Khawzawl, 11th September 2023: Khawzawl District Level SEDP Committee huaihawtin vawiin khan Socio-Economic Development Policy (SEDP) thawh hnihna dawngtute pualin ‘Awareness Campaign’ neih a ni a. He hun hi Khawzawl Deputy Commissioner Pu K. Lalrohlua chuan kaihruaiin thu a sawi a, line department-te hnen atangin thu sawi ngaihthlak a ni bawk.
Khawzawl Zaingen Veng Hall-a neih Awareness Campaign-ah hian thu sawiin DC Pu K. Lalrohlua chuan mipuite dawn tur SEDP sum (family-oriented SEDP) chu SEDP peng pakhat a ni, a ti a. SEDP chu sum sem mai piah lamah hmasawnna ruhrel hrang hrang dinna atan tangkai taka hman a nih thu a tarlang a. Kawng hrang hrang - ei leh bar, lo neih dan thar, agriculture link road, tui hnianghnar neih, rubber, hmunphiah, zirna, infiamna leh hriselnaah te sawrkarin SEDP kaltlangin hma nasa takin hma a la mek zel a ni, a ti. DC hian September thla chhungin SEDP Phase - III dawng tur thlanchhuah an nih tur thu a sawi bawk.
Line Department aiawha thu sawitu pakhat Khawzawl District Veterinary Officer (DVO) Dr. Lalbiakzuala Sailo chuan SEDP hnuaia Vety Trade thlangtu an tam chu lawmawm a tih thu a sawi a; amaherawhchu, thlangtu an tam huin hlawhtlinpui an tam em tih erawh ngaihtuah tham a ni, a ti. Sawrkar hmalakna reng reng chu a dawngtu ten a nihna tur anga an hman a pawimawh a ni tiin, inkaihhruaina dan (guidelines) anga tha taka SEDP chu hmang turin kalkhawmte chu a chah a ni.
Line Department aiawha thu sawitu dang Pu V. Lalhmangaiha, District Commerce & Industries Officer, Champhai chuan Commerce & Industries hnuaia trade-te chu mahni inlum atanga thawh theih a nih hlawm avangin a vanneihthlak hle a ni, a ti a. Tanpuina dawngtute chu a hnu zela enfiah (inspection & monitoring) dawl zova, tangkai taka an sumfai dawn te hmang turin a fuih a ni.
He hunah hian Pu C. Kera District Level SEDP Committee Member pawhin thu sawiin SEDP kalphung leh kalpui zel dan tur te a sawi.
‘Awareness Campaign’ hi Khawzawl District chhunga khaw panga - Khawzawl, Chawngtlai,Hmuncheng, Arro, Tualte te tana buatsaih a ni a. Naktukah hian Khawhai Town Hall-ah heng khua Khawhai, Sialhawk, Tlangmawi, Tlangpui, Chalrang, New Chalrang, Vangtlang, Riangtlai, Lungtan te tan awareness campaign hi buatsaih a ni ang a, Addl DC Pu Lalfakzuala’n a kaihruai ang.
