Khawzawl, the 20th February, 2021:

Vawiin chawhma dar 10:00 khan Zaingen YMA Hall, Khawzawlah State Day, 2021 lawmna hun hman a ni a, khuallian Pu Zothanmawia, Deputy Commissioner, Khawzawl District chuan kalkhawmte chu an hnathawh ngaipawimawh a, hriatreng tlak leh midang tihhmuh tlak thiltha hnutchhiah turin a fuih.

Pu Lalrohlua, Additional Deputy Commissioner, Khawzawl District kaihhruai programme-ah hian Pu Zothanmawia chuan kalkhawmte State Day chibai a buk a. Kum 1987 a State puitlinga hlankai a nih hnuah Mizoram chuan nasa takin hma a sawn tih sawiin, zirna, lirthei, in leh lo, information technology ah te hmasawnna a langsar zual a ni a ti a. India ram chhung hmun dang leh ram pawn thlengin  kan inzarpharh a, mithiam lo chhuak thar tam zel in inelna sang zawk a hringchhuak a, chu chuan changkanna leh ram hmasawnna a thlen zel a ni a ti. 

Khawzawl Bawrhsap chuan sawi chhunzawmin, Khawzawl District chhung hmun hrang hrangah inkalpawhna kawngpui laih leh siamthat mek a ni a, zawh fel a nih hunah chuan mipuite tan a chhawrnahawm hle dawn a ni a ti a. Vankal ah 20MW pechhuak thei Solar Power Plant bun mek pawh tluang tak a kalpui a nih thu a sawi bawk. 

Pu Zothanmawia chuan kalkhawm zinga sawrkar hnathawkte chu an hna ngaipawhmawh turin a fuih a. Sawrkar atanga hnathawhna tur pawisa lo kalte pawh a nihna tur anga tangkai taka hmang a, a hun taka thil ti thin turin a chah a ni. State Day lawm tura kalkhawmte chu Mizoram hmasawnna hrang hrang a taka chentu kan ni a, a kal zelna turah pawh mimal tinin dinhmun pawimawh tak kan chelh a, tangkai taka mahni awmna hmunah theuh thawk zel tur kan ni a ti bawk. 

Dr. Saithangpuia, Block Development Officer, Khawzawl RD Block chuan State Day hman chhan leh pawimawhna sawiin, politics, sakhuana, eizawnna kawngah te mahni a ro inrel tak tak turin State puitling nih a pawimawh hle tih a sawi a. State dinhmun chu harsa taka sualchhuah niin, India danpui Article 371G hnuaiah kan identity humhalhna atan special provision pawimawh tak kan neih theih phah a ni a ti.

Khawzawla State Day lawmna programme-ah hian Khawzawl chhunga Head of Office te, MJA, Joint VC, YMA, MHIP, MUP leh political party aiawhte an tel a. Captain John Zonunmawia, Commanding Officer, Khawzawl CO Bial in hunserh hmangin, Pu R. Lalrintluanga, Principal, Govt. Khawzawl College in Vote of Thanks a sawi a. Zaithiamten kalkhawmte awiin, 2nd IR Battalion pipe band in National Anthem an tum bawk a ni. 


Written by H. Lalramenga, SDC, Khawzawl District