Hmakhawsang atanga Vangtlang hmun/ram lo luah tawh tute zawng zawng leh a hunlai ziak hmuh tur a awm loh avangin hriat vek theih a ni tawh lo.Amaherawhchu pi pu sulhnu leh hmunhma heng-Rovawnginu hmun tlang parh zawl nuam tak leh a lungphun te,Sialapa mual tlang thengthaw nuam tak leh lungphun te,Hmarbawk tlanga Hmar-ho sulhnu,lung phun te leh Ralte kawlni-ho sulhnu nia ngaih Kawlni tuikhur te hmuh tur a la awm a,tin, Upa-ho chuan tun hmain Thanseia pawh In 300 khuain a lo lal tawh niin an sawi bawk.Mahse chu’ng ho chuan khaw hmun hi an chhuahsan leh ta hlawm a. Tunhma he tlang lo luah hmasa tu ten Lal dang leh khaw lian zawk awt bik lova rual pawl tak an nih avanga Vangtlang tih hming hi lo pu niin an sawi.
Ralthiauva Sailo Lal hmingthang Vuttaia tupa a ni a,a pa chu Lalvunga a ni.Thlahtu bul Nova (Bible a mi nilo) atanga chhuan sawmpasarihna (Nova, Dongula, Ningultea, Bawklua, Sehsinga, Ralnaa,Chhuahlawma,Zahmuaka,Thangura,Thangmanga,Sailova,Chungnunga,Rohnaa,Lallula,Vuttaia,Lalvunga,Ralthiauva)niin Arbawm khua (tuna Thinglian leh Hmunzawl khaw inkar) a kum 1862 a piang a ni.
A pate hi a pu Vuttaia hnungzui in hmun hran hran – Kharzawl,Karmual,Sialhmur,Siallukawt leh Ngentiang ah te an awm thin a,Kum 1872 vel khan kum 10 emaw lek a nih in a pa Lalvungan Ngentianga a lalna thlazar hnuaiah veng mawng lamah a lal tir ve a,he tih lai hian Ngentiang hi in 500 khua niin Zawlbuk pawh pathum (3) a awm a,Lalvunga hian a fate hi naupang te te in Liandawr vengtu lamah Zalala veng laiah a lal tir hlawm a ni.
Kum 1895 kumtirah Vangtlang ah a kai ta a, a upa rawn kaipui kan hriat theih te chu – Lalkhawsiama, H.Lalbawnga, Sawhpaiha, Lalkhama,Lianhawla, Patuma, Lianngura, Hena Hmar, Vanthawma,Phunchiara te an ni a,in 60 vel a rawn kai pui a, hei hi vawiinni thleng a meimit lova luah tanna Vangtlang khaw kum bul a ni leh ta a ni.
Vangtlang Lal Ralthiauva ram ri kal dan hetiang hi a ni-Khaw thlang lamah Elva lui hnar kawn hi Chalrang nena inri-na Ramri kawn niin lung phun a ni a,chuta tang chuan Elva lui zawh thlain Chhim lamah Elva lui zelah Riangtlei ram a ri thla zel a,khawchhak tuipui a pawh a.Tuipui kanin khawchhak lamah kawr zelah Bungzung nen inri chhovin ramri kawnah a chhuak chho a,kawnah hian ramri lung phun a ni a,kawn atangin kawr zelah liam thlain Thlikva lui a pawh leh a,Thlikva lui dung zelah Buang ram nen inri thlain tuipui a rawn pawh leh a,tuipui rawn kanin Tualte lui dung zelah Tualte a ri chho zel a,Chalrang luiin Tualte lui a rawn finna atanga Chalrang lui dung zelah Chalrang ri chho lehin Ramri kawnah a chhuak chho leh a ni.
Vangtlang khua hi Khawzawl District a awm niin, Khawzawl RD Block huamchhung a awm a ni a, Khawzawl atangin Km 40 a hla a ni. Champhai District a nih lai pawhin khawfai ber lawmman belpui te pawh lo dawng tawh a ni. Tin, Khawzawl District ah pawh khawfai ber lawmman pahnihna te pawh a lo la tawh bawk.
Vangtlang khua ah hian mipa -303 leh hmeichhia 284 an vaiin 587 vel an awm a, tunah hian In 103 vel an awm mek a ni. Vangtlang khua ah hian Kohhran Pathum UPCMz, UPC NEI leh Presbyterian te an awm mek bawk a, tunah hian Sub- Center pakhat awmin Health & Wellness Officer in a thut chilh mek a ni. Vangtlang Khaw luh dawnah YMA Park nuam tak a awm a, he park hi hmun theng thaw nuam tak a nih avangin tualchhung mi te leh khaw thenawm atang pawhin tlawh tu kan nei ve thin a ni.
