Khawzawl, the 20^th November, 2021:

Vawiin khan Rabung khuaa khawsa mek Pu V. Lalhmingliana in kang tanpuina chu State Disaster Response Fund (SDRF) atangin Khawzawl DC Office-a thawkte kaltlangin hlan a ni. 

Khawzawl District hmarlama awm Rabung khuaa Pu V. Lalhmingliana in hi nimin chawhnu dar 2:00 vel khan kang in, khawchhung mi tlawmngaiten theihtawp chhuaha an thelh chungin bungrua tlemte an chuh hman tih loh chu a kang chhe hman hle a. He inah hian Pu V. Lalhmingliana te nupa leh an fa naupang te te pathum chengin, kangmei chhuah lai hi pawnlama an awm lai tak a ni a, vanneihthlak takin mihring nunna chan leh hliam tuar an awm lo hlauh a ni. 

He chhiatna thlen chungchang hi hriat a nih ve leh Pu C.C. Lalchhuangkima, Deputy Commissioner, Khawzawl District kaihhruainain hma lak nghal a ni a. Vawiin khan DC Office-a thawk thenkhatte Rabungah hian kalin in kang hi a hmunah an tlawh a. SDRF atanga tanpuina pawisa fai Rs. 1,01,900 (Cheng nuai khat sangkhat zakua) bakah silpaulin pahnih te chu in kang tuartute kutah hlan niin, Rabung Village Council President Pu Vanlalrova Khiangte hnenah hnatlang thingpui lumna tur Rs. 2,000 hlan a ni bawk. Tanpuina pawisa fai leh thildang te hi DC aiawhin Pu H. Lalramenga, SDC & Nodal Officer, DM&R in a hlan a ni. 

Inkang tuartute tanpuina hlan zawhah hian hmalak zel dan tur sawiho a ni a. Rabung Village Council kaihhruaina hnuaiah hnatlanga in hi sak that tura rel niin, a sak dan tur leh hmalak zui dan tur kimchang chu Rabung VC kaihhruaina hnuaiah ruahmanna siam a ni dawn a ni.