Khawzawl, the 5th September, 2022: Khawzawl District huamchhunga VC By-Election neihna tur khaw 2, Aiduzawl leh Sialhawka inthlan buaipui tura ruat Returning Officer leh Presiding Officer-te tana training hnunhnung chu vawiin chawhma dar 10:30 khan Khawzawl DC Conference Hall-ah buatsaih a ni a, hemi hnu hian polling official-te chuan naktuk September ni 6, 2022 a by-election neihna tur hmun khuate panin an chhuak nghal a ni.
District Election Officer Pu C.C. Lalchhuangkima, District Bawrhsap ni bawk chuan inthlan buaipui tura ruatte chu inthlanna felfai leh thianghlim tak buatsaih a nih ngei theih nan uluk leh fimkhur taka an mawhphurhnate hlen tum turin a chah a. Mizoramah ram dangte tan pawha entawntlak khawpa inthlan thianghlim leh felfai buatsaih a lo nih tawh thin dante sawiin, mipuite chu inthlanna thianghlim leh hlawhtling neih kawnga thuneitute tha taka thlawp tum turin a sawm bawk a ni.
He hunah hian Addl. DC Pu Lalvenhima leh SDO Sadar/ Asst DEO Pu James Lalnithanga ten thu an sawi bawk a. Pu Obed Lalmalsawma, SDC in RO leh PrO te hi inthlanna atana an hriattur pawimawhte a zirtir a. Zawhna leh chhanna hunte hmanho a ni bawk.
Training zawh hian Voting Material leh thil pawimawh dangte endik a ni a. Polling Official-te leh Police duty tura ruatte chuan inthlanna neihna tur khaw lam an pan nghal a ni.
August ni 8, 2022 a VC By-Election Final Electoral Roll tlangzarhin a tarlan dan chuan Sialhawk khuaah hian vote nei mi 1,691 an awm a; heng zinga 820 te hi mipa niin, 871 te chu hmeichhia an ni a. Aiduzawl-ah hian vote nei mi 209 an awm a; heng zinga 106 te hi mipa niin, 103 te chu hmeichhia an ni.
Sialhawkah hian VC seat 5; General seat 4 leh Reserved seat 1 a awm a. General seat atanga tling VC member 1 boral avangin he seat ruak hi hnawhkhah a ngai a. Aiduzawl khuaah hian VC seat 3; General seat 2 leh Reserved seat 1 a awm a, General seat atanga tling VC member 1 boral avangin a hnawhkhat turin inthlanna buatsaih a tul ta a ni.
Naktuk September ni 6, 2022 zing dar 7 atangin vote thlak tan a ni dawn a. Inthlanni hian Khawzawl DC chu Aiduzawl ah a kal ang a, Addl. DC chu Sialhawk ah a kal bawk ang.
