Sailo Lal ten Chhak an nawr khan Lallula thlah Lalsavunga chuan Aizawl atangin a nawr chho a, mahse Darlawngah a thi ta mai si a. A fapa Vanhnuailiana chuan a ai arawn awh ta a, chhak lam a nawr chho zel a. Tualte a thlen phei chuan a lo ropuiin khua(In) pawh a ngah ta hle a, tun thlenga Tualte Vanglai kan tih fo hi a ropui vanglai a ni. Mizo lalah na na na chuan Selesih Sangsarih khua tih loh chuan an khum kher awm love..Hetih hun lai a ram dang atanga lo kal te pawhin tlawh hram an tum thin hialin an sawi, tun thlengin a Seluphan leh a thlan thlalak hlui pawh hi hmuhnawm a la tling a ni. Hetih lai tho hian Khawchhak Falamah chuan Lal ropui deuh mai, Dawi pawh thiam hiala sawi a awm bawk a. Zoram tiau thlang lama lal te chuan a hnenah chhiah an pe thin a,(Lal ropui Nikuala leh Chawngtlai. Page 279. Nikuala hun hnuhnung by Lalfakzuala) Khua an sah dawn pawhin a hnenah phalna an lak phawt a ngai thin ni. Heng hun lai hian Zoram lam lalte leh khawchhak lam ral hi an indo reng a, ‘Pawihchhe Ral’ an ti mai thin. A nihna takah chun an leido te hi Sukte,Hakha, Dawn leh Thlanthlang Pawihho an ni ber. Rawlral te pawhin an inbei fo a ni. Mizo History ziaktute chuan Tualte Vanglai hi Kum 1857 vel niin an ziak.
Nikuala lo lan tanna:- Tualte Vanglai huna Vanhnuailiana a lal lai tho hian Tiau chhak leh thlangah Zahauho chu lian takin khaw 40 dawn laiah an lal a, chung zinga pakhat chu Khawzaliana Nikuala pa hi a ni a,Tlauhmun Lal a ni. Nikuala chu unau mipa panga zinga a naupang lam (a thenin naupang ber an ti) a ni a, Lalna inhlan chhawnah hian fa naupang ten tlang an chan loh avangin Nikuala pawh hi Tlang chang lo tur a ni a, chuvangin a vak vel nasa hle thin niin an sawi. Thenkhat chuan a tei vel chu Lalna tlang zawng a ni an ti a,a enga pawh nise hetih hun lai hian Tiau ralahte pawh a rawn tla thla fo thin a ni. Nikuala chu pathlawi nau pang te niin an sawi bawk. Chutiang a chutih hun laia mahni a vakvel fo chu pa namai lo tak a ni ang tih Vanhnuailiana hian a lo hre thuai a, a chanchin te zawt thlithlaiin a ngaihven ta hle a, a tawi zawngin sawi ta ila Vanhnuailiana chuan chhak lam ralte nena an inkar thua remna sawi turin a ngen ta a. A han hlawhtlin phawt chuan a Lal ram atangin Lalna tlang siam ve turin a tiam ta a ni. Nikuala chuan Vanhnuailiana te ang lal ropuiin chutianga a tiam chuan a thutiam a hlen ngei ringin ani pawh chuan inremna Palai hna chu a thawk ta a, a vanneih a siamin a hlawhtling chho ta mai a,Tiau ral Pawihte nena an indo a kham ta a, tichuan Vanhnuailiana hnenah Tualteah chuan a awm ve ta a,(He a hnathawh ropui tak chawi hian a fapa upa zawk hmingah pawh Dokhama a sa ta reng a ni.) Lalna tlang erawh a siamsak nghal mai lo a, veng hming neiin a awm ve ta niin an sawi. Mahse Tualte vanglai chu Mautam avangin an darh leh zo ta a, Hemi kum hi hriat chian a har deuh. A chhan chu Mautam tam hi Zoram hmun hran hranah a tam hun hi a in ang chiah lo a ni mai thei.Ziaktu hrang hrangte ziah dan a in ang chiah lo. Vanhnuailiana chu Tualte atangin Lungdupah a kai a,Lungdupah hian kum 7 vel awm a sawi a ni. Lungdup atangin Chawnchhim(Champhai)ah a kai leh a, hei hi kum 1867 velah niin an sawi. Tichuan Vanhnuailiana chu tuna Ruantlanga Vanhnuailiana Hmun an tih ah khian a thu ta a,khua pawh la ngah thawkhat hle niin an sawi.
Vanhnuailiana fate thlang tlak chhan:- Vanhnuailiana Champhaia a awm lai hian Zan khat chu a khaw in a kang hluah mai a, Tlangval tawng thlahdah deuh ten “Sukteho hal a ni ang’ an lo ti mai pek a, khual thuthang leh ar pan chuk tih zawng zawng an neih ta a. Vanhnuailiana’n a lo hriat meuh chuan Sukteho hal riakah an lo puh thlu hman a, Vanhnuailiana chuan um zui turin a ti a, an umzui ta mai a. Nikuala nghe nghein ‘Ka pu, Sukte hal a ni ngei tih pawh i hre hauh si lo a, duh aiin thu i thlah hma lu deuh lo maw?’ a ti a. Vanhnuailiana pawh a inthiam leh ta meuh lo a, ‘Ko kir leh mai rawh u’ a han ti nain Tlangvalho chu koh kir phak rual an ni tawh si lo. A umzuitute lahin tumah an va hmu ta lova, Sukte Lo vat Ramriak an va that ta ngawt pek a. Sukteho chu an lungawi lo nasa ta mai a. ‘E he hei… Lungtat a par ta a, Run lui a lehluan ta a ni maw!’ an ti niin an sawi. Chutianga Nikuala’n Remthu a lo sawi tawh, Vanhnuailiana khuate thoin an han bawh chhe leh chu chinchang hre pha chinho thla a muang ta lo hle mai a, Engtik hunah emaw chuan phuba lain an rawn thawk ngei dawn tih an hre sa ran mai. Chutih nak alai chuan Vanhnuailiana chu a thi leh ta nghal a, a fate chuan Thlang tlak zai an rel ta a ni an ti.
Nikuala Lal tan dan-;Nikuala pawh Vanhnuailiana chuan fa anga a neih avangin Vanhnuailiana hnenah chuan a awm ve zel a, hetih lai hian Vanhnuailiana chuan Hmarho (Manipurah) a run fo a, a hlawhtling thei hle a, Nikuala pawh a tel ve thin a ni awm e.Manipur phai velah sawn Mizoram chin ramri lung pawh a phun niin an sawi thin. Mahse Vanhnuailiana chu a lo hrisel lo tan ta hle a Nikuala pawh Belrawhmual pein sangal khawng hrangin Lungverhah a awm hrang ve tan ta a ni. Helaia a awm hran tanna hi engemaw chen chu ‘Nikuala Hmun’ an ti a ni awm e. Chutih lai chuan Vanhnuailiana chu a thi ta mai a, A fateho chuan thlang tlak zai an rel ta a.
Nikuala erawh chuan “Kei chu ka pu in Tuipui leh Tiau inkar Chhim lamah Khuangthing, Hmar lamah Vaikhawtlang thleng i ram a ni ang min ti a,thlang ka tla ve dawn love” a ti ta tlat mai a.Vanhnuailiana fate chuan thlang an tlak san ta a ni. Nikuala tupa Zahuata Diary a a lan dan chuan Nikuala kai kual dan chu hetiang hi a ni. Lungverh atangin Khuangleng Zopui (1872-1873), Khuangleng Zopui atangin Leithum(1873-1874)ah a kai a In 70 zet a nei ta a, Leithum atangin Vanzauah (1875-1877) hetah pawh hian in 70 a la nei a, Vanzau atangin Phuihnam,Tlaikuang an tih bawk ah (1877-1881) He laia an awm lai hian Thing a tam a, tam a tla zui ta a, mahse Phuihnamah chuan tam a tla ve ta tlat lo mai a, chuvang chuan Nikuala khua chu an pan ta huai huai mai a, khua a lo nei pung ta hle a, in 400 lai neiin hmun danga an awm aia rei an awm ta nghe nghe a, a fa pa Dokhama pawh Phuihnamah a piang ta a ni. A fapa hmingah chuan Lalburha ngeiin Kan karah Do i khama chuvangin Dokhama kan sa tur a ni’ a ti ani an ti. Phuihnam atang hian Bungzungah (1881-1883) an kai leh a, in 100 laiin an pun belh a, mahse chhaklam ralte nen an lo indo nasa ta deuh deuh a, chuvangin Sailo lalho chuan thlang an tla ta vek a, Nikuala chu amahin helaiah hian a lal ta a ni. Indo a lo hluar chhoh zel, avangin Nikuala chuan in 150 neiin Thlahmunga chu Zawngtetuiah a lal tir a, amah chuan Buang a kai (1884-1886) leh ta a ni. Buang a kai hian in 350 lai a la nei tho a ni.
‘Pawihchhe ral’ an tih mai nen chuan an indo nasa tulh tulh ta mai a Amah Nikuala ngei pawh Jahau Pawih tho ni mahse Lushei Lal nghenchhana Tiau thlang lama Lal a nih avangin Jahauho tih lovah chuan Tiau chhak lam Pawihte nen chuan an inchemhar lo thei ta lova, Indo chang an nei ta fo mai a, rawlralte pawhin an inbei ta fo mai; chuvang chuan Nikuala chuan tanhmun tha a mamawh ta em em mai a khawthar kai leh a duh ta a, Ral dona remchang a dap ta a. Tichuan Chawngtlai a kai ta a. Chawngtlai a kai hian in 400 zet chu a lo tling leh tawh a ( A tupa Zahuata Diary chuan 500 a ti), Chawngtlai a kai kum hi upate chuan 1887 vel niin an sawi a, mahse Nikuala chanchin chhuinaa Document hmuh chhun chu 1889 a ni a, Chawngtlai khaw lo pian chhuahna bul tak chu hei hi a ni ta a ni. Nikuala’n Chawngtlai a kai lai hun hi 1888 kum tawp lam emaw 1889 kumtir lam emaw a nih ngei a rinawm. A chhan chu hetih lai December thla leh February thla inkar vel hi Chawngtlai thing/ par lai a ni a, he khuain a hming put chhan pawh a ni reng a ni. Sailoho chuan Tuipui ral a kai thla chu an lo ngaimawh hle nghe nghe a. Mahse Vanhnuailiana fapa Lalburha chuan a thlavang a hauh a, helaia a awm hian an tan phaw leh daingul a nih zawk zia in a unaute leh a pasalthate chu a lo thlem dam leh ta a ni. Nikuala chu Lalburha’n a beisei ang ngei chuan Sailo tan mai pawh nilo Zoram tan “Phaw leh Daingul” a lo ni ta reng a, chhaklam ral chuan Tiau lui bak an rawn pel ngam ta lo a, an rawn pelh pawhin Nikuala lakah an tlawm ta zel a.Tun thlengin India (Mizoram) ramri pawh Tiau chin a lo ni ta a, Mizoram Dil lian ber Rihdil Burma rama a awm tlat ang ni loin, Mizoram phaizawl zau ber Champhai pawh Mizoramah ngei a lo awm phah ta a ni.
A tawi zawngin sawi ta mai ila, Lal Nikuala chu Chawngtlaiah kum 1887/1889 vel atangin kum 1892 April ni 25 Vailianin an man thlengin a awm ta a ni.
Kum 1893 a Chin Lushai country Millitary report-ah phei chuan heti hian a inziak
“Far away to the west, in the very heart of the hill tract,, a chief NIKWE had established a village. He formed a separate section of his own and he ‘PROTECTED ‘ SOME 20 VILLAGES” tiin.
Chawngtlai khaw hal hnu chuan…..:- Chawngtlaia a awm chhung hian sulhnu leh chanchin tam tak a nei a, heath hi chuan ziah sen a ni lo. Kum 1892 April 25 ah an man a, an Camp-ah(Tuna Vairiah hmun, Chawngtlai High School vengah) an hruai a, a tuk 26th April ah hruai chhuakin khua an chhuahsan a, a khua an hal bawk avangin Lalnu Lalngurvungi hoin Hmawngmualah an inbawk lailawk a, He thu pawh hi hnialna a awm thin, chu chu Hmawngmual hi Tualte ram ang leh khua anga sawi ani, Chuvangin a tih chian nan- Pu Lalfakzuala’n North Lushai hills Bawrhsap A.W Davis a Report a hai chhuahah chuan Lunglei Superintendent, Captain Shakespeara’n Lalngurvungi hova Dokhamate khawsakna a va tlwh thu a chuang kiau mai. Hmawngmual hian khawi khaw hming dang mah a pu lo. Hei bakah hian Dokhama awmna an va tlawh hi Hmawngmual(Mongmual ti ngei a ziah ‘Englishman’s Overland Mail’ Chanchinbu ni 8th March 1893 a chhuakah a chuang bawk..Hmawngmual atang chuan Lungdupah (tuna Kelkang) kai an tum a, Chutih lai chuan Kelkang chu a ram a thain ngawpui a cham dup mai a, Dokhama te hian British awp lai mek an ni tih an inhre hauh lo a, Sailo lal, Lalburha hnenah Kelkang kai an va dil a, mahse Lalburha chuan a lo phal lo a, Artlang Mualkhangah an inbengbel ta rih a, hetih lai hi kum 1894 leh 1895 vel a ni a,Falam lal hnenah an dil leh a, (Falam Lal hnuaia awm emaw an la inti a) Falam lah lahin, ‘In duh leh kai rawh u’ an lo ti mai si a. Tichuan Kelkang an kai leh ta a, Dokhama upate chuan Lalburhate chu hlain an deng zui kher a;
“Thlang hnawmin lo sel lo u,
Awmlai leng leh Sappui ral lo chuan,
Kan kai nan khawtlang in dal love. tiin.
Lalburha pawh a thinrim viau a ni awm e. Lalnu hoin Tuna Chawngtlai ram Mauhakah an kai bawk a, mahse anni pawh kum khat hnuah Kelkangah an kai ve leh ta a ni. He khuaah hian Dokhama chuan fa a nei a, a hmingah Zahuata an phuah ta a.
Hetih laia thil pawimawh tak lo lang chu Falam lal leh Jahau Lal ten Lushei lal thenkhat hnenah lei man/ram luah man an la thin tih North Lushai Hills awptu ten an hre chhuak a, Sorkarin chung lai vela awmte chhiah chawisak atan Rs 40 leh Sial Falam hnenah an pe a, chu chu Lushai Lal ten Falam hnenah chhiah an pek tawpna a nih tur thu hrilhin Lushei lalte pawh Falam hnenah chhiah chawi/pe tawh lo turin an hriattir bawk a ni.(Lal ropui Nikuala leh Chawngtlai. Page 279. Nikuala hun hnuhnung by Lalfakzuala)
Kelkangah engemaw chen an awm hnuah Bawrhsapin Lalna tlang a sem a, Dokhama chu kum 1899 kum tawp lamah Artlangah in 60 nen a kai hrang a, Nikuala khua ni thin kha a fapate 2 in tlang an chan tak ve ve avangin khhaw 2 an lo ni ta a , Liannawla a lal tan hi Kum 1899 niin Dokhama chu hemi kum vek hian Artlangah a kai tihna a ni. Artlang atangin Tualte Bunghmunah kum 1903 velah a kai ve leh a, Tualte Bunghmun atang hian kum 1906-ah Chawngtlaiah an phei leh a, Tichuan Tualtea Dokhama a awm lai chuan Sorkar Record-ah chuan Dokhama chu Chief of Tualte tih a ni. Kum 1906 kum tawp lamah Chawngtlaiah, Nikuala hunlaia a kulh awmna chung fing hnih vel leka hlaah an kai phei leh ta a chu hmun chu tun thlengin Chawngtlai hmun ti a hriat zui a lo ni ta a ni. Helaia an awm lai hian Tualte khaw hming pu ni a sawina a awm a, amaherawhchu hetih hunlai Document hai chhuah ah chuan ‘Dokhama Chawngtlai ‘ tih leh ‘Dokhama Chief of Chawngtlai’ tih zel hi Sorkarin a record dan a ni a, Hetih lai hian Tualte khua a awm lo hrim hrim tih a lang bawk. He thu a inhnialna lo awm thin tih fiah nan tanfung leh a fiahna lo tarlang ta ila.
Champhai Vengthlang Kohhran Centenary lehkhabu kum 1911-2011 a chhuahah chuan kum 1908-ah Pu Hauzika Tualte khua chu ringtu ni saa Tualte atanga Champhai vengthlanga pemin ringtu hmasa ber angin ziah a ni.
Neihdawn Kohhran Centenary lehkhabuah chuan kum 1912 ah Pu Sina (Thangdailova) chu Tualte atanga Neihdawna pema Presbyterian Kohhran din angin ziak a ni bawk.
Heng thu ziak pahnihte hi Kum 1907-1912 ah Chawngtlai chu khawiah nge a awm tih leh Tualte a awm em tih hriat nan I lo chhui hlek teh ang..
1.Chawngtlai Lal, Niluala tupa Zahuata’n a chanchin a ziahnaah chuan Dokhama chuan khaw 5 (Khua panga) a satin a sawi. Chungte chu-1. Hmawngmual (Tuna Chawngtlai ram). 2. Kelkang. 3. Artlang. 4. Tualte. 5. Chawngtlai. Heng khua a sah hian Khawthar a kai tawh chuan a kalsan tak khua chu khaw ram a ni zel tawh. Eg- Lalsavunga’n Aizawl a chhuahsana Darlawnga a kai chuan Aizawlah khua a awm tawh lo.(Zahuata Diary)
2.Mizoram Synod Archive-a ‘List of Church” record a neihah chuan Mizoram khawchhak lama Tirhkoh Thangkhuma bial ziah lan a ni a, Khaw 22 a bial a, chung a bial chu fel takin –record a ni. Chutah chuan Name of the chief- Dokhama. Name of the Village- Chawngtlai tih a ni. Khaw 22 a Lal hming leh an khua a lang vek a, Chawngtlai leh a chhehvel khua a lan vek lain Tualte a tel lo tlat. . (Lal ropui Nikuala leh Chawngtlai. page-296. Nikuala hun hnuhnung by Lalfakzuala)
1.Tin, Synod Archive a Kohhran chhinchhiahna bu-ah chuan Chawngtlai khua a Ringtu hmasate leh lal leh an khaw hming a inziak vang mai. Hei bakah hian Lal Dokhama lal laia awptu Bawrhsap hmaa thubuai lut Document hmuh chhuahahte chuan Dokhama chu Chawngtlai lal a nih zia a tilang tel bawk. (Lal ropui Nikuala leh Chawngtlai. page-297. Nikuala hun hnuhnung by Lalfakzuala)
Engpawhnise Dokhama, Nikuala fapa hi keini chuan Chawngtlaia a awm lai chuan Chawngtlai lal a ni a, Kelkanga awm lai chuan Kelkang lal a ni tih kan pawm a, Chawngtlaia a awm lai pawha Tualte lal tih tlat hi kan pawm lo. Nikuala hi Lal a nih hnua a kaina khua tute pawhin eg- Bungzung, Buang, Khuangleng Leisen etc te hian’ kan lal a ni vet tho’ ti se kan hnial lo. Mahse Lal a nih hnua a kai miah lohna khua ten ‘kan lal a ni’ an ti hi kan pawm lova, Lal Nikuala an man laia a awmna khua ngeite hi chuan Document Proof awm si lova chumi khami chuan a ti tih leh ka pu chuan chuti chuan a ti tih ringawt tanchhan tlat hi kan pawm ngai dawn lo a ni.
Kum 1911 ah Chawngtlai hmunah chuan Zahuata pawhin nupui a nei ta. Kum 1913 ah Dokhama chuan a fapa Zahuata chu in 30 neiin Bualfiangah a kai tira, mahse Sakei hrang avangin kum khat emaw lek hetah hian an awm a, Kum1913 vek hian Lal Dokhama chu Tualteah a phei ve leh ta a, Lal Zahuata chu kum 1915 ah Keifang tlangah an kai leh a,Chawngtlai Biakin hmasa ber chu hetah hian an sa ta a ni. Helai thuah pawh hian Chawngtlai khua hi Lal Nikuala tupa Zahuata Lal ve atang chauha lo piang anga sawina a awm bawk. Mahse Saphoin an awp tantirha Nikuala chungchang report an pek pahnih chauh hi lo tarlang ila a chiang mai awm e.
“And that the latter in their turn bought their guns from the Duhlien villages across the Tyo-Kairuma, Sailienpui, Lalbura,(Chhim), Lalbura (Vonolel’s son), Kaihranga, Dokuma (Chongtleng) and NIKWE (WHILE AT CHONGTLAI)”
WCM Dundas. Asst Supdt, Lushai Hills. 1899
“I hear that South Kairuma, Lalbura, (two villages Kairanga, Dokuma, NIKWEQWE (WHILST AT CHONGTLAI) were some of the Lushai villages wchich sold to Whennohs.
Manglon, Chief of Sakhiliang
Recorded by Asst Supdt.Tiddim. Dt 17.4.1899.
Hengte mai pawh hian Chawngtlai khua hi Lal Zahuata indan 1913 atang chauha lang a nih loh zia a lantir chiang hle a ni. Helam hi chu kan sawi tum ber a nih loh avangin Nikuala Chawngtlai lal a nih zia fiahna Document tam tak nei tawh mah ila kan sawi tam tawh loving.
Zahuata chu Keifang atang chuan a pu Nikuala Lalna hmun Chawngtlaiah chuan kum 1918 German ral run lo haw kum chuan a kai leh ta a,hetah hian Dokhama Tualte lama phei leh tur khua atangin tlem a zawngin an rawn fin a in 67 an lo tling ve ta a. Hetah hian kum 6 zet an awm a kum 1924 ah chuan Keifang tlangah bawk Zahuata chu a phei leh ta a,(hemi kum hian ka pu Zadailova, Siamliana pa pawh a thi a, he thlanmualah hian phum a ni. HC Hmaa) tun hlengin a thlan pawh hmuh theihin a la awm. Keifang tlangah hian kum 1924- 1931 thleng an awm ta a, kum 1931 leh 1932 hian Zahuata chu Chawngtlai (Saizawl hmun) ah a kai phei leh ta a.Tichuan hemi kum atang hian khaw hmun sawna khaw thar kai tawh lovin Chawngtlai chu tun thlengin mei mit lovin a lo awm ta a..Saizawl hmun, Tuna Mual Veng kan tih thin atang hian veng hrang hrang lo piangin KEL Road-in (Khawzawl to East Lungdar Road) min pal tlang hnuah phei chuan Kawngpui bawhin kan inzar pharh ta a ni.
Pakai dawrh dawrh ta ila, Lal Nikuala pawh tu khaw kha ngaihsak hlawh lovin a tang bo ta vang vang a, Tumah tih tak zeta a chanchin chhui reng an awm lo. Pakhat te mah an awm lo. Mahse Ngaiteh, Lal Nikuala Pasaltha min ber mai Vanhnuaithang Mi hrang, mi leh sa leh ral hmaa tlawm ngai lo. Hranghleia thlah atang ngei mai chuan Lal Nikuala chanchin chu hai chhuah a lo ni ta a, A ni chuan Aizawl D.C Pisa pui atngin Kolkatta leh Delhi thleng rawkin a um zui zel a, “Nikuala hi kan Lal zawk a ni’ ti a Chawngtlai sawi bawrhbangtute meuh pawhin anmahnia chatuana an chhui chhuah rinawm lo khawp a ril chu “Biak zin Darzai”(Internet) hmangin a lo hai lang ta kuarh mai.!!! Chutichuan ani, Pu Lalfakzuala chuan Lal Nikuala thih ni thla leh kum thlengin a lo hai lan tak ni......Karei!!!! Khati khawpa Lal ropui leh Zoram tana tangkai kha kan lo va hai rei teh lul em!!!Ar nghal chu ar nghal bawkin a thlak leh thin an tih ang maiin, Lal Nikuala kut dinglam, Pasaltha Hranghleia chu awm tawh lo mahse a tupa Lalfakzuala ngei chuan a ai a rawn awh ta a nih hi.
Chawngtlai hmun hluiah hian Chawngtlai Presbyterian Kohhran chuan an lo din tanna hmun hriatreng nan Lung mawi tak a phun a. He hmuna Ringtua lo inpe hmasa Synod Archive a an lo record Copy ang thlap pawh tar lan a ni nghe nghe..
LOCATION AND BOUNDARIES
Chawngtlai khua hi Khawzawl District a awm a ni a, Distric Headquarters atanga chhim chhak lam Km 10 chauha hla a ni. Longitude Degree 93.20 leh Latitude Degree 23.45 vela awm a ni a, A ram Hmarchhak lam deuhah Tropic of Cancer chuan a tan tlang a ni. A ramri te chu:-
Khawchhak lamah---- Khawchhak Tuipui a awm a, Tuipui khua a awm.
Khawthlang lamah---- Phaisen Lui a awm a, Phaisen lui atanga km 20 velah Khawhai leh Chalrang khua a awm.
Chhim lamah ---- Khuailui a awm a, khuailui atanga km 5 velah Khuailui tlang liamah Tualte khua a awm.
Hmar lamah --- Tuimuk Lui a awm a,chu chu Lungtlanghing tlang bulthut a ni. Lungtlanghing tlang chip lamah Ngaizawl leh Neihdawn khua a awm.
Hmarthlang lamah-- Khawzawl a awm a, Champhai to Aizawl Road in a paltlang. Tin, Chawngtlai ram hi Khawchhak Tuipui ruam pheiah Champhai to Aizawl Road in a pal tlang a, a khua hi Lungdar (E) Roadin a pal tlang a, Tualte Road in a paltlang bawk.
CLIMATE
Chawngtlai khua hi a boruak a vawt nuam hle a, tunhma phei chuan thlasikah vur a tla thin. Tunah hian vur a tla ngai ta meuh lo a ,Global Warming hian a ti danglam ve te pawh a ni ang. A tlangpuiin a vawh lai berin 3*C vel a ni a, a lum lai berin 30*C vel a ni.(2024)
Mizo Historical Village Society- Chawngtlai khua chu kum 2014 February 21 ah Mizo Historical Village a puan a ni a; Mizo Historical Village a kan inpuanna chhan, langsar zual tlem lo tar lang ta ila:-
1) Mizo Lal ropui leh Zoram tuna a nihna anga awmtir theitu, Lal Nikuala din leh Lalna khua a nih vang.
2) Hmanlai Zofate hnuhma mai nilo Lushei rama tla thlate hnuhma hmuh tur Lungmi lem, Lung rahbi etc a la awm nual vang.
3) Nikuala Sulhnu, Zoram chhan nana theihtawp a chhuahna hnu hma Viz- Sahlam, Lal Nikuala inhmun, Sibih etc awmna a nih avangin.
4) Khaw mal khaiah chuan hmanlai thil (Historical Sites) awm tam khua a nih vang.
5) Lal Nikuala Zahau leh a pasaltha te hi tuna India leh Myanmar inrina (Mizoram leh Burma) a nih ang anga a lo awm theihna chhan an nih avanga Chawimawia tilartu kan nih vang a ni.
6) Zoram Khawvelin kan hnam rohlu, kan Historical sites leh Monuments te ngaihhluta, vawn him a, Tuaithar nachang kan hriat nan adt.
Kum 2013 October thlaah Mizo Historical Village Committee chu Organising
Committee angin Village Councilte remtihna ang thlapin din a ni a, Kum 2014-ah Pawl angin a lo ding ta zel a, A hmingah pawh Mizo Historical Village Chawngtlai tih a ni chho ta a, Hmalakna kawng hrang hrang a neih thin avangin thawh tur a lo tam chho telh telh a. Recognise/register loh NGO nih reng a lo rem thei ta reng bik lova, Tichuan
Section 8 of the Mizoram Societies Registration Act. 2005 (Act No 13 0f 2005) hmangin Registered kan lo ni ta a. Ni 19.08. 2022 ah Registration Number MSR-1524 niin Pawl
Hmingah pawh Mizo Historical Village Society (MHVS) tih a lo ni ta a ni
HMUNHMA HUMHALH LEH CHHINCHHIAH TLAK TE.
Heng a hnuai amite hi Mizo Historical Village Society chuan Mizoram tan,,Zofate tan a vawng himin a humhalh mek a ni. An chanchin a tawi thei ang berin tarlang zeuh ila.:-
1.Nikuala SAHLAM (1889-1892) Hei Lal Nikualan amah rawn run tum leh a pasalthaten an ral thah lu an khaina Thing a ni. Phuahchawp a ni lo va, a tak ngei a ni. Hlai thing a ni a, a tar tawh hle a, zaihri thingin a bawm a, a la chhan hram hram niin a lang. He Sahlamah hian milu 19 ngawt khai a lo ni tawh a ni.
2.Lalruanga-lung-kahkeh. Lungpui lian pui mai, a laia khi ruah a ni a, tunhma phei chuan a kahkehna (Thal mu ?) a khi karah a inhnawh tut thin. Mizo Dawithiam hmingthang Lalruanga kha Chawngtlai khuaah hian a lo kal ve tawh ngei a niang..! A lung kah keh pawh a awm tlat.
3.Lungsen/Ai enna lung.. He laia lo cheng hmasa ten he lung atang hian an hausak leh hausak loh (buh thar tam leh tam loh) an lo rin hriat thei thin niin sawi thin a ni
4.Lungmilem. Nikuala hun hma lam daih atanga awm tawh Lungphun, milem inziakna.(Mizorama lut hmasate sulhnu ni a rin a ni) hmun li (4) laiah a awm a, hmun khat chu tih chhiat a ni tawh a, Vangchhia, Mualkawi, Khawhai adt ah hetiang lung hi hmuh tur a la awm. Hmanlai deuh chuan Chhura farep an ti mai thin.
5.Nikuala in hmun:- Kum 1888-1889-a Chawngtlaia a rawn luh leh Pawih ral a do laia a awmna in hmun a ni. Tunah chuan Nikuala Lal Mualzawl kha Playground atan laih zauh belh a ni tawh a. Chumi sir te maiah chuan Nikuala In hmun hi a la awm a ni.
6. Lungphun sang ber:- Ft 24 leh a chanve laia sang, Lung sakhat phun chawp ngatah chuan Mizoramah a aia sang hmuh tur awm lo. He Lung hi Chawngtlai Phaiveng Presbyterian Kohhranten Mizorama Chanchintha kum za (100) tlin lawm nana an phun a ni a, kum 1994-a phun a ni a. Phai Veng Kohhran Biakin kawtah a awm.
7. Pawih thah Kawn:- Hei hi chuan ‘Mizoram Dil lian ber chu Rih Dil a ni a, Burma ramah a awm’ tih kha a ang deuh. Khawhai tlang Phul hmunah a awm a, Mizoram Pawih ralin an beih hnuhnun berna hmun a ni a.1891 ni a hriat a ni a, Nikuala Pasaltha Chawngluta’n Dawn pasaltha Ralbilha a thahna hmun a ni a, Hemi tuma lo kalte hi Nikuala Pasaltha ten an lo that mang thak a ni.
8.Hranghleia thlan:- Pasaltha Hmingthang, huaisen leh tuan rang. Nikuala awmna apianga awm thin a ni a, a chanchin hi chu lehkhabu a hranin a awm bakah mi hrang hrangin an ziak tawh a, sawi tam ngai lo ah dah phawt ang. Chawngtlai thlanmualah a awm.
9.Khawhlui thlanmual:- Thingtlang khua Saphoin an thutchilh loh naa Thlanmual hmasa ber ani a, Chawngtlai ram chhung Keifang hmuna awm a ni.
10.Khawpuitan:- A hming tak chu Tantinchhingi Khawpuitan a ni. He tlang chanchin hi Lalhmachhuana Zofa chuan Mizoram tlang hmingthangte tih buah khan ngaihnawm takin a ziak. Zahau Lal, Chawngtlai Lal, Nikuala khaw chuanna, leido a lak dawn leh a rammut dawn apianga ainthawina hmun, Lasite khawpuitan a ni. Hetah hian Tantinchhingi Puan tahna te, Tante te leh Tantinchhingi puk te a awm. Chawngtlai khaw hmar lam tlang dunga awm a ni a, Champhai Road chungah ral khat atangin a lang thei.
11.Mithah kawn:- Khawchhak Pawiten rawlrala Mizoram an beih hnuhnun bera an mi thah hnuhnung ber pahnih Kapvunga leh Hrangbawiha an thahna hmun a ni. Heng mi pahnih rawlrala thah an nih avang hian Nikuala pawn phuba lain Pawih ral engemaw zat a that niin sawi thin a ni. Chawngtlai leh Khawhai inkar kawng hlui hnuai maia awm a ni a, Phaisen feh kawnga awm a ni.
12.Liantlirthanga Hmun:-.Chawngtlaia Nikuala a thut laia a daideng atana a hman .Liantlirthanga awmna a ni a, Liantlirthanga hi Nikuala laichin hnai tak a ni. Bualpui Dil kamah awm.
13.Tuthanga thlan:-Khawhlui Thlanmual ah a awm a, Mi 10 that, Sal 6 nei, Pasaltha a ni,
14. Rokhawli thlan:- Hmeichhe khuangchawi tawh thlan a ni a, hmuh theihin a la awm.
15.Hranglung:- Pasaltha, sa leh rala mi huaisen leh kei ka ni inti ngam chinten an vanglai an hriat reng nan, Lung an phun thin, Ziak leh chhiar thiam hma a ni a, engmah a in ziak ngai lo. Mi bik lungphun a ni. Hmanlai chuan thiang leh thiang lo a tam em em mai- Sailo hnamin sa piangsual an ei thiang lo a, Lusei hnamin khiang thing leh fartuah thing hmanruaah an lain an hmang thiang lo. Khiang chu kuang urna a ni a, Fartuah chu mirawp lam dawna milem an tuk thinna a nih vang pawh a niang. Hranglung pawh hi Chawngthu hnam chauhin an phun thin a, chuti chung pawhin leido nei khua lo chuan an phun meuh lo.
Tin, Hranglung hi anchhia nena phun thin a nih avangin miin an tichhe ngai lo; “He ka Hranglung hi mi a ni emaw, sa a ni emaw, a tichhetu chu ngal ngetin thi rawh se” tiin an phun thin. Hmanlai hunah pawh a tichhetu hian a tihchhiat atanga reiloteah thihna sawi tur tingin tawk an lo awm ngei niin an sawi. Hranglung hi hmun hnihah hmuh a ni a, pakhat chu Keifang hmunah a ni a, pakhat chu Lalruanga lungkahkeh leh Chawngtlai Hmun (Khawhlui hmun) inkarah a awm .
16. Pakthanga tui & a thutna leh a khan:- Pakthanga hi Nikuala Pasaltha a ni a, Chawngtlai Phaiveng atanga Km. 2 velah a hming chawi tui a awm a, chumi bulah chuan a sa channaa a thutna thin lungpui khuar a la awm reng a, khan a nei bawk a, ral channa khan nge sa channa khan erawh hriat a ni tawh lo. Mangcheua Mual panna kawngin a paltlang.
17. Lal Lungdawh:- He Lungdawh hi Lal Zahuata’n a pa Dokhama hriat reng nana kum 1929 September ni 26-a dawh a ni a, lungphek hlai pathum hi a phun ding a, a chungah lung phek a phah leh a, Ft. 4 vela sang a ni. Hetih lai hian amah Lal Zahuata chu Keifanghmunah a la awm a,tuna Chawngtlai Mual veng hi Saizawl hmun tih a ni a, heta kai phei hi a tum avangin a kawtchhuahah lung a va dawh a ni. A bul lawkah hian Pastor Kaplunga damlai lung pawh a awm a ni.
18. Vai riah hmun:- Hei hi Lal Nikuala man tum Vailianin kum 1892-a an riah hmun a ni. He hmun hi Lal Nikuala hi Chawngtlaia a awm lai ngeia man a ni tih tichiangtu a ni.
19. Nikuala thuhrukna hmun:- Lal Nikuala man an tum hmasak kum 1891 khan a upaten Vailian chuan Lal an huat zawngte chu Sipai tam tak hruaiin an man mai thin a ni tih hriain Lal Nikuala an lo thuhrukna hmun, tuna Phaiveng hnuai, Sakhi leilawn kawr dungah a awm. A bul lawkah Hranghleia pawh Nikuala veng pah turin an thukru bawk. Hei pawh hi Lal Nikuala hi Chawngtlai Lal ngei a nihzia tichiangtu a ni bawk.
20.Chawngtlai Hmun leh Manganga Lung:- Chawngtlai khua atanga hnaite, km 1 awm leka awm a ni a, helai hmunah hian Lal Nikuala fapa, Dokhama chu Tualte Bunghmun atangin a rawn kai a, a rawn kai hian in 177 a nei a, a fapa Zahuata chuan Kelkang atanga an kai kual dan chu a Diary-ah heti hian a ziak.”Tin, Bawrhsap-in tlang a sem a, ka pa tan Tualte Artlang Chawngtlai a ruatsak a, Kelkang a chuan kei pawh ka lo piang ve ta a, Artlang kan kai a, in 60 lai kan ni a, chutatangin Tualteah kan kai leh a, 160 lai kan lo tling ta. Tin, chutatangin Chawngtlai kan kai leh a, in 177 lai kan lo tling ta a ni. Chumi khua atang chuan ka pain in 30 in min kai hran tir ta a ni.” (Zahuata Diary phek 5 na.) tiin.
He hmun hi Chawngtlai khuaa ringtu hmasa ber berten Baptisma an channa hmun a ni a, Baptisma chang hmasa ber pawh helai hmunah hian Pastor Vanchhunga’n a Baptis a ni. Chawngtlai hmuna an awm lai hian Lal Dokhama chuan Thirdeng Manganga (‘Ma^ng’ tih hi thluk tur a ni) a nei a, Khawthar kaia insawn reng an ni a,a ninawm deuh pawh a niang .Helai hmunah hian kum sarih lai an awm ta a,Thirdeng pa chuan nuam a ti hle a ni an ti.In pawh 300 lai an tling leh tawh a, Lung a phun ta a, A lungphunah chuan :-
“Thang leh thar tawnah ka hril zel dawn,
Deng hmingliana rolung chul lo tur.” a ti hiala ni.
He lungphun hi tunah pawh a la awm reng a, Helaia an awm lai hian an lo thahnem leh ta a,an tawng pawh a lo chapo leh tan tawh a,’Khuavel Chelh loh Chawngtlai khua’ an lo inti leh ngam ngat ta a ni. An hla ah pawh- “Khuavel Chelh loh Chawngtlai tlang hmingthang kan lenna” tiin Puma zaiin an chawi thin. He laia Thirdeng pa Lungphun hi Chawngtlai khaw lungphuna hawrawp inziak hmasa ber a ni. Engtik hun laiin emaw a lung hi a lo tlu bung a,mahse a lo la keh chhe lo hlauh a ni. He laia an awm laia Chawngtlai tana chhinchhiah tlak tak thil te chu:-
(1) Kum 1911 September ni 11 ah Kohhran a ding.
(2) Helaia awm lai hian Phai/Leilet siam tan a ni.
(3)Chawngtlai ram chhunga Lungphuna hawrawp chuang hmasa ber awmna a ni.
(4) Chawngtlai lal, Zahuata indan tanna (kum 1913) a ni.
(6) Pathian thuawih/Ringtu Baptisma channa hmasa ber a ni.
21.Mangcheua Mual:-Mangcheua hi Nikuala Pasaltha a ni a,Nikuala’n
Chawngtlai khaw hnuaiah daido atan a dah a,chulai hmun chu Mangcheua Mual tih a la
ni ta reng a ni
22. Hranghleia Tawllohpuan leh Fei kibar:- He puan hlu tak hi Lal Nikuala leh a nupui Lalngurvungin an pasaltha thihngam lu pua hmelma bei ngam tur hnena an hlan thin a ni. Pi Hmingliani’n a pa Hranghleia hnen atanga a rochun tun thlengin hmuh theihin a la kawl tha a, He Tawlhlohpuan hming pawh hi Lal Nikuala atanga lo chhuak a ni nghe nghe a,Hranghleia hman thin Fei kibar pawh kawl that ala ni. Tawlhlohpuan/Puanrin pawqh a fanuin a kawl tha reng thin a, a thih hmain Pu C Laltlangmawia a hlan chhawng ta a ni.
23.Sakhi leilawn:- Kawra khuarelin leilawn a lo dawh sa hi hmun hrang hrangah hmuh tur a awm.History kaihhnawih chu a ni lem lo na a, a lo awm tan dan tur te ngaih tuahin thil hmuh manhla tak chu a ni ve hrim hrim a, Cawngtlai ram chhungah hian pathum lai a awm.
24 Lungding:-Hmanlai chuan kan pi pu te hian Thingbul danglam deuh leh lung pui maksak leh pangngailo khawpa lian hian huai neiin an ngai thin a, chu Huai chu tih lung nih loh an hlau thin.Mangcheua Mual ral lawkah hian Lungpui lian em em mai a awm a, teh kualin Ft 72a lian a ni a,a san lam pawh Feet 72 zeta sang a ni. He Lungpui pawh hi hmanlai chuan an be thina sawi a ni.
25.Pi Thangvungi thlan:- Khawhar hla lar tak tak phuahtu Pi Thangvungi thlan pawh Chawngtlai khaw thlanmual hluiah a awm.
26. Lal Nikuala hriatrengna Lungphun:- Hei hi Lallungdawh bulah a awm a, Lei atanga Feet 32 zeta sang a ni. 2023 ah hawn a ni.
27. Biaklawma Lung:- Tv Biaklawma hi mi danglam tak a ni a, kum 22mi chauh ni a thi chungin ‘Val upa” nihna pek a ni. Mizorama Naulawm/Nauhual lo chhuahna bul a ni a, Boy Scout Chawngtlaiah a din.
28. Pi pu Chhuahtlang:-Hei hi kum 2023 a din tan a ni a, chhunzawm zel tura ruahman a ni Lung 11 phun a ni a,A khaikhawmtu lung 1, Pasaltha lung 5 leh Lal 5 an chanchin tawi ziaka tarlan a ni. Mizo Lal leh Pasaltha ram leh hnam tana thawk tha leh thawhhlawkte lung leh Chawngtlai Mibikte lung phun belh zel tur a la ni.
Heng kan tarlante hian chanchin ngaihnawm tak tak an nei theuh naa kan sawi seng dawn rih lo a, heta tarlan loh chanchin ngaihnawm nei ve tho thenkhat te pawh kan sawi seng ta rih lo a ni.
TLAWMNGAI PAWL LEH ASSOCIATION HRANG HRANG
1. Young Mizo Association. (YMA). Chawngtlai khuaah hian YMA hi kum 1945 kumah a ding a, a din hun lai hi chuan Young Lushai Association tih a la ni.
Central YMA thuchhuak ni lem lo, Chawngtlai leh a khaw thenawm vela lar tak pakhat chu Mizo Children Association (MCA) a ni. Kum 1964-ah din a ni a, Hall te pawh MCA hian a nei hman a,. An hnathawh hi a hluin a tangkai em em a, mahse a kip a kawiin kan sawi hman ta lo a ni. Kum 1977 ah MCA chu tihtawp a lo ni leh ta a ni
Tlawmngai thlan:- Chawngtlai Branch YMA a lo din atanga a vawi khatna atan, a din atanga kum 38-na ah Chawngtlai Branch YMA chuan Chawngtlai khuaa Tlangval tlawmngai ber thlanna hmasa ber a buatsaih a, a buaipuituten in tina lutin tlawmngai an tih ber an zawt a, an ziak zel a, chu ta tlawmngai bera thlan chu Tv. Vaichhawna a ni a, tunah (2024) pawh min la dampui a ni.
YMA Library leh Office:- Chawngtlai Branch YMA hian Kum 1983-ah Office an sa tan a, tunah chuan hmuh theihin a lo ding ta, kum 1989 February ni 17-ah Library a din a, hapta khat chhungin Thawhtanni, Nilaini leh Inrinni zingah hawn a ni thin a, tunah hian Nilaini leh Inrinni zingah hawn a ni a, tunah chuan Concrete Building-in Labrary sak a ni a, lehkhabu pawh 5000 chuang zet a lo nei ta a ni. Kum 2012 atangin Chawngtlai Branch YMA atangin Phaiveng Branch YMA a indang.
2. Mizo Hmeichhe Insuihkhawm Pawl (MHIP):- MHIP hi a din tirh chuan Mahila Samiti tih a ni a, kum 1974 vela din a ni a, tunah chuan MHIP tih a lo ni ta a ni.
3. Mizo Upa Pawl :- He Pawl pawh hi a din tirh chuan Zoram Upa Pawl (ZUP) tih kha a ni a, kum 1975 ah din a ni a, tunah chuan MUP tia hriat an lo ni ta
4. Mizo Historical Village Society:- Hei hi a tirah chuan Organising Committee ang chauh (2013) a din a ni a, Chawngtlaiin Mizo Historical Village kan inpuan dawna din a ni a, hun a lo kal zel a, Committee-a din a lo tul tak avangin 2014 ah Mizo Historical Village Chawngtlai tiin din a lo ni ta a. Tunah chuan Mizo Historical Village Society tih a lo ni ta. A chanchin tlangpui kan sawi tawh kha.
Heng bakah Association hrang hrang, a hunlai milin a ding thin a, thingtlang khua ngang a nih avangin Pawl nghet tak tak dang din hleih theih a ni lo. Pawl lo ding tawh leh ding mek zinga langsar zual deuh deuh te chu-
1) Boy Scout:- Hei hi kum 1938 hma lam velah lo dingin kum 1947 velah a tawp ta a ni.
3). Games and Sport Association:- Hei hi kum 1973 velah a ding tan a, thingtlang lo neihna hmunah chuan chak taka hma lak theih a ni lo nain thalaiten an tuipui hle. Tun thlengin a la ding chho ve zel.
4) Mizo Zirlai Pawl (MZP). Hei Pawl hi kum 2003-ah din a ni a, Sub-Headquaters hming pu a din a ni.
5) All Mizoram Fermers’ Association (AMFU) Hei hi kum 1978 vel khan a ding tawh a, Lo nei mite tan an theih tawpin an thawk thin.
6) Sawhthing Chingtu Association:- Sawhthing hi hun rei tak chu chin a lo ni ve ta a. Sawhthing chingtute an lo pung zel a, he Association pawh hi a tangkai tulh tulh a ni.
7) Chawngtlai Educational Employees Association :-(CEEA) hi kum 1980 khan a ding tawh a, a hming atang khian a chiang mai awm e. Tunhma chuan CTA (Chawngtlai Teacher Association) tih a ni thin
8) Chawngtlai Boxing Association:- Kum 2009 velah a ding a, President hmasa ber chu Pu Tlangthanmawia a ni a, An din atanga reiloteah Boxing-a District Champion-te, Mizoram LPS Profight champion-te kan nei nghal a ni.
9) Chawngtlai Welfare Committee (CWC):-Hei hi kum 2000 June ni 24-ah din a ni a, he Welfare-ah hian a rei emaw rei lo emaw Chawngtlaia hun rei tak atanga lo awm tawh hrim hrim, a duh apiang te a huap a. Tin, khawi khuaa awm pawh a huap vek a ni. Aizawl hi Headquarters-ah hmangin Chawngtlai khua nen thlun zawm vek a ni.
10. Consumer Union:- Hei hi 2012 vel khan a ding zawk a, a tawp leh a kum 2022 khan din thar a lo ni leh ta a ni.
11. Wolf Cup:-Hei hi kum 1939 a din a ni a, Cup Master chu Tv. Biaklawma a ni a, he Pawl hian thutiam an nei a, chu chu hei hi a ni. ‘Chinghne no chuan a pui thu a zawm thin, Chinghneno chuan ama thu a zawm mai lo’. tih leh ‘Pathian leh Lalber
leh kan ram tana ka tih tur pual ti turin, Wolf Cup Pact dan zawm turin leh nitina tu emaw tal tana thiltha titurin, dan zawm turin leh nitina tu emaw tal tanpui turin theihtawp chhuah ka tiam tlat e’ tih a ni.
Chawngtlaiah hian Association hrang hrang PRISM, , Grape, Sapthei, Tomato, Phai leilet nei Huan neite pawhin Association a rem chan angin an din thin a, thenkhat chu hunin a hril a, pawimawhna tam tak a awm tak lem loh avanga tawp tate a awm bawk. Chutih rualin mihring indaih loh avangte , thawktu tui tlan lohna avang tea tawp tate an awm nual bawk.
SORKAR LEH A KUT THLAK VENA TE
Chawngtlai khua hian kan Sorkar hi kan tilungni thiam lo nge kan la phak lo hrim hrim ka hre lo a, Sorkar hian min uap lo hlein ka hre thin. Department Office hi tun thlengin kan la nei lo chu a nih hi. Tlem tlemin lo thlur ta hlek hlek ila:-
1. Education Department. Hei hi Sorkar hnathawk kan neih tamna ber a ni a, tunah (2024) tak hian High School- 1, Middle School- 1, Primary School- 3 leh Presbyterian English School (Kg 1-Class VIII)-1 kan nei. School khaikhawmtu SDEO Khawzawl a ni. Anganwady 4 a awm bawk.
2. Post Office. Hei hi 1 a awm a, kum 1959 atangin hawn a ni a, Branch-a ding a ni a, thawktu 2 an awm a, Post Master hmasa ber leh tang rei ber chu Pu R. Vanhnuaithanga a ni.
3. Health Sub-Centre. Hei hi kum 1970 atangin Dispensary a din niin Nurse 1 dah a ni a, Nurse hmasa ber chu Lalbiaktluangi a ni a, Compounder hmasa ber chu Lalvela a ni. Kum 1979 velah Health Sub-Centre tia thlak a ni a,
4.Agriculture Department:- Kum 1972-ah Agriculture Department hian Quarters an rawn sa a, thawktu (Staff ) pawh 3 vel chu an rawn dah ve a, hei hi Chawngtlai ram Bualpuiah Alu an rawn chin vang a ni ber, kum 2002-ah Rest House an rawn sa bawk a, IV Grade pakhatin a enkawl a, mahse tunah chuana engmah hi a awm tawh lo.
5. Administrative Officer (A.O):- Hei hi kum 1969 atangin kan nei a, Quarters pawh fel tak a nei a, kum 1969 ah Godown pawh sak tan a ni a, AO tihtawp a nih khan LDC-in a hna hi engemaw chen a kut ken a, mahse tunah chuan an awm tawh lo vek a, Buhfai Godown pawh a awm tawh lo. Kum 1981 leh 1982 kum bawr hi Mizoram chu President Rule a a awm avangin V.C awm lovin AO hian a kawp nghe nghe a ni.
6. Public Work Department- Aizawl to East Lungdar Road (KEL Road) siam a nih lai kum 1973 khan SA Quarters nena dah a ni a, tunah chuan Quarters pawh a awm leh ta lo.
7. Electric Department:- Khawzawl atanga pek kan ni thin a, kan khaw mi thawktu 2 tunah(2024) an awm a, chu chuan min thutchilh thin, tunah chuan tual chhungah thawktu 2 kan nei a,Electric hi kum 1987 atangin kan eng ve tan a ni. Tunah chuan Khawhai atangin Power Supply thin kan ni.
8. Public Health Engeneering (PHE):- Khawzawl Division-in min awp a, tunah hian Thawktu pakhat tualchhung mi kan nei a, amaherawhchu, Department lam hian tui enkawl hna hi tualchhung kutah a dah a, chu pawh chu tidanglam hretin WATSAN Comt din a ni a, chung chuan an enkawl ber
ZIRNA IN
Tun hma atangin Chawngtlai hi khawhlun pawl leh thingtlang khuaah chuan a lian pawl tak ni ve mahse, zirna lamah mi lar leh mi hmingthang a chhuah lo hle a, Primary School pawh a ding hma viau a; mahse, hei hian rah chhuah a nei nep viauin a lang. Primary School a din atanga kum 75 inkar (1925-2000) hmasawnna aiin tun hnai kum 20 (2000-2020) chhunga hmsawnna hi a nasa fe zawk a tih theih awm e. A hnuaia tar lan hi School hrang hrang kan neih tawh leh tuna kan neih dan a ni:-
Sl No School hming A din kum
1 Primary School I 1925
2 Middle School 1963
3 Primary School II 1977
4 Primary School III 1979
5 High School (a hmasa) 1978
A hnuhnung 1985
6. Emmanuel English Medium 2013 ( awm tawh lo)
7 Presbyterian English School 2015
KOHHRAN AWMTE
Tuna (2024) Chawngtlai khuaa Kohhran awmte lo tarlang ta ila
Sl No Kohhran hming Din kum
1 Presbyterian Kohhran 11th Sept1911
2 United Penticostal Church 1951
3 Roman Catholic 20.6.1960
4 Isua Kohhran (Formerly IKK) 6th May, 1972
5 Salvation Army 1994
United Penticostal Church-ah hian engemaw hun lai chuan North East lam an awm ve nial a, Biak in pawh an nei hrang hman a, mahse tunah chuan an awm ta lo.
VILLAGE COUNCIL
Village Council hi kum 1954 atanga neih tan a ni a, hemi tum hian 1954-1957 VC tur thlan nghal a ni.
Zoram buai lai, kum 1966 hian Village Council hi thlan an ni lo va, a ruata ruat an ni. Tin, kum 1980-1982 hi Mizoram President Rule-a dah a nih avangin Village Council an awm lo va. Administrative Officer (AO) Pu Rohmingthanga leh Pu K. Sanghnuna’n min awp a ni. Kum 1982-ah Village Council thlan a ni leh a, 1982-1983 an V.C a. Hemi dawt Kum 1984 a V.C thlante chu dissolved an ni a, Hei hi Administration lama buai a awm vang a ni ber awm e. Chuvangin 1984 hian VC an awm lo bawk a, C.A –(Pu Lalhranga) in min awp bawk. Village Council President ni rei ber chu Pu Saihranga a ni a, kum 1958 atanga 1966 thleng VCP hna a chelh a, Secretary ni rei ber chu Pu PC. Rozika a ni a, kum 1972 atanga 1999 thleng Secretary hna a chelh.
Village Council hi Chawngtlai khuaah Term 21 neih a ni tawh a. Kum thum term zel a ni thin. Kum 2015 atang chuan an term chhung tihdanglam a nih bakah Hmeichhe dinhmun chawi kanna ni fa hmiang Village Council memberah Hmeichhia telh ngei ngeina dan a lo chhuak a, kum 2015 ah chuan hmeichhia thlan tel a lo ni ta a. Hmeichhe VC hmasa ber chu Pi Kaptluangi a ni. Tichuan 2015 a V.C te chu kum 2020 thleng V.C an ni ta a. Kum 2020 kum tawp l;amah VC term 21-na chu thlan a lo nil leh ta a, Mahse an term an hman zawh hmain Suspended an ni a, Hei hi Financial Management-ah buai a awm vang a ni. Village Council aiah Advisory Board, Member 5 siam a ni a, Chairmanah Champhai LAD atangin Field Inspector (F.I) Lalchhuanliana. dah a ni. Advisori Board pawh hi Mizoram Member of Legislative Assembly thlan 2023 in a nanga, Sorkarna a inthlak avangin tum 2 kan nei ta bawk. He thu ziah lai hian Village Council Suspend chungchang thuah thu thar dang a la awm lo.
TLANGKAWMNA.
HISTORY hi thil kal tawh daih pawh nise hriat sual palh leh tih dik loh tam tak wm thei a ni a, Hriat belh leh hmuhchhuah thar awm reng a nih bawk avangin a famkim mawh hle. Mizo hnam hi kan naupan em avangin ziak leh chhiar lamah kan hnufual hle a, kan chanchin pawh ziaka dah that loh a tam em em. Pa thil chhinchhiah thei deuh leh Upate thu lak a tam em em thin. Reserch based leh Document based loh a ziak a tam em em a, hnamdang ten an chanchin an ziahna a lo lang hlek pawh kan tan chuan a pawimawhin Document tha tak a tling thin. British ten min awp dawn leh min awp fel hnu a an thu ziak hrang hrang hmuhchhuahte hi Nikuala chanchinah pawh hian kan behchhan ber a ni a. Ziak leh chhiar thiam kan lo awm china kan thu ziak leh chhinchhiahte hi Chawngtlai khaw chanchina kan innghahna a ni bawk. Mizo tena Mizo History kan ziak theuh theuh pawh a inan loh tam thin em avangin A then ring tlut a, a then hnawl leh thak si hian thudik min hailan tir dawn lova, Ziak hrang hrang lakhawma thil ni thei lo paih a, thil ni thei chuktuah rem kan thiam loh chuan Mizote ngei pawh hian History inang lo kan chhep khawm teuh mai dawn a lo ni. Chuvangin thil nihna tak chik a, fel taka chhinchhiah kan uar a ngai tak meuh meuh a ni.
