Khawzawl, the 9th February, 2022:
Vawiin chawhma dar 10:00 khan Khawzawl District Administration, Animal Husbandry & Veterinary Department, District Village Council Association leh Khawzawl Vawkpui Vulh Association te chu DC Conference Hall, Khawzawl Darngawnah an thukhawm a, Khawzawl District a vawk note man Rs. 6,500 aia sang lo ni mek chu Rs. 7,000 aia sang lo ni turin an rel.
Vawiina meeting kaihruaitu Pu C.C. Lalchhuangkima, Deputy Commissioner chuan District pawn hmundanga vawk notr leh vawksa thawnchhuak thei khawpa intodelh nise a duh thu a sawi a. District mipuiten vawkvulh an uar a, mi nawlpuiin vawk note an vulh ve phak theih nan vawk note man sang lutuk tur ven a ngai thin tih a tarlang.
Meeting-ah hian African Swine Fever (ASF) vangin Khawzawl District ah vawk 1024 a thi niin chhinchhiah a ni a, Khawzawl Town bikah chuan ASF vanga thi zat hi 624 a nih thu tarlan a ni a. District thenawma vawk note man te thlirho niin, vawkchaw leh thildang man sang chho zelah vawk note man tihsan chu thil awm tak ni a hriat a ni a, chuvangin rate hman mek chu Rs. 7,000/- ah tihsan nise tih a ni a. Chutihrualin, Rs. 7000 a hralh tur vawk note chu ni 60 tala upa a ni tur a ni ti a rel a ni bawk.
District pawn atanga vawk lakluh pawh meeting-ah hian sawiho niin, District chhunga ransa te hri danna pek runpui (mass vaccination) kalpui tum mek a nih avang leh, ASF hrileng dinhmun thlithlai a la tul rih avangin, AH&Vety Department thurawn angin vawk lakluh chu khap chhunzawm rih nise tiin rel a ni bawk.
Written by H. Lalramenga, SDC, Khawzawl District
