Tlangpui khua hi Mizoram hmar chan huam chhung, Aizawl atanag chhim chhak lama awm, boruak mela mel 47 vela hla a ni. Chhak lamah Lungva luiah Sialhawk nen a inri a, thlang lamah, Thinglian, Lungpho, tlangdung nen Tuichang luiah a inria a. Chhim lamah Lungdar, Mualcheng te nen a inri a. Hmar lamah Tlangmawi khua nen a inri bawk . Tlangpui khaw ram, zau zawng hi A dung Km 17.6 niin a vang lam hi Km 9.6 vel a ni bawk.
Tlangpui ram huam chhungah hian mei mit lova khaw awm hun chhung hi Kum 160 vel ni ngeia rin theih a ni. Amaherawh chu Khawhmun khata awm reng lovin, hmun hrang hrangah awm hmun an lo khuar tawh a ni.Tuna khawluah mek hi 1945 kuma luah tan a ni.
Kum 1861 vel khan Lalvunga ho in Sialhmur an luaha, in 300 vel niin an sawi thin. Lalvunga hi Vuta fapa upa ber dawttu a ni a. a fapa chu Khawhai Lal Zataia a ni.Lalvunga hi he hmunah hian kum 7 emaw vel chu a awm ngeia hriat a ni. He Sialhmur hmuna an awm lai hian Mizo History a dai tawh lo tur, Chhim leh hmar Indo chu a thlenga, Chhim Pasaltha Chawngbaw;la ho ten Sialhmur(Tlangpui) an run a, Sialhmur Pasaltha Nghatebaka(Chawngzika Chawngthu) chuan um let in a nuna a chan phah hial a ni..
Heng hun hnua Tlangpui Khua rawn luah leh tu chu Kairuma te nufa an ni.Kairuma hi Vuta leh Neihpuithangi te fapa naupang zawk a ni.. Kum 1879ah Ngentiang atangi Tlangpui ramah kai chho in an kaina hmun chu tun tlengin Kairuma Tlangpui hmun tih a la ni reng a ni. Heta tang hian, Khawhai ah te, Sialhawk ah te a kaichho ta zel a ni.. Kairuma nu Neihpuithangi hi Tlangpui, Sialhawk leh Riangtlei khaw neitu ber a ni a, Sialhawk ram, Karmual atangin kum 1889 vel khan Neihpuithangi hi Tlangpui rama khawlerhah a kai ve leh a Hetah hian kum 6 emaw vel an awm a, in 200 chuang an ni. Heta tang hian Sialhawk ah Khawthar a sata, kum 8 vel a awm hnuin kum 1903 khan Sialhmur ah a kaithla leh a ni. Hetahj hian Kum 7 vel awmin Kum 1911 ah Riangtlkei ah a kai leh ta a ni..Neihpuithangi hi Vuta nupui pathumna nia hriat a ni.
Neihpuithangi Sialhmur atanag Riangtlei a kai kum hian, Kairuma Tlangpui hmunah C.I Paliana`n khua a din a, Tlangpui ti a lo vuah chu Sialhmur bul lawk, Tuitlin hmun (Tuna Tlangpui khaw awmna hi) ah hian an rawn insawn phei leh a, chumi awp tur chuan Pi Neihi hian a
tupa, Liankanglova fapa upa ber Lalthima chu Tlangpui awp turin kum 1913 khan a tir thla a. Tun thlengin Tlangpui tih hming hi a pu hlen ta a ni.Tuna Tlangpui khawhmun a luah tan hi 1945 niin , buai kuma Khawhai leh Sialhawk a an khawm tih loh chu hmun dangah insawn tawh lovin an luah tlang ta zel a. Tlangpui khua kan tih hian hmun hran hranah insawn kual thin mah se a ram hian khawdang, Tlangdung dang zawmpui a neih loh avangin Kum 1879 vela Neihpuithangi leh a fapa kairuma ten he ram chhunga Tlangpui khua an din atanga tun thlengin he ram hi Tlangpui ram tih a ni a, khua pawh Tlangpui khua kan ti ta zel a ni. Kum 2000 ah khan Anniversary lawm a ni nghe nghe a. YMA te pawn Kum 1996 khan Golden Jubillee ropui trakin an lawm tawh a ni.
Khaw sawikhawm a nih hnu tuna Tlangpui hmuna let leh a nih khan Kum 1972 ah Primary School din a ni a.Kum 1976 ah Middle School neih leh niin, Kum 1994 khan High School din a lo nil eh ta bawk a ni.
Biak in ding hmasa ber chu Presbyterian Kohhran Biak in niin Kum 1919 vela saka ni a. Kum 1920 ah Biak In tihngheh a ni. Tunah hian In 170 awm mek in Mihring cheng hi Mipa 472, Hmeichhia, 428 kan vain Mihring 900 kan cheng mek a ni.
Tlangpui khuaa chhungtin te eizawnna ber chu Tlangram lo neih niin, Tun hnai atangin Lakhuithei leh Serthlum chinga ei zawng chhungkaw enge maw zat an awm bawk.
