Khawzawl, 1st November, 2021:
Vawiin chawhnu dar 2:00 khan Pu C.C. Lalchhuangkima, Deputy Commissioner, Khawzawl District, District Election Officer ni bawk chuan DC Office Conference Hall, Khawzawl-ah Special Summary Revision of Photo Electoral Roll, 2022 atan Draft Electoral Roll a tlangzarh.
Khawzawl District Election Officer (DEO) Pu C.C. Lalchhuangkima chuan inthlanna felfai kan neih theih nan Electoral Roll tha leh dik a pawimawh a. India khua leh tui kan nih anga chanvo pawimawh tak kan neih, kan aiawha ram hruatute thlang chhuak thei turin Electoral Roll-a awm thei chinte chu kan awm vek a tul a ni, a ti a. Tuichang AC ah chuan harsatna lian tham awm lova Electoral Roll buatsaih a ni thin chu lawmawm a tih thu sawiin, a hun taka Draft Electoral Roll tlangzarh a nih theih nana thawktu Election kaihhnawih official te thawhrimna a fak bawk a ni.
Election Officer Pu H. Lalramenga’n Tuichang AC chhunga Khawzawl Vengthar South Polling Station building thlak niin, Khawzawl Zuchhip Polling Station hming thlak a ni tih a tarlang a. Electoral Roll Revision kalphung tlangpui bakah Draft Roll tlangzarh hnua tih hmabak leh mawhphurhna nei hrang hrangte dinhmun a sawifiah a, kan aiawha roreltute thlan chu India khua leh tui, kum 18 tling tawhte chanvo a nih angin, Electoral Roll-ah India khua leh tui dik takte chauh an luh theih nan kalkhawmte chu thawhpuiah a sawm. He hunah hian Pu Lalrinawma Kholhring, Data Entry Operator in Tuichang AC bika kum 2021 Final Electoral Roll leh kum 2022 Draft Electoral Roll khaikhinna leh sawifiahna hun a hmang bawk a ni.
Khawzawl District Election Officer enkawlna hnuaiah hian Tuichang Assembly Constituency awmin, DEO bakah hian Electoral Registration Officer (ERO) pakhat leh Assistant ERO (AERO) pahnih an awm a. Draft Electoral Roll-ah hian voter mipa 8501 leh hmeichhia 8467, an vaiin voter 16,968 an awm a, Service Voter 96 an awm bawk a ni. Khawpui (town) huamchhungah Polling Station 13 leh thingtlang (rural) ah Polling Station 15, a vaiin polling station 28 a awm. Heng hi Electoral Registration Officer (ERO) pakhat leh Assistant ERO pahnihin bakah Booth Level Officer (BLO) 28 in an enkawl mek a ni.
Draft Electoral Roll-ah hian vote 1007 awmna Khawzawl Vengthar North chu voter tamna ber a ni a. Urban Area (Khawzawl leh Khawhai) ah voter 9,868 (58.16%) awmin, Rural Area -a khaw 13 ah voter 7,100 (41.84%) an awm a ni.
Vawiina Electoral Draft Roll tlangzarhna-ah hian Election Office-a thawk te, Khawzawl MJA member te, Khawzawl District Village Council Association, Sub-Headquarters YMA, Sub-Headquarters MHIP aiawhte bakah political party hrang hrang INC, MNF leh ZPM aiawhte an tel a, District Election Office buatsaih Draft Roll khaikhawmna (Overview) sem nghal a ni.
Written by H. Lalramenga, SDC, Khawzawl District
