Khawzawl, the 15^th January, 2022:

Vawiin chawhma dar 11:00 khan Khawzawl District Bawrhsap Pu C.C. Lalchhuangkima, District Election Officer ni bawk chuan DC Office Conference Hall-ah Tuichang Assembly Constituency  Electoral Roll thar ber a tlangzarh.

Khawzawl District Bawrhsap chuan thu sawiin, Electoral Roll siamthat hna chu Election Commission of India ruahmanna hnuaia Special Summary Revision of Photo Electoral Roll, 2022 hnuai a ni tih a tarlang a. Roll siamthat hna thawh a nih chhung hian Electoral Roll Observer-in a rawn tlawh avang te, party hrang hrang leh tlawmngai pawl hrang hrang ten tha taka an thawh pui thin avang te in lawmawm a tih a thu a sawi. Hmun thenkhatah Electoral Roll siamthat hna thawh a nih laiin harsatna thleng a awm fo thin laiin Khawzawl District-ah chuan chutiang harsatna tawk lova zawh fel theih a ni chu lawmawm a tih thu a sawi bawk a ni.

Electoral Roll tlangzarhna hunah hian Pu Lalrohlua, Additional DC pawhin tun aia Electoral Roll a inthun ngaihven lehzual a tul tih sawiin, Vote nei thar te leh hmundang atanga rawn pem thar te Roll-a an inziahluh vat theihna tur a hmalakpui/puangzar zel turin political party aiawhte a sawm nghal a ni.

Pu James Lalnithanga, SDO(Sadar) & Electoral Registration Officer in Roll tlangzarh report a pe a. Khawzawl District Election Officer enkawl huam chhungah 22-Tuichang Assembly Constituency awmin, Electoral Roll thar berah hian vote nei mipa 8624 leh hmeichhia 8626, an vaiin mi 17250 an awm a. Khawzawl khawpui bikah voter 8181 awmin, Khawzawl pawna vote nei awm zat chu 9069 a ni. Tuichang AC ah hian polling station 28 awmin, voter 1026 awmna Khawzawl Vengthar North chu voter tamna ber a ni a. Voter tlemna ber Arro village-ah voter 115 an awm thung a ni.

Summary Roll Revision, 2022 ah hian voter nei thar leh constituency dang atanga rawn insawn mi 535 awmin chhan hrang hrang avangin mi 253 chu Roll atanga paih an ni a. Voter punna hi 282 niin, chu chu vote nei zawng zawng atanga 1.6% a ni.

Vawiina Final Electoral Roll, 2022 tlangzarhnaah hian political party aiawh te, NGO hrang hrang heng YMA, MHIP leh  MUP aiawh te bakah Mizoram Journalist Association aiawh te an tel a. District Election Officer chuan Electoral Roll thar ber hi Political Party aiawhte kutah a hlan nghal a ni.