Khawzawl 7th. March, 2024 : Vawiin khan Tribal Cooperative Marketing Development Federation of India Ltd. (TRIFED) leh Khawzawl DC Office buatsaihin  Tribal Artisan Empanelment Mela (TAeM) chu Khawzawl DC Conference Hall-ah neih a ni a, hetah hian Khawzawl khawchhung atangin Self Help Group 9 leh Khawzawl khaw pawn atangin Self Help Group 9 bakah mimal engemawzatin an thil siam te an phochhuak a ni.

Tribal Artisan Empanelment Mela tan dawn hian a hawnna inkhawm tawi neih a ni a, he hun hi Additional DC Pu Lalfakzuala chuan khuallian ni a hmanpuiin District Urban Development Officer  Pu Vabeimozachhi Chozah chuan inkhawm hi a kaihruai  a. He hunah hian thu sawiin khuallian chuan, Tribal Artisan Empanelment Mela hi nikum November ni 2 a neih tum anih laiin MLA inthlan avangin a hun sawn a ni a, vawiinah neih a ni thei ta hi lawmawm a tih thu leh he Programme hi Ministry of Tribal Affairs atanga ruahman a ni tih a sawi a. 'Marketing and Logistics Development for Promotion of Tribal Products from North -Eastern Region (PTP-NER)' hnuaiah Mela hi buatsaih a nih thu leh hei hi Tribal te zinga kutthemthiamna nei te an thiamna eizawnna atana an hman theihna tura hmalakpuina tur a ni a ti a, vawiina an thil phochhuah te atang hian a endiktuten tha an tih ang te chu Guwahati-ah keng thlain PSP Committee in tha an tih chuan tam tham tak thawn thla turin an chah ang a, a Market an zawnsak dawn tih a sawi a. Vawiina an thil phochhuah zingah thei tui leh puantah a lansarh thu pawh sawiin, Khawzawl District tan puantah leh thiamhnang lama hmalak chu thil tih chi tak tur nia a hriat thu a sawi bawk.

TRIFED lam aiawhte pawhin thu sawiin TRIFED lam atanga Guidelines an neih ang zulzuiin endikna an neih tur thu leh an thil endik te chu Packaging-ah te leh thildangah duhthusam tawk lo a awm a nih pawhin harsatna a awm lo tih sawiin an duh ang a an la siam lo anih pawhin an siam theih nan Training te an buatsaih dawn tih an sawi a. Tun hi a bultanna leh a enchhinna chauh ala nih thu leh hetiang ang hun hi Khawzawlah hian an la buatsaih zel dawn tih an sawi bawk.

He hunah hian Pu Elijah LH Sanga, SDC, TAeM Nodal Officer ni bawk chuann kalkhawmte hnenah Mela kalphung leh awmzia te inhrilhfiahna hun a hmang bawk.