Dated Khawzawl, the 20th March, 2021: Vawiin chhun khan Rural Development Minister Pu Lalruatkima'n Khawzawl district DRDA Office, Darngawn Veng-ah a hawng a, Minister hi Pu C.Lalmuanpuia, MLA, Vice Chairman, Veterinary and Fishery Board-in a tawiawm a. RD Joint Secretary leh Rural Development department hotu pawimawhte bakah Khawzawl khawtlang hruaituten he hun hi an hmanpui a ni.
DRDA office thar lawmna puala inkhawm Zaingen YMA Hall-a buatsaihah khuallian niin Minister Pu Lalruatkima chuan Khawzawl district-in DRDA office an neih theihna tura theihtawp chhuaha tan lakpuitu Chief Minister Pu Zoramthanga leh Deputy Chief Minister Pu Tawnluia te chungah lawmthu a sawi a. DRDA office hawn thar chu district danga DRDA office kum tam tak lo awm tawhte nen khaikhin nghal mai a rem dawn lo tih sawiin, mamawh leh tul dang tam tak te chu zawi zawia ngaihtuah belh a ni ang, tiin a sawi a. Minister chuan District mipuite tawiawmna leh hriatthiamna an mamawh hle dawn a ni, a ti bawk a. DRDA staff te leh District mipuite chu malsawmna ni tawn tura thawkho turin duhsakna a hlan a ni.
Rural Development Minister Pu Lalruatkima chuan Sawrkar laipuiin rural development a ngaih pawimawh avangin India rama Flagship programme lian ber MGNREGS pawh RD hnuaiah a dah a, hei hi India rama employment generate nasa ber a nih bakah, khawvela inhlawhfa inziahluh tamna ber a ni, a ti a. COVID-19 hripui a len vanglai pawhin MGNREGS hnuaia ni za inhlawhna chu tluang taka kalpui zel a ni a, COVID-19 avanga thi an awm ang tih sawrkarin a hlauh rualin, eitur neilo chhuanchham harsatna tawk avanga nunna chan an awm a hlau bawk a, heng dona kawngah hian ni za inhlawhna hi thingtlangah nasa takin COVID-19 hrileng karah a takin mipuiten an tangkaipui a ni, a ti a. DRDA kaltlangin thingtlang hmasawnna tur programme tam takte mumal leh awmze nei zawkin a kalpui theih tawh dawn a ni, a ti. Minister Pu Lalruatkima chuan district hmasawnna turin DRDA-in hma a la tan dawn a ni a, theihtawp chhuaha mikhual thlen leh biak nuam leh dawnsawn kawngah theihtawp chhuaha, a thawktu tur mithiamte pawhin thahnemngai taka thawk turin a fuih bawk a ni. Minister chuan thawkleh khata hmasawnna neih theih a ni lo tih hriat renga, hmasawnna chu nitina inkhawl bek bek leh zawi zawia lo thleng a ni tih hre reng turin Khawzawl mipuite a chah bawk a ni.
Khawzawl district DRDA office tharah hian Khawzawl District Addl. DC Pu Lalrohlua'n Project Director hna hi a kawp rih dawn a. APO, AO leh Assistant Engineer leh staff 20 vel ten bul an tan dawn a ni. Khawzawl district DRDA office hi Khawzawl Darngawna BNRGSK Hall chu thuam thain bultan a ni a. April ni 1, 2021 atangin office hi dawr theih a ni ang. BNRGSK building luah mektu Khawzawl Darngawn VC te hnenah thlen nghal niin, annin harsatna siam hauh lo leh phur takin an building hman mek chu DRDA Office, Khawzawl District atan hman an remti a ni. DRDA Office ah hian Officer room 4, establishment room, inthiarna, tui connection, in chhung leh pawn rawng hnawih that, room partition thar, electric wiring thar, a building hungna siam a ni.
DRDA Office building len zawng hi a dung 36 feet, avang 24 feet a ni. A bang brick wall niin, a chung erawh rangva a ni thung. A chhungah hian Room 4 a awm a, chungte chu: Project Director room, a dung 20 ft leh avang 9 ft (attached bathroom); Assistant Project Officer room (13 x 9 feet); Assistant Engineer Room (13 x 9 feet);Account Assistant room ( 9 x 9 feet); Establishment room (20x 9 feet); Office dawr tu tan inthiarna pawn lamah 2 a awm bawk. Thawktu hrang hrangte mamawh table, chair, computer, almirah etc te dah nghal vek an ni.
DRDA office thar lawmna inkhawm hi Khawzawl district bawrhsap Pu Zothanmawia'n a kaihruai a, Joint Secretary, Rural Development Department Pu C.C. Lalchhuangkima pawhin thusawiin, Pu R.Lalnghakliana, Project Director, DRDA, Champhai District in technical report a pe a, Dr. Saithangpuia, BDO Khawzawl in he hun hi lawmthu sawiin a khar a ni.
Written by H. Lalramenga, SDC, Khawzawl District
