Dated Khawzawl, the 10th  December, 2020:

Vawiin chawhnu dar 1 ah khan District Level Task Force on Covid-19, Khawzawl District (DLTF) chu Krismas leh Kumthar vuakveta duty dan tur ngaihtuahin DC’s Conference Hall, Khawzawlah an thukhawm.

Meeting hi Pu Zothanmawia, Deputy Commissioner, Khawzawl District leh DLTF Chairman ni bawkin a kaihruai a. Member-te chu Covid-19 dona kawnga thahnemngai taka an thawhnaah lawmthu a hrilh a, Khawzawl District chhungah tun thlenga tualchhunga hri inkaidarh (Local Transmission) a la awm lo chu thil lawmawm tak a nih thu a tarlang a ni.

Khawzawl Bawrhsapin a tarlan danin Khawzawl District-ah Covid-19 positive 22 an awm tawh a, an zavai hian phai atanga rawn haw, quarantine facility-a positive an ni tih hmuhchhuah vek an ni. State pawn atanga rawn haw, quarantine tawh zawng zawng chu mi 576 an ni bawk.

Khawzawl DLTF chuan boruak muanawm leh hlimawm tak hnuaia Krismas leh Kumthar vuakvet hman a nih theih nan, chhunlama No Tolerance Executive Duty bakah December ni 21 atanga January ni 3 chhung chu zanlamah Police leh YMA te duty nise tiin a rel a, hei bakah hian Magistrate leh police ten khawlai an fangkual thin dawn bawk a ni. Tin, Deputy Commissioner, Khawzawl District in halpuah, silai lem (a mu kapchhuak thei), sky lantern etc. khapna thupek a tihchhuah chu khauh taka kenkawh nise a ti bawk. 

Hunpui chhung hian Khawzawl District medical mi leh sate chu khaihlak awm lo a duty tura beisei an ni a. Covid-19 kaihhnawiha duty-te pawh loh theih loh a nih loh chuan an duty na hmun chhuahsan lo tura tih nise tiin DLTF chuan a rel bawk.  

Chairman in member te chu tha thlah lo a, khawtlang a lo him zel theih nan theihtawp chhuah chhunzawm turin a chah bawk a ni.

Written by H. Lalramenga, SDC, Khawzawl District