Khawzawl 15^th March, 2022 : Vawiin chawhnu dar 2:00 khan Planning & Programme Implementation Department bultumin Khawzawl District chhunga VC te leh Khawzawl khawpui chhunga Sawrkar Department hotute leh NGO hrang hrang hruaitute tan Sustainable Development Goals (SDG) chungchang inhrilhhriatna buatsaih a ni a, he hun hi D.C. Pu C.C. Lalchhuangkima chuan khuallian niin a hmanpui a ni.

Khuallian D.C. chuan SDG hi 2015 khan U.N. General Assembly in kum 2030 a khawvel awm dan tura duhthu a sam a ni a ti a. SDG hi hlawm lian deuh deuh chi 17-ah then niin a thil tum hrang hrang zingah hian rethei awm tawh lohna, riltam awm tawh lohna, hriselna chungchangah inenkawlna tha thei ang ber an dawnna turte, zirna duhthusam an dawn theihna turte, hmeichhia leh mipa intluktlanna te,tui thianghlim in turte, Clean Energy siam chhuah te a tel a ni a ti a. India Sawrkar pawhin kum 2030-ah hetiang dinhmun a thlen ve theihna tur hian hma a la ve char char tih sawiin Mizoram-ah pawh Planning & Programme Implementation Department chu hmala tura tih a ni tih a sawi a. Mizoram Sawrkar pawhin SDG ti hlawhtling thei tur hian theihtawp a hmalain Sawrkar Department hrang hrangte pawh hmachhawp a siamsak a. Heng bakah hian khawtlangah VC leh YMA ang te pawhin tih tur kan nei a, kan awmna hmuun theuhah kan tih tur angte leh kan mawhphurhna te kan hlen chhuah a tul a. Hemi ti thei tur hian Workshop hi buatsaih a ni tih a sawi.

Vawiin Workshop-ah hian Planning & Programme Implementation Department atanga mithiam lo kal - Pu Isaac Lalmuanpuia Chuaungo, Economist-cum-Under Secretary leh Pu R. Lalfakzuala, Research Officer ten SDGs chungchanga hriat tur pawimawh hrang hrang inhrilhhriatna an nei a. Zawhna leh chhanna hun te buatsaih a ni bawk.