Khawzawl, 22nd February 2024: Vawiin khan Khawzawl DC Meeting Hall-ah Lok Sabha Inthlanpui 2024 pualin Khawzawl, Champhai leh Saituala District Level Master Trainer te tan Training buatsaih a ni.

He hunah hian Khawzawl Bawrhsap, District Election Officer ni bawk Pu K. Lalrohlua chuan training hi khuhhawngin, kalkhawm te hmaah inlawmna thu a sawi a. Bawrhsap hian training neih fo a tul zia sawiin, kalkhawmte chu hre lo emaw thiam lo nih hreh lo turin a fuih a, thiam leh zual zawk ni turin midang te zawh hreh loh a pawimawh thu a sawi bawk.

Pu K. Lalrohlua hian training hrang hrang a lo chhim tawhnaah mahni tawnhriat theuh atanga sawihona an neih thin chu hlawk thlak bera a hriat thu a sawi a. District Level Master Trainer te chu thawhhona tha nei tura chahin, kawng engkimah inzir peih turin a fuih a. Inthlan kaihhnawih official te training an pek hunah tih sual an nei a nih pawha zam lo leh buai lova an mawhphurhna hlen turin a chah bawk a; training an pek tur te chu ruihtheihthila filhlim tura chah theuh turin DEO hian a ngen a ni.

Vawiin Training-ah hian State Level Master Trainer pathum - Pi V. Lalmuanpuii, Project Director, Khawzawl DRDO; Pi PC Zonuntluangi, Project Director, Saitual DRDO leh Pi Lalhruaitluangi, BDO Champhai RD Block ten District Level Master Trainer te hi inthlan kaihhnawih thupui hrang hrangah zirtirna an pe a ni.