Leilung teh thiam te chhutna ah chuan, khawvel hmar lama Ni kan thlen thui ber chhinchhiahna rin (Tropic of Cancer) chhim lam hret, chhawrtui leh lungpho in kar a awm a ni a. Khawzawl District huam chhung, Lengteng Constutuency chhung a awm a ni bawk. A ram hi Khawchhak lamah Tuichang in, chhim hawi in a luan kuala, Khawthlang lamah Nghalrawh luiin chhim hawi zawng bawk in a kual leh a. Hmar lam ah chuan Uilungzo tlang ft. 3000 dawn lai a sangin a khuap zui mai bawk a ni. A khaw hmun hi aram tlang chhip hmun rem tak mai ah, Tlang hniam te te pathum thut in a awm a. Khawdung leh vang a inbial tawk a. khaw ualau tha tak mai a ni a, zawl dap ni lo in, tlem a hmun awihtlan hret a ni a, a lawi len a nuam em em a, sik leh sa pawh a nuam tawk hle. Thlasik lai in vur a tla thin a, Nipuiah pawh khawlum lutuk a awm ngai lo. Tunah tak hian Vanchengpuiah hian in 180 awm in, mihring hi 1100 vel an cheng mek ani.
A HMING PUT CHHAN
Vanchengpui khaw hming putu tak chu tuna khaw awmna nilo, Vanchenghmun ti a, an sawi thin ah a ni a. chuta an awm hma, Vaiphei ho awm laiin, Vancheng tih hi alo pu tawh niin alang. Vanramah pawh awm se chu aia a nawm zawk chu an ring reng reng lo a ni. Tichuan nuam an tihzia leh a nawmzia sawi nan, Vancheng tih hming putu khawdang alo awm si avangin, Vanchengpui an ti ta a ni. A hmun a nuam em em a. Tlang hniam te te, a kara tui tha tak awm vek, veng thler nuam bawk si, ral lak a ven him awl tak mai, han hawi reng reng a khaw hawina dal theitu engmah awm lo a, van hawng zau em em mai hi a ni a. Chhim leh Hmar indo lai pawh in ralin an run thei lo niin an sawi.
KHAW INDIN DAN LEH INSAWN KUAL DAN
Vanchengpui khaw ram chhungah hian tu te nge cheng hmasa tih hriat a har tawh hle a, chanchin hriat theih hlaber chu Vaiphei ho awm lai 1820-1860 bawr vel a ni. Vanhnuailiana alo lal a, Vaiphei ho chu ral daido tura dah nghal in, khaw chhak lamah Ngendal hnam a dah a, Hmar lamah khawlhring hnam, vawin thlengin hmun hmingah an pu ta hlawm a ni. Chhim leh Hmar indo areh a, Vanhnuailiana a chu Tualte ah a chho ta ani.
Kum 1894, Mizoram chanchin tha thlen kum chiah khan Lalburha, Vanchengpui khawtlang ngaina rum rut mai chuan Arro atangin Vanchengpui ram Bawksang an tih ah a rawn kai a, a kum leh ah a pa sulhnu ngei Vanchengpui khawhmun ngaiah an awm leh a ni. Kum 1917 ah Lal chuan Chhawrtui kai a rawt a, mahse German ral do turin Vanchengpui pa 23 ngawt mai kal a tul ta si a. Khawthar kai chu an thulh leh ta a ni. Kum 1922 ah chhawrtuiah an kai phei a, Kum 7 dawn an va awm hnu ah 1929 ah an lo let leh a ni.
Kum 1933 ah Lalburha fapa Thangchungnunga a lal tan a, 1939 ah Chhawrtuiah an kai leh a. He mi tum hian kai ve duh lo in 23 an awm a, Lal leh sawrkar in chhuak tura atih pawhin an duh si lo, hrem nan leiman cheng 2 chu cheng 4 a tih san sak an ni a, rit an ti thin hle.
Mizoram huntawng (Rambuai) chuan nang ve in, India sipai leh Mizo sipai inveh reng kar ah khawtlang a kun a, kum 1968 February ah phei chuan Mizo sipai T. Battalion leh CH Battalion infin leh India sipai te chu Vanchengpuiah chuan an inkap ta chiam mai a. Mizoram buai chhung a inkah rei ber te zinga mi a ni.
Kum 1968, April ni 13 ah chuan Vanchengpui chu Lungpho hmunah khawm tura tur chhuah an ni ta hial a ni. Chhuahsan chauh ni lo in sipai in khua chu an hal vek a, mei vap ah a chang ta a ni. Kum 1972 ah Lungpho atang in Vanchengpui ram Suanghlum an tih ah an kai phei leh a, 1973 ah khawhmun chu luah ngheh a ni leh ta a ni. Khaw hrang hrang a pem tawh te pawh an lo let leh a, khaw nghet tak a ni chho ta a. Tun Kum 2024 ah hian in 180 leh mihring 1100 vel an awm a ni.
VANCHENGPUI KHUA LO AWP TAWH TUTE
1.VANHNUAILIANA: Lalsavunga fa paruk zinga a upa ber a ni. Mi nun nem, zaidam, huaisen ngilnei tak, mi khawngaihna ngah tak a ni. Chhim leh Hmar indo lai khan vanchengpuiah a awm a, Vanapa, Tawkthiala, Keikawla leh Chawngduma te pawh he khaw Pasalthate an ni.
2. LALBURHA: Vanhnuailiana fa 5 zinga a tlum ber a ni. Lal hmingthang tak a ni bawk. Pa rorum thap tak, zu leh fiamthu duhtak, tawngkam maksak pui pui a mi fiam hrat tak a ni. Vanchengpui khawtlang hi a ngaina rum rut bawk a ni. Sapin a awm duhna an thlan tir pawh in, Serchhip ah awm rawh aw, a ti a, “ka leng lovang” Lumtuiah awm rawh a ti leh a, “ A leh koh emai” a ti bawk si. Vanchengpui ah awm rawh aw, a han tih meuh chuan “Lal awmna awm reng a ni, i ti har ka ti reng a ni” a ti hmiah mai a ni. 1894-193 chhung Vanchengpui ah ro a rel a ni.
3.THANGCJHUNGNUNGA: Lalburha fa pali zinga a tlum ber dawttu a ni. 1933-45 thleng Vanchengpuiah a lal.
4. ChAWNBIKA: Lalburha fa tlum ber a ni a, a Pa Lalburha a thih chuan kum 13 chauh a nih a vangin Rorel tur chuan alo naupang deuh a, MC Call Sapin a u chu tlang chang turin a ruat a ni awm e. Kum 1945 vel atangin a lal a , Mizote Lalna a tawp thleng in ro a rel a ni.
PI PUTE SULHNU LEH THILMAK AWM TE
1.. LALRUANGA LUNGKAH LEH TUI THUHRUK:
Mizo thawnthu a kan hriat lar tak Lalruanga, dawithiam khan, Mizoram hmun hrang hrang ah sulhnu a nei tam hle a. Vanchengpui hmunah pawh a sulhnu hmuh tur alo awm ve zel a, Vanchnegpui khua a tanga Chhimchhak lam 3 kms vela hla ah hian ram parh tha tak mai thlawh hma ah pawh neih thin a awm a, chu ram chu “Lalruanga lungkah ram” tih a ni.
Hem hming an chawina chhan ber hi, he ram chhungah hian lungpui lian tak mai, a sira teh kualin Feet 221 vel lai a lian a awm a. He lungpui lian tak mai hi a pang (Lei atang a sang lo te) ah hian 8 inches vela zau hian a kaw phei hul mai a, a kaw sir vel chu Silai zen phuhna ni awm tak hian a chik hrup mai a. A kua chu mautlawn sei tak a an hawlh pawhin a tawp an hawlh thleng ngai lo a ni.
Tin, he Lungpui awmna atanga hla vaklo, fing 2/3 lekah hian Lungpui lian tak dang a awm leh a, chu Lungpui sir pang leiseh chinah chuan 10 inches bial vel a zau, feet 1 leh a chanve vel a thuk hian a kaw thla a, chutah chuan tui hi a khat tawk chiahin a tling reng mai a. Suak kang vek mah ila, a rawn tling khat leh mai thin. A liam ngai lo thung. Hemi hmun lo a neite Bai chhuanna khawp chu a thling thei reng a ni. Chu chu Lalruanga tui thuh ruk chu a ni.
2. ZAWLMANGI LUNG: He Lungpui hi khua atanga 3 kms velah Ngentiang nen a, a inkar khamko a awm a ni. Lungpui sang tak, a chung zawl duai mai a ni a.
Tun hmain Vaiphei ho he lai hmunah hian an awm thin a. Tunah pawh Vaiphei ram tih a la ni. Vaiphei ho an awm lai a , an nula hmeltha Zawlmangi hian he Lungpui chung zawlah hian puan a tah thin a. A them tlang ban phunna te, a thutna te, a tlawh chhan leh a them tui hnawih bunna khuar te a la awm thlap a ni.
3. KHAMKEH: Zawlmangi lung awmna kham zawmtu kha a ni a, kham sang tak chu a ni lo nain, danglamna riau a nei a ni. A bulthut atanga chunglam chhuak vekin, a keh chho ruih mai a. A keh hi Patling in theih tawk a kar tawk vel a ni ang.
4. LALBURHA THLAN: Vanchengpui khaw Lal, Lalburha Lung/Thlan hi khua atanga hmar lam dai kiang lawk ah a awm a. A lungdawh sirah hian Lunglian tak mai pahnih a inphun bawk. A Lung hi feet 7 vel a sang a ni.
5.LUNGKHAWDUR: Khua atanga chhim lam 1 km vel ah, Lungpher zau tak mai a awm a, chu Lungpher ah chuan khawdur ni awm takin, a then laiah a khuar a, a then lai a pawng thunga, awmze nei tak, han en mai a, khawdur a an em a vangin Lungkhawdur tih hming hi pu ta a ni.
Lungkhawdur atanga hla lo te ah hian puk zau tha tak mai a awm a, Lungkhawdur puk tih a ni a. He puk awmna ram Lo a nei tu chuan thlamah an hmang mai thin.
6.DARTHIR:Khua atang Hmar lam Km 5 velah a awm a.Kawrah hian pialtlep a awm a.chutah chuan lian vak lo in kua a awm a.a hnuai /a chhung chu a kaw thla rul mai a ni.chumi kuaah chuan thing bung leh mau tlawn te han thlak ila,Dar ri ang mai hian a ri rung rung mai .favai te an thlak thin a.Tuichangah a chhuak thin an ti.adventue club ho pawh he Darthir kua ah hian an lut tawh a ni.
