Khawzawl, the 7^th December, 2021:

Vawiin khan Pu James Lalnithanga, Sub-Divisional Officer (Sadar) chuan tun hnaia Covid-19 positive hmuhchhuah tamna Aiduzawl khua a tlawh a, Aiduzawl Village Level Task Force (VLTF) leh khawtlang hruaitu dangte nen inkawmin Aiduzawl khawtlanga Covid-19 dinhmun leh mamawh bakah hmalak zel dan turte an sawiho. SDO(Sadar) hian DC aiawhin VLTF te hnenah N95 mask 50 leh surgical mask 250 a hlan nghal bawk a ni. 

Aiduzawlah hian Covid-19 positive 25 awm mekin, heng zinga 17 te chu kum 18 chin hnuailam an ni a. Mi 4 te chu Community Covid Care Centre ah dah niin, midang zawng chu mahni inlam (Home Isolation) a enkawl an ni. Tun dinhmunah contact tracing atanga test ngaite chu test zawh thawkhat tawh an nih thu leh, Covid-19 positive zingah ngaihtuahawm an awm loh thu VLTF te chuan SDO(Sadar) hi an lo hrilh a ni. 

Vawiin vek khan SDO(Sadar) hian Rabung PHC pawh tlawhin Medical Officer leh damdawiina hnathawkte nen inkawmhona hun tha tak an nei a. Rabung PHC huamchhunga Covid-19 dinhmun leh hmalakna hrang hrangte an sawiho a ni.

SDO(Sadar) Pu James Lalnithanga hi DC Office atangin Pi Lalchawimawii, LDC in a tawiawm a ni.

Written by H. Lalramenga, SDC, Khawzawl District