Khawzawl, the 3rd December, 2021:
Vawiin chawhma dar 2:00 khan Mizoram Youth Commission leh Core Team on Skill Development, Khawzawl District tangkawpin an buatsaih vawk vulh chungchang inzirtirna, “Skill Training for Piggery Farming” Pu James Lalnithanga, SDO (Sadar), Khawzawl District in KVK Training Hall, Khawzawlah a khar.
Training kharna hun, Pu Lalruatzela Renthlei, Course Co-ordinator kaihhruaiah Pu James Lalnithanga chuan thu sawiin, training hlawhtling taka buatsaih a nih theih nana tha thawhtute zawng zawng chungah lawmthu a sawi a. Vawkvulh chu eizawnna hlawk leh tangkai, hralhna lamah pawh buaina awm lo a ni tih a tarlang a. Training chhuakte chu rilru nei tak leh entawntlak ni tur khawpa vawk vulh chhunzawm a, midangte tan pawha rawn tlak leh zirtirtu ni turin a chah bawk a ni.
Pu H. Lalramenga, SDC in training kalpui dan leh hmalak zel dan tur sawifiahin trainees te hnena certificate leh stipend semna hun a kaihruai a. Dr. Philip Lawmsangzuala, Course Instructor bakah trainees zing atangin Pu K. Malsawmdawngliana ten training report pe in, Dr. Henry Saplalrinliana, Sr. Scientist & Head, Khawzawl KVK pawhin thu a sawi a. Pu K. Lalremruata, Dealing Assistant in lawmthu sawiin hun a khar a ni.
Vawkvulh inzirtirna, Skill Training for Piggery Farming hi Mizoram Youth Commission hnuaia "Livelihood Generation for returned migrant workers due to Covid-19 in the state of Mizoram" programme kaltlangin buatsaih a ni a, training buatsaihna sum hi North Eastern Council (NEC) atanga dawn a ni. Khawzawl District-ah hian District Core Team on Skill Development leh AH & Vety Department hmalaknain training hi kalpui a ni.
Khawzawl District-a vawkvulh training hi KVK Training Hall, Khawzawl Kawnzarah neih niin, District chhung khaw hrang hrang atanga mi 20 (sawmhnih) an tel a, tluang takin training hi an zo thei vek a ni. Training chhung hian stipend an dawn bakah training kharna programme-ah certificate leh vawkvulh inzirtirna thuziak an dawng theuh a, post training support atan vawkte pathum theuh an la dawng dawn bawk a ni.
Written by H. Lalramenga, SDC, Khawzawl District
