Khawzawl, 19th March 2024: Khawzawl District a Assembly Segment awmchhun 22-Tuichang (ST) a inthlanna muanawm leh felfai buatsaih a nih theih nan leh vote a tlak that theih nan vawiin khan Khawzawl DC Meeting Hall-ah Khawzawl Bawrhsap, District Election Officer ni bawk Pu K. Lalrohlua hovin District chhunga Political Party hruaitute leh tlawmngai pawl hruaitute an thu khawm.
Thutkhawm kaihruaitu Pu K. Lalrohlua chuan Lok Sabha Inthlanpui a vote a tlak that theih nan Political Party leh Tlawmngai pawl te thawhpuina a ngen a. Lok Sabha inthlanpui neih tawh thinah Tuichang bial mai ni lo, Mizoram ang pawhin India ram puma vote tla chawhrual (National Average) phak loh a nih thin thu sawiin he mi kawngah hian ngaihtuahna sen a tul a ni, a ti.
Thutkhawmah hian Khawzawl Addl DC, Deputy District Election Officer ni bawk Pu Lalfakzuala, Election Officer Pu Timothy R. Lalhmangaiha te bakah Khawzawl District-a Political Party leh Tlawmngai Pawl hruaitute an tel a. Inthlan muanawm leh felfai taka buatsaih a nih theih nan leh vote a tlak that theih nan thil pawimawh hrang hrang te an sawi ho a ni.
Vawiin thutkhawm hian Tuichang Assembly Segment-ah vote a tlak that theih nan hmalakna tur thil hrang hrang an rel a. Heng zingah hian Mizoram Peoples’ Forum kaltlanga Kohhran tina Vote thlak tura ngenna puanchhuah te, DC hminga Vote nei zawng zawng te hnena Vote thlak tura ngenna lehkha pek te, YMA Chanchinbu hmanga vote thlak tura inzirtirna tih chhuah te, Inthlan hma leh Inthlannia Polling Station vil that te, Service Voter leh Home Voting tithei te hrilh hriat that te bakah vote 100 a 70 chunglam tlakna tlawmngai Pawl – YMA, MHIP leh MUP Branch te hnena lawmman pek te a tel a ni.
