Tualpui, 7th June 2024:  Vawiin khan Tualpui khawtlang chuan an khaw chhuak Pu Lalduhoma, Mizoram Chief Minister anih lawmna leh chawimawina hun ropui takin an hmang.

Tualpui Mual Zawla Vantlang inkhawmah hian Chief Minister Pu Lalduhoma chuan amah leh a chhungte siam lian a, a thlavang vawi tam hauha chawimawi thintu Tualpui khawtlang chungah lawmthu a sawi a.  Mizorama la thleng ngai zen zen lo - a lim din a ni chu zahthlak a tiin, phu lo a intih thu pawh sawiin Pu Lalduhoma chuan Organising Committee lam ten tul an tih tlat avangin hreh tak chungin a pawm pui ta tih a sawi. Vawiina Chief Minister anih lawmna leh chawimawina hun buatsaihtu Tualpui VC, Organising Committee, tlawmngai pawl, Kohhran leh Tualpui Welfare  te chungah leh amah tawiawmtu Minister, MLA, Board Chairman leh sawrkar official-te chungah lawmthu a sawi bawk.

Chief Minister hian Tualpui khawtlangin an khaw tan chauh ni lo, ram pum leh bial huapa inang tlanga hmasawnna hna thawh an duh tih an sawi chu a ropui hle a ni, a ti a. Kalkhawmte chu Tualpui khua tihmingchhetu ni lo tur leh Tualpui khaw hmingthatna - buh ngah, hlo thlawh chak leh taima khua an nihna chhawm nung zel zawk turin CM hian a chah. Mimal, chhungkua leh khawtlang min runtu ruihhlo laka fihlim theuh turin a ngen bawk.

Chief Minister Pu Lalduhoma hian  School Education Minister Pu Vanlalthlana thilpek - ‘Smart Board’ chu Tualpui High School hnenah a hlan a; Tualpui Primary leh Middle School Building te chu sak that an nih tur thu sawiin, zirtirtu indaihlohna pawh phuhruk thuai an tum tih a sawi. Hei bakah hian CM hian Health Minister Pi Lalrinpuii aiawhin Tualpui Health & Wellness Center hnenah damdawi engemawzat a pe a. Tualpui khaw power lakluhna 11Kv line thar siam nan P&E Department hnuaiah cheng nuai 113.94 an ruahman thu pawh CM hian a tarlang.

Chief Minister Pu Lalduhoma hian he hunah hian lehkhabu pahnih Pu C. Laizawna ziah ‘Nunhlui Ngaihawm’ tih leh Pu C. Sangthuama ziah ‘Tualpui Chanchin’ te a tlangzarh a. Adviser to CM, Champhai North bialtu Er. H. Ginzalala chuan Chief Minister lim a hawng a ni.

He huna thu sawitu dang Sports & Youth Services Minister Pu Lalnghinglova Hmar chuan Tualpui khaw thalaite tan chona siamin, Tualpui khaw pa Chief Minister Pu Lalduhoma hnungzuia Central Service a inziah tlin ngei tum turin a ngen a. Pu Lalduhoma’n beidawng lova kum 40 a beihna chu mitin tan zirlai tha tak nia a hriat thu a sawi bawk.

Rural Development Minister Prof Lalnilawma chuan Tualpui khawtlang tui mamawh phuhru turin cheng vaibelchhe 5 chuang man ruahmanna (proposal)  an thehluh tawh thu a sawi a. A department enkawl hrang hrang (RD, P&E, Horticulture) kaltlanga khawtlang mamawh hmasawnna hna thawh zel a duh thu sawiin, khawtlang hruaitute chu khua leh ram tana rotling hna rawn ruahman zel turin a chah. 

ZOHANDCO Chairman Pu Lalliansawta pawhin he hunah hian thu sawiin Tualpui khawtlangin CM Pu Lalduhoma chawimawina hun an buatsaih chu ropui a tih thu a sawi a. Tualpui khaw chhehvela ramngaw humhalh tha tak a hmuh chuan a tih lawm thu sawin, lui kawr leh ramngaw humhalh chhunzawm zel turin a chah a ni.

Khawzawl Bawrhsap Pu K. Lalrohlua chuan Khawzawl District chhunga ramngaw enkawl tha tak khua Tualpui khuain Chief Minister chawimawina leh lawmna hun an buatsaih chu a ropui hle a ni, a ti a. Tualpui khuain an khaw bil ta tur aia ram pum tana Pu Lalduhoma thawhna an ngaihhlut zawk tur thu an sawi chuan a thinlung a hneh hle thu sawiin, CM-in ram rawng a bawlna kawngah theihtawpa thlawp leh tawiawm zui zel turin a chah a ni.

He hunah hian Lunglei High Powered Committte Vice Chairman, Lunglei N bialtu ni bawk Pu V. Malsawmtluanga, Tualpui VC President Pu Ramengmawia, MHIP President Pi Ngurpianmawii te pawhin thusawina hun an hmang.

Chief Minister Pu Lalduhoma hi a nupui Pi Liansailovi leh a chhungten an tawiawm a. Pu PC Vanlalruata, Agriculture Minister; Pu Vanlalhlana, PWD Minister; Prof Lalnilawma, RD Minister; Pu Lalnghinglova Hmar, Sports Minister; Pu Lalfamkima, Deputy Speaker; Pu W. Chhuanawma, Deputy Govt. Chief Whip, MLA Tuichang; Er. H Ginzalala, Adviser to CM (Technical), Champhai North MLA; Pu V. Malsawmtluanga, Vice Chairman Lunglei HPC, Lunglei North MLA; Pu Lalchhuanthanga, Aizawl South II MLA; Pu Jeje Lalpekhlua, South Tuipui MLA; Lt. Col Clement Lalhmingthanga, Champhai South MLA; Pu Lalliansawta, Chairman ZOHANDCO; Pu JK Dawngzuala, Chairman, ZIDCO; Pu Lalthazuala Royte, Chairman, MIFCO; Pu C. Lalremliana, Chairman, MKVI; Pu Isaac Malsawma, Chairman, MAMCO, Pu K. Lalrohlua, Khawzawl DC, Pu Lalchhuanthanga, Khawzawl SP leh sawrkar official-te pawhin he hun hi an hman pui a ni.

Chief Minister Pu Lalduhoma lawmna leh chawimawina hun hi CM Chawimawina Organising Committee Chairman Pu C. Lalromawia’n a kaihruai a. Zai, hnam lam leh recitation sawi ngaihnawm leh hmuhnawm tak tak te thlir ho niin, hun hlimawm tak hman ho a ni.