Khawzawl, 12th April 2024: Vawiin khan District Election Officer Pu K. Lalrohlua, DC Khawzawl chuan DC Conference Hall-ah thuthar lakhawmtute kawm in Lok Sabha Inthlanpui 2024-a inbuatsaihna leh ruahhmanna hrang hrang te a sawi a, he hunah hian 22-Tuichang North MPF Forum President leh Sub Headquarters YMA President te sawm bik an nih angin an tel ve bawk a ni.

Election Commission of India thuchhuak hrang hrang bawhzuiin District Election Officer, Khawzawl chuan ECI- in kalphung leh tih dan tur a zam angin Inthlanpui neihna turah hetiang hian inbuatsaihna a kalpui a ni -

1.  Observers: Mizoram Parliamentary Constituency vil turin General Observer pakhat Dr. Nipun Vinayak, IAS leh Police Observer K. Satyanarayana, IPS (Mizoram pum atan) ruat an ni a.  Exependiture Observer atan mi pahnih - Aravind Sharma, IRAS leh Anita Rinesh, IRS te ruat an ni bawk. 22- Tuichang bial hi Pi Anita Rinesh vil tur bialah kan tel a ni.

2. Training: Inthlan kaihhnawiha mawhphurhna nei hrang hrang ten an chanvo tha taka an hlen chhuah theih nan training engemawzat neih a ni tawh a. Polling Official-te pual hian March ni 27, 2024 khan training tumkhatna neih a ni tawh a, vawiin (April ni 12, 2024) hian training tumhnihna neih a ni dawn a, April ni 17 khian training tum thumna neih a ni ang. 

3. Polling Officials Randomisation: Inthlan muanawm leh felfai a awm theih nan Polling Official te hi a bik taka duan khawl hmanga thliarfel an ni thin a. 1st leh 2nd Randomisation hi neih tawh a ni a, Polling Official tur te leh an thawhpui tur team te heng hunah hian thlan chhuah a ni a. Third Randomisation hi April ni 17, 2024 khian neih a ni ang. Polling Official te hian an duty-na tur Polling Station hi inthlan hma ni, duty tura an chhuah dawnah bak an hre dawn lo a ni.

4. Electronic Voting Machine: Mizoram pum hi Parliamentary Constituency pakhat kan nih avangin, EVM Randomisation hi a huhovin, Observer Dr. Nipun Vinayak kaihhruaina hnuaiah video-conference kaltlangin neih thin a ni a. March ni 21 leh April ni 8 khan EVM 1st leh 2nd Randomisation hi neih niin, 22-Tuichang AS huamchhunga Polling Station 28 te tan EVM pakhat theuh (CU 1, BU 1, VVPAT 1) te thlanchhuah an ni tawh a, a thlaveng atan Control Unit 15, Balloting Unit 15 leh VVPAT 18 ruahman a ni bawk. Vawiin ni 12.04.2024 hian EVM hman tur zawng zawng te hi Commissioning neih mek a ni a, candidate te hming leh symbol dah luh mek a ni.

5. Dispatch & Receiving Center: Khawzawl DC Office tual atang khian inthlan hm ani khat (April ni 18, 2024) ah Polling Official ten an duty-na tur hmun theuh an pan ang a, inthlan an va buatsaih zawhah he lai hmunah vek hian lo dawnsawn leh an ni ang. Anmahni dawngsawng tur leh an bungrua te lo enfel turin a bik takin Dispatch & Receiving Team ruat an ni a, anni hian Nodal Officer leh Trainer te kaihhruaina hnuaiah Polling Official te hi an lo dawngsawng dawn a ni.

6. Home Voting: Kum 85 chunglam leh pianphunga rualbanlo (PwD) disability certificate nei, Electoral roll-a chuangte chu in lama vote thlak theihna tur ruahmanna siam a ni a. Khawzawl District chhungah Home Voting tithei mi 109 an awm a, mi 107 in April ni 8 leh ni 9 khan vote an thlak a ni.

7. Web Casting: Khawzawl khawpui pawn zawng zawng Polling Station ah Web Casting neih a ni ang a. DEO Office, CEO leh ECI lam atangin en theih a ni ang.

8. EDC leh Postal Ballot: Nikum MLA Election-ah kha chuan Assembly Constituency 40 a awm a, Constituency hrang hrang ah Official Duty tur ten vote an neih avangin Postal Ballot hmangin vote an thlak a. Kumin MP Election-ah erawh chuan Mizoram pum hi Parliamentary Constituency pakhat anih avangin Service Voter, state pawna  Police duty tur, Home Voting leh Essential Service duty inthlannia vote thlak thei lo te chauhin Postal Ballot-in vote an thlak a a bak zawng official te chu Constituency pakhat kan nih avangin Election Duty Certificate hmangin an duty-na hmunah vote an thlak dawn a ni. Mipui leh Political Party te pawhin hei hi kan hriat a tul a ni. Tin, DC Office a thawk Election duty te, Team hrang hrang FST, SST, VVT, VST etc te pawhin an remchanna hmunah vote an thlak ang, amaherawhchu Election Duty Certificate an neih ngei a ngai thung.

9. Vote thlak that chungchang: Khawzawl District a awm hnua a tumkhatna atan MLA Inthlanpui 2023 buatsaih a lo ni tawh a, kha inthlanah khan tlawmngai pawl, kohhran leh chanchinbumite nena kan tanrualna chuan rah tha chhuahin kum 2018 a vote tla aiin vote za zela panga vel zetin a tla tam a. Kumin Lok Sabha Inthlanah pawh hian he kan thawhho tawhna tha tak hi chhunzawm leh turin ruahmanna hrang hrang a awm mek a. Chungte chu:

I) Deputy Commissioner, Khawzawl District hmingin voter zawng zawng te hnenah vote thlak tura ngenna lehkha pek chhuah a ni a. Vote thlak tura sawmna leh Voter Information Slip hi April ni 11-13 chhung hian BLO ten anmahni area theuhah an sem chhuak mek a ni.

II) Chanchinbu leh YMA Chanchinbu hmanga vote thlak tura inzirtirna tih chhuah tur a ni.

III) Inthlan hma Chawlhni hnuhnung berah Kohhran tinah Vote thlak tura ngenna puanchhuah ni se. Kohhran tin te hi MPF kaltlanga ngenna pek tur a ni.

IV) Inthlan hma leh Inthlannia Polling Station vil that. Intlar awm lohna (Queueless PS) siam a nih theih nan mahni veng mil zelin YMA, MPF etc ten ruahmanna siamin an bawhzui ang.

V) Vote 100 a 70 chunglam tlakna Polling Station-ah chuan a tlakna Branch YMA, MHIP leh MUP te hnenah lawmman pek tur a ni. He mi chungchangah hian NGO te nen hian meeting neih a ni a, vote a tlak that theih nan an tang hle a ni.

VI) Systematic Voters’ Education and Electoral Participation (SVEEP) hmalakna hnuaiah Khawzawl, Khawhai, Chawngtlai, Sialsuk leh Tualte-ah te Vote thlak tura inzirtirna banner tarchhuah a ni a. Motor hrang hrang-ah vote thlak tura inziritirna sticker bel a ni tawh bawk. Hei bakah hian Inthlan kaihhnawih mipui ten an hriatfiah theih nan video leh thlalak chi hrang hrang te chu Social Media kaltlanga thehdarh thin a ni.

Tin, naktuk (13.04.2024) hian Taidawnkawn Bazar leh Khawzawl Vengthar Bazar-ah te vote thlak tura inzirtirna kalpui a ni bawk ang.