KHAWZAWL DINTHAR VENG CHANCHIN TLANGPUI 

KHAWZAWL KHUA HI 

Khawzawl hi rambuai (1966) hma Khawzawl leh Grouping Centre-a hman a nih hnu Khawzawl tia sawi theih a ni awm e. Khawzawl khua hrim hrim din a lo nihna chu a rei tawh hle a, kum 1525 vel lai khan hmar hnam peng zinga Khawzawla tih hming chawi a phuah a ni awm e. Zoram buai avangin Khawzawl chu hal a ni a, a kan fai vek avangin tumah cheng-zui an awm thei ta lova, khawram a lo ni ta a ni. 

 Kum 1968-ah Khawzawl chu Grouping Centre-ah hman a ni a, tichuan a chhehvel khua heng: Hmuncheng, Arro, Zaingen, Tuisen, Tualpui, Ngaizawl, Zuchhip, Neihdawn, Zopui te hi khawm leh anni ta a. Tuna Khawzawl field No. 1 hmar lamah vek hian awmtir an ni a, mahni khaw hming kha veng hming atan pawh chhawm nghal a ni deuh vek a ni. Ngaizawl leh Zopui awmna bik erawh chu Lal Veng tih a ni a, Tuisen pawh Darngawna behtir niin, Hmuncheng chu Zuchhip Vengah an behtir a ni. Hun a lo kal hret a, mahni khaw hluia kir leh theih a nih takah chuan Hmuncheng, Arro, Tualpui, Ngaizawl leh Neihdawn te chuan an khaw hmun hlui lam an luah leh ta a, engemaw zat kir leh ta lo pawh an awm bawk a, hemi hnu hian Tualpui Veng chu Darngawn ah betin, Lal Veng pawh Zaingen vengah a awm ta a ni. Kum 1972-ah chuan Aizawl-Champhai motor kawngpui laih tlang a lo ni ta a, heng kawngpui kama awm duhte tan hian Khawzawl VC chuan inhmun a theh a, mi tam takin kawngpui kama awm hi thlahlelin veng tam tak Vengthar, Kawnzar, Electric veng leh Hermon vengte a lo piang chho ta zel a ni. 

DINTHAR VENG PIAN DAN 

 Rambuai (1966) hma khawzawl kha chu tuna Field No.1 kan tih chhim lamah vek hian an awm a, khawzawl Dinthar veng pawh hi khatihlai kha chuan Sasawthelh Veng tih a ni. Khawzawl chheh vel khua khawm a nih khan helai velah hian tumah an awm loh avangin Aizawl – Champhai motor kawngpui siamtu BRTF-te chuan awm nan an hmang a. Kum 1977-ah chuan BRTF-te hi tlemte chauh an awm tak avangin Khawzawl VC-te chuan inhmun an theh ta a, tunhma khawzawla lo awm tawhte tan pawh mahni inhmun ngaiah awm theih a lo nih takah chuan mi tam takin an hmun ngaihah an inbengbel leh ta  a ni. Kum 1977 chuan Pi Sapneli leh Pu Lalhuzama ten in sain an luah nghal a, a kum leh 1978-ah chuan chhungkaw 24 zetin an belh ta a ni. Hemi kum hian vengchhung inpumkhat nan Krismas leh Kum thar hmun khatah hmangin hlim takin ruai an kilho a ni. Veng chhung paho chuan veng hming mumal nei lova awm chu thil fel lo takah ngaiin, Pu Lalhuzama inah veng paho inhmuh khawm a ni a, kal khawmte chuan hruaitu an inruat nghal a, chungte chu: 

Chairman - Pu K. Hrangnawna  Secretary - Pu Chawngkhuma 

           Treasurer      -        Pu Selthanga (L) 

           Fin. Secretary -      Pu H. Chalkhuma 

 Hruaitu kaihhruaina hnuaiah Veng hming tur chu ngaihtuah a ni a, veng paho kalkhawm chuan ngun taka an ngaihtuah hnuin ‘Khawzawl luahtu ber kan nih avangin kan veng hi ‘KHAWZAWL DINTHAR VENG’ni rawh se, tiin lungrual takin he veng hming hi anlo phuah ta ani. Kum 1980 ah chuan chhungkaw sawmli zet anlo ni ta a, chutiang chuan he veng hi an pung chho ta zel a,tunah hian in 200 chuang zet a lo awmta a ni. 

KHAWTLANG RORELNA LAM (Village Council) 

Hun rei tak Khawzawl hi V/C pakhat hnuaiah kan awm thin a, chuvangin khawtlang rorelna leh inawpna lamah pawh heng vengchhung hruaitu inruatte hi vengchhung thilah chuan sulsuttu ber an ni a, chhiat/ thatah pawh mawhphurhna an koah a innghat tak meuh ani. 

V/C pakhat hnuaia khawzawl kan awm chhung hi kum 21 chhung zet a ni a, Kum 1982 khan Khawzawl Dinthar veng chuan Pu K. Hrangnawna V/C memberpakhat a nei ve ta ani. Khawzawl V/C pakhat kan nih lai hian VCP Pu Taiirha leh V/C Secretary Pu PC. Zasiama te pawh Dinthar veng hian alo nei ve tawh  bawk. Kum 2009 khan Khawzawl V/C panga athen anih khan khawzawl Kawnzar nen V/C pakhat hnuaiah dah ani a, VCP atan Pu Lalbiakenga Khawzawl dinthar veng chu thlan ani a, Kawnzar leh Khawzawl Dinthar in V/C hran an neih hnu in VCP hmasa berah Pu Lalbiaksiama (L) a awm leh ta ani. Tunah hian VC mala kan din hnuah trem thumna hman mek a ni. 

KHAWTLANG HRUAITUTE HNA THAWH (Activities) 

Khawtlang hruaitu V/C te hian veng chhung hmasawnna chi hrang hrang tam tak anlo thawk tawh a, a langsar zual chauh tarlan lo tum ila. 

1. Veng ramri chungchang : 

Kum 1982 ah Zuchhip veng nen V/C pakhata kan awm laiin veng chhung ramri, a bik takin Zuchhip veng nena inramrina lai hi siam fel ani a, hetiangin ramri chu thenfel ani. Khawzawl main road kawng bula awm tuna Pu Hrangzuala in bul kawr atangin thlanglamah Taidawnkawn – Kawnzar kawngpui a su thla anga, kawngpui (main road) chhak lamah thung chuan Pu Lengsiau (L) in kawr zawh chhoin Pu Liankunga (L) kawmtlang kawng zawh pheiin Pu Lalchhuanga in bul kawrah a chhuk thla ang. Hei hi ramri siam dan Lt Governor Gazzeted chu ani.  

1. Vengchhung kawngpui siam : 

Khawtlang roreltu V/C te hmasawnna hna an thawh zinga langsar tak pakhat chu kawngpui tha siam leh vengchhung step siam te hi ani. Khawzawlin V/C pakhat kan neih chhungin khawzawl Dinthar veng chhungah kawngpui tamtak siam/ laih thar a ni a, Tin, internal main road pawh tihzauh a, blacktop ani. A tlangpui thuin V/C te hian ni za inhlawhna hmangin kawngpui sir chu (Concrete) a siam leh tuikawr siam te, Culvert leh retaining wall siam te an thawk nasa a, thlanmual kawng  tih zauh leh siam te pawh an thawk bawk ani. 

1. Zirna in (School) din: 

Khawtlang roreltu V/C te hian khawzawl dinthar Veng chhungah hian zirna  in pawh anlo din ve ta nual a, mi thahnemngai te zarah leh V/C puihna in LITTLE FLOWER SCHOOL hi khawzawlah chuan English Medium hmasa ber ani. Modern Middle School pawh din ani a, Tin, mimal school, Grace Foundation School pawh a awm bawk a, tunhma chuan primary School- II pawh khawzawl Dinthar veng chhungah hian a awm thin bawk a, Kohhran School PES pawh a awm bawk ani. 

1. Thlanmual ram pek : 

V/C te hnathawh zinga pawimawh tak pakhat chu thlanmual ram pek hi a ni.Kum 1982 ah VC member Pu K Hrangnawna hoin Khawzawl V/C hnenah thlanmual ram tur hi dil a ni a, an dil angin pek a ni a, a hnu kum engemaw zat ral hnuin ramri hi felfai zawkin V/C te chuan an siam ta a ni. Thlanmual kan neih hnu hian Vengchhak lamah kan inphum ta lo ani. 

1. Thildang thawhte : 

 V/c te hian vengchhung hmasawnna leh inrelbawlna kawng hrang hrangah tha an thawh nasa hle a, vengchhunga department office a awm theih nan te, ran khuahkhirh chungchangah te, vengchhung kawngpui blacktop a nih theih nana office dawr te, thianghlimna lamah te, in leh lo neilo te tan inhmun te thehin hma an la thin ani. Khawzawl Dinthar Village Council hian faina kawngah hma ala nasa hle a. Fai intihsiakna lawmmawn pawh vawi duai lo alo dawng tawh thin a, a hnuaia mi ang hian fai intihsiakna lawmman dawnte ziah lan a ni. 

        2016 - Cleanliness week Khawzawl town                                3^rd Prize 

1. - Khawzawl Town Faina intihsiak Swachh Survek shan          2^nd Prize 
2. - Cleanliness week Khawzawl town                                         1^st Prize 
3. - Cleanliness week Khawzawl town                                         2^rd Prize 
4. - Khawzawl Town Faina intihsiak Swachh Survek shan          1^st Prize 
5. - Cleanliness week Khawzawl town                                         1^st Prize 
6. - Cleanliness week Khawzawl town                                         3^rd Prize 
7. - Swachh State Award (Best Village Council)                           3^rd Prize 
8. -  Swachh State Award (Best Village Council)                          1^stPrize

NGO LO INDIN TAN DAN 

Non – Government Organization(NGO) te chu veng chhunga hmasawnna leh changkanna thawktu, mi hausa leh mi retheite kar zau lutuk tur vengtu pawimawh tak anni a, Kawzawl dinthar veng chungah pawh veng bil NGO ding engemaw zat a awm ve a, chung te chu din tan anih dan leh an hnathawh hrang hrang langsar deuh te tarlan kan tum dawn ani. 

(1) YMA din tan dan : 

Khawzawl dinthar veng hi kum 1977-79 chho thleng kha chuan YMA branch nei lovin veng thenawm Zuchhip vengin hmuiin, chhiatni thatniah pawh min tawiawm thin ani. Kum 1980 January ni 3 inrinni zanah Pu Rokhuma (L) inah YMA branch hi din ani ta a, kalkhawmten hruaitua an thlan te chu: 

Kum 1980 – 1981 kum chhoah hian Khawzawl dinthar veng chu in 70 bawr vel an awm tawh a, chhiat / thatah pawh mualpho loin intawiawm tham an awm tawh ani. Tunah hian YMA member hi zathum dawn an awm tawh a ni. 

YMA HMALAKNA (activities) 

1. (1) Chhiatni/thatni hmalakna : 

Young Mizo Association chuan a hnathawh lianber leh langsar ber chu chhiat that nia intawiawm tlan dial dial te a ni. Mitthi an neihin tawrhpui ngai chu an tuarpui a, thlan an lai a, kuang tur ngaihtuah leh siam te, lengkhawm thingpui lumsak te hi an tih langsar ani a, khawzawl dinthar vengchhunga chhiat alo awm pawhin chutiang chuan theihtawp chhuahin hma an lo la thin ani.Inphumna tur thlanmualkan la neihloh avangin kum 1982 chuan YMA hian thlanmual tur V/c hnenah dilin vengchhunga V/C member Pu K.Hrangnawna hoin V/c ah dil chhuah ani ta ani. Bungraw dahna tur Thlanmual in hi 1989 kum khan 12x12 square-a sak ani bawk a. YMA member tlangvalte chuan khawhar in riah hi an hnathawh thiltih langsar tak pakhat ala ni awm e. Tin, YMA hian Nupui Pasal innei te, zirna lama pass tharte lawmpuina siam pawhtun hma chuan anlo tihdan fo ani bawk. 

1. Vengchhung hmasawnna hna : 

YMA hian vengchhung hmasawnna hna pawh theih angangin an lo thawk tawh thin a, awmdan mawi te, zirna lama hma kan sawn zel theihna atana infuihna te, ruihtheih thila thalai fihlim tura infuih te, ram leh hnam humhimna tura hnamdang neih loh te, Kristian nun chawisan te, thianghlimna lam uar tura infuih te hi, YMA chuan atheihna hmun hmunah a kalpui thin a ni. Kum tinin kumpuan an nei thin a, chumi bawhzui chuan nasa takin hma an la thin.  

1. Hmalakna thildang te : 

Khawzawl Dinthar YMA (Branch) hian vantlang inhmuhkhawmna in hall 54X30X20 area annei a, Library-in pawh neiin, chhiat that a hman theih gas thuk pawh pahnih annei a, bungbel hawh theih pawh eng emaw zat annei bawk. 

Tunah hian Khawzawl Dinthar veng hi Section thumah then a ni a, chhiatni/ thatni inkaihhruaina fel tak nen chak takin an kal chho mek zel ani 

2.MHIP DIN TAN DAN: 

 Khawzawl Dinthar veng Mizo Hmeichhe Insuihkhawm Pawl (MHIP) hi 1991 ah din a ni a, Hruaitu hmasa thlan chhuahte chu: 

 Heng pawl hruaitu hmasate hian hun lo kal zel tura pawl hmalak dan tur te, pawl thil tum ti hlawhtling tur te, an kal zel dan turahte sul an lo su a, NGO dangte nen inpawh takin hma an la thin. Vawiin thlengin pawl nung takin an lokal chho zel a ni. 

Hmalakna lam (Activities) 

 MHIP hian hmalakna kawng hrang hrang annei ve a, an thil tum pui ber chu mizo hmeichhiate chawikan hi a ni. Hmasawnna atana zirna lamah te, mizo hnam nun incheina chawisan te, hmeichhe dinhmun tleu tawh laklawh chawikan leh te, hmeichhiat / mipatna lama inzirtirna tha inpekte hi an hmalakna langsar zual a ni. 

 Khawzawl Dinthar veng MHIP tepawh hian he an thil tum te hi tihlawhtling zel turin chak takin hma an la reng a, vengchhungah ruang a awmin kuangah pangpar mawi takin an dahsak thin a, vengchhung tuikawr leh khawlai bawlhhlawh thian faiin vawi tam an hnatlang tawh bawk a, mi retheite an tanpui bawk thin. An rising day hi uar takin an hmang thin a, MUP tepawh football an khelhpui bawk thin.  

MUP DIN TAN DAN 

Khawzawl Dinthar Veng Mizo Upa Pawl (MUP) hi kum 1985 March ni kua khan YMA hall-ah din a ni a, hetih hunlai hi kum 50 chin member nih theih hunlai kha ani a, kal khawmte chuan MUP din relin hruaitu tur an thlang nghal a, thlan chhuahte chu : 

Heng hruaitu thlante hian vengchhung Upa Pawl inkaihhruaina turah sul an lo su a, member turte zawngin, sum tuak nan Kho te, Chhihri te, Khochhuan te, Paikawng te, Arbawm te tahin hnatlang an nei thin a, MLA te hnenah pawh inhlawhna tur sum hi an lo dil tawh thin bawk. 

HMALAKNA LAM (activities) 

Mizo Upa Pawl (MUP) te hian thil tum tha tak an nei a, chu chu ‘Mite tan malsawmna nih’ tih ani. Khawzawl Dinthar Veng MUP te hian kawng hrang hrangin hmalakna hi anlo nei ve tawh thin a, hnatlang inkoa Vantlang kawngpui tur zawn te, vantlang hmun pawimawh tihfai te, chhiat that nia intawiawm te, an member thi te ina Darkhung vuak te, Flag tar leh vuina programme- a chanvo neih te, inral te chu an tih turah ngaiin tlin takin an tih turte chu an hlen chhuak thin. Tin, hnatlanga hnathawhho an uar a, MUP run te pawh neiin, a luahman pawh thlatin an dawng thin.Member chauh lo pawh, damlo leh chhiat tawk te ina len hi an tihtur bera ngaiin an kal taima hle a, Mizo hnam nundan mawi vawngtu ber, kan hnam rohlu an ni hial awm e. Khawzawl Dinthar Veng MUP te infuihna ber chu ‘intihfai’ a ni a, tar rim, rimchhiaa awm loh nana rimtuite pawh inhnawih fo turin an inchah thin ani. 

VDP DIN TAN DAN : 

Khawzawl Dinthar vengah hian Village Defence Party mumal tak a awm a. A din tan kum chu 1982-ah a ni a, he pawl hian a tum bulpui ber chu vengchhunga misual leh awm tha duhlote thenfai/ nundan dika kaihhruai a ni. Hruaitu hmasate chu. 

Heng hruaitute hian vengchhungah an theih ang anga chakin hma an la a, chanchin bawhzui ngai apiangah phur tak leh taima takin, an hnathawh lai pawh kalsanin hma anlo la thin ani. Thlamuang taka vengchhunga awm theih nan awm tha duhlo te, thilruk hmangte zilhin a tul phei chuan kut han thlak zauhte pawh an nei thin. 

VDP HMALAKNA(activities) 

Village Defence Party (VDP) te hian vengchhunga thil ruk hmang te, zu leh ruihtheih thil dang damdawi leh Ganja zuarte an hriat leh an hmuh chuan a then thianghlim hna an thawk thuai thin a, vengchhung mipuiten hetiang thil an hriat apiangte chu an hnenah an report thuai thin. Tun hma deuh phei chuan khawlaia insual thawm hriat tur leh zurui buaina siamte hi an awm deuh reng thin a, hengho hmachhawn tur hian VDP te chuan hmanhmawh takin hma an la thuai thuai thin. Chhungkaw pa ber buaina siama chhungkaw buai ta rum rum te, khawlaia zurui au vak vak te hriat turte hi an awm leh zauh zauh thin a. Ar inruksak te pawh vawiin ni thlenga la awm reng ani.  

Heng sualna chi hrang hrang do hian VDP te chu an hmanhlel hle thin a, mutmu pawh tuah hlei theilova awm tlaivar chang a awm fo thin ti ila a sual tampui lovang. 

GAMES &SPORT ASSOCIATION: 

Games & Sport Association hi vengchhungah infiamna lam buaipuitu ber ani a, Dated 13.1.1981 ah Pu Lianchhawna (L) inah hemi lama tui mite chu inhmukhawmin Association an din a, hruaitu inthlang nghalin, chunga thlantlinte chu: 

Heng hruaitu thlan tharte hian veng chhungah member turte zawngin hma an la nghal a, dan leh hraite pawh an hman tawk ang zela siamin sum leh pai te pawh an ngaihtuah a, hun reilote chhungin pawl chak leh nung takah an insiam ta mai reng ani. 

HMALAKNA LAM (activities) 

Khawzawl Dinthar veng Games & Sports Association chuan a tum ber chu infiamna lama thalaite chher hriam a ni a, hetih hunlai hian football hi infiamna lar ber a nih avangin thalaite pawn an tuipui ber a, Hockey leh Volleyball te pawh awm ve bawk mahse, Khawzawl pum huapa inelna erawh ala awm ngai lova, Football ah erawh chuan inelna a awm deuh reng avangin veng chhung thalai, a tui rualte chuan nuam an ti hle thin ani.Veng hrang hrang inelnaah pawh lawmman pakhatnaa leh pahnihna lak ve fo ani a. Kan changkan chhoh ang zelin infiamna pawh chi hrang hrang alo chhuak zel a, tunah phei chuan sawrkar hmalakna zarah Volleyball khelhna tha tak,phullem(turf) phah, Zoram hmundanga la awmlo Khawzawl Dinthar vengah hian a awm ta hial ani. Infiam mi pawh anlo chhuak tam ve tial tial a, Association hrang hrang pawh vengchhungah hian alo awm ta nual ani.Teakwando intihsiaknaah Zoram pumah Khawzawl Dinthar veng chu Champion an lo ni ta hial a ni. 

SAKHAW LAM DINHMUN 

Khawzawl Dinthar vengah hian Sakhua,Pawl(Denomination) hrang hrang a awm a, Biakin pawh paruk zet a awm ani. Chungte chu Presbyterian Kohhran Biakin.The Salvation Army Hall.Baptist Church Of Mizoram(BCM) Biak In Reform Church Biak In, UPC of Mizoram Biak In, Church of God Biak In te ani. Heng Kohhran pawl hrang hrangte chanchin tlangpui chu a hnuaia tarlan ang hi a ni. 

1. PRESBYTERIAN KOHHRAN: 

Khawzawl Dinthar vengah chuan Presbyterian Kohhran hi kohhran lian leh ding hmasa ber a ni a, Date 16.1.1980 chawlhni zanah veng paho inhmukhawm chuan biakin sak an rel a, building committee atan heng mite hi an ruat nghal a ni. 

           Chairman                : Pu Lalhuzama 

           Secretary                : Pu Hmingthanga Varte 

           Treasurer                : Pu Rokhuma 

Committee member mi 11 ruat nghal a ni bawk a.Building Committee chuan tuna Khawzawl Dinthar Presbyterian Kohhran bial Pastor Quarters hi Rs 550 a leiin, nitin hnatlang an ko thin a, tichuan Biakin chu ni 4.3.1980 ah sak tan a ni a, ni 13.12.1980 ah luah tan a ni ta a ni. 

Khawzawl Dinthar Presbyterian Biakin, a thara sain tuna an biakin hi an sak vawihnihna a ni. Kohhran upa nemngheh hmasate chu. 

Upa Rokhuma, Upa Lalhuzama, Upa R.Vanlallawma te an ni a, Upa Thangluaialeh Upa Laltluanga chu pem niin Upaah nemngheh an ni bawk. Pastor biala dah anih hnuin Khawzawl Dinthar Presbyterian Kohhran chu Pastor thuthmun(Bial Station) a lo ni ta a, Pastor hmasa ber Rev.Laltharzuala chuan dated 22.12.2001 ah Pastor Quarters a luah a, Khawzawl Dinthar Presbyterian Kohhran hi member zariat leh sawmruk chuang tunah hian an ni. 

2. THE SALVATION ARMY: 

Khawzawl Dinthar Veng Salvation Army-te hian bul an tan hma viau mai. Kum 1983 January thlaah Pu Chhunzika inah Hall(Biakin) sak dan tur rel tan a ni a, Biakin chu a dung Ft 30 leh avang Ft 15 a sak a ni a, a chung rangva niin, a bang dap hman a ni. He an biakin ding hmasa hi Kum 1988 khan RCC-in sak that leh ani a, hei hi vawiin thlengin an la hmangani.Khawzawl Dinthar Salvation Army biakin-ah hian Zuchhip Veng leh Kawnzar lam te pawh rawn lawiin tunah hian member za chuang zet an awm ve tawh bawk ani. Commanding Officer (CO) awm hmasa ber chu Lieut.C.Dawngliana a ni a, biakin thlangah mai hiam Quarters awmin hetah hian Commanding Officer(CO) te chu an cheng thin a ni. Khawzawl Dinthar Salvation Army Kohhran hi an sakhaw puithiamte thuthmun a ni bawk a ni. 

3.BAPTIST CHURCH OF MIZORAM (BCM): 

Khawzawl Dinthar Baptist Church Of Mizoram (BCM) te hi kum 1997 ah awm tanin, biak in chu dated 27.12.1997 ah sak tan a ni a, ni 8.2.1998 ah sak zawh niin Rev Lawmsangan a hawng ta a ni. Kohhran hruaitu hmasate chu. 

           Chairman    : Pu K.Lalduhawma. 

V.Chairman : Pu T.Lalmuankima. 

           Secretary    : Pu VL Hmangaihchhnga. 

          Asst.Secretary       : Pu Ngunvenga. 

          Fin.Secretary          : Pi Chawmawii. 

Kohhran Upa hmasa berte chu Upa C.Laltlanmawia leh Upa F.Rohmingthanga te an ni a, an kohhran hi tunah hian member za leh sawm panga bawr vel an ni a, tunah hian Pastor thuthmun neiin an awm bawk a ni. 

4.REFORM CHURCH: 

Khawzawl Dinthar veng Reform Church te hi a tirah chuan UPC Reform tih a ni a, hun engemaw ti lai a liam tak hnuin Reform Church (Reform Kohhran) tia hriat ani ta ani. A tirah chuan biakin hi rap in in an sa phawt a, tuna an luah lai hi dated 24.3.1987 ah sa tanin vawiin ni thlenga sa tha tawh lovin an la luah ta zel a ni. Kohhran puipa hmasate chu Pu Biakthanga (L), Pu Lalvuana, Pu Biakthuama te niin, tunah hian kohhran member sawmsarih bawr vel an awm mek a ni. 

5. UPC OF MIZORAM: 

Khawzawl Dinthar Veng UPC of Mizoram te hi kohhran ding zingah chuan a hnuhnung ber an ni awm e. Mizoram UPC a phel khan UPC of Mizoram a lo piang a, chummi Kohhran kal zel chu a ni. Dated 20.3.2011 khan rap in-in biakin sak tan a ni a, hun engemaw chen an luah hnuah kum 2013 khan RCC in sak that leh ani a,biakin thar chu 2018 ah Pastor Zionramngaia’n ropui takin a hawng ta ani. He an biakin hi vawiin ni thlengin anla luah chhunzawm zel a, Kohhran member hi sawmsarih bawr vel an ni bawk a ni. 

6.CHURCH OF GOD (Seventh Day): 

Church Of God (Seventh Day) hi Khawzawl khua hrim hrima alo pian chhuahna chu a rei tawh hle a. Kum 1975 khan Pu Lalsiama(L) leh Pu Lalhmangaiha te kaihhruainain lungvar vengah he kohhran hi din a ni a, inkhawmna hmasa ber chu april 13,1975 ah Pu Lalsiama lungvar inah neih a ni. An kohhran biakin hmun hi Rs 3000 a leiin, biakin chu a chung rangva, a bang dap a sa in, ni 17-4-1999 ah bawng talh meuhin, Elder Lalhmangaiha’n a hawng ta a ni. He an biakin hi vawiin thlengin an la luah a, kohhran member hi sawmsarih bawr vel an ni a, Upa pathumin an enkawl mek a ni. 

POLITICS LAM DINHMUN 

India ram hi Democracy ram kan niah angin kan inthlang thin a, inthlan chuh turin Political Party pawh tam tak a awm a, chutiangin Mizoramah pawh National Party mai bakah Regional Party pawh a awm nual bawk a ni. Heng party lian leh langsar deuhte hi Khawzawl Dinthar vengah pawh din a ni hlawm a, chungte chu :- ZPM,MNF,INC te a ni. 

Hengpolitical party-te hian MP, MLA, VC te thlangin an induh thin a, Party tinte hian Unit neiin hruaitu an nei vek a, ram leh khawtlang, vengchhung inrelbawlna leh hmasawnna turin an thawk thin ani. Roreltu(ruling) nih hi an tum ber leh vengchhng rorelna, hmasawnna tura thawh hi an tum a nih avangin opposition lamte pawhin tha tawklo leh fel tawk lova rorelna chu a siam tha zawngin an lo bei ve thin a ni. Heng Political Party te hian hunbi neiin inthlan thatna an nei thin a, pawl tichak turin theihtawp an chhuah thin. Veng chhung rorelna leh hmasawnna thilah ruling Party hi an inrawlh tlukin, mipuite pawn an kaihruaina hi kan thlir leh en ber a ni. 

ZIRNA LAM (Education) 

Khawzawl Dinthar Vengah hian zirna Sikul heng – LF school, P.E.S, Grace Foundation School te hi a awm a, Primary School – II leh Modern Middle School te erawh chu thil dangah hman ani ta a ni.Zirna hi Khawzawl Dinthar Veng mipuite hian kan uar viau a, tunhma chuan YMA hian HSLC pass tharte lawmpuina te buatsaih in, YMA(Branch) te chuan awareness campaign te pawh alo nei ve tawh thin a ni. Tunah hian Graduate leh a chunglam pawh tih tham tak veng chhung thalaite an awm a, ram chhung leh pawnah pawh an awm ta nual a ni. Veng chhung literacy rate chu 100% a ni a, hei hian zirna lam an ngaih pawimawhzia a tilang awm e. 

KHAWZAWL DINTHAR VENG PAWIMAWHNA 

Khawzawl Dinthar veng hian pawimawhna a nei hnem hle a, a awmna hi khawzawl hmun laili lai a nih avangin Deputy Commissioner (DC) Office awmna hmun a ni a, District Horticulture Office te, DRDA Office te, BDO Office te leh Quarters te, Sub-Hqrs YMA Office te, MHIP Sub-Hqrs Building te, Khawzawl Bazaar hmunpui tur te, Volley ball Court Phullem(turf) phah te, chenna in neilo awmna in(shelter) awmna hmunte a ni. 

VENGCHHUNG THIL CHHINCHHIAH TLAKTE 

1. MLA/Minister ni hmasa ber :- Pu Tawnluia leh Pu Aichhinga(L) 2. BA hmasa ber :- Pu R.Vanlallawma(L) 

1. MA hmasa ber:- Pu Zohmingliani. 
2. Headmaster (Primary) hmasa ber :- Pu H.Khualhnuna. 
3. Village Council Member hmasa ber :- Pu K.Hrangnawna. 
4. Certificate exam-a Zoram puma pakhatna ni hmasa ber (Cl- III) :-Pu Tawnluia 
5. Sawrkar Department Officer-a lut hmasa ber :- Pu JH. Rimawia (BDO) 
6. Bachelor of Engineer hmasa ber :- H.Zahmingliana 
7. Thlanmuala phum hmasak ber :- Pi Zakungi (90)