Khawzawl, dated 7th May 2025: Union Minister of State for MSME and Labour & Employment Pi Shobha Karandlaje chuan vawiin khan Khawzawl district a tlawh a, Khawzawl office hotute nen inkawmna hun hmangin Khawzawl leh Chawngtlaiah hmun hrang hrang a tlawh a ni.


Union Minister Pi Shobha Karandlaje chu chawhma dar 10 khan helicopter-in Mualvawm Helipad a lo thleng a, Khawzawl DC Pu K. Vanlalthiana leh hotu dang te'n an lo lawm a ni. Union Minister chuan DC Auditorium a pan nghal a, he hunah hian pisa hotute nen inkawmna hun a hmang. He hunah hian DC Pu K. Vanlalthiana chuan thu sawiin Minister zahawm tak Khawzawl district a lo tlawh avangin lawmthu a sawi a, hun hlimawm leh hlawk tak a hman ngei theih a beisei thu leh district lo inpuahchahna te a lo hlut ngei a beisei thu a sawi. SDO (Sadar) Pu Suvigya S. Chandra chuan Khawzawl district chungchang inhrilhhriatna PowerPoint presentation hmangin a pe a, department hrang hrang hmalakna te leh scheme hrang a sawi lang a ni. Union Minister Pi Shobha Karandlaje chuan pisa hotute nen inkawmna hun tha tak a hmang a, department hrang hrang zawhna leh a hriat duh zawng a zawt a, scheme chi hrang hrang - PMEGP, PM Vishwakarma, MGNREGA, PM KISAN, Jal Jeevan Mission leh department kaihhnawih hrang hrang chungchang hotute a sawipui. Union Minister chuan district hotute'n tha taka an dawnsawn avangin lawmthu a hrilh a, fuihna thu sawiin district tana theihtawp chhuah turin a sawm a, hna tul ngai pawimawha eirukna leh hlemhletna laka fihlim tlat turin a chah a ni.


Union Minister Pi Shobha Karandlaje chuan inkawmna hun a hman zawh hian Govt. Little Flower School tlawhin zirtirtute leh zirlaite a kawm a, PMAY(G) hnuaia sak in a tlawh bawk. Heta tang hian Union Minister chuan Chawngtlai panin MzSRLM Rurban Centre te, Passion Fruit Processing Unit te leh Chawngtlai Anganwadi te tlawhin Chawngtlai mipui te a kawm a ni. Chawngtlai atang hian Khawzawl panin chawhnu dar 1:30 khan Mualvawm Helipad atangin helicopter-in Aizawl a pan a ni.


Union Minister Pi Shobha Karandlaje hi MSME te, KVIC te leh Commerce & Industry hotute leh thawktute'n an tawiawm a ni.



Written by: Lalzara, MIS, DIPRO - KHAWZAWL