Khawzawl, the 31^st March, 2021: 

Vawiin chawhma dar 10:00 khan Khawzawl District Disaster Management Authority (KDDMA) chuan YMA Hall, Khawzawl Zaingen Branch-ah District chhunga Village Disaster Management Committee te tan “Capacity Building Training” a buatsaih. 

Training hawngtu Pu Zothanmawia, Deputy Commissioner, Khawzawl DDMA Chairman ni bawk chuan chhiatrupna chu hriat lawk lohva thleng thut thin a nih avangin chhiatna thleng thei laka mumal taka lo inpuahchah a, inrinlawk reng a tul tih a sawi a. VC leh YMA te chu khawtlang hruaitu, chhiatrupna thlen pawha a che chhuak hmasa an nih avangin a tul anga che chhuak thei tur leh, thutlukna siam zung zung thei turin leh, mumal taka rorel thei turin an inbuatsaih a tul a. Training chu ‘Disaster Management’ chungchanga an hriatna leh theihna tipungtu atan hmang tangkai ngei turin duhsakna a hlan bawk a ni.

Vawiina training-ah hian Pu H. Lalramenga, SDC i/c DM&R chuan powerpoint presentation hmangin State Disaster Response Fund (SDRF) leh National Disaster Response Fund (NDRF) atanga tanpuina awm thei bakah, lirnghing-a tih tur leh tih loh turte a sawi a. Pu VL. Hruaimawia, District Organizer, DM&R Champhai District in VDMC te mawhphurhna leh, Village Disaster Management Plan chungchangah zirtirna a pe bawk.

Pu Vantlangkhuma, Superintendent, DC office, Khawzawl hnen atangin Quick Response Team dinchhoh dan leh an mawhphurhna te ngaihthlak a ni a. Khawzawl DDMA hnuaia Quick Response Team Member ten VDMC Member te hnenah chhiatrupna thlen thulh a chhanchhuah hna thawh dan tur leh damlo te bawihsawm dan turte zirtirna an pe bawk a ni. 

Vawiin Training-ah hian Khawzawl District huamchhung khaw hrang hrang atangin VDMC Member 57 (sawmnga leh pasarih) an tel thei a ni.

Written by H. Lalramenga, SDC, Khawzawl District