Bhavan) pawh Govt. M/S ram, khawchhak lam kawngpui kamah a chhawngin sak a ni. Tuna V/C tanglaite chu :-
President : Pu HP.Chhawntluanga
Vice President : Pu K.Thangliana
Treasurer : Pu HP.Ramhluna
Members : Pu R.Thangdela
Pi Lalropuii
Secretary : Pu R.Lalbiakthuama
Vengchhung cheina kawng hrang hrangte thawkin, ni 100 inhlawhnate an buaipui bawk. Rorel tur hrang hrangah an thawk reng bawk.
YOUNG MIZO ASSOCIATION (YMA) : Zaingen Branch YMA ah hian member 480 awm in, mipa 346 leh hmeichhia 134 kan ni. Zaingen khuaa awm lai atang tawhin YMA in kaihhruaina tha tak nei thin an ni a. Khawzawlah pawh chu chu chhawm zelin, YMA nung leh entawn tlak tak a ni ta zel a ni. YMA din champha hetiang hian ropui taka lawm thin tawh a ni. Kum 1998-ah Golden Jubilee (kum 50-na), Kum 2008-ah Diamond Jubilee (kum 60-na) leh kum 2023-ah Platinum Jubilee (kum 75-na).
YMA Hall pawh a nei hmasa niin vawi 3 lai sak that a ni tawh. Hall hi veng laili tak Taidawnkawnah sak a ni a, sak vawi thumna hi kum 1999-ah sa tanin, kum 2013 khan ropui taka hawn a ni. mi 500 chuang lenga ngaih a ni. Khawzawlah chuan Hall tha ber niin thil tih khawm lian deuhah chuan an hmang zel. Inthlan dawn phei chuan a rim thin khawp mai.
Junior YMA/YMA Chhang pawh hi a din hmasa veng kan ni a, hemi hma hian Mizo Children Association (MCA) tiin an lo din tawh nghe nghe a ni. An in hmukhawm zingin hnatlang pawh an ko ngawrh hle. Tuizem te tuakin YMA ah chuan Tuizem nei hmasa ber kan ni hial ang. YMA chhang kaihruai tura ruat Pu Khiangliana phei chuan, YMA Chhang hla 2 mawi tak leh sak nuam tak a phuah a, kalkhawm nikhuate hian an sa thup thup thin. YMA Hla Bu-ah pawh a chuang thin. Vawiin thleng hian kawng hrang hrangah an la tangkai em em a ni.
Zaingen Branch YMA hi Hall nei hmasa, Tuizem leh YMA Thutthleng sei nei hmasa kan ni. Tuna Office Bearer ni lai mekte chu heng mite hi an ni :-
President : Pu B.Lalhmangaihtluanga
Vice President : Pu JH.Kaptluanga
Secretary : Pu Vanlalchuana
Asst Secretary : Pu HP. Lalrinkima
Treasurer : Nl Lalruatdiki
Fin Secretary : Tv H.Lalropuia
MHIP : Hun rei tak Zuchhip Veng MHIP te nen in kawpin hma an laho tawh thin a. Hun rei deuh tawh atang khan branch hnihah an in siam ta a ni. Zaingen Branch MHIP-ah hian Member 413 an awm. Vengchhung tih fai leh an hma lakna awm dangahte an tangkai hle. Chhiatnia thlalakpui tur Pangpar mawi tak takin an khawi thin. Vengchhung damlo leh harsatna tawkte an tanpui thin bawk. College vengah inhmun tha tak neiin Assam Type-in an sa a, mi an luahtir mek. Tuna Office Bearer ni mekte chu :-
President : Pi Lalrinsiami
Vice President : Pi Thanseii
Secretary : Pi R.Lalrinchhani
Asst Secretary : Pi T.Ngaihluni
Treasurer : Pi Lalhmunmawii
Fin Secretary : Pi K.Lalramlawmi
MUP : Zaingen vengah hian MUP pawh nung takin ala kal ve zel a. Tunah hian member 134 awmin, Mipa - 61 leh Hmeichhia - 73 an ni. Vengchhung fainaah leh thildangah an theih ang tawkin hma an la ve thin. Taidawnkawn atanga College veng pan pheina kawng an thlang lamah, Concreate Building-in MUP Run tha tak an nei. Ni 12.10.2022 khan ropui takin Pu Tawnluia, Dy. Chief Minister-in a hawng. Kan Run hi memberte in awm hlimna bakah Pawl hrang hrangten Committee nan an hmang tangkai hle. Daihnai lawkah Rawhmun an siam a, National Highway-in a tan tlanga sum tlem hmuh a ni. Pawimawh hrang hrangah an hralh bawk thin.Tuna Office Bearer ni mekte chu :-
President : Pu K.Lalzika
Vice President : Pu Khawpuingaia
Secretary : Pu K.Lianhela
Asst Secretary : Pu MS.Dawngliana
Treasurer : Pu HP.Ramhluna
Fin Secretary : Pu HP.Chhawntluanga
G&SA : Zaingen Games & Sport Association pawh Khawzawl kan awm hnuah chhunzawm zelin, vawiin thlengin harsa tak chung pawn sports lamah theih tawp an chhuah zel a. Tournament hrang hrangah quarter final leh semi final te thleng ve thin in champion te pawh an ni ve thin a ni. Volleyball-ah pawh champion ve tawh in a tlangpui chuan quarter leh semi final te an thleng tlangpui. Tuna G&SA hruaitute chu :-
President : Pu Lalnunkima
Vice President : Pu Lalngaihawma
Secretary : Pu K.Lalhruaitluanga
Asst Secretary : Tv F.Hmingsangzuala
Treasurer : Nl R.Lalhlimpuii
Fin Secretary : Pu K.Lalruatkima
VDP : Zaingen veng VDP te hi an chak viau thin a, hun engemawti atang khan an chak ta vak lova, report an dawn erawh an la bawhzui ve zel e. An hna a rum deuh avangin hruaitu tur an in van deuh thin. VC te kaihhruaiin inthlan a ni deuh ber a, tuna hruaitu ni mek te chu :-
President : Pu K.Lianhela
Vice President : Pu Arsithanga
Secretary : Pu C.Laldingliana
Asst Secretary : Tv Laltlannilawma
Treasurer : Pu Zoremmawia
Fin Secretary : Pu C.Lalramliana
Kohhran lam : Zaingen khua atanga Khawzawl a min khawm luh khan heng mite hi kan Upa te chu an ni :-
1) Upa Surawia 2) Upa Thandawla 3) Upa K.Lalzuia
4) Upa Laldawla 5) Upa Rokima
Khawm hlimah Biak In kan la neih loh avangin Upa Thandawla Inah Inkhawm thin a ni. Zaingen Biak In kha thiat in a chak te chhinchhiah vekin lak phei a ni a. A ang chiahin sak leh a ni a, a chung chih hma deuh hian Zuchhip veng Biak In sakna turah sipai in sak an phal tak loh avangin Zaingen Biak In ah lawiho tura min tih angin a sir ve ve ah zauh leh a ni a, kan lawiho ta a ni. Lalveng te pawh Biak In hran nei lovin min rawn fin ve bawk a, Zaingen leh Zuchhip Upa hote chuan Kohhran an enkawl ta a ni. Kohhran hming tur hi sak alo ngai ta a, kan veng chhak lama awm Darngawn, Tuisen, Arro leh Tualpui te chu Kohhran pakhatah awm in, an ni hi Vengsang Kohhran tih an ni a, keini hi Venglai Kohhran tih kan ni ta a ni. Pastor Liandawla hi Tualpui atanga rawn lut ve a nih avangin, Vengsang chu Pastor thuthmun a ni a, hun lokal zelah Vengtharah Pastor Quarters chu sawn a ni ta a.
Bial khat atana kan len tak em avangin Khawzawl Bial chu Bial hnihah thenin kum 1987-ah chuan Venglai Bial leh Vengthar Bial alo piang ta a ni.
Zaingen veng chhungah hian Kohhran (Denomination) hrang hrang kan awm a, chungte chu:- Presbyterian church, Fundamental Baptist Church (FBC), Baptist Church of Mizoram (BCM), United Penticostal Church (UPC) (NEI), United Penticostal Church (UPC) (Mz), Reform Church leh Church of God (Sabath) te an ni.
Heng Kohhran zingah hian Presbyterian Kohhran hi a lian fal hle a, member 1046 an awm a, in 211 leh Kohhran dang nena in awmpawlh in 12 an awm bawk. Presbyterian nilo Kohhran dang chu in 21 an awm. Veng inlungrual tak an nih avangin pawl hruaitu hrang hrangah inthliar hranna a awm ngailo. Tuna Kohhran hrang hranga Upa din hmun hetiang a ni.
1. Presbyterian Kohhran :
1) Upa K.Lalzika 2) Upa PB.Lalhmingthanga 3) Upa C.Valkunga
4) Upa K.Lalrohlua 5) Upa Lalchawiliana 6) Upa F.Lalbiakkima
7) Upa Pachhunga Chhangte 8) Upa B.Lalruatkima 9) Upa Lalhumhima
10) Upa R.Laltlankima 11) Upa C.Tlanghmingthanga 12) Upa Laldinsanga
2. FBC :
1) Sr. Upa Vanruma 2) Sr. Upa Vawmhranga
3. UPC (NEI) :
1) Sr. Upa Lalkhawnghinga
4 UPC (Mz) :
1) Upa K.Vanlalhriatrenga
5. Reform Church :
1) Upa Lalbiakthuama
Zirna lam : Zirna lamah chuan, Zaingen khua awm lai kum 1919 atanga zirtirtu dahin zirna tan a ni a. Zaingen Primary School atangin Mizoram pumah kum 1953-ah Lianhnuna pangana, 1955-ah Tawnluia pakhatna. Middle School atangin Mizoram pumah kum 1956-ah Lianhnuna pakhatna, 1958-ah Tawnluia pakhatna. Kum 1956-ah P/S behchhanin M/S an din bawk.
Zaingen khaw chhuak a zirna lama tawng sang deuhte han tarlang ila :-
1) Rev.Dr.KM.Vanlalpeka (Prof.ATC) 2) Pu Chuauhnuna (MCS), DC. Hnahthial
3) Dr.JT.Vanlalngheta (LLB) 4) Pu. Lalnunmawia (LLB) Ukil
5) Dr.Lalmuanawma 6) Pu K.Ziona, Principal, Govt Khawzawl College
Zaingen veng hmun danga awm mek tello in Zaingen veng chhunga awm mek ah -
MA -16, BA-65 an awm mek. Hmun danga awm tawh te nen phei chuan an tam ve tawh viau ang. Tun dinhmunah zirna in lamah kan hausa hle a, Anganwadi atanga MA thlenga zir zawh theihna hmun a awm a ni. Hetiang veng hi a vang ngawt ang le. Zaingen venga zirna in awm te chu heng te hi an ni :-
1) Anganwadi Center : Zaingen veng chhungah hian zirna bul ber Anganwadi Center pahnih a awm a, Anganwadi Center V, Lalveng a mi leh Anganwadi Center VI, Vengthlang a mi te an ni.
2) Govt Primary School I : Tun hmaa Khawzawla Primary School III ni thin kha P/S Amalgamate a awm nual avangin P/S I a lo ni ta a. Zirtirtu pali leh VC rawih pakhat awm in an vaiin panga an ni. Zirlai 61 an awm a, Cook pahnih an nei bawk. Tunah hian Pre-Nursery pawh hawn tel a ni. Inthlan apiangin Polling Booth-ah an hmang thin.
3) Govt Middle School : Zaingen veng chhungah hian Govt M/S hi pakhat chauh kan nei a, tunah hian thawktu pariat an awm. Zirtirtu paruk, Computer instructor pakhat leh IV Grade pakhat te an ni. Zirlai 30 an awm mek. Middle School compound chhungah hian PHE in water reservior/tanky lian tak a nei a, tun hma phei chuan Khawzawl pumpui chawmtu ber a ni. VC lam pawhin tui dahna tur tanky hmun hnihah an siam a, tanky tui liam rinchhanin swimming pool an siam a, heta tang hian tui hleuh thiam engemawzat an chhuak tawh.
Compound chhungah hian Elementary Boys te tan a thlawna awm theihna Residential Special Training Center, Samakra Shiksha-in an buatsaih a awm bawk. Enkawltu mumal neilo leh harsa bik deuh te an dah deuh ber thin. A bul lawkah Airtel tower a awm a, P&E Department transformer pawh pahnih lai a awm bawk.
4) Far East Experimental School (FEES) : Zaingen venga veng then pakhat College veng mawng lamah hian Far East Experimental School a awm a, hetah hian Nursery atanga Class -X thleng a awm. He school hi private school niin zirtirtu 15 leh IV Grade pakhat an awm a, zirlai naupang 320 an nei mek. School tha tak a ni.
5) Higher Secondary School : He School hi FEES thlang lawka awm a ni a, Khawzawl khawtlang hruaitu ten kum 2002 ah din in, 2003-ah class tan a ni. Kumin kum tawp lam khan Govt-ah hlankai an ni a, Arts, Science leh Commerce Subject te hawn a ni. Tunah hian thawktu teaching staff 25 leh non teaching staff pakhat an nei mek a, zirlai 230 an awm.
Central sawrkar atangin Girls Hostel tur, Netaji Subhas Chandra Boss Avasiya Vidhyalaya atangin dawn a ni a, building hi peihfel thawkhat a ni a, a chhung bungrua te pawh peihfel a ni tawh. He hostel hi Secondary zirlai hmeichhia 30, a thlawna awmna tur a ni. He school-ah hian building pariat a awm a, a dang sak tan leh mek a ni. He school-a thawk zirtirtute hi an tha in result pawh an nei tha thin hle a ni.
6) Govt Khawzawl College : Khawzawl College hi kum 1985-ah khawtlang tangrual ten an din a ni a, teaching staff 23, non teaching staff 10 leh IV Grade 2 an awm mek. Zirlai 86 awm in, Subject offer paruk a awm a, chungte chu;- English, Economic, Education, History, Political Science leh Mizo subject te an ni.
Khawzawl College-ah hian library tha tak a awm a, Volley ball court, Basket ball court, Badminton court leh Multipurpose Hall-te a awm. Building pawh pasarih lai a awm a, a compound pawh brick hmanga hung chhuah vek a ni. A compound chhungah hian thing tam tak zuahin mawi leh tha taka enkawl an ni.
Khawzawl College-ah hian IGNOU hawn a ni a, hetah hian BA leh MA a zir theih. BA-ah hian Pol.Science, Public Administration leh History te a zir theih a, MA-ah hian Pol.Science leh Public Administration a zir theih a ni.
Sawrkar Office : Kan veng huam chhungah hian sawrkar office a awmlo hle, Taidawnkawn bula UD&PA Office te, Biakin kawna Union Bank leh zirna in zawng zawngte hi an ni mai.
Sawrkar hnathawk : Zaingen veng chhungah hian Sawrkar hnathawk an tlem hle a, tlema hna sang deuh thawk phei chu an awm lo leh zual. Engemaw zat chu khaw dangah hnathawkin an awm ve bawk. Tunah hian hna nghet - 54 leh a nghet lo 15 an awm a, a ngheta thawk zingah hian police lam an tam ber. Hmun dang atanga hna rawn thawk, Zaingen veng chhunga in luahte pawh chhiar vek an ni. Pensioner hi mi 23 vel kan awm bawk. Lirthei/Motor : Zaingen veng chhungah hian lirthei 190 a awm a, chung zinga 117 chu two wheeler a ni a, Car 50, LPK(Tripper) 5, Sumo,Tata Ace leh Pick Up 10, JCB 4, Hitachi 2, Trailer (Truck) 1, Road roller 1.
Tuikhur : Zaingen veng huam chhungah hian tuikhur 3 a awm a, hengte hi chhuah chhawngah vek an awm. Lalveng huam chhunga awm vek an ni bawk. Chungte chu:-
1) Khur thlang :- Tunah VC lamin motor kal theih in a kawng an lai tlang tawh a, a hlat deuh avangin atangkai tur angin a tangkai thei lo.
2) Kawngphei tuikhur :- Hei hi Sinzawl road kamah a awm a, a kawng a phei in tuihna a tha bawk a, kan tlan ber a ni.
3) VC tuikhur :- Hei hi Lalveng atanga College veng kal pheina kawng chhak hrula awm a ni. Siam thar a nih avangin a tangkai tur angin ala tangkai chiah lo.
Kawngpui : Zaingen veng chhunga motor kawngpui awmdan chu hetiang hi a ni. Chhim leh hmar zawngin kawngpui pahnihin a tan tlang a, pakhat chu khawlai kawngpui ber a ni a, pakhat chu Sinzawl road a ni a, Lal veng mawng lamah a kaltlang bawk.
Kawngpui dangte chu Taidawnkawn point a hmangin - Taidawnkawn atangin College veng panna, Lalveng panna (Sinzawl road pawhin), DC Quarter panna, Mualvawm Field panna, Circuit House panna leh Kawnzar veng panna te an ni.
Ruihhlo : Tun hma chuan Zaingen vengah hian ruihhlo zuar an awm ve thin a, tunah erawh chuan a zuar han tih tur an awmlo a ni. A zuar awmlo mah ila a in chi leh inchiu chi erawh chu a tam pawl tak kan ni.
Thildang : 1) Taidawnkawn :- A hming awmzia hi hetiangin an sawi, tun hmain helai kawnah hian zu fe/tai fe an paih thin a, chumi chawi chuan Taidawnkawn an ti ta a ni an ti. Taidawnkawn hi Zaingen veng laili takah awm in a lun thin hle. Taidawnkawn ropuina em em chu Mizorama kawng peng thuam tamna ber a ni hi a ni. Peng thuam sawm a awm a, motor kawng pariat leh step-a siam kawng pahnih a awm a ni.
Kawn lai takah traffic point a awm a, Khawzawl-a traffic point hmasa ber a ni. He point hi Pu Lalchamrenga te chhungkua in an nu Pi Rokami hriatreng nana an siam a ni. A senso pawh an tum vek avangin Rokami point tih hming hi phuah a ni. Kum 2017 a siam a ni.
2) Tower :- Govt M/S Compound-a tower awm kan sawi tawh bakah Pu Lianthuama kawmchhakah Airtel tower a awm a, P/S I bul BSNL compound ah BSNL tower a awm bawk.
3) Volleyball court :- Volleyball court hi pahnih a awm a, P/S I bulah leh Darngawn veng nena kan inri na bazar zawl hmun hlui a mite hi an ni. Thalai ten an chhawr tangkai hle.
4) Futsal ground :- Pu K.Lalzika te chhungkua in an kawmthlangah Futsal ground an siam a, kum 2022 tir lamah siam tan in, ni 16.1.2023 zanah tawngtaia Pathian hnena hlanna neih a ni. A hmingah LZ Futsal ground tih a ni a, Khawzawl a awm hmasa ber ani bawk a, khawtlangin an lawm in an hlut hle. Nitin leh zantin inkhel an awm ve deuh reng.
5) Thlanmual :- Kan thlanmual hman mek hi khawm hlim atanga hman tan a ni a, kan veng thlanmual bik a ni lo. Zuchhip, Zaingen, Arro leh Darngawn ten kan intawm a ni. Zuchhip veng mawngah a awm a, Vengchhak thlanmual tih a ni.
