Khawzawl dated 20th February 2026: Vawiin chawhma dar 11 ah khan Khawzawl Sub Hqrs. YMA field ah State Day vawi 39-na puala Mizoram pum huapa tawngtairualna hun State Day of Prayer 2026 chu hman a ni a, Khawzawl Bawrhsap Pu K. Vanlalthian'an a hmanpui. 

Khawzawl Bawrhsap Pu K. Vanlalthiana chuan he tawngtairualna hun hmang tura  an hun leh tha hlu tak seng a mipui lo kal khawmte hnenah chuan lawmthu sawi a, vawiin ni ah hian kan ram leh hnam tan theihtawp chhuah a tawngtaia dil turin a sawm a, hetiang hun tha  hman a ni thei chu lawmawm a tih thu sawiin,  mizote chu hnam huaisen, hnam rinawm tia miten min hriat thinna chu tlem tlema a tlak hniam zel  niin a hriat avangin, kan ram leh hnam din tharna kawngah tan la thar leh turin mipui te chu a sawm a ni.

He hun hi hun hnihah then niin State Day of Prayer Organising Committee Chairman Rev. Laltleipuia Hmar, i/c FBC, Khawzawl Pastor Bial chuan kaihruai a,  Organising Committee Secretary hnen atangin thupuan ngaih thlak a ni. Mipui tawngtairualna thupui atan "I Din thar leh ang u" tih Nehemia 2:18 chu hman niin,  thupui sawi hawnna Rev. David Saithuama Pachuau, i/c PCI, Khawzawl Venglai Pastor Bial leh Rev. Lalbiaksanga Pachuau, FG/CC ten an nei a, Zaipawl leh Female Voice,  PCI Khawzawl Venglai, PCI Khawzawl Vengthar leh PCI Khawzawl Vengthar North atangin ngaihthlak niin Upa K. Lalzika, President, District MUP-Hqrs chuan hun khatna tawngtainain a khar a ni. He tawngtairualna hun ah hian khawzawla Kohran hrang hrang te leh Political party hrang hrang te leh NGO hrang hrang te nen inlungrual tak leh thahnem ngai taka hman ho a ni a, Organising Committee Secretary  Upa Rohmingliana Colney, Secretary, District MUP-Hqrs chuan lawmthu sawiin Rev. R. Lalthlengliana, i/c PCI, Khawzawl Vengthar Pastor Bialtu in tawngtainain he hun hi a tin a ni.