Khawzawl 16th. March, 2021 : Mizoram State Rural Livelihood Mission, Khawzawl Block Management Unit leh Krishi Vigyan Kendra (KVK), Khawzawl tangkawpin vawiin khan Khawzawl RD Block huamchhunga khaw 15 a leilet nei mi 115 te hnenah Self Help Group kaltlangin leilet Buh chi tha Pusha Sugand (PS)-5 sem chhuah a ni a, he hun hi Khawzawl Addl. D.C. Pu Lalrohlua chuan khuallian niin a telpui a ni.

Leilet Buh chi tha PS-V sem chhuahna puala inkhawm tawi, KVK Khawzawl Office kawt a Pi Lalrammuani, Block Mission Manager kaihhruaia neihah khuallian ADC Pu Lalrohlua chuan Retheihna umbona atan leh eizawnna siamna atan Self Help Group kalphung chu India ram chhung mai bakah Khawvel Agency te pawhin an hmang nasa tih a sawi a, tunhmain Mizoram-ah hian SHG hi kalpui thiam lo viau mah ila MZSRLM kalpui anih hnu, tunah chuan khaw hrang hrangah SHG nung taktak kan nei tawh a, Block Mission Management Unit te an tha tawk a, Bank atanga a hlawm a Credit kan hmuh theih te pawh nuai ni tawh lovin vaibelchhia tih te a ni tawh a, hma kan sawn hle a ni a ti a. SHG thenkhat te hmalakna tha taktak avangin MZSRLM Aizawl a an hotuten nikum khan Chief Minister Award for Excellence in Public Administration an dawng tih pawh sawiin khuallian chuan SHG hlawhtling taktak a an Member te hi keimahni ang tho an ni tiin SHG Member kalkhawmte chu hlawhtlinna hmu thei turin theihtawp chhuah turin a chah a, thil hrang hrang bawh tumnaah chetsual palh a hlauawm tih sawiin hmalakna tura an lo thlan tawhah insawr bing turin a chah a. India sawrkarin retheite umbo atan leh eizawnna siamna atana tha a tih SHG hi Mizoram-ah pawh kan tuai nun a, kan tih vul zel chuan ram leh hnam, chhungkaw tan hmasawnna a nih ngei a ring tih a sawi a ni.

He hunah hian KVK Khawzawl Head & Senior Scientist, Dr. Henry Saplalrinliana chuan SHG Member, leilet nei kalkhawmte hnenah an Buh chi sem chhuah tur PS-V kui tiah dan leh enkawl dan turte hrilhhriatna a nei bawk a, hemi hnu hian leilet neitute hnenah khuallian in buh chi te hi a hlan a, buh chi hi mi pakhat tan Kg. 2 zelin an sem chhuak a ni.

Vawiina leilet neitute hnena leilet buh chi tha an sem chhuah, PS-V hi KVK Khawzawl in leilet neitute chin pun tur a Indian AGriculture Research Institute, New Delhi atanga an lak chhuah a ni a. Khawzawl RD Block huamchhunga khaw 15 - Pamchung, Chawngtlai, Sialhawk, Tualte, Tlangmawi, Tlangpui, Vankal, Vangtlang, Rabung, Puilo, Chhawrtui, Kawlkulh, Neihdawn, Arro leh Hmuncheng khuaa SHG te kaltlangin leilet nei mi 115 in an ching dawn a, buh chi an sem rual hian loneitu mi 111 hnenah Spinach (Palak) chi sem chhuah a ni bawk.