Khawzawl, the 22nd December, 2021:
Nimin khan Khawzawla awm tur, metric ton 10 (sawm) dawng Solar Cold Storage chu a dahna tura ruahman KVK Complex, Khawzawlah dah luh a ni a, vawiin atangin a siamtu company service engineer ten a install/fit hna an thawk tan.
Solar Cold Storage hi Tuichang Assembly Constituency bialtu MLA Pu Tawnluia, Deputy Chief Minister ni bawk hmalaknaa Khawzawl phurh thlen a ni a. A hlawhtlin theih nana project siam leh khawl (technology) hi Mizoram Science, Technology & Innovation Council (MISTIC) bultum niin, a dahfel pawh hi Aizawl atangin thawktu thenkhatin an tawiawm a ni. A hmunah hian Pu C.C. Lalchhuangkima, Deputy Commissioner, Khawzawl District kaihhruainain Pu Lalrohlua, Additional DC leh Tuichang Block MNF hruaituten theihtawp an chhuah hnuah harsa takin a awmna tura ruahmanah an dahlut a ni. Khawl hi a rih tham avangin motor atanga hlan thlak leh dahsawn nan NH-6 kawng zauh hna thawk mektu Shri Balaji Construction Company khawl hman a ni nghe nghe a ni.
Department hotute hnen atanga DC Khawzawl thu dawn danin Khawzawla Solar Cold Storage dah hi Mizoramah chuan a hmasa ber leh a lian ber a ni a. Hemi atan hian MISTIC chuan India Sawrkar laipui, Department of Science & Technology hnuaia North East Center for Technology Application and Reach (NECTAR) atanga cheng nuai 22 (sawmhnih pahnih) dawngin, buaipui ngai dang heng – a phurhna man leh a chhunga thlai/thei dahna tur chhuar (crates) siamna turte hi Deputy CM in MLA fund atangin a ngaihtuah a ni.
Cold Storage hian a vawnthat theih zat a tam dawn avangin thlai leh thei tharchhuak nasa leh taima Khawzawl District mipuite tan a tangkai dawn hle a ni. Tin, ni zung chakna hmang tur a nih dawn avang hian electric power pawh a heh dawn lo hle niin thu dawn a ni bawk.
Cold Storage install hna hi MISTIC kaihhruaina hnuaiah a siamtu company engineer ten an thawk a. Install hnua a enkawl chhunzawm (maintenance) hna chu KVK, Khawzawl mawhphurhna a ni dawn thung a ni.
Written by H. Lalramenga, SDC, Khawzawl District
