Khawzawl 19th March, 2022: 

Vawiin khan Pi Renu Sharma IAS, Chief Secretary, Government of Mizoram chuan Khawzawla Sawrkar hmalakna hrang hrangte a tlawh a, sawrkar hnathawkte chu mipui rawngbawlna (public service) rilru pu chunga hna thawk thin turin a fuih. 




Chief Secretary hian vawiin chawhma dar 10:00 khan DC Conference Hall, Khawzawl-ah District chhunga sawrkar hnathawk hotu (Head of Office) te meeting a neihpui a. Mizorama tum thum a awmna a ni tawh tih sawiin, Department pawimawh tak tak - Finance, GAD, Home leh DP&AR ah te a awm thin avangin Mizoram leh sawrkar hnathawkte kalphung a hrechiang tih a sawi a. Khawzawl District-a sawrkar hnathawkte chu DC kaihhruaina hnuaiah thahnemngai taka an thawh tawhnaah fak in, mipui rawngbawlna rilru pu chunga hna thawk a, an an hnathawhna hmunah a tha zawnga danglamna thlentu ni thin turin a fuih a ni. 

 

China leh Europe-ram thenkhatah Covid-19 hri thar a hluar leh mek tawh avangin India sawrkar pawhin State tinte fimkhur turin a chah thar leh tawh tih CS chuan a tarlang a. Khawzawl District-a Office, zirna in leh mipui vantlang khawsakna hmunah te Covid Appropriate Behaviour zawm tha sauh sauh thin turin a chah nghal a ni. 




CS hova meeting-ah hian Khawzawl District Bawrhsap Pu C.C. Lalchhuangkima chuan Powerpoint Presentation hmangin District dinhmun (profile) tlangpui bakah Sawrkar Project langsar zual thenkhat – Vankal Solar Park, Tualte Tomato chin, nizung chakna hmanga tui pump (Solar Water Pumps), PMGSY kawng laih, BPL Free Villages, Kawlkulh-a Dragon Fruit chin mek te bakah Myanmar raltlan leh African Swine Fever dinhmun te a tarlang a. Khawzawl District-a Tourism lam theihna awm hrang hrangte a tarlang bawk. Pu PC Lalchunglura, Superintendent of Police in Police Department hmalakna leh mamawh hrang hrang te tarlangin, Dr. Albert Lalhminghlua, District Medical Superintendent cum Chief Medical Officer in PPT Presentation hmangin District chhunga damdawiin hrang hrang leh Covid-19 dinhmun te a tarlang bawk a ni. 

 

Khawzawl District Headquarters chhunga Sawrkar hmalakna hrang hrang te pawh Chief Secretary hian a tlawh a. Darngawn veng-a Mualvawm field leh pavilion sak mek te, Dinthar veng-a DC Office Complex leh DRDA Office tur sak mek te, Hermon veng-a CMO Office building sak mek leh District Hospital te leh Peng pui, Darngawn-a Solid Waste Management Centre sak mek te a tlawh a. Heng bakah hian Dinthar veng-a SP Office leh KVK, Kawnzar-a Cold Storage te pawh a tlawh bawk. CS hi DC leh SP bakah DC Office-a officer ten tawiawmin, a hmunah Department hotute leh contractor ten an lo dawngsawng zel a ni.


Written by H. Lalramenga, SDC, Khawzawl District