Khawzawl 22nd. June, 2022 : Vawiin chhun dar 12:30 khan Khawzawl District Bawrhsap Pu C.C. Lalchhuangkima hovin DC Conference Hall-ah tun thla ni 30 a Remna Ni lo thleng tur Khawzawl a lawm dan tur ngaihtuahin Meeting neih a ni a, hetah hian Khawzawl khawpui chhunga Sawrkar Department Head of Office te, NGO leh Political Party aiawhte, Joint VC hruaitute leh MJA aiawhte an tel a ni.

He hunah hian Khawzawl District Bawrhsap Pu CC. Lalchhuangkima chuan COVID-19 vanga kum hmasa lamah te Remna Ni hi mumal taka hman theih a nih loh thu leh kumina Remna Ni lawmna neih tur chu Khawzawl District Function a nih hnua Remna Ni hmanna hmasa ber a ni dawn tih a sawi a. Kumin Remna Ni hi Bialtu MLA, Dy. CM ni bawk Pu Tawnluia'n a rawn hmanpui dawn tih tarlangin Remna Ni chu Official ta a ni lo, mipuite ta a ni a ti bawk.

He hunah hian Remna Ni lawmna neih dan tur Programme duan niin Remna Ni lawmna hi tun thla ni 30-ah Zaingen YMA Hall-ah neih a ni ang a, Bialtu MLA Pu Tawnluia chu khuallian niin DC Pu CC. Lalchhuangkima chu Chairman a ni dawn a. He hunah hian Sawrkar hnathawkte, NGO leh Party aiawhte, Joint VC hruaitute, Kohhran aiawhte, KHSS a Class XII zirlaite, Martar chhungte, Ex-MNA te leh sawm bik te tel tura ruahman a ni.