Khawzawl, the 26th January, 2022:

Tukin dar 7:30 khan Khawzawl-ah India Republic Day vawi - 73 na lawm a ni a, Pu C.C. Lalchhuangkima, Deputy Commissioner, Khawzawl District chu khuallian niin hnam puanzar a pawtparh a, 2nd IR Battalion ten hnam puanzar chibai an buk chu chhangletin, kum 2021 a UD&PA Department in fai intihsiak a buatsaih a lawmman dawngtute hnenah lawmman a hlan a ni.



 

Republic Day-ah hian zing ni chhuah rualin Khawzawl District chhunga sawrkar Pisa hrang hrangah India Hnam Puanzar zar a ni a. A lawmna pui ber hi DC Office kawt zawl, Khawzawl Darngawn-ah Khawzawl-a head of office te, Cleanliness Competition a lawmman dawngtute leh press mite nen neih a ni. Khuallian Pu C.C. Lalchhuangkima chuan Khawzawl District mipuite chu Republic Day chibai bukin, India ramin zalenna a neih theih nana nasa taka lo beitute Mahatma Gandhi leh midangte hre rengin zahna chibai a buk bawk a. Constitution tha leh hman tlak duang chhuak tute pawh zahna chibai a buk thar bawk a ni.

 

Khawzawl DC chuan Covid-19 hrilengin hmasawnna hnathawh a tithuanawp chunga kum hnih leh a chanve chhunga sawrkar office hrang hrangte dinhmun leh hmasawnna hnathawhte a tarlang a ni. 

 

Superintendent of Police in kum 2021 chhungin regular case 37 an ziak lut a; dan lova phurh Kuhva bag 4195, cheng 7,80,17,000/-(vaibelchhe 7, nuai sawmriat singkhat leh sangsarih) man chu Khawzawl Police ten an man tawh a ni. Heng bakah Heroin(no.4) cheng Rs. 5,70,000(nuai 5 sing 7) man hu leh local zu leh Burma Zu(BEDC), Rs. 89000/-(sing 8, sang 9) man hu an man bawk.

Public Works Department in District chhunga inkalpawhna kawng pawimawh tak tak pathum, km 34.201 a sei laih hna an thawk zo tawh a, hnathawh mek engemawzat an nei bawk. Horticulture Department hmalaknain Tualte ah tomato sauce siamna khawl chu bialtu MLA ruahmannain bun a ni tawh a. Mission for Integrated Development of Horticulture (MIDH) hnuaiah thei leh thlai chi leh tiak te pekchhuah thin a ni. P&E Department hmalaknain Khawzawl to E. Lungdar 33 Kv to 132 KV Line siam that leh Vankal Solar Park atana 132 KV Double Circuit line, Km 3 a sei siam te chu zawh tawh a ni. 

Rural Development Department hnuaiah January thla thleng hian ni 93 inhlawhna siam tawh a ni. Ni 100 inhlawh tlin ngei tumin hma lak mek a ni; SPMRM hnuaiah Agriculture link road, retaining wall leh village internal road te siam a ni bawk. UD&PA Department hnuaiah mi 120 in beauty therapist, puanthui leh juice processing technician ah te training nei tawhin, PMAY- Housing for All hnuaiah beneficiary 2072 an awm tawh a ni. Heng bakah hian Mualvawm Field ah Artificial Turf phah leh Pavilion sak a ni a, Cheng nuai 700 senna tur Auditorium pawh PWD Tlangah sak theih tep a ni tawh. Hmachhawp awm mek zingah nuai 500 senna tur Khawzawl Multipurpose Hall, Zuchhip leh Electric Venga Basketball court siam te a tel a ni.

District Hospital, Khawzawl ah PSA Oxygen plant 250 LPM dah a ni a, khum 21 ah Oxygen hman theih tura siam fel tawh a ni. BSNU (naute damlo enkawlna tur) building leh CMO office sak hna thawh mek a ni a bawk. Covid 19 hrileng dotu bulpui ber an ni a. Jan 20, 2022 thlengin mi 11689 vaccine pek tawh niin 1st dose mi 10873 in an la tawh a, 2nd dose mi 8690 in la tawh bawk. Kum 18 hnuailam (kum 15-17) te hnenah Covaxin pek mek niin, mi 1031 beneficiaries zingah mi 701 (68%) ten vaccine an la tawh a ni. 

FOCUS in “One Crop One Village” kalpuiin balhla tiak 4980, lakhuihthei tiak 124500, Balhla bul 11450 leh Dragon fruit phun tur 180000 sem tawh a ni. ei chunglang kuang ral tur ven nan leh tui hna humhalh a nih theih nan khaw 20 ah checkdam 20 lai tha taka siam a ni a. District chhunga hmun 26 ah tui khawlna tanky leh tui luanna tha tak sak a ni bawk.

DC Office hmalakna hrang hrang zingah offline leh e-district kaltlangin certificate hrang hrang pekchhuah thin a ni a. State Disaster Response Fund atangin chhiatrupna thleng thinah chhawmdawlna Rs. 98,23,814 (cheng nuai sawmkua pariat, sing hnih sangthum zariat leh sawmpali) semchhuah a ni tawh. National Highway No. 6 thuamthatna tura sawrkar laipui tana ram lak hna kalpui mekah kum 2020 atangin ram hectare 119.28 lak tawh a ni a, hemi atan hian compensation cheng vaibelchhe 93 chuang (₹93,49,95,473) ruahman a ni. Tin, Mizorama a hmasa ber ni turin solar cold storage tur chu KVK compound ah dah fel a ni a, metric ton 10 lai dawng thei tura ruahman a ni. DC Office Complex thar tur pawh chak taka sak mek a ni bawk. 

Vawiin Republic Day lawmna-ah hian Faina Hapta 2020 puala faina intihsiakna lawmman chu Khuallian in a sem nghal a. Category hrang hranga lawmman dawngtute chu a hnuaia tarlan ang hi a ni:


Khawzawl Town chhunga veng fai:

1. Dinthar 

2. Electric

3. Hermon 

 

Zirna in fai ber: Government Middle School

 

Office/Sawrkar Pisa ber:  Office of District Education Officer

 

Hospital & Sub-Centre fai ber: District Hospital Khawzawl

 

Hotel/Restaurant fai ber: Hahdamna Hotel, Vengthar

 

Bazar fai ber:  Vengthar Bazar

 

 

Written by H. Lalramenga, SDC, Khawzawl District