Khawzawl the 15th July, 2021
Tukin khan Pu Zothanmawia, Deputy Commissioner, Khawzawl District ruahmannain Khawzawl Road Protection Squad chuan ke in Khawzawl khawchhung kawngpui dung an fang a, kawngpui nekchep leh tichhe thei zawnga hmalakna awm theite endikin, senghawi tura hriattirna pek an ni.
Kawngpui endik hi zing dar 6:30 ah Zaingen YMA Hall kawt atanga tan niin, Khawzawl khawchhunga veng pali Zaingen, Zuchhip, Dinthar leh Electric Veng kawngpui dungte endik a ni a. Road Protection Squad te hi Village Council leh YMA hruaituten an area chin theuhah an lo tawiawm bawk a ni.
Pu H Lalramenga, SDC & Member Secretary, Road Protection Squad, Khawzawl in a tarlan danin Road Protection Squad hian vantlang leh kawngpui tana hnawk leh kawngpui tihmelhem zawnga chet lakna awm te, kawngpui tichep zawnga hnawmhnawk siam hrang hrangte an endik a. Ngaimawhawm chin mi 16 (sawmparuk) te hnenah senghawi tur leh chhunzawm lo turin a hmunah hrilh nghal niin, lehkha pek zel an ni bawk.
Khawzawl khawchhung kawngpui endik hi nikum lam atangin a khat tawka kalpui niin, Khawzawl khawpui chhung kawng langsar zual (Main road) chin bakah, kawng langsar lo zawk te pawh a tul leh remchan dan ang zelin endik chhunzawm a ni ang.
Written by H. Lalramenga, SDC, Khawzawl District
