Khawzawl, the 27th March, 2021: 

Tukin khan District Election Office, Khawzawl buatsaihin Khawzawlah Systematic Voters’ Education and Electoral Participation (SVEEP) mini-Marathon neih a ni. 



Intlansiak hi Pu Zothanmawia, Khawzawl Bawrhsap leh District Election Officer ni bawk chuan hawngin a vailiam a, kalkhawmte chu vote nei tura inziahluh leh vote thlak ngaipawimawh theuh turin a chah. India chu democracy ram a nih angin a khat tawkin inthlan a awm thin a, India khua leh tui dik takte tan chuan vote neih leh vote thlak hi ram inrelbawlnaa tel ve theihna pawimawh tak a nih avangin a hlu hle a ni a ti. Tin, intlansiakna-a telte chu taksa hriselna ngaipawimawh a, intihsiakna awm dawnah chauh ni lo, inthlahdah lova nitin nunphunga ‘fitness’ senglut turin a chah bawk. 


Tukina SVEEP mini-Marathon ah hian mi 58 an tel a. A pumpuiah Isak Malsawmtluanga, Hermon Veng chu pakhatna niin certificate leh pawisa fai Rs. 5,000 a dawng a. Pahnihna Lalsangpuia, Vengthar in certificate leh pawisa fai Rs. 3,000 dawngin, pathumna K. Vanlalthlanawma, Dinthar Veng in certificate leh pawisa fai Rs. 2,000 a dawng a ni. Naupang kum 14 hnuailam zinga tlan thleng hmasa pathum K. Lalnunchhana, Vanlalhumhima leh Lalhmingmawia, Khawzawl Darngawn Veng vek ten pawisa fai an dawng bawk. Lawmman te hi Pu Zothanmawia, District Election Officer in a hlan a ni. 



Written by H. Lalramenga, SDC, Khawzawl District