Khawzawl 9th. March, 2022:
MZSRLM, Khawzawl RD Block leh Swacch Bharat Mission (R), PHE WATSAN Division, Khawzawl tangkawp bultum a MZSRLM hnuaia Self Help Group te tana intihsiakna buatsaih, 'Competition on Water & Sanitation' Result chu vawiin chawhma dar 11:00 khan Electric Veng YMA Hall, Khawzawlah puan a ni a. Pu C.C. Lalchhuangkima, Deputy Commissioner, Khawzawl District chuan khuallian niin he hun hi a hmanpui.
'Competition on Water & Sanitation'-ah hian intihsiakna chi 3 neih a ni a, Category-I inthiarna felfai leh thianghlim neih pawimawhzia tarlanna Poster inziahsiakah Loisi SHG, East Phaileng V.O., Darlawn Block chu pakhatna an ni a. Category-II Tuii thianghlim leh tui hna humhalh pawimawhzia tarlanna Poster inziahsiakah Sawmfang SHG, Kawlkulh North VO, Khawzawl Block chu pakhatna an ni a. Category III Waste Product hmanga thil insiamsiakah Biakhluni, Daisy SHG, East Lungdar VO, East Lungdar Block chu pakhatna a ni. Intihsiaknaah hian ah hian RD Block 4 - Khawzawl, Tlangnuam, East Lungdar leh Darlawn RD Block atangin Self Help Group (SHG) 45 an tel a ni.
Result puanna Programme ah hian Khuallian Pu C.C. Lalchhuangkima chuan thu sawiin, 'Competition on Water & Sanitation' chu intihsiakna changkang tak leh pawimawh tak a ni a ti a. Intihsiaknaah SHG 45 lai an tel thei leh Khawzawl RD Block bakah Block dang pathum atanga SHG te an tel thei chu lawmawm a tih thu a sawi. Mi thenkhat tan Ek in fai pawimawhzia te hi sawi ngai lo ni tawh mahse Mizoramah hi chuan hei hi sawi ngai reng a ni a ti a. Mimal inthiarna te chu thianghlim pawh nise vantlang inthiarna leh vantlang hmun tihfai leh tihthianghlim nachang hriatna kawngah hma kan sawn a ngai a, inzir kan ngai a, hei hi SHG nuho te hian fate leh chenpui chhungte bulah kan thehdarh a ngai a ni a ti.
District Bawrhsap chuan sawi chhunzawmin, tui thianghlim leh tuihna humhalh pawimawhzia hi sawi tawh a awm thei lova, sawi nawn fo a tul a ni a ti a. Hun rei vak lovah Mizoram-ah hian tui tlakchhamna ala thleng dawn tih sawiin Khawzawl RD Block-ah pawh tui harsatna hi reilote-ah kan tawng dawn a ni a ti bawk. Keimahni ngeiin kan humhalh loh chuan engtikni-ah emaw chuan thal alo thlenin kan harsa ang a, ruah a sur chauhin tui kan nei ang a ti a. Kan changkang zel ang a, nakinah phei chuan ruahsur lai pawhin tui neih loh hun kan nei mai ang tih hi a hlauhawm a ni a ti a. Chuvangin thalaite leh Mizoram mipuite hian tuihna humhalh hi kan tih ngei ngei tur a ni a ti a. In lamah tui dinhmun hrechiangtu ber chu nuho an nih avangin SHG nuho pawhin hei hi an ngaih pawimawh a tul tih a sawi a. Lui tuite hi kan humhalh lohva, duatna chang kan hriat loh chuan keimahni vekin kan tuar dawn tih a sawi bawk.
D.C. chuan Waste Product chungchang pawh Mizoramah sawi a ngai hle tawh tih a sawi a. Hmasawnna in min luhchilh a, naupang ei leh in thil chi hrang hrang, mumal taka Pack sa hi a rawn lut ruih ruih a, kan ei in kan in a, reilote-ah a kawr kan paih a, hei hi kan ngaihtuah leh si loh chuan nakinah chhiatna a rawn thlen thei dawn a ni a ti a. Plastic Product kan tih tamtak te phei hi chu a tawihral ve thei si lova, kan lui tui te, kan bawlhhlawh paihna hmun thleng hian tunah hian kan tuar tan tawh a ni a ti. Solid Waste Management kan ti a, bawlhhlawh paihna hmun mumal tak hi Khawzawlah phei chuan kan la nei lo tih sawiin bawlhhlawh te hi han hal ila, a khu chu boruak rimchhia a lo ni a. Hal lo ila, a tawihral thei bawk si lo tih sawiin hemi chungchangah hian mimal tinin hma kan lak theihna chu bawlhhlawh tawih thei leh tawih thei lo thliar hi a ni a ti. Waste Product te hi kan ngaipawimawh lova, engtiangin nge nghawng a neih theih kan hre lova, chuvangin bawlhhlawh bawmah a vaiin kan paih tawp zel a. Bawlhhlawh kan paihte hi khawiah emaw kan sawngbawl si loh chuan a tawpah keimahni vekin kan tuar thei a ni a ti a. A kal a kal a, a thli chu luiah a kal a, lui tui kha a Pump tute an Pump chho leh a, kan in leh thei a. Chumi anih avang chuan Department bawlhhlawh paih lam buaipuitute kan chhawk zangkhaina nih pahfawmin keimahni theuh hian bul kan tan thei a ni a ti a, bawlhhlawh tawih thei phei chu leithaah a chang thei a, kan tan vek a ni a ti bawk.
Vawiin hun hman hi Pi Lalduhawmi, H.A., PHE WATSAN Division in a kaihruai a. Pi Lalrammuani, BMM, MzSRLM Khawzawlin Report pe in Judge aiawhin Pu Lalrotluanga Ralte chuan Report a pe a ni. Programme-ah hian PHE Department Staff te bakah MZSRLM hnuaia SHG hrang hrang aiawhte an tel bawk.
