Dated, Khawzawl, the 12th July, 2022 : Khawzawl Vengthar YMA Hall a buatsaih “State Handloom Expo” chu vawiin chawhma dar 11:30 khan Pu CC. Lalchhuangkima, Deputy Commissioner, Khawzawl chuan a hawng. State Handloom Expo hawnna inkhawm hi ZOHANDCO Manager Pu C. Lalrinmawia’n kaihruaiin Mipui kalkhawmte lawmna thu a sawi a, Expo chhim turin Khawzawl mipuite a sawm nghal bawk a ni.

He Expo hawnna inkhawmah hian Pu C.Lalrammawia, Chairman ZOHANDCO chuan thu sawiin “ZOHANDCO din thar leh anih chungchangah hian Puantah leh thiam hnang deh lama eizawngtute tan malsawmna nih chu ZOHANDCO tum ber a ni” a ti a. ZOHANDCO Chairman chuan “Tunhma chuan Manipur State atangin puan kan lei thin a, tunah chuan kan thawn let tawh zawk a ni. Hei hi hmasawnna duhawm tak a ni” a ti. “ZOHANDCO din thar anih leh hnu hian Puantah leh thiam hnang deh lama eizawngtute tan Sawrkar Laipui-ah Project engemawzat thawn thlak a ni tawh a, hmalakna kan thlir mek a ni. Vawiina Handloom Expo kan neih hi Mizoram a District Headquarters a Expo kan buatsaih kimna a ni ta a, Heti chung hian hmun thenkhatah chuan Handloom lama hmalakna lian tham a awm lo niin a lang. A bik takin Khawzawl mipuite hetiang lama tanla thar tur hian ka chah duh che u a ni. Mizo mipuite pawh kan changkang zel a, hei hian Hnam thuam inbel kan zahpui lo telh telh a, kan chawisang zel hi a hluin, a vanneihthlak a ni. Mizo kan pung zel a, Puantah leh thiam hnang deh lama eizawnna pawh hian hma a sawn zel dawn a ni. Hei hi hre reng ila ka duh a ni. ‘Beidawnna piahlamah hian hlawhtlinna a intan thin a ni' tih I hria ang u’ a ti.

He huna Khuallian, Khawzawl DC, Pu C.C. Lalchhuangkima chuan “ZOHANDCO in State Handloom Expo khawzawl a buatsaihna hi lawmawm ka ti a, Kutthemthiamna hian kan ram Economy a chawi kang thei a, engtikah nge khawvel mithmuhah kan thil siam chhuah, a bik takin Puantah leh thiamhnangdeh lama hi kan phochhuah ve theih tih hi zawhna pawimawh tak niin ka hria, kan Traditional Dress te hi khawvel mithmuhah a zahpuiawm loh a ni” a ti. Handloom lamah hian Khawzawl hian theihna nasa tak a nei niin ka hria, hemi kawngah hian ZOHANDCO hian tan min lakpui se ka duh tak zet a ni. Tin, He Handloom Expo a Stall nghaktute ka fuih duhna chu ‘Kan thil siam chhuah hi a man phu tawk ni rawh se; miten rinrawl a an hman taktak turin a Quality tha rawh se’ tih hi a ni. Quality tha hian rintlak min nih tir a, chu chu kan than zelna atan a tul a ni” a ti. 

Expo hawnna inkhawmah hian Khawzawl SP, Project Director, DRDA, DUDO, UD&PA leh Sawrkar mi pawimawh thahnem tak an tel a, Stall 30 siam niin Zirtawpni thleng a awh dawn a ni.