Chalrang

CHALRANG KHAW CHANCHIN  

                Chalrang khua hi Mizoram khawpui Aizawl aṭanga Km 180 vela hla Khawzawl District huamchhunga awm a ni a, Khawzawl aṭanga Km 30 vela hlaa awm a ni. Chhak lamah  Vangtlang Mel 4 a hla leh Tualte Mel 9 vela hla a ni a. Thlang lamah Khawhai Mel 2 a hla (tunah chuan New Chalrang nen an inzawm tawh a ni) nen a inri a. Chhim lamah Riangtlei Mel 7 a hla leh Sialhawk ram Lungpum a ri a. Hmar lamah Chawngtlai Mel 9 leh Zuchhip(Phaisen lui) a ri a ni. 

                 Lui lian lian tlawh chhan a nei lova, ram vahna tham deuhte chu Tualte lui, Raifan lui leh 

Phaisen lui te an ni a. Ṭhal nghate han vuak ve mai mai theihna te chu Chalrang lui, Luidung lui, Laisawr lui, Khawhlui lui leh Sakeithingham lui te an ni.  

                  Chalrang khua hi khaw hmun rem teh chiam lo, remlo lutuk ni bawk si lo. Chhuah chhawnga awm tlang thawveng ṭha tak leh kawtchhuah nuam tak nei, ni chhuak dawng ṭha em em khua a ni a. A hmun hi hriselna kawngah pawh a ṭha thawkhat viau a ni. Thilmak angreng tak chu mai chu 1895-ah he khaw hmunah hian Zataia (Khawhai khaw lal) hoin an lo awm tawh a. Kum tam fe a liam hnu 1925-ah an lo luah leh hi a ni.  

                   He thu buatsaih lai hian Chalrang khaw dinhmun chu hetiang a ni : 

In luah lai 173 niin mihring 835 an awm a, Kohhran 3 awmin 1) Presbyterian, 2) Isua Krista Kohhran, 3) UPC (NEI). Zirna In – 1) High School (Private), 2) Govt. Middle School, 3) Govt. Primary School, leh 4) Presbyterian English School te an awm a. Anganwadi Center I leh II an awm a. Health Department-ah Health Clinic a awm bawk a ni.    

CHALRANG KHAW LO INDIN DAN  

                      Chalrang khaw chanchin kan sawi dawn avangin tute nge khua lo din a. Chalrang khua tih hming alo put chhan te sawi lan hmasak phawt a ngai dawn a. Pu Lalthangkima Sailo Chalrang lal thlahtu te chhui hmasakloh chuan a famkim dawn lova, a tawi thei ang berin kan ziak mai dawn a, a ṭobul kan chhui theih chinah; Nova’n (Bible-a mi nilo) Dongula a hringa, Dongula’n Niguitea a hring a, Niguitea’n Bawklua (Sihsinga) a hringa, Bawklua’n Ralnaa, Ralnaa’n Chhuahlawma, Chhuahlawma’n 

Zahmuaka, Zahmuaka’n Ṭhangura, Thangra’n Thangmanga, Thangmanga’n Sailova, Sailova’n 

Chungnunga, Chungnunga’n Rohnaa, Rohnaa’n Lallula, Lallula’n Lalthangvuta(Vuttaia), Vuttaia’n Lalvunga, Lalvunga’n Zataia, Zataia’n Chalrang lal Lalthangkima a hringa. An ṭobul kan chhui theih chin chu chhuan 17 thleng a ni. 

                        Thangkima Sailo hi a naupan laiin a pi Darkungi(Pi Puii) kiang Siallukawt-ah a awm ṭhin a. A pi hian Arbawm-ah te, Sialhmunah-te, Karmualah leh Darsamah te alo kaipui tawh nia hriat a ni. 

KHAW HMING SAK CHHAN                           

                          Vailian vawi 2-na 1880 aṭanga 1890 vel alo thleng a, chutih laia naupangte kum 18 vel lek a upa a nih laia Ngentiang khuaa lal Zataia chuan Vailian chu lo doin theih tawp lo chhuah mahse a hneh zo dawnlo nia a hriat avangin a unaupa Ralṭhiaua Vangtlang lal chu a bel ta chawt a. A unaupa kianga awm reng pawh chu ralmuang tawka a hriat loh avangin Tuipui kama puk chu a hote nen chuan an bel leh ta a. Tun thleng hian Zataia ral tlan P^ûk an la ti a ni. 

                         Chumi hnuah chuan Riangtlei leh Vangtlang inkar Chhinlungah an insawn leh a, he mi hmunah hian Chalrang lal Thangkima Sailo chu 1895-ah alo piang ta  a ni. Hemi hmuna an awm lai hian Vai lian vawi 2-na pawh chuan zual lam ala pan zel dawn nia an hriat avangin an hlauh chu ala ngai reng a. A upa min Senphuaia chuan Vailian kuta inpek mai chu an tan ṭha zawk mai dawna a hriat avangin lal chu thurawn a pe a. Senphuaia  thurawn ang chuan 1895 kum chuan N.Vanlaiphaia sipai ho inkulhte hnenah chuan an va inpe ta rawih a. An silaite pawh an tung ta vek bawk a, chuta an lo hawn leh hnu chuan khawthar kai an rel a, Zataia chuan Ngentiang leh a chheh vela a khaw mite tlan darh tawh te chu hui khawm lehin khua an din ta a. Chalrang khua tih hming an pu ta a. Hetih hun hi 1895 vel nia hriat a ni. He hmuah hian kum 6 dawn lai an awm hnuin Lungtan ram Niawn tuiah 1901 velah an insawn thla ta a, Chalrang khua chu luahtu awm lovin alo ram ta a ni.  

                      Chalrang khaw hming put chhan nia an sawi chu Kairuma Biate lal leh a pasalṭha Khalhrumate ho ram hauh tur zawnga an ram chhuah ṭumin he lai hmunah hian Ramsial (Sele) chal khirh tawh tak mai tur hi an hmu a, kah tuma an veh pawhin thal an thlah thei ta lova, chu Ramsial chu a chalah hian a rang (var) kalh mai hi an hmu a, Ramsial chalrang ram an vuah ta nghe nghe a ni. Hemi hnu hian Zataia hoin Chalrangah hian an kai ta a, ramngaw ala ni bawk nen khaw hnuaiah chuan Sihpui al tak a awm a, ramsa chi hrang hrang ten an tlan a, hemi hmun hi Ramsial chalrang an hmuhna hmun kha a ni.  

                       Pasalṭha Khalruma hi pasalṭha huaisen tak a ni a. An Sai ram chhuah ni khuate hian a hma hruaitu a ni ṭhin a, Tualte ram aṭanga Chalrang ram rawn paltlanga Sialhawk rama kal ṭhin Sai ho rawn kalna “Sai tluang”  hi a awmzui mai a. Ṭum khat chu Chalrang ram chhunga saitluangah chuan Pasalṭha Khalruma te chuan Sai an lo chang a, Sai pa lian tak lo chhuak an han hmuh chuan Muzuk fei (Fei kibar neilo chi) chuan Pasalṭha Khalhruma chuan a lo khawh a, tun thleng hian he lai hmun hi   ‘Khalhruma Sai khawh kawn’ tih hming ala pu a ni. 

                        Chalrang khaw hming put chhan sawidan pakhat awm leh chu – Hmar ho ten helai hmun hi an lo luah tawh anga, Chalrang tiin a hming an lo chawi tawh a niang, tih thute an sawi a. Engpawh chu nise, Chalrang khua tih hming chu tun hun thlengin ala pu ta zel a ni.   

AWNNU HMUNA AN KAI 

                       Zataia’n Chalrang chhuah san a, Lungtana a insawn hnu chuan a nu Darkungi (Pi Puii) chuan a pasal Lalvunga Siallukawta a thih tak avanga Arbawmah te, Sialhmunah te, Karmualah leh Darsamah te khaw siama a kal lawr hnuah a fapa Zataia thurawn angin kum 1912-ah chuan a tupa Thangkima Sailo hruaiin Darsam aṭangin Awnnu-ah an kai ta a ni. Helai hmuna an kai ṭan tirh hian Pi Puii chuan khawvel mihring lo la awm leh zel tura miten, he hmunah hian khua dinin kan lo khawsa ve tawh a ni tih an hriat theih nan tiin thing chikhat Phunchawng thing chu a phun ta a. He thing hi a ṭhang duhin a par a mawi em em ṭhin a ni. Mak ve deuh mai chu, he Awnnu ram hi luah tawh loh a nih hnuah Lo atan te neih a ni tawh ṭhin a, Pi Puii Phunchawng phun chu kit ṭhin mahse duah taka rawn chawr chhuak lehin mawi takin par a rawn chhuah leh mai ṭhin a, tun thleng hian ala awm reng a ni. 

                      He Awnnu hmunah hian Mizo lal ropui leh hmingthang Vanhnuailiana hoin 1860 aṭanga 1870 vel khan khua an lo siam tawh a, tun thlengin helai hmunah hian Vanhnuailiana Tuikhur pawh a la awm a ni. Chumi hnuah a upa hote nen Tualte-ah an kai chho ta a ni. Awnnu an kai hnu hian Pi Darkungi, Lalvunga nupui chu alo upata alo tar deuh tawh avangin Zataia, Khawhai lal chuan a fapa 

Thangkima Sailo chu a pi Darkungi lalna tlang rawn ṭhut turin a  upate a koh hawn tir a. Hetih lai hun hi 1916 favang vel a ni a. Pu Thangkima hian tlang a chang ta a ni. Chung lai chuan Pu Thangkima chu Aizawlah a awm a, a nupui Sekungi Chhangte nen missionary Syndy-a puiin an awm a, lehkha thiam thei tak Sapṭawng pawh thiam em em a ni a. Hetih hun lai hian Sikul pawl (Class)zat hi Standard tiin an lama Standard Five leh Six a zir a. Pawl 5 leh pawl 6 a zir lai hian First Division-ah a pass ve ve a. Kohhran hlate a letlinga, hla 5 lai mai chu Kristian Hlabu-ah a chuang nghe nghe a. Amah hi solfa pawh a thiam hle bawk a ni.   

KHAWCHHIAR NEIH DAN 

                       Kum 1914 alo inher chhuah chuan khawperte pawhin khawchhiar an nei tur a ni, tih chu sorkar lam thuchuak alo ni ta a. Khawchhiar atan chuan Neihdawn khuaa awm Hrangchhuana Hauzel chu Khawhai lal Zataia chuan a nu Darkungi khawchhiar atan a upa te a han hruai tir ta a ni.  

                    Hrangchhuana khawchhiar atana Zataia’n a lakna chhan chu Vuttaia fapa 3-na a ni a. Lungliana khua Rullamah 1884 a piang a ni a. A pa Luanzawnga Hauzel a ni a, a nu chu Kungliana fanu Lalpuithluaii Sailo a ni a. Kungliana chu Lallula fapa 4-na Vuttaia chhangtu a ni. Tichuan, Hrangchhuana chu Chalrang khawchhiar alo ni ta a. A pension hnuah a fapa Lalchhawnzova’n 1942 aṭanga 1946 thleng khawchhiar hna a thawk leh a, Manipur-ah an pem tak avangin a aiawh atan a nau Thangdula’n 1947 aṭanga 1954(VC thlan hmasak ber) thleng khawchhiar hna hi a thawk a. Khawchhiar hna hi alo tawp ta a ni. Khawchhiar hna hi a pawimawh em em a, tunlai VC Secretary hna ang hi an thawk a ni ber mai. 

FRANCE RAM KAL 

                        Pu Thangkima chutia Aizawl aṭanga an koh hawn takah chuan tlangchang alo ni ta a. A pi Darkungi awp ram chin zawng zawng chu a awp ve ta nghal a. Lal dinhmuna a din hnu chuan a upate nen ro an rel ho ta a. Lal fing leh lehkha thiam alo ni bawk a, lal dangte leh a ṭhenawm khuate pawhin an zahin a thu an ngaichang em em ṭhin. (A pa Zataia pawhin a fate ho a koh khawm ṭum pawhin “Fin in duh leh Chalrangah awm rawh u” a ti hial a ni awm e. Kum 1917 alo inher chhuak a, Kumpinu (British) Sorkar chuan a lei dote dopui turin mizo lalte bawrhsapin a ko khawm a, “British ram ṭanin hmelma kan do ang, ti a British flag kal hual ṭheuh tur” a tih ṭum khan Aizawl thleng hmasa lal hote khan “Chalrang lal Thangkima lo thleng ve phawt se, a ngaihdan kan hriat hma chuan flag chu kan kal hual rih lovang” an ti a. Thangkima alo thleng a thu tlukna an siam thei ta chauh a ni. Mizo lal ho Council-ah hotu pawimawh a ni reng a, Assam governor-in Mizoram a rawn tlawh dawn nikhuain lal ho aiawha lo dawngsawngtu berah a ṭang ṭhina an thlamuanpui hle ṭhin.   

                       Kumpinu (British) Sorkar chuan France rama kal a, a lei do German ral dopui turin mizo tlangval 2000 rual zel chu ral run turin a ti a. Thangkima Sailo pawh a khaw tlangvalte nen kal turin British Sorkar chuan an rawn ngen a, heng mite hi German ral run tura  Chalrang aṭanga kal te  chu an ni –  

Thangkima Sailo 

Rokunga 

Neihzika 

Doruma 

Pachhunga 

Khawkunga 

Hemi ṭum hian lal pakhatin mi 500 zel an hova, chuta lal ho kalte chu –  

Thangkima Sailo, Chalrang lal 

Dohleia Sailo, West Lungdar lal 

Thanghlianga Sailo, Tlangsam lal 

Thanzama Sailo, Lunglei lal 

                    German ral runa 1917 kuma kalte chu France rama rei fe an awm hnu chuan a kal hote pawh an lung a leng ta hle a ni awm e. An kalsan tak Chalrang Awnnu hmuna awmte pawh chu an khua a har hle mai a, Thangkima nupui phuah niawm tak Thangkima chu hla an lo phuah khum a, hetiangin – 

                        “Ka pawm lai lal dâng, ka ngai em che, 

                        Ṭiaupui chhum khi van lai kawlkungah a zâm; 

Zan talaiah lunglen hi tuar ve maw! 

Laldâng, cham rei lo la, râl daiah, Rangpui zo dai sah zai an rel dawn; 

A ngûr lal Saienga tual lenna” tiin.  

                      German ral rûna France rama Pu Thangkima leh a hote an kal hlan chuan Chalrang 

Awnnu aṭangin khaw thar kai turin a pi Darkungi leh a upate chuan khua an lo sat a. Hetih hun lai hi kum 1918 ṭhal tir a ni a. Tichuan, ral r^ûna kalte chu nghak zo lovin khawtharah chuan an kai a. A ṭhenin khuaah chuan an lo nghak thung a. Kum 1918 tawp lamah chuan an lo hawng ve ta a. Kum 1919-ah chuan tuna Chalrang khua aṭanga Km 2 vela hla Hausak ram hmunah an kai kim chho ta a ni.   

                          Khawthar an kai hnu pawh hian Awnnu hmuna a Pi Darkungi’n upa atana a ruat te chu a chhawm zel a. Amaha rorelna keng kawh mai lovin upate nen ro an rel ṭhin a ni ber a. Thubuai/hlabuai ngaihtuahn reng reng chu lalleh upate kutah a awm a.  Awnnu aṭanga upa an chhawm te –  

Kairuma (Biate lal ni lo) 

Benga 

Thangpuiliana 

Zahluma 

Thanzinga  

Hrangchhuana, Khawchhiar 

Lalbawiha 

Lalbuta 

Thlangtlaa 

Kapphunga 

Hrangtawia 

                        Thangkima hian Awnnu aṭanga an insawn hnuin lal upa tur ruat belh ṭha a ti a. Heng mite hi a ruat belh a ni – 

Vanhnuaia 

Chawngchhunga 

Kailiana 

Tlangkhuma 

Lalchhawnzova 

Thangzuala 

Chawngmanga 

Zaduhvea 

Thangliana 

Thangkawla 

Neihtluanga 

Pangṭhuama 

Thanṭhuama 

Rokunga 

Nunkhara 

Suakkunga  

Val upa atan heng mite hi an ruat – 

Lalduata 

Pangṭhuama 

Luaia 

Lalkawlha 

                         Val upate hian khawtlangah hmun pawimawh tak an luah a, tlangval ho kaihruaitu leh ho khawmtu pawimawh tak an ni a, mizo tlawmngaihna keng kawhtu pawimawh tak an ni a, khawchhunga mi tlawmngai zing aṭangin hruaitu nihna pianpui nei an thlang chhuak kher ṭhin a, chung ho chu Val upa an ti ṭhin a ni. Kum 1920 aṭanga 1952 hun chhung khan Val upate hi an awm a ni. 

BAWLPU 

                     Chalrang-ah hian Bawlpu an awm ve a. An hna ber chu damlo te thawi a ni a, Liantlaia chu Bawlpu a ni.  

SADAWT 

                      Sadawt hi kristianna awm hmaa sakhaw lam puithiam an ni a. Hrangtawia chu Sadawt a ni a, amah pui turin Sarbaka (thlah pawlh) a ni a, heng mite hian kristianna lo awm thlengin Sadawt hna hi an thawk a ni. 

THIRDENG 

                     Chalrang Thirdeng hmasa ber chu Kapphunga a ni a. A hnuah Thangliana a ni a, tin a fapa Khuangṭhiauva’n a chhunzawm zel a, lal lal lai hun chhung zawngin a thawk a. An ni pasa hi an kut a themthiam em em a, Pathian thilthlawn pek nasa tak an dawngin khaw ṭhenawmte hriat phak khawpin an lar hial a ni. 

TLANGAU 

                   Tlangau hi khaw chhunga thu pawimawh tak tak puangtu an ni a. Lal lal lai hun chhung hian Chalrang khua-ah hian mi 6 Tlangau an awm hman a, chung mite chu a indawt dan hetiang a ni – 

1. Chalbuanga, 2. Vanaia, 3. Noa, 4. Laizika, 5.Thangtlaia, 6. Kapdaia.  

PI DARKUNGI BORAL 

                       Pu Thangkima leh a hote France ram kal an lo hawn hnuah Chalrang Hausak ramah an kai chho tih kha a ni a. Hemi hmunah hian kum 6 vel zet an awm hman a, heta an awm laiin Pu Thangkima pi, Darkungi (Pi Puii) chu fur laiin a boral a. A thih hian lalnu ropui leh hmingthang tak alo ni bawk a, lal hrang hrang ṭhenawm khuaa awm ten an rawn s^ûn a. Mipui tam tak khaw ṭhenawm aṭanga lo kal khawmte leh a khua leh tui ten an sûnin an thlah liam a. Tin, a fapa Zataia (Khawhai lal) leh a upate,  a khua leh tui ten ui tak chungin an rawn thlah liam bawk. 

                          Sailo lal ropui tak Lalvunga nupui Darkungi hi lal fing leh rorel thiam tak a ni a.               

A boral thu hria apiang ten an ui thu an sawi fo ṭhin. A lungdawh-ah hetiang hian an ziak a ni – 

DARKUNGI – LALVUNGA NUPUI HRIATRENGNA.

KUM 67 A DAM. 8.6.22-A A THI TA

KUM 47 RO A REL. A CHUNGA MI AN

LUNGAWI EM EM A. A KHUA LEH TUIIN

AN KHAWNGAIA RAN HETI ZAT HI

A HLAWH. SIAL. 11 KEL. 37

VAWK. 13. UI 9

                  Hetiang zat lai mai nikhat thil thua an talh nge ni ang. Mihring an la tamlo hle ang a, in 50 vel emaw chauh an ni hmel si a. Lalnu thisenna chaw leh sa zawng tlai leh puar takin an ei chu a rinawm a ni. 

                 Pi Darkungi a boral tak hnuah chuan khawthar kai an rel leh ta a. Kum 1924 ṭhal lai chuan khaw thar chu an sat a, 1925-ah chuan an insuan phei ta vek a ni. ( He Chalrang khua an luah leh hi kum 

1895 vel a Khawhai lal Zataia hoa an lo awm tawhna khaw hmun kha a ni nghe nghe.)    

YLA DIN 

                 Indopui II-na hun pawhin a dan zawh loh Zawlbuk nungchang chhunzawm zel turin 1935 kum-ah chuan Mizoram-ah YLA chu Pu Niara leh Pi Zaii te Bangla-ah din alo ni a. Chumi hnu kum 10 vel ni 5.1.1945 zanah chuan Chalrang LP School-ah mi 72 lai member kalkhawm ten an din ta a. Chuta hruaitu thlante chu – 

                  Heng mi thlan tharte hian YLA hruai hna an thawk a. Hemi hnu kum 1946 June ni 19-ah chuan Chalrang-ah Mizo Union din alo ni leh ta a. Hruaitu insiamin heng mite hi an ni – 

                   Kum 1976May ni 2-ah Chalrang Branch Mizo Hmeichhe Insuihkhawm Pawl (MHIP) din a ni a. Kum 1983 January ni 1-ah Zoram Upa Pawl (ZUP) Unit tunah chuan Mizoram Upa Pawl (MUP) Branch an tih chu din a ni bawk. 

                      Kum thum vel a ral hnu kum 1949 January thlaah chuan hun danglam tak mai lo thlengin lal ban duhna a lo awm thut avangin Mizo Union-te chu Mizoramah an nuar ta a. Khaw ṭhenkhatte chuan lal inte an tawng a, ṭhenkhat chuan in leh lote an tichhia a, huan thlaite an tichhe bawk a. Chung hrem tur chuan ADC(Bawrhsap) te chuan sipai ho hruaiin khaw hrang hrang an fang kual a, mi tamtak an vua a, a ṭhente phei chu ramtuileilo khawp hial tein an sawisa bawk a. Thangkima khua Chalrang-ah chuan Mizo Union chuan pawi an khawih ve lo bawk a, lal chuan “Ka khuaah chuan hrem tur tumah an awmlo” a ti a, kut tuar tumah an awm ve ta lo a ni. 

                   Lal fing leh rorel thiam, khua leh tui awp khawmtu huaisen a ni a. A khua leh tui ten an thlamuanpui em em a ni. Pu Thangkima hi pasalṭha huaisen a tling kan ti thei awm e. Sa pawh 100 chuang zet chu a kap a, Sai 2, Ramsial 2 leh Sakei 2 a kap a. Mizoin pialral kai thei kan tih ang hi a ni.   Finna, dikna, rinawmna, taimakna leh hawihhawmnate hi amahah a langsar em em a. A khua leh tui te pawh chutiang lamah chuan chhawr tlak ni turin a fuih ṭhin a, a khua leh tuite pawhin he lamah hian theih tawpin hma an la ṭhin. Khaw teah chuan rual el tak leh zirna lama hlawhtlingte pawh an ṭhahnem ve hle a ni. 

                      Kum 1928-ah a nau Lalkhuma lalna tur khua sat turin mi 20 vel nen Hriphaw an pan a. A ram chu ngaw dur pui pui ala ni a, a hautak hle a ni awm e. Hemi ṭum hian Chalrang lal chuan Sai 2 leh Ramsial/Tumpang chal ki ṭha em em a kap nghe nghe a. (Hei hi a Autobiography a ziahah “Ka hunting memorial” a ti nghe nghe a ni). Hemi hnu lawk hian Thangkima hian fa 5-na tur a hring a, a upa pakhat Pu Vana chuan hla a han chham ta a – 

                                    “Ngur zawng zawng laiah a chungnung lur,                           Vungdânga chawi Sailian Tumpang khalnemtu; 

                                    Sakhming Lal Hranglawta kan ti e” tiin. 

                       Indopui II-na alo thlena Japan ral a len lai khan Bawrhsapin ṭul thut a awm takah tiin buh nei deuh deuh khuaah buhfai leh buhhum a lei ṭeuh a, Chalrang In 100 khua aṭangin Mound 500 lai leiin a dahṭha (stock) a. Hei hian Lalthangkima khuate chu ei leh barah an intodelh tih a ti lang hle a. Sorkar lam pawh an lawm hle a, Indopui alo tawp khan “BUH SILAI” an tih mai Elhbun/Ulhbun Phir Mizorama mi bik  16 an pekte zingah pawh Thangkima Sailo Chalrang lal pawh alo tel pha a ni. 

LAL ZE MAK TAK MAI CHU 

                      Bawrhsap Macdonald-a khan mizo lal 4 lai a ban kha a ni a. Kawlkulh lal Dolura pawh kha a ban zingah a tel ve a, Thangkima fapa Lalchungnunga Hav./Clark hna aṭanga chawl ta chu Kawlkulha lal turin bawrhsap chuan a ruat a. Thangkima Sailo Chalrang lal chuan bawrhsap hnenah chuan “Kawlkulh lal hi lal tlak lo leh rorel tlak lo i ti a nih pawhin fapa a nei tho a, a fapa hi a pa aiawh tir mai la, a ṭha mai lawm ni ? Engpawh nise, keini pafa chuan mi chaweithleng luahlan chu kan theilo” a ti a.  Kawlkulh lal Dollura fapa tana a dilpuina chu bawrhsap pawh chuan a pawmpui ta a ni. Lalna a hlut tehlul nen mi tam takin lalna leh thuneihna an ngaihlu em em a, khatianga a han hnawl kha a makin a ropui tak zet a ni. 

ZAWLBUK 

                     Zawlbuk hi mizote nuna bet tlat a ni a. Tun hmaa Lal lal laia khawtlang nuna thil pawimawh tak a ni. Zawlbukah hian zanah pa ho leh tlangval hote an kalkhawm ṭhin a. Tlangval hote an riak khawm ṭhin bawk. Mi, ral leh sa rala vengtu ṭha tak an ni a, naupang tlema fel ve tawh deuh ten zana tuah tur thingnawi an fawm ṭhin a, chu chu zanah aiin pa ho an titi ṭhin a ni. Pasalṭha chanchin te, tlawmngai, huaisen leh thil dang dang chanchinte an sawiin mihring awm dan tur leh nungchang mawite an inzirtir ṭhin bawk a ni. 

                        Lal awmna khuaah chuan Zawlbuk a awm ziah avangin Chalrangah pawh hian Zawlbuk hi kum 1924 vel aṭangin a ding ṭana, kum 1942 October thla thleng khan a ding a, chumi hnu aṭang chuan alo tawp ta a ni. Chalrang khuaah hian Pu Thangkima hian kum 1916 favang aṭanga 1954 January thla thleng khan lal rorelna a kalpui a, lal rorelna chu alo tawp ta a, chumi hnuah VC thlan hmasak ber ten rorelna hi an kalpui ta a ni. 

 CHARGE INHLANNA ROPUI TAK MAI CHU 

                       Mizo lalte an tlawm tak 1954 kum tirah chuan Mizoramah Village Council thlanna hmasa ber neih alo ngai ta a. Chalrangah pawh Village Council thlan alo ni a, VC Thlan tharte hnenah Charge hlan alo ṭul ta a. Hemi ṭuma Pu Thangkima Sailo Chalrang lal thusawi ang hi khatih laia Mizo lal hote zingah khan sawi  an awm ve kher awm love. VC thlan tharte pualin zanah LP School-ah public meeting koh a ni a, mipui pawh an tam hle maia mi 105 lai an kal a, School-ah hian an lenglo ani ber mai. Pastor Pasena’n Chair a la a, ṭawngṭaina hun a hman zawh hnuin Pu Thangkima chu thu sawi turin a sawm a, lo dingchhuakin he thu ropui leh fing tak mai hi a sawi ta a – 

                    “Ka khua leh tui duh tak, Chalrang mipui te u. Zaninah hian hun danglam tak kan lo chuang chhuak ta a. Hei hi thilmak danglam tak a ni lo tih hi kan zavai hian kan hriat hmasak ka duh a ni. Khawvel hun inher danglam hian tute lalna emaw tute tawpna emaw alo her chhuahpui ṭhin a ni. Kum 400 lai lei pangkhing awptu Pathian ang hiala inchhal Kaisara pawh alo tlawm tawh kha. Ani chang a ni lo, Agupta lal te, Babulon lal Nebukadnezara-te meuh pawh an lo tlawm tawh kha. Dictator ropui khawvel zawng zawng hneh tumtu Hitler-a te, Nepoleon-a te pawh an tlawm tawh bawk kha. Russia ram ropuia lal ber King C-Zara te pawh an tlawm tawh bawk kha. Chutiang bawkin keini Mizoramah kum 200 zet lo lal tawh Sailo lalte pawh kan tawp a hun a ni ve tawh mai a, thildanglam a 

ni reng reng lo. Tute emaw an tawp hian tute emaw tan zalenna alo inherchhuak a ni bawk si a. Khawvel lal tam tak ang lova thisen far khat mah seng lova kan hun kan hmang thei hi Pathian malsawmna ropui tak kan dawn a ni. Ka lalpui, kan ṭhian ṭhenkhatte erawh chuan an hriatthiam loh ka hlau hle a, an tan ṭawngai sak ṭulin ka hria. Vawiin thlenga ka tlang chhuak upate leh ṭhian ṭhenkhat ten min phatsan lova, min ṭawiawmte hi mak ti suh u. ‘Lal leh tlang khatah, thih leh ruamkhatah’ lo ti tlang tawhte kan nih hi! Ka lama an ṭang hi nangni an huat vang che u lah a ni bawk hek lo. Mi dik takte tihdanin thutiam an hlen ve mai zawk a nih hi. Tunhma kum 30 zet aṭang tawh a, Chalrang khaw tana ka fin vena leh ka remhriatna zawng zawng khawtlang hmasawnna lam kawnga ka hman ṭhin dan leh ṭan ka lak dan hretu in ni chauh ni lovin a tihlawhtlingtu chu in nih ṭhin kha. Zaninah hian VC thlan tharte kutah chutianga mawhphurhna zawng zawng chu ka hlan dawn a. Khawtlang tana thilṭha tih an tumna kawngah chuan kei mi ṭanpui ṭhin ang bawk khan anni pawh ṭanpui an ngaihnaah chuan ṭanpui zel turin ka ngen takmeuh cheu a ni. Anni pawh tumah thlei bik nei lova, hmangaihna nena ro an rel ngei ka ringin ka duh bawk a. Harsatna tam tak an sut tur a awm ang tih pawh ka hriatpui a ni. Chutiang kawngah chuan a ṭul ang a pianga ṭanpui turin kei leh ro mi relpuitute nen hian kan inpeih reng a ni tih an hriat ka duh bawk. Zalenna hi hman thiam loh chuan keimahni ngei pawh min vaw let thei a ni tih pawh kan zavai hian i hre ṭheuih ang u. Tunah VC thlan tharte kutah khawtlang neitu nihna leh thuneihna ka hlan e” a ti a. Mipui ten hnukulh ṭeuha lal thusawi ropui tak an ngaihthlak hnu chuan kut an beng dur dur a, an ṭin ta a ni. He thuchah ropui leh ril tak hi hmun danga zoram mipuite hian han hre ve hlawm se, a ropui an tiin mak an ti ve hlawm ngei ang. 

PEM NASA KHUA 

                       Chalrang khua hi a khaw phu tawkah chuan pem chhuak tamna khua kan ni awm e. Burma, Manipur/Tuiṭhapui-ah te an pem hlawm a. Manipur Kawnpui-ahte phei chuan Chalrang Veng tih tham hial an awm a ni. Tun hnu kan hriat phak ve chinah pawh Aizawl, Tlangsam, Khawzawl, Lunglei leh  Mizoram hmun hrang hrangah te pawh an pem nual a. Burma rama doctor thiam   Dr. 

Thanbilhluaia leh Dr. Vanlalmuana te chu Chalrang khaw chhuak an ni a. An hnuai aṭanga zir chuak doctor pawh an tam hle a ni. USA-ah Pastor 2 Pastor Jacob Rodawla leh Pastor B. Thangzauva te an awm a, Israel Sorkar Office lianah hna lian tak chelhtu Rebek-i te pawh an awm a ni. 

NEW CHALRANG A PIANG 

                     Kum 1978-ah People Confernce (PC) Party alo sorkar a, khatih laia Supply Minister Pu Zairemthanga hmalakna nena kal kawpin Chalrang khua chu Khawhai nena infin khawm tura hmalaknaah Chalrang Community Hall-ah Public Meeting neih a ni a. Mahni ram chin ve vea awma, khaw lian tham ve tak din nise tih relho a ni a. Kawngpui kama awm hlutna leh khawpui din chu rel niin khawthar din chu pass alo ni ta a, tichuan New Chalrang chu alo piang ta a ni. Kum 1984-ah chuan in alo ding ṭan ta a, hemi hmuna khawthar kai ve duh lemlo chhungkaw tam tak an awm ve thung a, chung mite chuan Chalrang khaw hmun hi an la luah a ni.  Tunah hian New Chalrang-ah in 130 chuang zet chu Chalrang aṭangin an insawn thla a ni. 

ZIRNA LAM 

                     Kum 1927-ah Lower Primary School (LP School) a lo ding a. Zirtirtu hmasa ber chu Patawia (Pu C.Pahlira u) a ni. 1947-ah Phaipui Manipur-ah pemin Chalrang khaw mi ṭhenkhat a pempui a. A hnuaah Chalrang lal Thirdeng Thangliana hoin 1955-ah Manipur-ah chuan pem an awm leh nual a, Zirtirtu 2-na Pu Rosema Sailo chuan 1943 aṭanga 1981 chhung a zirtir leh a. Khawvel indopui Japan ral len tawp lam deuh a ni a. Pu Rosema Sailo chu Sialsukah 1946 khan Guru Training a zo a, kum 1953 – 1954 khan Aizawl Chaltlang-ah Basic Training DIET-ah a zo bawk a. Naupang zirtirnaah a  inpein a tuina zawng tak alo ni a, Chalrang LP School aṭanga   zir zawm zelte Graduate an tam em em a ni. Amah hi zitir hnaah a tui leh a ṭhat em avang hian Zirtirtupa tia koh a ni hial ṭhin. A pension hnu hian Pu H.Rinenga, Pu R.Thangthuama, Pu Vanlalthanga leh Pu LP liansiama tem Head Teacher hna an thawk a ni. Zirtirtu pawh engemaw zat an lo awm ve ta bawk.   

                      Mi hmasa Chalrang LP School aṭanga zirna lama hlawhtling hmasa langsar zualte han tarlang ta ila –  

Laltinbiaka, B.A., B.Ed  Headmaster (Rtd.) 

Dr. H.Vanlalhluna, M.A., Ph.D. Collage Principal (Rtd.) 

H. Zosiamliana, MA., M.Phil. Associate Professor (Rtd.) 

Rualkhuma Hmar, Advocate M.A., LLB 

Lalbiakzuala, S.E. PWD (Rtd.) 

J.Sangkhuma, S.E. PWD (Rtd.) 

JH Roṭhuama, B.A., Ex-Minister 

Lalduhsanga Khiangte, S.E. P&E 

Dr. Lalsangluaia, MBBS., M.S.(ophthalmology) (Rtd.) 

Lalthanzuala, M.Sc., Agri. (Rtd.) 

Dr. Lalsawmliana Sailo, MBBS 

JH. Ramfangzauva, MA (Eco), I.E.S. 

                          Heng mi hmasa te hnungah pawh hian mi tam tak an lo chhuak leh tawh a, kan ziak lang seng ta lo a ni. 

                         Kum 1970-ah Middle School din a ni a. Headmaster atan H.Vanlalhluna lak a ni a, Hrangluia, Hrangthanpuia, Pu C. Rosanga leh Pu Suandochina te nen an thawkho a ni. Pu H.Vanlalhluna hnua Headmaster hna thawk tawh te chu Pu. H.Zosiamliana, Rualkhuma Hmar, K.Sangthuama, Pu C.Lalengvara, Pu Lalthangruna Sailo, Pu Suakhnuna Kawlni, Pu H. 

Lalhlimthanga,Pu Vanlalhruaia Ralte leh Pu Vanlalruata Ralte te an ni. Khaw ṭhenawmah zirna inte ala awm tam loh avang leh Zirna lama inenkawlna a ṭhat avang hian ṭhenawm khuate aṭangin zirlai engemaw zat an rawn kal ṭhin a. Zirlai pawh an ṭhahnem thei hle. H.Vanlalhluna hnuah chuan tun thleng hian mi hrang hrang anlo thawk chho ta zel a ni.  

                             Kum 1976 kum tirah khawtlang mipui kalkhawmte chuan kan khawtlangin hma kan lo sawn a, rampum huapa mi thiltithei leh khawtlang leh ram tana mi chhawrnahawm te kan lo neih ve theih nan tiin High School chu an din ta a. Headmaster hmasa ber atan H.Vanlalhluna chu lak a ni a, a ni hian Middle School nen a kawp a ni. A ni hnuah hian Pu H.Zosiamliana, Pu TC Pachhunga, Pu Vanlalrawna te chu Headmaster hna Chalrang High School-ah hian an lo thawk tawh bawk. Khaw hrang hrang aṭangin Zirtirtu tam tak an rawn thawk tawh a. Zirlaite pawh khaw ṭhenawm aṭangin an lo kal ve nual ṭhin a ni. Changtlung ve tawh taka High School kan neih ve tawh hnuah Khawhai High School nena infinkhawm tura Sorkar lamin min ruahmanpuina avangin kum 1982 thleng lo ding tawh Chalrang High School chu kum 1983-ah Khawhai High School nen chhunfin alo ni ta a ni.  

SAKHUANA LAM 

                       Pu Thangkima Sailo Chalrang lal hi Pathian thu awih Kristian hmasa niin Missionary Sap hote hnung zuiin an bulah a lo awm tawh a.  Mizo pastor hmasa ber Pastor Chhuahkhama dawta Pathian thu Cherra-a zir tura a inbuatsaih laiin a pa Zataia’n a pi lalna tlanga lal tura a koh hawn avangin a zir thei ta lo a ni.  

                    Hetih hun lai kum 1914 vel pawh khan Chalrangah kristian an lo awm ṭan tawh a. Kum 

1915 alo inher chhuah chuan kohhran mumal takin alo ding ta a. Upa atan Upa Hrangchhuana leh Upa Tlailiana te chu ruat an ni a, khawthar an kai thlengin Upa an nihna an keng zel a ni. Kum 1925-ah Upa Tlailiana chu nemngheh niin Upa Hrangchhuana chu kum 1926-ah nemngeh a ni bawk. 

                       Hun alo kal zel a, Pu Thangkima lal fing tak chu Kristian hmasa a nih vangin Kristianna a ngaipawimawh hle a, kohhran rorelna sang Assembly (tunah chuan Synod tih ni ta) ah Pastor bial ṭhuthmun tura a dil angin kum 1939-ah chuan Chalrang chu Pastor bial thuthmun atana siam a alo ni a, Pastor Pasena chu Chalrang Pastor bialah Pastor hmasa ber atan an rawn dah a, amah hi Tlangsam khaw chhuak a ni. Hetih hun lai hian Chalrang Pastor bial hi a zau em em a. Inkhawmpui alo awm hian khual aṭanga inkhawmpui tura lo kalte chu nilengin kein an rawn kal ṭhin nghe nghe a ni. Pastor Pasena chu pum lam natna avangin 1960-ah a boral a, a aiawh turin Pastor Biaksanga an rawn dah leh a. A ni hi South Khawbung khaw chhuak a ni a, thu leh hla lama mitin hriat B.Lalthangliana pa nau a ni a. Thiamna sang nei lo mahse, Pathian ring tlat mi a ni a, a ropui hle mai. 

                       Pastor Biaksanga chu kum 1980 khan Sairangah sawn a ni a. A hnu leh kum 1981-ah chuan Chalrang Pastor bial ni ṭhin chu Khawhai Pastor bial a lo ni ta a ni. Kum 30 chuang zet a vei hnuah kum 2013 khan Chalrang Pastor bial chu Synod hnuai aṭangin hawn thar alo ni leh ta a ni.   

CHULHUAN 

                          Kum  1935-ah   sorkar thupek  angin Village Welfare Committee din a ni a, Chairman atan Lalthangkima Sailo ruat a ni a, Secretary-ah Lalchhawnzova chu ruat a ni bawk. Khawtlang tan Thingpui huan leh Thingtheihmu huan ṭheh a ni a, Aizawl thingpui huan tlang, tuna Macdonald Hill nita a mi khu a chi an la a, chu chu an chinga, alo puitlin meuh chuan khawtlang tan sum hnar ṭha tak a ni a, tun thlengin khawtlangin an chhawr ṭangkai em em a ni. Thingpui leh Thingtheihmu karah Serthlum, Zawngṭah, Lamkhuang leh Theihai te an chinga tun thleng hian khawtlangin an chhawr em em               bawk a ni. 

KHAWKHAWM 

                         Mizo lalte ban an nih khan Pu Lalthangkima pawh hi ban zingah a tel ve a. Lal fing leh rorel thiam in lam leh ram lama thangchhuah meuh chu a khaw mipuite tan ala ṭangkai em em a, kum 1966-a rambuai alo nih khan khatih laia mipui te chu an buaiin an mangang hlawm hle a nih kha. Khaw ṭhenkhatah te phei chuan India sipai hote khan mite an vaw nasain an rikrap nasa viau a nih kha. 

Chalrang khaw hote chuan engmah hi nasa takin an tuar lem lova, In an hal tih ngawt loh chu ramtuileilo khawpa an sawisakte chu an awmlo a ni awm e. Sipai hoten MNF (Under ground) tamna khua nia an hriatah phei chuan an lut zing hle a, India sorkar-in sipaite tha chakna hmangin khaw hrang hrangte an khawm a. Khawhai leh a chhehvel khuate pawh engemawzat khawtlang hruaitute chu   Khawhai-ah ko khawmin, Khawhai hmunah khawm(grouping) tura inpe turin Sipai ho chuan hming  ziah luih tir an tum a. Pu Thangkima leh Pu Thanghuta thurawn angin Chalrang khua erawh chuan    hming an ziak duh ve ta lo a, khawm an ni ve ta lo a ni. Hetah hian Pu Thangkima, Lal fing leh huaisen lehkhathiam leh German ral runa France rama kal, British Kumpinu sorkar meuhina Tangkapui a pek vang hian sipai ho hian an zah a niang, Chalrang khua hi khawm an nih ve  lohna chhan hi. 

                       Rambuai lai ngang a nih avangin a khaw mipuite tana nun petu Thangkima meuh pawhin a rilru khawtlang tan a semg nasa hle a. Vawikhat pawh sipai hotu, Major Nathana hoin khawhai aṭangin Chalrangah  an lo kal a. Pu Thangkima chu an rawn ṭhawng thut mai a, Nathana chuan a hote chu silai rifle nena inring turin a ti a. Chalrang lal chu a in aṭang chuan an ko chhuak ta a. Nathana chuan “Thangkim, khawiah nge mizo sipai (MNF) te an awm ? I sawi loh chuan kan kap dawn che” a ti a. Riffle hmawra Chemte(Banet) chuan hnaih tawkah Pu Thangkima chalah chuan an tin a. “Tualte aṭangin Chalrangah MNF an lo kal a, chaw ilo pe a ni” a ti ta mai a. Thangkima chuan “Ka hre lo, chutiang kan khuaah an lo kal ka hre hauhlo mai. Khawi aṭanga chu thu chu hria nge i nih ?” a ti a. Nathana chuan a hote chu silaia kap mai thei tur chuan silai chu a kau tir ta a. A chaldarah chuan silaiin an chuktuah a. Thangkima thinrim lutuk chuan “In ngam leh min kap rawh u, nangni sipai ho hian dawtsawiah min ngai a, min ringlo a ni maw ?!” tih pah chuan a kawr awm a hlim a. “Min kap ngam a nih chuan min kap teh u. British Kumpinu sorkar pawhin min ringin France ramah German ralrun turin min kova Headman-ah min awm tir a sin !” a han ti a. Silaia kah tum sipaite chuan an silai chu an la thla ta a ni.  

                       Thangkima chuan Nathana leh a  hote chu a inah hruaiin Kumpinu sorkar-ina Tankapui kawr (Jaman kawr) leh a dara bel awm ‘mihuaisente chawimawina’ chu a entir ta a. Chumi hnuah chuan Major Nathana leh a hote chu Khawhaiah chuan an chhuk thla ta daih a. Khawhaia sipai awmkhawm hote hnenah chuan “Chalrang khuaah in kal chuan fimkhur hle ang che u. An lal Thangkima khi mifing, sapṭawng thiam, mihuaisen, British sorkar pawhina an rin tawk avanga Chawimawina Tangkapui an hlan ngat a ni” a ti a. Chuta ṭanga a hnu deuhah chuan Pu Thangkima chu Khawhai tlang Sipai Campah chuan Chalrang khawtlang hruaitute nen koh thlak an ni a. Chutah chuan thu chhan har pui pui leh an chhan lohva pawi tur thu chi hrang hrang an zawt a. An tan chuan chhan loh chi pawh a ni awm lo e.  Hemi ṭum hian Pu Thangkima chu alo upa tawhin a kumte alo tam tawh a. A khua leh tuite chhan nan thli thaw vuk vuk karah chuan sipai hote chuan an hreng ta reng  mai a. A thinrim lutuk insangmar chu a zo ta lova, leiah chuan a tlu ta tawp mai a. A lungphu pawh chuan alo ṭhat loh phah niin, a ṭhat lohpui chhunzawm ta zel a, hemi aṭang hian a taksa chu zawi zawiin alo chaklo ta tial tial a. Chalrang tana a finna leh thiamna, a hun leh tha alo hman ṭhin zawng zawngte chu hmang thei tawh lovin nitin hian alo hniam zual zel a. Theih tawpa an enkawl chung pawhin a chau tulh tulh ta mai a. Ni 30.10.1969 ah chuan a nunnain a tlin ta lova, a nupui leh a fanau, a khua leh tui ten ui em emin an thlah liam ta a ni. A thlan hi Chalrang khaw chhung lun lai tak Chawlhmunah a awm a, fapa 13 leh fanu 6 a nei. A thlan lungah hetiang hian ziak a ni – 

 KAN PA DUH TAK 

THANGKIMA SAILO KUM 75 CHALRANG LAL 

KUM 40 RO A REL 

1917 AH FRANCE RAM KAL HO 

HEADMAN A NI. LAL FING LEH 

ROREL THIAM TAK, IN LAM LEH 

RAM LAMA THANGCHHUAH A NI. 

NI 30.10.1969 AH A NUPI FANAU, A KHUA LEH TUI TEN NGAI EM EMIN KAN ṬHEN TA.