Khawzawl, the 11th October, 2021:
Vawiin chawhma dar 11:00 khan DC Office Conference Hall, Khawzawl-ah Faina Hapta (Cleanliness Week), 2021 denchhena Khawzawl District chhunga thingtlang (Rural) khuate fai intihsiakna result puan leh lawmman semna hunh man a ni a. Rabung leh Arro khuate chu pakhatna niin, certificate leh pawisa fai Rs. 5,000 ve ve an dawng.
He hun hi Pu C.C. Lalchhuangkima, Deputy Commissioner & Chairman, District Water & Sanitation Mission (DWSM), Khawzawl District chuan kaihruaiin lawmman dawngtute a lawmpui thu a sawi a. Faina chu hunbi nei lo, kan nunphunga sengluh tur a ni tiin, Faina hapta piahlamah pawh fai chhunzawm reng turin lawmman dawngtute leh kalkhawmte a chah a ni. Khawzawl District Bawrhsap chuan fai intihsiak result puanna leh lawmman semna hun a hmang chhunzawm bawk a ni.
Faina Hapta (Cleanliness Week), 2021 denchhena Faina kawnga inelna hi Khawzawl District-ah chuan khawpui (Urban) leh thingtlang (Rural) ah a hranin kalpui a ni a. Khawpui fai inelna hi UD&PA Depatment in buatsaihin October ni 8 khan a kharna hun hman a ni tawh a. Rural areas bika intihsiakna hi Public Health Engineering (PHE) Department leh DWSM tangkawpin an buatsaih niin, October ni 2 atanga ni 9 chhungin Khawzawl District chhunga thingtlang khaw hrang hrangte chu khawlai fai mai bakah School, Anganwadi, VC House/BNRGSK leh vantlang bungraw pawimawh thenkhat heng - Community Hall, vantlang inthiarna, Waiting shed etc. te endik a ni a. Khaw hrang hrang 24 te chu Sawrkar department hrang hrang atanga Officer 11 (sawmpakhat) in insemin, October ni 2 atanga ni 8 chhungin a hmunah an endik a ni.
Vawiina fai intihsiakna lawmman semna hunah hian Pu Lalzakhama, Executive Engineer, PHE Department & Member Secretary, DWSM in report pein, intihsiaknaah hian Covid-19 hrileng hluar zualna tih loh District chhunga khua (Rural) zawng zawng endik a ni a ti a. Intihsiaknaah hian a pawnlam langsar lai chauh en lovin, building chhung lam a fai tha em, a tul ang zelin eisiamna hmun a thianghlim em, inthiarna a awm tha em, bawlhhlawh paihna a awm tha em tihte en vek a nih thu a tarlang a ni.
Khawzawl District-a thingtlang khuate fai inelnaah hian Khualen leh Tualpui te chuan lawmman pahnihna la in, certificate leh pawisa fai Rs. 3,000 ve ve an dawng a. Pathumna Sialhawkna in certificate leh pawisa fai Rs. 2,000 an dawng bawk a ni. Intihsiaknaa tel zawng zawngte hian consolation prize certificate leh pawisa fai Rs. 1,000 an dawng dawn bawk a ni.
Result puan leh lawmman semna hunah hian Pu Eliza Vanlalpeka, PHED SDO, Pu H. Lalramenga, SDC leh Pu TC Lalhmachhuana, SBM(Gramin) District Co-ordinator te bakah lawmman pakhatna atanga pathumna dawngtu khua Village Council atangin aiawh pahnih theuh an tel a ni.
Written by H. Lalramenga, SDC, Khawzawl District
