Khawzawl, the 14th September, 2022: Khawzawl District chhunga Centrally Sponsored Scheme kalpui a nih dan leh hnathawh hrang hrangte zirchiangtu, District Development Co-ordination & Monitoring Committee (DDCMC/DISHA) chu an Chairman Pu C.Lalrosanga, Member of Parliament (MP), Lok Sabha (LS) hovin vawiin khan Khawzawl DC Conference Hall-ah an thukhawm. He hunah hian 2021-2022 financial year third leh last quarter bakah 2022-2023 financial year first leh second quarter chhunga hmalakna hrang hrangte thlirho a ni.

Chairman Pu C.Lalrosanga chuan Khawzawl District tana DISHA meeting neih a ni chu lawmawm tiin, District chhunga Officer awmte, NGO leh VC lam aiawhte kim taka an kal chu lawmawm a tih thu a sawi a. India sawrkar ropui takin thingtlang mite a ngaihtuah em em a, an hmasawnna atana tangkai tur scheme tam tak a ti chhuak reng a ni, a ti a. Heng scheme-te hi mipui ten an tangkaipui  sawrkarin a ngaipawimawh ber a, sawrkar vei ber pawh a ni, a ti a. Sawrkar Department leh Banker-te chu Sawrkar laipui scheme pawimawh tak takte a chhawr tangkaitu tur mipuite hnena puangzar tam tur leh an chhawr tangkai ngei theih nana hma la turin a chah a. DISHA meeting chu CSS kalpui kawnga hmalakna leh harsatna awm theite sutkian kawngah a tangkai thin hle a ni tiin, Khawzawl District mipuiten an hlawkpui ngei a beisei thu a sawi bawk.

He huna tarlan a nih dan chuan MGNREGA hnuaiah 2022-2023 financial year kal mek August thla zawh thleng khan job card holder 8658 te hnenah ni 37 inhlawhna siam a ni tawh a. UD&PA Department kaltlangin PMAY-HFA hnuaiah HFA-BLC dawngtu 2045 leh HFA-CLSS dawngtu 8 an awm a. PHE Department hmalakna Jal Jeevan Mission (JMM) hnuaiah khua/veng 22 ah Water Supply Scheme siam mek a ni a. NABARD kaltlangin tuilakna 7 thawh mek niin, heng zinga 4 te hi nizung chakna hmanga siam a ni. AMRUT 2.0  hnuaia hmalakna tur project 2 DPR thehluh fel a ni tawh bawk a. August 2022 tawp thlengin PWD hnuaiah Pradhan Mantri Gram Sadak Yojana (PMGSY) kawng la zawh fel loh siam mek 5 awmin, hna tam zawk thawh tawh a ni. Pradhan Mantri Krishi Sinchayee Yojana (PMKSY) ‘Har Khet Ko Pani’ hnuaia Minor Irrigation Project 4 kalpui mekte zawhfel tep a a nih hlawm bakah a vawikhatna turin Ground Water Irrigation Scheme kaltlangin leihnuai verh hmanga tuilakna tur project 1 kalpui mek a ni bawk.

October 2021 atanga June 2023 thlengin  nausen thi 6 awmin Infant Mortality Rate (IMR) chu 29.41 a ni a. Nu nau chunga thi an awm lo thung a ni. Mi nawlpuiah HIV test tihsak mi 325 zingah 18 an positive a. Naupai mi 337 test zinga 2 an positive a ni. Vector Borne Disease Control Programme kaltlangin malaria case 9; Pf  5 leh Pv 4 hmuh a ni a. TB test 407 atangin 21 an positive a, Multi Drugs Resistance rinhlelh 24 test atanga 1 a positive bawk a ni.

Khawzawl District-ah Ration Card leh Aadhaar  thlunzawm hna za zela 95.03 zawh tawh niin, beneficiary nena thlunzawm hna chu za zela 86.73 zawhfel a ni a. National Social Assistance Programme (NSAP) hnuaiah tar chawmna/ tar pension mi 750, hmeithai pension mi 59 leh rualbanlo pension mi 19 te pek mek an ni a. Heng bakah hian CSS hnuaia hnathawh hrang hrangte sawiho a zirchian a ni bawk.

Vawiin DISHA thutkhawmah hian Member Secretary Pu C.C. Lalchhuangkima, DC; Pu Lalvenhima, PD, DRDA leh CSS khawih Department hrang hrang hotute, DISHA Member dangte leh sawm bikte an tel a ni.

DISHA meeting  neih zawh hnu hian District Electricity Committee chu an Chairman Pu C.Lalrosanga, MP, Lok Sabha hovin an thukhawm nghal a. District hawn hnua thutkhawm hmasak ber niin, power supply dawn leh semchhuah kawnga tul leh mamawhte bakah hmalak dan turte sawiho a ni.