Riangtlei khua hi Mizoram khawchhak lam, Khawzawl District chhunga awm a ni a. Aizawl aṭanga 200km vela hlaa awm a ni. Chhim lamah Biate, thlang lamah Sialhawk, hmar thlangah Khawhai, hmar lamah Chalrang leh Vangtlang, chhak lamah Zawngtetui leh Bungzung, chhim chhakah Khawbung khua ten an hual a ni. 

 Riangtlei ram chhungah hian chhim lamah Sirte tlâng 4230ft a sâng a awm a, khua aṭanga 2km vela hlaa tlangpharh nuam tak mai a ni a. He tlâng bul ṭhut kâwn zau takah hian Hmar ho hnam Riangtlei leh Biate ho an cheng tawh ṭhin a, an Sunhlu phun awmze nei taka tlar te pawh hmuh tur a awm. Hmar chhak lamah Chhinlung tlâng dung 4130ft vela sang a awm a. Chhinlung tlângah hian hmanlaia Mizo pi le pute thlang tlâk tirha an chênna pûk a awm a, ‘Chhinlung pûk’ tih a ni. Tin, Chhinlung tlângah hian pi leh pute thlang tlâk tirh (AD 1650) vela an sulhnu- lei laihzawl te, lungphun te, lungrem zawl te, bel kehte hmuh tur pawh a awm. 

 Hmar thlang lama Sialhawk nen an in ramri-ah Lungpum lui a luang a, chhim lama luang zelin Raifan lui a fin a. Raifan lui chu Biate ram nena a in rina a luang zelin khawchhak lama Bungzung nena ramri atana hman khawchhak tuipui chu a fin a. Tin, Riangtlei leh Chalrang in rinaah Elva lui a luang a, chu lui chu khawchhak lama luang zelin Vangtlang ram nena inrinaah luang tlangin khawchhak tuipui a fin bawk. 

            

KHAW HMING PUT CHHAN 

            Riangtlei khaw hming put chhan hi chiang taka hriatna awm lo mahse upate sawi chu- 

  1. Hmar ho zingah nula leh tlangval inhmangaih deuh an awm a, an nu leh pa te chuan inneih an phal si lova, anni lah an inṭhen thei bîk si lova, an lo chêtsual tâkah chuan an lo tlângthang ta a, tih ngaihna dang hre ta hek lo, an tlânbo dûn ta a. Hnim hnah leh thei rahte ringin ramhnuaiah an vâkvai a, nakinah chuan lui pakhat an zawh a, chu lui chu râipuar chunga an zawh anih avangin ‘Râifân’ an ti ta a. Râifân lui chu a mawng lamah zawh thla zelin khawchhak tuipui kam an zuk thleng a, chuta an awm laiin a nau pai chu a hrin a lo hun ta a, a nau nei hlim tuihâl chuan ‘tui aw’ a ti a. Chulai ram chuan ‘Tui aw’ hming a put phah ta a ni. Chuta ṭang chuan lêt chho lehin Sirte tlângah an chuang chhuak ta a, chutah chuan an in bêngbel ve ta a. ‘Tûnah chuan rethei leh riangvai taka kan vahvaihna chu a lo tâwp ve ta a, kan lo tlei ve ta e,’ tiin an awmna chu ‘Riangtlei’ an ti ta a. 
  2. A dang leh chu- Riangtlei ramah hian eng hun laia lo chêng nge an nih chiah hriat chian loh Hmar ho chu Sirte tlâng (Riangtlei hmun hming putu tak zâwk) ah an lo chêng tawh a. An Sûnhlu phun tlar pawh tûn thlengin ala ding hlawm a. Chûng Hmar    ho zingah chuan ‘Riang hnam’ (Hmar hnam pêng pakhat) ho an tel ve a, an hnam hming chawiin ‘Riangtlei’ an ti anih ring an awm.  
  3. Sawi dan dang leh chu- Tûn hma aṭangin Riangtlei ram hi buh ei tlinna, buh ṭhat duhna ram anih avangin khaw ṭhenawmte pawhin ei leh bara inhnangfâk nana an lo hman ṭhin a ni a. He khuaah hian mi rethei leh harsa zâwkte pawh an pêm luhin buh a ṭhat duh avangin an in tungnung thuai thuai ṭhin a. Chutianga mi rethei leh harsa zâwk te pawh an lo ‘tlei’ na anih avangin Riangvaite tleina- ‘Riangtlei’ an ti ta a ni. 

 

KHUA DIN ANIH DAN 

 Hun hmasa lamah Riangtlei ramah hian eng hnam hnam emaw lo awm fo tawh mahse an chanchin han chhui chian a, han chhui thuina em em a awm hran lova. An sûlhnu leh an pêm sawn tur vel aṭang mai lo chuan sawi chian fak tur a awm meuh lo a ni. 

 Sialhawk lal Liankanglova Sailo pawhin hun eng emaw chen chu Riangtleiah khua a han dinin a lal a, Sialhawk-ah a lêt leh a. Tin, Khawhai lal Zataia pawhin Riangtlei rama Chhinlung tlâng (Fuhmun tlâng pang) ah hun rei vak lo chu khua dinin a 

lal ngei tih chu hriat a ni. 

 Kum 1925-ah Sialhawk lal Liankanglova Sailo (1906-1926) fapa upa ber dawttu Lallula Sailo ho in In 30 vel chuan Riangtlei khua din a ni a. Chuta ṭangin mei mit lovin Mizoram buai avanga khaw khâwm kum 1969 thleng awmin, kum 1969 March ni 7-ah Sialhawk-ah a tam zâwk leh Biate ah a ṭhen khâwm an ni a. Ni 7th May, 1969 ah an hâl a. Kum 1972 ah Sialhawk aṭangin Riangtlei-ah lêt chho lehin vawiin thlengin mei mit lovin a awm ta a ni. 

 Riangtlei khuaah hian Sailo lalte hian kum 1925-1954 thleng ro an rêl a. Hetiang hi an rorêl indawt dan a ni: 

           (1) LALLULA SAILO (1925 - 1937) 

 Riangtlei lal hmasa ber niin kum 1925-ah In 30 vel nen khua a din a. Kum 12 chhung ro a rêl a, lal ṭha tak a ni a, Kristian hmasa te zinga mi a ni. 

           (2) RINPUII SAILO (1938 - 1946) 

 Rinpuii Sailo hi Lallula Sailo nupui a ni a, a pasal a thihin an fapa Tlangliana Sailo chu ala naupan em avangin rorêl thei ala nih loh avangin ro a rêl ta a. Kum 1946 thleng ro a rêl a, lal ṭha tak a ni. 

           (3) TLANGLIANA SAILO (1946 - 1954)  

 Pu Tlangliana Sailo hi Lallula Sailo leh Rinpuii Sailo fapa niin, a pa thih aṭanga kum 9-naah tlangvâl niin ro a rêl ṭan a. Nupui atan Chalrang lal Thangkima Sailo fanu Thanhrangi Sailo nen an innei a. Mizoramin District Council a neih hnu, Village Council neih hmasak ber kum 1954 thleng ro a rêl a. Lal ṭha tak a ni bawk. 

 

 

                                             Riangtlei khuaah hian YMA, MUP, MHIP leh G&SA a awm a, zirnaah 

Anganwadi Centre-I, II, leh III awmin Govt. Primary School, Govt. Middle School leh High School te a awm a. Kohhran pathum Prebyterian Kohhran, UPC (NEI) leh UPC (Mizoram) an awm bawk. 

 Riangtlei khua hi khaw thleng rem leh hmun hma rem tak a ni a, in leh lo dinna hmun ṭha tak tak awmna a ni. A khuaa cheng tam zawkte hi lo neia eizawng an ni a, ranvulh leh huan thlai siama eizawngte pawh an awm. In 100 khuaa inchhâl niin in luah lai tak erawh chu 95 a awm mêk a, mihring 517 an chêng mêk a ni. 

 Ruihhlo zuar awm lohna khua niin mikhual te tlangnêl leh zalên tak a, nuam taka an awm theihna khua, chhiatni thatniah pawh intanpui leh inngaihsak tak khua niin chhiat tawkte tan a thlamuanthlak thin hle. Khaw inlungrual, ei leh bara intodelh khua an ni.