Khawzawl, the 7th June, 2021:
Vawiin chawhma dar 11:00 khan District Disaster Management Authority (DDMA), Khawzawl District chu June ni 14, 2021 thlenga Lockdown kalpui dan tur ngaihtuahin DC’s Conference Hall-ah an thukhawm.
Vawiina meeting hi Pu Zothanmawia, Deputy Commissioner leh Chairman, Khawzawl DDDMA chuan a kaihruai a. Meeting-ah hian District Headquarters-a dawr leh bazar hawn chungchang ngaihtuah a ni a, karkhata nihnih – Thawhlehni leh Zirtawpni – nileng a dawr hawn chu hman chhunzawm rel niin, dawr hawn hunchhung chu tlailamah darkar khat a pawhsei nise tih a ni. Heng hun loah te chuan mahni ina dawr neite pawh inhralh leh dawr phal a ni dawn lo a. Tin, mipui pawnchhuak an tlem zawk nan bazar ni ah te chauh hian ATM a pawisa lakchhuah phal nise tia rel a ni bawk.
Khawzawl District-a phalna neia hmasawnna hnathawh kalpui mektuten an chhuah tanna VLTF atanga phalna la hmasain, hnathawhna-a hman tur bungrua leh hmanrua thiar/phurh phalsak rel a ni a. Tin, insak kalpui mekte hnathawh dan tur te, Mizoram chhung hmun dang atanga Khawzawl District-a lo zin/haw te chungchang ngaihtuah a ni bawk.
District Bawrhsap hoa DDMA meeting-ah hian Khawzawl District-a Covid-19 dinhmun thlirhona neih a ni a. Covid-19 positive enkawl lai 10 (sawm) awm mekin, Covid Care Centre atanga chhuak tawh zat hi mi 69 an ni a, Recovery rate hi 87.34% a ni. Anni bakah hian phai atanga lo haw khunghran lai mi 17 awm mekin, heng zinga mi 5 (panga) te chu TrueNat result nghak lai an ni.
Khawzawlah hian April 21 atanga vawiin thlengin Covid-19 Lockdown kengkawhin Police, Covid-19 Executive Team leh VLTF te ngawrh takin an duty a. Nimin thleng khan Covid-19 kaihhnawih dan bawhchhia mi 341 man tawh niin, an pawisa chawi tlingkhawm hi Rs. 94,800 (Cheng singkua, sangli leh zariat) a ni.
Written by H. Lalramenga, SDC, Khawzawl District
