Khawzawl the 30th July, 2021
Tukin khan Pu Zothanmawia, Deputy Commissioner, Khawzawl District ruahmannain Khawzawl Road Protection Squad chuan ke in Khawzawl khawchhung kawngpui dung an fang a, kawngpui nekchep leh tichhe thei zawnga hmalakna awm theite endikin, chutiang titute chu senghawi tura hriattirna pek an ni.
Kawngpui endik hi zing dar 6:30 ah Khawzawl Vengthar atanga tan niin, Khawzawl khawchhunga National Highway No. 6 in a paltlang zinga veng pahnih – Vengthar leh Kawnzar vengchhung kawngpui dung endik a ni a. Road Protection Squad te hi Village Council leh YMA hruaituten an area chin theuhah an lo tawiawm bawk a ni.
Tukina Road Protection Squad in kawngpui dung an fanna ah hian vantlang leh kawngpui tana hnawk leh kawngpui tihmelhem zawnga chet lakna awm te, kawngpui tichep zawnga hnawk siam hrang hrangte an endik a. Ngaimawhawm chin mi 10 (sawm) hnenah senghawi tur leh chhunzawm lo turin a hmunah hrilh nghal niin, CrPC 133 hnuaiah lehkha pek zel an ni bawk.
Khawzawl khawchhung kawngpui endik hi nikum lam atangin a khat tawka kalpui a ni a. A thawhhnihna-ah hian Khawzawl khawpui chhung kawng langsar zual (Main Road) chin te endik phawt niin, kawng langsar lo zawk te pawh a tul leh remchan dan ang zelin endik chhunzawm a ni dawn a ni.
Tukina kawngpui endik hi Pu James Lalnithanga, SDO(S) & Convener, Khawzawl Road Protection Squad chuan kaihhruaiin, DC office leh police bakah PWD, P&E, PHE Department aiawhte leh khawtlang hruaitute an tel a ni.
Written by H. Lalramenga, SDC, Khawzawl District
