Vawiin October ni 27, 2023 Zirtawpni hian Khawzawl town leh Tuimuk hrula NH-06 kawngpuiah khawvel Geography kaihhnawiha hmun pawimawh tak mai Tropic of Cancer kalna line chu Deputy Commissioner, Khawzawl District leh Geography Association of Mizoram (GAM) thawhdunna hnuaiah zawn chhuah a ni.

Khawzawl town Tropic of Cancer in a tan tlangna lai tak hi Hermon Presbyterian Biak In kawta Bung kung awmna hnuai chiahah niin a awmna hmun diktak hi GAM ten GPS khawl hmangin an tehchhuak a, tuna BRO ten Tropic of Cancer line kalna nia an tar mekna aṭanga chhim lam hret meter 12 vela hlaah line hi a kal. Tin, Khawzawl chhehvela NH-06 kawngpuiah he Tropic of Cancer line kalna hi zawn chhunzawm leh a ni a. NH-06 kawngpui bikah chuan Neihdawn road in NH-06 kawng a pawhna bul chiah, chainage 92+ 700-ah he line hi a kaltlang tih hmuhchhuah a ni leh a, heng hmun pawimawh hmuhchhuahna laiah hian a chhinchhiahna vih phun zel a ni.

Tropic of Cancer kalna lai hmun zawn chhuah nan hian GPS khawl pali hman a ni a, a zawn hna hi GAM kaihhruaina hnuaiah neih niin Aizawl aṭangin GAM aiawhin heng mite hi an rawn thawkchhuah  - Professor Rualkhuma Colney, Associate Professor Dr. C Nunsiamliani GANC, Asst. Professor Dr. PC Lalrohlua ICFAI University, Lecturer Dr

 David B Lalhruaitluanga Govt. Public HSS. Tin, Govt. Champhai College faculty aṭangin Asst. Professor Pu C. Zirnghakngura leh Asst. Professor Cicily VL Ruatpuii te bakah Govt. Champhai College-a Geography zirlai naupang mi 23 an tel bawk. Tropic of Cancer in India rama state 8 a paltlang zingah Mizoram hi telin, Mizorama khua a paltlang tlem te zingah Khawzawl hi a tel a ni.

Khawzawla Tropic of Cancer kalna line hmuchhuak tura vawiina Deputy Commissioner Khawzawl District ngenna ngai pawimawha rawn buaipuitu leh hmuchhuaktu Geography Association of Mizoram leh Govt. Champhai College chungah Khawzawl DC chuan lawmthu a sawi a ni.